MARBISUK DIBAGASAN JESUS

 

Minggu, 12 September 2021 (15 Dung Trinitatis)

Epistel : Poda Ni Raja Salomo 1:29-33

 

MARBISUK DIBAGASAN JESUS

Sibonsiri

           

Di zaman sinuaeng on, muramura nama jolma mambaritahon angka nanaeng sibaritahononna marhite media sosial. Jala panghorhonna pe serba cepat. Satongkin on dibaritahon di Sumatera Utara, nungga satongkin i boi tarsar barita i sahat tu Papua, bahkan sahat tu liat portibi on. Adong ma nadeba on memanfaat on media sosial on tu ulaon nadenggan, isarana martigatiga, nadeba nari laho marsitangiangan songon dalan marnostalgia. Adong muse do nadeba nari, holan laho pasalisali nonang, ujungujungna margosip. Bahkan, adong muse do gabe patubutubu parbadaan marhite angka barita hoaks manang angka hata lea. Adong muse do najumorbut, ima palua angka aib ni dirina manang keluargana. On ma angka jolma na so boi be dirajai dirina, ima holan mangoloi angka hagiotni dagingna manang hapuasan ni emosina sambing. Ndang marbisuk hita jolma laho manimbangi dia do na denggan, jala dia na so denggan. Tung gabe dihasogohon do bisuk i laho mangoloi hatagianna mamangke angka media sosial, dohot angka games, parjujian marhite internet, dohot angka lan na asing. Lupa do hita di angka hatani Debata naung disahaphon Ibana tu hita ganup jolma. Angka on ma salah satu contoh di hita angka jolma nagabe dilalapi angka parbinotoanni portibi namambahen hita ndang adong be roha biar mida Jahowa. Gabe marlomoloma sambing ma jolma i mangatur dirina, hape ndang dirajumi dirina nungga lam dao sian Debata. Alai hita berengma, adong do upani saluhut. Songon uhum tabur – tuai do parngoluan on. Aha na hita suan sonari, ido nang tapuonta marsogot. Dibahen i asa lam marbisukna hita mangalapati angka namasa sinuaeng on songon angka perkembangan zaman namasa sonari, boi ma jo hita parrohahon turpuk on.

 

Hatorangan

            Sada sian buku ni Raja Salomo na mansai terkenal jala gabe bagian ni buku nabadi on, ima Poda ni Raja Salomo. Goar do daina. Ia buku on, marisihon angka poda naborhat sian angka pengalaman-pengalaman ni parngoluan. Jadi mansai kontekstual do molo isi ni poda napinatorangni Raja Salomo di bukuna on. Sada karya sastra namansai uli do anggo isi ni buku on. Alai ndang holan sebatas karya sastra nadiputihi sian angka parbinotoan sambing manang sian malona manghatai dohot manurathon. Alai, tutu do on disadur Raja Saloma sian dalan-dalan ni angka parngoluan, mangihut ma i dohot angka sian tatanan bermasyarakat (sosial, budaya, politik, dan ekonomi). Laos mardomu tu si do bisuk na nijalo ni Raja Salomo na sian Debata boi dipamanathon ibana saluhutna gabe sada pola manang tolok ukur ni parngoluan, sian najolo sahat tu si nuaeng on. Andorang so tarbarita pe Raja Salomo sebagai Raja namora, namarsahala, dohot namarbisuk, nungga adong di dirina sada pos ni roha, namandok ndang ringkot be di ibana hamoraon i, manang sangap pe. Ala, na tung diharingkothon ibana, ima bisuk na sian Debata. Asa boi ibana manguluhon bangso Israel hombar tu lomo ni rohani Jahowa, ima bisuk manang pantas ni roha laho manirang na denggan sian na roa; (bnd. 1 Raja 3: 9).

