Evangelium : Markus 8:31-38
MARBISUK DIBAGASAN JESUS
Sibonsiri
Molo hita pamanat do perkembangan zaman digital sinuaeng on, nungga tung godang referensi ni angka ruas ni huria laho mangalului angka jamita laho si pamananthononna di bagasan ngoluna. Rumbang mai muse tu parjamita favoritna. Sian angka parjamita i dohot jamita nanijamitahonna, adong deba sian parlawahan dipasahat, na debanari sian ondolan ni tafsiran namambahen tung mansai “serius” jamita i dipasahat. Sian on botoonta namarragam do tahe angka faktor pendukung laho pasahathon angka jamita i tu angka ruas ni huria i. Bahkan ruasni huria i pe marragam do tong, baik sian pola pikirna, latar balakang ni parngoluonna, dohot angka pergumulanni ngolu nanialamanna be laho manjanghon angka jamita i. Di angka jamita dohot angka parjamita namarragam i, porlu situtu do tahe pangantusion ni ruas i laho manghangoluhon jamita i di bagasan ngoluna. Dibahen i, ndang holan sebatas tabo begeon jamita i, manang ndang alani parjamita favoritta. Bahkan ndang holan sebatas cocok manang so cocok jamita i hombar tu parungkilonna, alai songon diama jamita i boi hona tu parngoluon ni hita jolma marhite angka alusta. Alusni hita angka naporsea do nagabe ondolan ni hita laho mangalapati jamita i. Attar songon diama alustai, betama hita paihutihut hatorangan ni turpuk on.
Hatorangan
Di ginjang ni turpuk on didok taringot tu sungkun-sungkun ni Tuhan Jesus namandok “Ise do Ahu, didok halak?”. Marragam do alusni angka siseani, alai sumurung ma alusni si Simon Petrus, namandok “Kristus i do Ho!” (bnd. 27-29). Jala molo hita bandinghon muse tu isi ni Injil Matius 16: 17, didok Tuhan Jesus do muse laho mangalusi si Simon Petrus, “Martua do ho, Simon, anak ni si Jona, ai ndada daging dohot mudar papatarhon i tu ho, Damang na di banua ginjang i do.” Di son boi ma botoonta, ia alusni si Simon Petrus ndang murni haruar sian parbinotoonna mananda Tuhan Jesus. Adong do sintong ni on. Molo hita uduti ma muse manjaha turpuk on, maralo do muse Tuhan Jesus dohot si Simon Petrus, ia dung dipatorang Tuhan Jesus taringot tu parungkilonna laho paluahon angka sipardosa. Tung mansai disolsoli si Petrus do pandohan ni Tuhan Jesus, hape baru dope dialusi ibana na Kristus do Tuhan Jesus, ima Mesias (Jesus Sipalua). Umbahen i, gabe martolak belakang do pandohan ni Tuhan Jesus tu si Petrus sian na parjolo i namandok, “Martua do ho, Simon, anak ni si Jona, ai ndada daging dohot mudar papatarhon i tu ho, Damang na di banua ginjang i do.” Dungi gabe, “Laho ma ne ho, bolis, sian lambungkon; ai ndang na diparrohahon ho na di Debata, angka na di jolma do.” Dibahen i, naporlu sipamanathononta nuaeng di turpuk on, ima hadirion ni si Simon Petrus namananda Jesus. Sian angka jamita ni Jesus dohot angka halongangan napinatupNa, mangihut muse dipandohan ni ibana namandok, “Kristus i do Ho!”. Ise do Jesus, di dirini si Simon Petrus.
Simon Petrus dohot anggina Andreas ima halak nelayan. Alai laos sian ulaonna sebagai nelayan i do dijou Tuhan Jesus nasida gabe siseanna, huhut didok, “Ihuthon hamu Ahu; bahenonku do hamu sijala jolma!” (bnd. Markus 1:17). Boima botoonta, molo Simon Petrus ima sahalak rakyat biasa do. Bahkan molo diukur sian jenjang sosial, tung mansai dao do ditoruni rata-rata parngoluan ni si Simon Petrus mangihut ma muse dohot angka siseanNa na asing marimbanghon dohot angka jolma na asing. Namungkin sahali boi dope dipillit Jesus angka nadeba ima angka najenjang sosialna lebih timbo, ai nungga masa atihai angka parsingkolaan dohot angka pangkat ni ulaon. Alai, paula so taboto majo maksud ni Tuhan Jesus dipamillitan on. Alai napasti, namarsengaja do Tuhan Jesus mamillit angka siseanNa on. Udutna ma annon pinatorang. Ia si Simon Petrus dipillit Jesus do gabe uluan (ketua) ni angka sisean laho manguduti panghobasionNa (bnd. Yohanes 21-15-16). Lumobi, didok Tuhan Jesus do muse tu si Simon Petrus, “Si Petrus (Batu mamak) do ho, jala di atas batu mamak ondeng do paojahonku huriangku, jala na so tupa talu i bahenon ni angka harbangan ni banua toru.” (bnd. Matius 16:18). Tung mansai husus do hadirion ni si Simon Petrus on di nasa panghobasion ni Tuhan Jesus. Pola diganti Tuhan Jesus goarna (manang hira ditambai), sian Simon gabe Petrus, namarlapatan batu mamak.
Songon naung pinatorang di ginjang, bahwasana tung pe orang biasa si Simon Petrus alai panghorhonna di ganup panghobasion ni Tuhan Jesus tung mansai tandi do. Alai pinajojor ma jo muse hadirion ni si Simon Petrus dohot hubunganna di turpuk on. Toho do dihaporseai si Simon Petrus ia Tuhan Jesus, ima Kristus (Sipalua/ Mesias), alai maralo do anggo di rohana partinaonanNai. Boasa? Di sonma beradu antara haporseaon dohot akal (parbinotoan) ni si Simon Petrus mananda Tuhan Jesus. Somalna rakyat biasa, ima na berwawasan sempit, tontu mempengaruhi do tu akal (pola pikir) na hurang marpangantusi. Alai tung ipe, natulus marroha do anggo si Simon Petrus. Maksudna disi, polos do anggo hadirionna, namangihuthon Tuhan Jesus. Natape ibana halak na “keras” alani faktor parkarejoonna dohot lingkungan, alai dipangantusion laho mangalapati sesuatu, humurang do ibana jala muramura munggil rohana hinorhonni situasi. Di bahen i, ndang tarjalo ni si Simon Petrus anggo parungkilon ni Jesus ala mesias nanimaksudni rohana, ima sipalua namangolu jala namamarenta laho merebut kekuasaan bangso Rom. Di atihai, bangso Rom menjajah bangso Israel. Ai, molo parungkilonni Tuhan Jesus i, gabe haleaon do i, annon maradophon dirina dohot angka sisean. Jadi, ndang domu haporsean i dohot parbinotoan i laho mangalapati parungkilon manang sitaonan ni Tuhan Jesus, boasa ingkon marsitanonan Ibana. Dibahen i ingkon mulak do muse, tu ayat na di ginjang mandok, “ai ndada daging dohot mudar papatarhon i tu ho, Damang na di banua ginjang i do”.
Mangalusi maksudni Tuhan Jesus mamillit angka siseanNa, na ditoruni ratarata, songon si Simon Petrus on, ima Tuhan Jesus bermaksud laho membangun dasar iman na togu naborhat sian hahotoon, manang sian parbinotoan na sompit, asa tuk hatani Jahowa mamangkulingi rohana ni nasida. Natape, ingkon melewati proses. Ai, somalna angka murid na oto do namamorluhon angka pangantusion. Sada sian proses i, ima turpuk on. Sian turpuk on, dipaandar tu hita taringot tu haporseaon dohot pangantusion ni si Simon Petrus mananda Tuhan Jesus. Asa lam marbisuk angka sisean i, huhut asa lam toras haporseaonna maradophon diriNa, parungkilon ni Jesus, na kemungkinan hailaon manang haleaon di kalangan ni angka sisean i, ingkon do situhukon ni nasida. Haporseaon dohot parbinotoanni si Simon Petrus dohot angka siseanni, ingkon bersinerji do i gabe bisuk di dirina manjangkon silang i di nasa panghobasionna. Dibahen i, songon nanidok Tuhan Jesus, “Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu.” On ma bisuk na pinaandarni Tuhan Jesus tu angka siseanNai. Ima roha na olo mansoadahon diri. Roha na olo mansoadahon diri, ima roha namauas di hapapatar ni Debata di sandok ngoluna. Dibahen i, roha neberserah jala naolo marsigantung tu Debata gabe ingkon sipatuduhonni si Simon Petrus dohot angka sisean i, laho manguhithon Tuhan Jesus, sahat tu naro tingki parungkilonNa i.
Tarhatongtong do rohani si Simon Petrus dohot angka siseani dung ditangihon nasida hatani Tuhan Jesus di ayat 38 i, “Asa molo adong na maila ala ni Ahu manang ala ni hatangki pe maradophon bangso pangalangkup jala pardosa on, laos maila do Anak ni jolma i sogot mangkatindangkon i, di na ro Ibana di bagasan hasangapon ni Amana rap dohot surusuruan angka na badia i.” Molo pe sanga dipingkiri si Simon Petrus dohot angka sisean i taringot tu perebutan kekuasaan, jala ila rohana molo gabe lipe pangantusionna sian nanihaporseaonna i, nungga dipajongjong jala dipauli Tuhan Jesus be ojahan ni haporseaonnai laho tumananda Tuhan Jesus dohot maksudni parungkilonna i. Lam martamba do bisukni angka siseani, ai nungga domu be haporseaon dohot parbinotoanni nasida laho padomudomuhon saluhut angka parulaon dohot panghataion (pengajaran) ni Tuhan Jesus. Haotoon i pe nungga lam dipauli jala pola piikir nasompit i pe nungga lam dipungka pangantusionna. Jala on pe, saurdot ma on tu partinandaan ni angka siseani na olo manghangoluhon parngoluon ni Jesus. Nanigoaran ma i, marbisuk di bagasan Tuhan Jesus.
