HALAK NA SINTONG DI ADOPAN NI DEBATA - Mundosaragi

Minggu, 22 Agustus 2021 (12 Dung Trinitatis)

Epistel : Rom 12:17-21

                            



I. Patujolo

    Dungkon ojak huria na parjolo ( Gereja mula-mula ), boi dohonon tung mansai godang do parungkilon na di bolus angka sisean ni Tuhan Jesus, angka Apostel nang halak Kristen naung mangalaheon dirina gabe siihuthon Kristus ( Kristen). Na tumangkas parungkilon na diadopi huria na parjolo i ima dimasa ni harajaon Rom ( Romawi) adi abad I, mulai ma i uju Kaesar Nero manggomgomi Rom ( thn 64 M), di fitnah raja i do halak Kristen marhite hata provokasi na mandok naung ditutung halak Kristen huta Rom, hape ibana sandiri do na mangulahonsa (manutung), alai halak Kristen ma di tudu asa sogo roha ni halak Rom tu nasa halak na targoar Kristen hatihai. Masa do muse pangaleleion (penganiayaan) tu halak Kristen di zaman ni Kaesar Dominitianus ( 95 M). Dung gabe Konstantin manggomgomi Rom ( 312 M), mansohot ma pangaleleon tu halak Kristen jala denggan ma di jalo halak Kristen di huta Rom. Mansai singkor do halak Kristen ujui alani i gabe godang na mabiar patuduhon dirina songon halak Kristen, adong na gabe mundur sian hakristenon. Mayoritas do pangisi ni huta Rom tarlumobi angka Kaesar marsogo ni roha (membenci) halak Kristen, ai dang olo hatihai halak Kristen marsomba tu Raja. Alani i margantisoring do hatihai habegean barita na paboahon halak Kristen naung hona tangkup, hona hurung jala di paporsuk-porsuk. Alani i ma didok roha ni Apostel Paulus porlu padasiphon haporseaon ni halak Kristen hatihai, ditongos ma suratna on na mangondolhon asa ingkon tarida do hadirion nasida songon si ihuthon Kristus molo tung adong pe angka namasa tahop tu nasida, ima halak Kristen naung pinillit, pinapulik ni Debata, naung manjalo basa-basa haluaon dohot hangoluan. Dipaingot apestel paulus do nasida asa unang holan manghaholongi halak na manghaholongi nasida, baliksa ingkon mampu manghaholongi dohot patupahon na denggan tu jolma na mambahen na jahat maradophon nasida, unang adong na manimpan dendam, ima parbue ni haporseaon jala tanda haserepon ni roha ni angka halak naung pinalua ni Kristus. Mambahen na denggan tu musu, ima ciri-ciri ni halak na sintong di adopan ni Debata.



II. Hatorangan

Sian judul ni surat on, tangkas ma botoonta ia hasahatanna ima halak Kristen na adong di huta Rom na tongon marungkil siala hansit ni pambahenan na pinatupa ni halak Rom tu nasida nang sian Kaesar na mangkorhon gabe tubu parsoalan (konflik) di tonga-tonga ni halak Kristen na disi. Ditongos apostel Paulus do suratna on paingothon halak Kristen na di huta Rom asa diboto marpangalaho na denggan tung pe songoni hansitna pambahenan ni halak tu nasida, ingkon sai tongtong do nasida burju tu halak Rom ima namambahen sogoni roha nasida i, termasuk ingkon unduk do nasida tu ganup panggomgomi na marsahala ( Rom 13:1). Dipatorang apostel i do, aha jala songon dia do hakristenon nang ngolu ni halak Kristen ( hidup kristiani).

Dang apostel i pajongjong ia huria na di Rom. Mungkin huria i dipajongjong halak Makedonia naung manjalo Kristus marhite pelayanan ni apostel Paulus, manang dipajongjong halak Jahudi naung marhamubaon ni roha (bertobat) di tingki ari Pentakosta ( Ul.Ap.2:10). Tangkas do dipaboa ibana di suratna on paboa naung piga-piga hali ibana marsangkap naeng ro mandapothon halak Rom, alai sai sundat do i hinorhon ni angka halangan na ro tu ibana sian angka pamarenta, termasuk faktor politik ( Rom 1:13-15, 15:22). Mansai sihol situtu do rohana didok tu nasida jala ditahi rohana do ingkon ro ibana mamboan barita nauli tu huta Rom ( 15:22-23). Ditongos ibana surat on menjelang perjalanan misioner III ( 15:25-26, Ul.Ap. 20:2-3, 1 Kor. 16:5-6), jala di huta Korint do ibana hatihai ima di bagas ni si Gayus ( Rom 16:23).