            Dibahen bisuk na sian Debata i, mansai denggan situtu do anggo pola pamarentaonni Raja Salomo. Dungi lam tarsar ma barita habisuhon ni Raja Saloma. Hinorhonni i mansai gok do angka raja ro laho marsiajar tu Raja Salomo huhut mamboan angka sinamot laho sipelehonni nasida tu raja i. Bahkan, Ratu negeri Syeba na sian Selatan (kemungkinan sian Ethiopia) na tarbarita haulionna di sandok bangso ro holan mandulo Raja Salomo, sahira ulaon kunjungan negara. Songoni ma barita na sar sahat tu liat portibi di atihai, taringot hinabalgani harajaonni si Raja Salomo. Jala diparhatutu angka raja na ro i lumobi ratu sian Syeba i do, bahwasana songoni pe bisuk, pistar, dohot hamoraonni Raja Salomo, holan sian Debata Jahowa sambing do haroroni i. Sian on botoonta, ia hamoraon, hasangapon, dohot hatenaron naung nijaloni Raja Salomo, ndang na i nagabe patontuhon keberhasilanna di na manguluhon bangso Israel jala namambahen ro marsiajar angka raja tu ibana. Aha mai? Ima roha napantas laho manirang na denggan sian na roa. Olo do gabe sarat makna laho mananda nadenggan dohot naroa. Hinorhonni, angka pangalaho na tangkang jala ndang adong biar mida Jahowa. Jala ido namasa diparngoluan si atihai, bahkan sahat tu si nuaeng on.

Alai tung pe denggan pola pamarentaon ni Raja Salomo, alai sai adong do angka rakyat i na tangkang marroha jala sijogal rungkung. Roha late, hosom, dohot elat tu angka donganna masa do di nasida. Ai angka i do hagiotni dagingna. Ndang diharingkothon laho mangalului bisuk na sian Debata, asa tung mabaor nian angka hagiotni hatangkangan i sian parngoluan ni nasida. Sada contoh taringot tu dua parompuan na ro mangadop Raja Salomo asa dilehon haputusan ia dung monding anak nasada, naeng gulutonna anak ni donganna marhite penipuan. Ndang adong roha biar di nasida, pola ingkon mangadop tu Raja laho patotahon persoalan ni nasida i. Alai tung i pe, marbisuk do Raja i laho patotahon persoalan i dohot denggan jala di bagasan hasintongon (bnd. 1 Raja 3: 16-28). Sian angka parulaonni rakyat i, sai dipodahon Raja i do tu nasida asa dihaholongi ma parbinotoan na sian Debata, unang sai dipaolooloi angka parbinotoanna na justru mamboan nasida tu haotoon. Roha na so pantas laho manirang angka nadenggan dohot na roa, mambahen otik parbinotoanna laho mangalapati biar mida Jahowa. Asa unang gabe sarat makna be antong hadengganon i nanaeng siulahononna dohot na roai nanaeng sipaholanghononna. Unang gabe bangkol di roha laho manjalo angka hata panuturion dohot angka pinsangpinsang.

Parbinotoan nanimaksudni turpuk on, ima parbinotoan na sian Debata. Ndang songon parbinotoan na secara lahirilah didapot jolma i di masa ngoluna. Alai parbinotoan na lobi sian i, ima bisuk. Ala boi do sahalak jolma godang parbinotoanna, alai ndang marbisuk. Dibahen i, mansai denggan do molo adong parbinotoan, alai ingkon sarumbang do i dohot parbinotoan na sian Debata, manang bisuk sianangking. Bisuk lapatanna di bagasan bahasa Indonesia Hikmat. Manang molo di bagasan bahasa Heberna, chokmah, lapatanna kebijaksanaan manang kearifan. Sian KBBI kebijaksanaan dilapati gabe parbinotoan mamangke akal budi namarojahan sian angka pengalaman ni ngolu, manang torasni roha laho mangadopi angka namasa. Udut ni i muse, ia bisuk i berhubungan do i dohot parulaon sebab-akibat. Dibahen i, panghorhonna laho mangulahon sada ulaon manang nanaeng sisangkaphonon ingkon do marojahan tu akal budi. Asa dungi, homi do anggo parulaonni angka namarbisuk, songon Raja Salomo. Dibahen i, molo dung disahaphon Debata hataNa tu hita, tung haleaon situtu do anggo gabe ndang hita halomohon parbinotoan dalan laho mananda Jahowa, di bagasan roha na biar. Jala songon nanidokna sinangkin, berhubungan tu sebab-akibat manang songon uhum tabur-tuai do anggo so marbisuk do jolma i laho mandalani parngoluonna. Dibahen i, molo sai giot do jolma i di hagiotni angka dosa songon hatangkangan ni rohana, tung panganonni nasida do parbueni dalanni nasida natangkang i. Alai, natumangihon Debata dibagasan roha na pantas, marsonangsonang ma ibana maringanan, jala sonang rohana maradophon hagodoron dohot jea.

