Minggu, 10 Oktober 2021 (19 Dung Trinitatis) - Mundosaragi

 Minggu, 10 Oktober 2021 (19 Dung Trinitatis)

Epistel : Heber 6:17-20          

 

 DEBATA NA SO HEA MUBA

 

I. Patujolo

Digoari do surat on surat Heber, ala surat on dipasahat tu halak Heber naung gabe Kristen jala mangihuthon Kristus. Ndang pola tangkas disurathon ise panurat ni buku on, alai na pasti disurat buku on laho paingothon nasida do asa hot porsea jala marpanghirimon tu Debata Jahowa. Ragam hamaolon, sitaonon dohot pangaleleion diadopi nasida dung dijalo Kristus i di ngoluna. Ido umbahen gabe naeng marbalik haporseaon nasida sian Tuhan Jesus. Alani i panuruat ni buku on manggogoihon nasida asa manontong hot porsea tu Jesus. Dibahen do Jesus Kristus gabe sada gombaran na sempurna naboi sitiruon nasida di namangadopi namasa i. Adong tolu ojahan na disurat di buku on; parjolo, Jesus Kristus Anak ni Debata, ima naung patuduhon hasatiaonNa mangadopi ragam ni hamaolon dohot sitaonon lao paluahon manisia, ido umbahen digoari do Ibana sumurung sian hamalimon na di Padan na robi nang sian angka suru suruan. Paduahon, dipatuduhon Debata do Jesus do Malim na hot salelengna jala na tumimbo sian angka malim na di padan na robi. Patoluhon, marhite Jesus Kristus, angka na porsea tu Debata dipalua sian angka dosa, biar ni roha, dohot hamatean sisalelengna.

II. Hatorangan

Hot do Padan ni Jahowa tu bangsoNa. Haporseaon ima songon sada tema sentral ni buku Heber on. Jala dijou do nasida asa marposniroha di angka sihirimon ala haporseaon i pamotoan na tontu taringot tu na so niida (pat. 11:1). Ido bagabaga ni Jahowa tu si Abraham na lehononna do parianakhonon di nasida tung naung marumur saratus taon ibana jala si Sarai marumur sia puluh taon asa gabe torop. Diboto panurat ni buku on do songon dia haporseaon nasida, tarpatudos ma i tu dakdanak na ingkon minum susu dope, ndada boi tarpanganna indahan na pir. Alani i haporseaon nasida pe ingkon dope di diparmudu mudu asa bulus panandaionna di Debata. Alani i dipasiding panurat on dope manaringoti angka patik taringot hakristenon dope; ima taringot pandidon, mangampehon tangan, taringot haheheon ni angka naung mate, uhum (6:1-2). Sandok songon dia do ngolu na sintong jala dihalomohon Debata ido na tontong disoarahon.

Dung dijalo nasida Kristus i di ngoluna, didok roha nasida aha do upa manang tumpal dung gabe Kristen hami? Dia do bagabaga haluaon na dipasahat i tu hami? Ido na sai mangonjar di roha nasida na so dapot diida mata dope. Haporseaon ni hita Kristen saonari pe jotjot dope songon i. Di rohanta nian pintor patar ma pasupasu i, pintor patar ma na tapangido jala na tahirim i, maol hita marbenget ni roha paimahon. Jotjot haporseaonta songon “haporseaon ni si Tomas”, ingkon jolo diida dungi porsea. Maol do hita porsea di bagabaga haluaon naung dipadanhon Jahowa tu hita. Alani i, dijou do halak Heber i nang hita saluhutna, asa songon si Abraham marlambas ni roha tung sura ndang gira ro jala taida alus ni pangidoanta, ala taboto do pasti do dapot hita na tapangido, ai manontong do Jahowa di hataNa dohot di padanNa naung diuarihon tu hita.

Didok di turpuk on, uari do dipakke Debata laho patuduhon tu angka sitean bagabaga i tahina, ai tangkas hadirion ni Debata ima na so hea muba jala ndang hea margabus. Sapala naung didok Debata ingkon pasupasuonna hita, pasti tarpasu pasu hita. Alai aut sura dang satia hita jala manimbil sian dalan hasintonganNa i ndang tarambati hita rimasNa na ingkon sahat tu hita. Alani i, marsiadu ma hita manggulut bagabaga i asa dipasahat Ibana i tu hita. Di angka na marlinggom tu Debata dilehon apoapo asa tusi marhaporusan, marsitiopan di panghirimon naung patar jala rade dijolonta.

Ringkot pangkirimon na togu dohot haporseaon na sintong paimahon bagabaga ni Debata. Panghirimon ima gogo na tuk mambahen hita margogo mandalani ngolu, martahan di angka namasa jala marpanatap di haluaon sogot. Panghirimon i boi do tarpatudos hita tu halak na manumpang di sada kapal laut. Dipardalanan di laut i, boi do ro galumbang na balga dohot alogo lubis laho manunggalinghon kapal i. Alai saluhut panumpang tarlumobi Nahkoda ni kapal ingkon boi manatap labuan na sonang i mangunsandehon kapal na jala asa maradian disi, asa margogo mandalani dohot manaluhon na masa i. Jala muse di kapal i adong do sao/jangkar lao manahan asa unang dipijomhon namasa i. Na mambahen jolma i sundat di sakkapna ima ala ndang marlambas ni roha, jala jotjot manghirim alai ndang diulahon. Naeng ma nian dapotan jala maruntung nang so mangula. Manghirim ingkon do dohot lambas ni roha, ai ido parbue ni Tondi (Gal. 5:22), lapatanna ingkon loasonta do Tondi Porbadia mangarajai diri dohot ngolunta asa dapot hita hasonangan i. Panghirimon i ma na gabe sao di ngolunta ima lao pahothon dohot patoguhon hita paimahon bagabaga i.

Marragam dipatuduhon halak Kristen pangalahona lao mangatasi parungkilon ni ngoluna, tarlumobi di parungkilon haporseaon. Molo ro pangaleleion/pamusaon sian ugamo na asing, adong tolubsikap ni halak Kristen mangadopi namasa i, ima; Parjolo; talu manang menyerah tu parungkilon i, ditadingkon ma haporseaonna jala diihuthon na mangalelei ala biar ni rohana. