Epistel : Yakobus 2 : 5-13
PARGOGOI MA ROHAM UNANG TAHUTAN
I. Sibonsiri
Bungku Jakobus on digurithon si Jakbus sandiri. Hurang lobi digurithon di toan 45-49 dung tubu Jesus. Bungku on ditujuhon tu halak Jahudi naung porsea na adong di tano parserahan (Ida. 1:1) laos boi taida (2:19;21) pataridahon bungku on dipasahat tu halak Jahudi na adong di luar ni Palestina. Dungkon mate si Stefanus, na mate di dangguri dohot batu (Ul.Aps. 8:1) godang do halak Jahudi Kristen na mangangkat borngin hinorhon ni parungkilon nasonggop tu nasida. Borhat nasida laho pasiding angka hamagoan na sinangkapan ni halak Jahudi na marsogo ni roha marnida halak na porsea tu Jesus. Di ganup angka pangarantoan ni nasida, songon na di Fenesia, Sifrus dohot Antiokia ditongos do bungku on laho patoguhon haporseaon ni nasida mangadopi angka halak namarsogo ni roha marnida nasida, ala ni goar ni Jesus i. Si Jakobus songon sada uluan ibana di Jerusalem manongos surat on tu halak Jahudi na adong diparserahan.
II. Hatorangan
Diturpuktaon dipaingot si Jakabus do angka halak Jahudi na porsea asa unang marnida bohi. Unang marlea ni roha marnida halak na pogos. Diturpuk on dipaingot do; dipillit Debata do angka napogos di portibion asa mamora nasida di haporseaon jala panean di harajaon. Dileai halak Jahudi do Jesus ala ni hapogosonna, ndang tarjalo nasida Jesus gabe sipalua, dohot panurirang, gabe didok, anak ni si Jusuf tungkang hau i do? (ida. Mat 13:55). Marlea pe Jesus i, alai ingkon saut do anggo sangkap ni Tuhan i di portibion. Dibahen i unang lea roha marnida halak napogos, sian naso taboto ditodo Tuhan i angka napogos laho pararat harajaonna di portibion. Alai ndang na mandok sude halak napogos gabe otomatis masuk tu harajaonNa i, ai godang do nang na pogos ndang ditanda dirina. Ditingki dihatahon si Jakabus taringot tu napogos di parhepengon, dohot sinadongan, na jojot masa, ndang pola berpengaruh nasida di masyarakat jala hurang diparrohahon. Alai, halak na pogos na mangarajumi dirina halak na gale, manang naso margogo. Panandaion diri naso margogo, mangkaringkothon pangurupion dohot haluaon dingoluna. Ai halak na mananda dirina porlu haluaon, ido na mangalului haluaon. On do angka hahurangan ni angka na godang sinadonganna. Sai songon naso ringkot be sipalua di ibana, tumimbo harga dirina dibahen sian haluaonna, pos ni rohana tu artana, ndang be tu Tuhan i.
Ditingki pangkobasion ni Jesus hea do Ibana didapothon si dolidoli mandok; ulaon na denggan dia ma patuonku asa dapotan haluaon ahu? didok Jesus ulahon ma patik i; unang mamunu, unang mangalangkup, unang manangko dohot angka naasing, alai didok dolidoli i, sian nagelleng nungga hu ulahon i sude, aha dope ulahononku? Didok Jesus; gadis ma nasa artami ninna, alai mulak ma dolidoli i, ala saor habot ni rohana, ai paradongan situtu do ibana, dungi ninna Jesus ma: “Situtu do na hudok on tu hamu: Tung maol do habongotan halak na mora harajaon banua ginjang i. Lam dohononku do tu hamuna: Gumabur do bongotan ni gaja pinggol ni jarum, unang halak na mora masuk tu harajaon banua ginjang i” (Mat. 19:24). Naso tupa daion ni namora harajaon ni Tuhan i, molo tu arta nai do haposanna. Ndang na so lomo roha ni Tuhan I hita mamora, alai unang arta i gabe haposan ni rohanta.
III. Hahonaan
Dimasa nueng tung mansai nalnal do dipataridahon parbedaan ni halak napogos dohot
halak na mamora. Hampir di sude instansi perlakuan khusus tu halak paradongan diulahon jala ido memang dipadiri halak di portibion. Di keluarga pe songon i do, molo paradongan do tondong nai sai pintor dihalaputi doi, nang pe dao tuturna olo dohononna, apala hami dope i, alai molo dongan napogos do tondong nai, olo dohononna, nga dao hami tusi, ai ompu namartinodohon nama hami tu nasida. Termasuk ma di huria, huria na seharusna memperlakuhon sude jolma so mardia imbar, gereja na ingkon mangarungangkon angka parik pangambat mangulahon holong so marnida bohi, alai di huria pe nungga adong be perlakuan khusus tu angka paradongan. Molo tu paradongan tung mansai tinggil sipareonna, holan didok marsahit pintor di halaputi, molo adong angka ulaonna pintor dihalaputi, jumonjot angka paradongan di dapothon. Nuaeng di pigapiga Gareja, molo ndang hata ni na mora i na saut, boi sundat sude angka naung ni hataan. Jala sai holan hatana ma dipabebege, ai mabiar sotung maon annon pinda ninna rohana. Perlakuan naung dihasomalhon portibion mambahen parbolatan di tonga ni jolma i nang huria, antara ni napogos dohot paradongan.
Sarupa do sude jolma di adopan ni Debata, ndang mardiaimbar anggo hajolmaon di adopan ni Tuhan i, namora nang napogos rap dipangke Tuhan i do laho paherbang harajaonNa di portibion. Mangkahologi dongan jolma ndang ala sinadonganna, alai ala ni parsuruon ni Tuhan i do, ingkon sude haholongan so mardia imbar. Hasomalan na diportibion ndang gabe hasomalan di huria manang di ngolu ni halak na porsea. Saluhut hum manisia ingkon do haholongan. Songon panghongkopon ni Tuhan Jesus tu portibion naso si ida bohi, ingkon songon i do nang pambahenanta tu sude jolma. Pargogoi ma roham mangulahon hata ni Tuhan i, songon ojahan ni turpuk on, pargogoi ma roham unang tahutan mangulahon holong ni roha manang na tu ise pe. Margogo ma hita asa boi mangulahon holong i so marnida bohi, so marnida sinadongan. Gabe parasi roha ma hita maradophon angka donganta jolma didiape hita maringanan. Taingot ma; napasangap Tuhan i do hita molo taulahon holong i tu saluhut halak. Unang terpengaruh di hasomalan ni portibion, alai tapengaruhi ma hasomalan ni portiobion gabe hasomalan ni angka na porsea hombar tu hata ni Tuhanta. Dijou angka na porsea gabe palito manondangi portibion, manang gabe sira laho manirai portibion. Ndang hita na terpengaruh tu portibion alai hita mempengaruhi portibion asa saurdot dohot lomo ni roha ni Tuhan i. Amen
Post a Comment