 

Hahonaan

            Mago do pantas ni roha molo dung mangarajai haotoon. Hagiot ni daging mamboan hita tu parulaon namandao sian Debata. Bahkan, songon naung nidok di ginjang, honorhonni kemajuan zaman songon media sosial on. Jotjot jolma i, mangalupahon bisuk jala lebih pajolohon emosina, ala prinsip marlomolomo. Biar mida Jahowa gabe parulaon na sintong laho manjanghon huhut manghangoluhon bisuk na sian Debata. Parbinotoan na hita jalo di portibion, na tuk dope i, laho mangalapati saluhut angka namasa diparngoluan on. Dibahen i, ndang menjamin pendidikan manang pangkat laho marpantasni roha asa dungi boi manirang nadenggan dohot naroa. Nagabae jotjot an, angka napistar i do olo mamutarbalikkon angka fakta hinorhonni hagiot ni dagingna asa dietong marbisuk. Hape, songon Raja Salomo, tung Debata do dipangasahon laho mamutushon angka uhum hombar tu hapeahanna. Hita ingotma, saluhutna namasa di hasiangan on, ndang lingkang i sian angka aha nata ula. Akal manang kebijaksanaan mamboan hita tu pola pamingkirion na toras asa boi hita mangulahon na denggan asa dungi marparbue ma tu parngoluonta nadenggan muse. Uhum tabur-tuai ima parningotan di hita asa tongtong manghaholongi parbinotoan dalan laho mangholongi Debata, asa dungi marbisuk ma hita laho mandalani nasa dalandalan ni ngolunta.

            Didok natuatua, manat unang tartuktuk nanget unang tarrobung. Sian on botoonta, mardalan do parngoluan ni nasa jolma. Alai dang godang jolma i marsiajar sian angka nanidalananna asa adong pengalaman ni ngoluna. Hape mansai ringkot situtu do i, asa boi habe parsiajaran tu dalan nanaeng siehahonna. Dibahen i, molo tung pe na sai laon, hita paolooloi hagiot ni dagingnta, hita bahen ma i sebagai pengalaman ni ngolu na ingkon dipadengganonta. Songon sada contoh, ima dinamamangke media sosial on hita. Sotung gabe lam tarida haotoanta ala hurang marbisuk hita laho mamangke media sosial i. Hita bahen batas ni emosinta laho mangoloi hagiot ni daging. Unang gabe sijogal rungkung, na so tangi di angka sipasingot dohot angka pinsang-pinsang. Asa boi hita manat manimbangi angka dalannta, jala nanget unang ro angka mara di bagasan ngolunta. Marbisuk ma hita di bagasan Debata. Ai ibana do ojahan ni bisuk i, jala marhapatean tu Ibana do saluhut angka dalan ni ngolunta. Sahulak nari, ndang hamoraon, hapistaran, manang pangkat menjamin hita laho marlasni roha, alai bisuk na sian Debata do menjamin hita boi marlasni roha nata pe gok angka lika-liku ni parngoluan. Boha carana? Tontu marbisuk ma hita di bagasan Debata laho mangalapati i muse. Amen.