PARGOGOI MA ROHAM UNANG TAHUTAN

Minggu, 5 September 2021 (14 Dung Trinitatis)

Evangelium : Yesaya 35:4-10



PARGOGOI MA ROHAM UNANG TAHUTAN

I. Sibonsiri

Dipillit Debata do bangso Israel gabe bangsoNa, dipillit asa tandi marasing sian parange ni angka bangso humaliangna. Dilehon Debata do patik tu nasida si ulahonon ni nasida ganup ari, asa unang manimbil sian dalan naung ni tontuhon ni Tuhan i. Alai, di pardalanan ni ngolu ni bangso Israel, ndang hot nasida mardalan di dalan naung ditontuhon ni Tuhan i. Manimbil do nasida gabe mangihuthon parange ni angka bangso humaliang nasida. Sasintongna ingkon nasida do sitiruon, alai gabe balik. Si Ahas na gabe raja hatiha i ndang marroha biar maradophon Tuhan i, tung balik do parangena songon amana si Yotam na bonar di adopan ni Tuhan i. Nungga pola diorai asa unang mangido pangurupion tu bangso naasing, alai tong do dituntun laho mangido pangurupion tu bangso naasing (bindu 31), ala bangso Asyur na gogo hatiha I mangondam nasida gabe tahutan. Mago pos ni roha ni bangso Israel tu Debata, matamburak angka dosa di tonga ni bangso i. Ndang be tanda bangso songon bangso na pinilit ni Debata na ingkon asing parangena dohot bangso naasing. Ndang dipasombu Debata angka hajahaton i martamburak, diuhum do ganup halak na mardosa di adopan ni Tuhan i, ndang mardia imbar, bangso Israel dohot bangso naasing tong do di uhum Debata (bindu. 34). Debata na manguhum sude bangso pataridahon Ibana do raja di atas raja, saguru di Ibana do liat portibion. Diparrohahon Debata do anggo halak partigor, halak na hot marhaporseaon tu Tuhan i, jala na unduk mangulahon hata ni Tuhan i. Di turpukta tingki on, las ni roha ni angka na hot marhaporseaon na, pinalua ni Tuhan i, tangkas ma tapaihutihut.

II. Hatorangan

Dipasahat si Yesaya do hata ni Tuhan i tu saluhut halak na porsea di Israel, dipatogu haporseaon ni nasida, na margogo do Tuhan i laho paluahon nasida. Marnida situasi ni bangso Israel naso margogo laho mangalo bangso Asyur hatiha i, dipadomu muse hatangkangon ni bangso i naso olo unduk tu hata ni Tuhan i, mambahen tahutan angka na porsea dope di Tuhan i. Diturpukta didok; Dok hamu ma tu angka parroha na tahuton: Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ho do ibana tongon paluahon hamu (4). Lapatanna, nang porsea nasida tu Tuhan i, tong do mabiar marnida namasa dohot nanaeng masa di tonga ni bangso Israel. Bangko nama i dihajolmaon sai adong tongtong biar ni roha. Dos doi songon hata ni Tuhan i tu si Josua laho masuk tu tano Kanaan nasida didok; “Nda nunga hudok tu ho: Pir ma tondim, jala Jahowa Debatam do donganmu, manang dompak dia pe ho mangalangka”(Yosua 1:9). Manang na boha pe molo nungga dipaadop tu angka ragam ni hamaolon, na pasti sai adong do ganggu ni roha mabahen tahutan. Umbahen i do, dipaingot Tuhanta bangso Israel asa unang gabe mandele ala ni biarna, asa unang gabe bobonosan nasida di ngolu ni nasida. Dipaingot nasida, adong do Debatamuna, tu si Josua didok, Jahowa Debatam do donganmu. Dipaingot si Yesaya bangso Israel angka na porsea di Tuhan i, adong do Debata paluahon hamu. Sipata molo nungga jonok parporangan i, olo do ndang diingot Tuhan i ala ni biarna. Olo lupa adong do Debata naso hatudosan mandongani nasida. Di holong ni roha ni Tuhani tu angka halak na porsea tu Ibana, dipaingot do nasida. Holong ni Tuhani dipataridahon marhite naposona si Yesaya laho paingothon asa unang mabiar.