    Mansai ragam do disoroti apostel Paulus di ganup suratna taringot tu kehidupan praktis, di huria nang di masyarakat pe, alai otik do i dapot di surat na tu halak Rom on, na gumodang angka hal-hal praktis dipabotohon ibana di angka surat parmahanion na na asing i. Anggo surat na tu halak Rom on boi dohonon mangondolhon (menegaskan) dasar-dasar teologis tu huria i asa unang rumar haporseaon nang pardagingon nasida, alai ingkon pelean na badia na so marlaok do pamatang nasida ( Rom 12:1-2). Dapot roha ni apostel i do na sai jotjot huria i mangadopi hamaolon manang parungkilon (ancaman) na ro sian luar, jala mungkin adong muse parsoalan na tubu di internal nasida, selisih paham ala ni angka pangantusion na marasing, dungkon ni i muse boi do masa sala pangantusion (penafsiran) tu ajaran ni Kristus ala ni angka parpoda haliluon na boi gabe pamasahon parbolat-bolatan di huria i, adong na marsisogoan roha, marsihosoman. Didok roha ni apostel i ia pangaramotion (proteksi) na dumenggan mangadopi angka nasa hajahaton ima ngolu na mian dibagasan haporseaon na sintong.



Nangkin didok dang hasil na porlu di hita, alai haoloon tu hata ni Tuhan i do. Di uduti muse mandok “intap ni na tolap hamu”. Lapatanna unang ala dang olo jolma i mardame tu hita gabe ta burai manang gabe pinatubu bada. Tanggapan (respon) orang lain (musuh) dang boi gabe pasuruthon (mangintopi) holong ni rohanta nang patupahon na denggan. Adong do deba halak na na mandok ay.17-19 di turpukta on sebagai kelemahan jala kompromi maradophon ketidakadilan manang pembiaran tu kejahatan molo sai holan dame nihataan. Isarana, sogo do nean roha mida pangalaho ni jolma na sai olo manutung gareja di piga-piga luat, na sai olo paroa-roahon halak Kristen marhite angka orasi di lapangan nang di media, molo sian pardagingon nga tama ingkon hehe hita halak Kristen marporang angka i sude. Alai mangihuthon jamita on, dang pamaloson porang hape siulahononta, alai pamaloson marhite holong do, marhite ulaon parasinirohaon. Jala terbukti do i, lam diambati pe hakristenon i songon di negaranta on, nang pe so hita na marlulu (membalas) marhite kekerasan, dang hasundatan anggo barita nauli i lam mangerbang di bangsonta on. Ima pamaloson sian Tuhan. Jadi pajongjong keadilan (hasintongan) songon na di rohanta i dang pola sai holan marhite ulaon balas dendam, boi do lam nal nal hasintongan i molo siula na denggan hita jala tongtong dame rohanta di jolo ni halak saluhutna. Tugasta didok apostel Paulus pasahathon rimasta i tu Debata (ay.19). Biarlah Allah yang berperang, yang bertindak kepada setiap orang yang berlaku semena-mena, yang berlaku tidak adil kepada kita ( 5 Musa 32:35).

Memang molo ni pingkiran tung suhar situtu hata ni apostel Paulus on tu ngolu pardagingonta. Alai marhite turpuk on apostel Paulus naeng pahothon hadirionta halak Kristen asa talup gabe halak na sintong di adopan ni Debata, na rade mangulahon hataNa, “ingkon songon parrohaon ni Kristus Jesus do parrohaonmuna..” ( Fil.2:5-6). Molo dang dibagasan holong hita laho pajongjong hasintongan (keadilan), boi do gabe ketidakadilan manang porang na lam bidang tubu, alana olo do ala ni pamaloson i gabe tubu na humansit sian hajahaton na parjolo naeng binalosna i hian. Sai dirimpu deba halak do ia pamaloson i gabe ubat ni rohana, hape dang diboto ubat na dirohana pamalumhon i boi gabe parohon efek samping, gabe tubu muse sahit na imbaru, na humansit sian sahit na parjolo. Ima molo hajolmaon, ngolu pardagingon. I do umbahen didok apostel paulus : “ jumpa male musu, lehonon ibana mangan; jumpa mauas ibana, painum” ( ay.20a). Pandohan on mandok tu hita asa hatop hita mardame parjolo tu dirinta sandiri (berdamai dengan diri sendiri) uju adong mamusui hita. Molo so boi dope hita mardame tu dirinta, sada ulaon na maol do mangalehon mangan dohot minum musunta.

Didok do mambahen na denggan balos ni na jahat tarsongon ‘na pagukgukhon gara do tu atas uluna’ (ay.20.b). Jala andorang so turpuk on dope nunga didok apostel paulus : “ pasu-pasu hamu ma angka na paburu-buru hamu; pasu-pasu ma antong, unang burai” ( Rom 12:14). Molo didok “songon na pagukgukhon gara” sasintongna nunga sada bentuk hukuman i laho menyadarhon jolma i ( poda 25:22). Lapatanna maila sandiri do musunta i molo sai dihasogohon hita hape sai tapatupa na denggan tu ibana, jala ni onjar ni ila (rasa malu) ujungna olo gabe tarjolma (tersadar) ibana di pambahennai. ‘Pagukgukhon gara’ (api) di anet apostel Paulus do i sian ulaon na pinatupa ni Jahowa di padan na robi maradophon angka halak na so olo tumangihon hataNa, ‘pagukgukhon gara’(api) didok ma i songon penghukuman Ilahi ( 2 Sam 22:9,13; Job.41:20-21, Pslm 18:9, 13, Poda 6:27-29). Jadi pandohan ‘pagukgukhon gara’ boi do marlapatan mamboan angka jolma na sai mian dibagasan hosom, dendam, rimas tu panguhuman ni Jahowa. Ketika kita menahan diri terhadap pembalasan, berarti kita telah memberi ruang bagi murka Allah. Taulahon ma ulaonta ima patupahon hadameon, patupahon na denggan tu saluhut halak, jala Debata ma patupahon ulaonna ima pamaloson. Molo tapatupa i berarti nga unduk jala satia hita tu hata ni Debata, jala martua do ganup halak na mamep hata ni Debata. Halak Kristen tung naso jadi do ditaluhon hajahaton manang olo terpengaruh dibahen hajahaton manang terbawa arus hita gabe dohot mangulahon hajahaton marhite pamaloson. Tarjou do hita gabe sira dohot panondang ( mat.5:13-16). Halak naung gabe sira dohot panondang ingkon mangantusi laho mangalo hajahaton dang marhite hajahaton, alai mangalo hajahaton marhite na denggan.

III. Panimpuli

    Denggan jala dihalomohon Debata do molo radot hita di hataNa. Alai bidang do pangabahan ni hata na mandok “mangaradoti hata ni Debata”. Mangaradoti hata ni Debata ndang marastuan holan tu diri ni iba sandiri, alai dohot do maradophon dongan jolma nang maradophon musunta. Adong do jolma mangantusi bahwa ketaatan kepada firman Allah hanya ditunjukkan melalui hal-hal yang lahiriah dan seremonial , isarana : ro tu parmingguan, partangiang, olo pasahat pelean, pardongan, dohot na asing dope. Memang na denggan do i, alai adong dope di igil Debata sian hita marhite turpuk on, ima asa gabe halak na sintong hita diadopanNa. Boha do asa gabe halak na sintong hita di adopan ni Debata, ima ingkon boi hita mardame tu dirinta sandiri, ingkon olo manesa dosa ni donganna (mengampuni orang lain). Mengampuni orang lain bukan berarti melupakan peristiwa yang pernah terjadi di masa lalu, mengampuni adalah ketika kita bisa melepaskan diri kita dari hal-hal menyakitkan akibat peristiwa masa lalu yang mengganggu hubungan kita dengan orang lain di masa kini. Halak na sintong do hita di adopan ni Debata molo tabahen na denggan balos ni na jahat, dame balos hosom. Unang ma baloshon hamu na jat alo ni na jat, panginsahion alo ni panginsahion; lam mamasumasu ma hamu, ai naeng teanonmuna do pasupasu, umbahen na tarjou hamu (1 Petrus 3:9). Amen