Bahan Sermon Minggu 20 Juni 2021
Evangelium : 2 korint 6:1-10
Topik : PANGHOBASION NA GABE HOLONG
Minggu 3 Dung Trinitatis
I. Patujolo
Sian angka huria na hinobasan ni Apostel Paulus, huria Korintus on ma na tung mansai godang diparungkilhon ibana. Di huria on do masa angka parbolatan jala adong dihuria i angka kelompok na marbingkas sian pangalaho dohot parrohaon na gabe patubu parbolatan. Alani angka masalah na masa di huria Korint on umbahen digoar surat togosan on songon surat arsak ni roha, nang pe di ujungna monang do Hata ni Debata di huria i. Diarsakhon Apostel Paulus do parrohaon ni deba halak na girgir mangalului hasangapon ni dirina sandiri jala na mangarajumi dirina sumurung sian halak na asing. Adong sian tongatonga ni halak Korint na meragukan tohonan haapostelon ni si Paulus na mandok na so sian Debata dijalo ibana tohonanna i. Alani angka na masa di huria i gabe ditongoshon ma surat Korint on di bagasan arsak ni roha.
II. Hatorangan
• Tung dihaporseai jala diondolhon Apostel Paulus do paboa ganup halak na porsea manjalo asi ni roha ni Debata. Alai alani halembaon dohot halangguson ni jolma i gabe jotjot do magopo asi ni roha ni Debata na jinalona marhite na madabu jolma i tu angka pangalaho dohot parulaon na gabe partuktuhan dohot hasurahan. Tarlumobi ma molo diadopi jolma i angka ragam ni hasusaan dohot parungkilon songon na nialaman ni Apostel i. Dipajojor ibana do di suratna on angka na ni alamanna songon naposo ni Debata. Angka on ma parungkilon ni Apostel Paulus songon na dipajojorna di 2 Kor.11:23-27: mangadopi renge ni ulaon, linsinglinsing, mangadopi parmaraan hamatean, tolu hali hona lasak, didangguri dohot batu, harom parauna di laut tolu hali jala mumbangmumbang di tonga ni laut sadari saborngin, mangadopi parmaraan di bagasan pardalanan di na mamolus batang aek, marmara dibahen panamun, marmara dibahen dongan sabutuha, sian angka parbegu, marmara di huta, halongonan dohot laut. Jotjot do Apostel Paulus pola ingkon mangkar mata, mauas male, songon i nang manaon ngali ni ari dohot hurangan ulos. Manahan jala monang do Apostel i mangadopi angka ragam ni hasusaan dohot parmaraan i alani pandonganion dohot pangurupion ni Debata
• Disosohon Apostel Paulus do disuratna asa ungkap dohot rade huria i laho manumpahi ulaon marbarita nauli dohot mangurupi huria na di Jerusalem. Marningot balga ni asi ni roha ni Debata tama do halak Kristen ingkon mandok mauliate tu Debata. Songon tanda ni naung manjalo asi ni roha Debata adong do tolu hal dipangido ibana na ingkon patupaon ni huria Korint i ma: Parjolo, asa marhabuason mangalehon, Paduahon, asa sian ungkap ni roha ma marsilehonlehon dohot manumpahi ulaon pangurupion tu dongan, Patoluhon, naeng ma marlambas ni roha mangadopi ragam ni na masa na tupa mambahen marungkil hita. Pangalaho na tolu on ma naeng dihangoluhon halak naung tangkas mananda jala naung manjalo asi ni roha dohot basabasa ni Debata. Sipasidingon do roha na mangingking jala na bangkol manang na terpaksa mangulahon na patutu dipatupaon, naeng ma sian roha na ungkap dohot las ni roha.
III. Panimpul
• Dapot do Sitiruon hangoluan ni Apostel Paulus na pataridahon lambas ni rohana patuduhon hatotoras ni haporseaon dohot kualitas ni ngolu partondion na mampu mengampuni dongan di hahurangan dohot hasalaanna so pola madabu tu bagasan dosa dohot hajahaton. Halak na tang marhaporseaon ndang muramura madabu tu sikap mandele, terpancing emosi, ndang muramura manguhumi dongan alai mampu mengendalikan diri dohot marhabengeton di ragam ni situasi dohot angka na masa. Jala hombar tu tema minggunta sadarion, lumobi angka parhalado partohonan dohot na so partohonan naeng tongtong marhalambason ni roha laho melayani angka ruasna. Tontu godang situtu do angka hamaolon nang parsoalan na ro tu angka pangula ni huria si tonga ni huria i songon na nialaman ni Apostel Paulus. Amen
Post a Comment