Molo taparrohahon di ayat 5-7 didok; Buha mata na mapitung jala marbinege na nengel. Marhajingjang napangpang songon ursa, mariaia dila ni na ngungu, marbuhalbuhal aek di halongonan jala sunge di adaran. Tano hasang situtu gabe tao, tano bangkalbangkal gabe parmualan aek. Hata ni si Jesaya on sada gombaran di ngolu ni bangso Israel naung jonok tu hamagoan ala ni parange ni nasida naso marroha biar maradophon Tuhan i. Boi masa do gabe sude hona mara ala ni parporangan na nanaeng masa binahen ni Asyur tu sude halak na adong di bangso Israel. Songon pandohan ni natuatua; maraprap so magulang. Alai nang pe songon i, nang pe naung tumorop halak mangulahon hajahaton, tongtong do diparrohahon Debata halak namanontong marhaporseaon di Ibana. Nian molo tarparrohahon di ayat 5-7 ndang mungkin boi masa i anggo di ngolu ni jolma, alai ndang adong naso tarpatupa Debata (Luk. 1:37). Di ayat 8-9, patupaon ni Debata ma dalan na bolon di angka na badia, ndang boi dalanan ni angka na ramun, holan angka na badia do na boi mandalani i hombar tu lomo ni roha ni Tuhan i. Dalan na pinatupa ni Tuhan i, ima dalan na tigor jala tiur, naso marlegotlegot. Ndang adong disi angka pangago, tung dalan hasonangan doi ala Debata do napatupahon dohot na mandongani. Dilehon Debata do pangkirimon di angka na marhaporseaon di Ibana. Bahenonna ma mulak nasida tu hutana, jala marlasniroha ma nasida salelengna molo manontong nasida mangoloi hata ni Tuhan i. Salpuhonon na ma arsak nang hoihoi sian nasida, tutu gok hasonangan ma, molo hot marhaporseaon di Tuhan i (10).

III. Hahonaan Ojahan di mingunta ima: PARGOGOI MA ROHAM UNANG TAHUTAN. Molo nungga di paadop tu hamaolon na pasti olo do hita bobonosan jala olo sampe tahutan. Situasi on olo ma mambahen hita gabe gale manang mandele. Boi parungkilon ala ni parkarejoan, ianakhon naso haajaran, parhepengon naso tontu, rumatangga naso denggan, amanta naso sumarihon tu jabu, inanta naso malo mamangke hepeng, ianakhon naung tang umur ndang ra marhasohotan, angka parsahiton nasonggop di pamatang, mabiar dimutasi, suansuanan naso langku dohot lan angka naasing na mambahen hita tahutan dingoluon. Sude namasa on mambahen mago las ni roha. Disude namasaon hata ni Tuhanta mangalehon di hita gogo nang las ni roha na imbaru mangadopi sude angka hamaolon naro tu hita asa unang hita tahutan. Molo tung pe ndang mungkin malua hita sian ragam ni hamaolon i didok rohanta, manang ndang adong be dalan haluaon na boi tapatupa didok rohanta, alai taingot ma adong do Tuhan i mandongani hita laho paluahon hita sian sude angka hamaolon i. Pos ni roha mardophon Tuhani dingolunta, ido narumingkot mangadopi hamaolon. Ndang adong naso tarpatupa Tuhan i, di sude angka parungkilon i, tarpatupa Tuhan i do dalan di hita asa malua hita sian parungkilonta. Si Jeremia mandok tu bnagso Israel nang tu hita; “Alai martua ma baoa na marhaposan tu Jahowa, jala Jahowa haporusanna dibahen” (Jer. 17:7). Haporseaon di Tuhan i, patubuhon pangkirimon di hita angka naporsea di Tuhan Jesus, molo bangso Israel diboan mulak ta tano Kanaan manang Sion, sonnari hita naeng boanon ni Tuhan i hita tu surgo hasonangan i, molo pemarungkil hita di tano on, sihirmon na umbalga ima parsidohot hita tu surgo i. Jesus do dalan na pinatupa ni Tuhan i asa boi bongot hita tu surgo i. Didok Jesus: “Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu”. (Joh. 14:6). Tongtong ma togu haporseaonta di Tuhan Jesus i aha pe namasa dingolunta on. Pandonganion dohot pangaramotion ni Tuhan i saleleng hita di tano, ido si auhonon di ngolunta. Nunga pola didok Tuhan Jesus; “Ai ida ma, sai na dongananku do hamu ganup ari, rasirasa ro ajal ni hasiangan on!” (Mat. 28:20b). Amen