Sada pangantusion sian angka teolog mangalapati artini bisuk ima ngolu nahombar tu pandohan ni Debata. Artina, mangolu di bagasan dalan dohot gomgoman ni Debata. Asa dungi, turpuk ni jamita on, patuduhon tu angka siseani, ia mangolu pe nasida, dang lingkang nasida sian dalan dohot gomgoman ni Debata. Debata sambing do namargogoihon nasida laho mansoadahon dirina dohot namanuhuk silang i. Ndang alani gogo dohot pangantusionni nasida. Jala dinamanguduti panghobasion i pe nasida, holan Tuhan Jesus dohot hatani Debata do nagabe haposan di bagasan ngoluna. Asa molo mate pe nasida, mate di bagasan Tuhan i do. Ai gabe haotoon bolon do di nasida, molo mate nasida alai ndang mate di bagasan Tuhan i. Marisuang ma ngoluni nasida. Dibahen i, marbisuk di bagasan Tuhan Jesus, ima ngolu na olo mansoadahon ngoluna jala na olo manuhuk silang i. On ma ngoluni halak Kristen, angka siihuthon Tuhan Jesus.
Hahonaan
Songon angka ruas ni huria si nuaeng on, gok do hita mandok dirinta sebagai halak naporsea. Sarupa ma hita dohot si Simon Petrus. Tadok do di dirinta, “Tuhan Jesus, sipalua au”. Alai ndang terima hita molo ro pangunjunan di bagasan ngolunta. Jotjot hita maralo tu Debata, ai ndang saurdot haporseaonta i dohot partinandaanta tu Debata. Dibahen i, olo pe hita tumangihon hatani Debata sian angka Parjamita i, alai ndang lingkang hita sian angka penilaian na subjektif tumangihon hatai, dungi ndang maralus jamita i di bagasan ngolunta. Holan laho mangoloi hagiot ni sipareon manang daging do tahe hita tumangihon Jamita i. Sai naeng hita auhon jamita i di bagasan ngolunta, hape ndang olo marparbue, ai so olo hita diproses songon angka siseani. Bereng hitama, ndang dia imbarta songon angka siseani, naoto jala jolma biasa do hita di adopan ni Debata. Tung pe hita angka pande manang angka namarpangkat, alai sonari on di adopan ni Debata tung ise ma hita. Marsiajar sian maksud ni Tuhan Jesus, mamillit angka siseani, songoni do nang nuaeng Tuhan Jesus mamillit hita gabe siseanNa. Ai targoar do hita saluhut di ganup bangso gabe siihuthon Kristus. Otomatis status nagabe jolma naoto hinorhonni dosa dohot na berpola pikir sempit hinorhonni katerbatasanta sebagai jolma na lea, ido dope bagiannta. Dibahen i, unang magira ginjang roha manang teal. Asa dungi, rap dope hita saluhut angka siseani mangharihothon panuturion na sian Tuhan Jesus dohot hapapatarni Debata laho manggomgom hita di dalanNa. Asa saut lomo ni rohaNa marhite ngolunta.
Asa molo tatangihon pe jamita i, ndang asa lomoni rohanta na saut, gabe tubu angka penilaian di hita laho menilai angka jamita. Alai secara objektif, ingkon do maralus jamita i marhite parangenta na songon parange ni Kristus. Boha mai? Ima namansoadahon diri jala namanuhuk silang i. Ndang tu aha hita sai mangido pasupasu hape ngolunta pe ndang gabe pasupasu. Ndang tu aha hita mangido haluaon, hape hita mamusa dongan. Ndang tu aha hita mangido angka sipangidoan tu Debata, hape hinorhonni angka intrik-intrik do hita namardebatahon Debata. Tung haotoon bolon ma on, di hita halak Kristen sinuaeng on. Ai jotjotan do hita mangatur Debata asa songon na tarida manang sangap hita di hasiangan on. Hape lupa do hita mardalan di dalan ni Debata. Dungi angka cara hita bahen laho mangoloi angka hagiot ni daging. Hita ingotma, gok do angka parsorion namasa nagabe silang di ngolunta angka halak Kristen, boi marhite lasni roha dohot habotni roha, alai bohama hita marbisuk di bagasan Tuhan Jesus laho mangadopi i? Ingkon mardomu ma nian haporseaonta i dohot pangantusionta i mananda Tuhan Jesus asa dungi mangolu manang mate pe hita dinamamorsan silang i, tongtongma di bagasan Debata. Hita soadahon ma dirinta, asa Jesus manggohionsa. Hita tuhuk ma silang i, ai Debata do namargogoihonsa. Amen.
Post a Comment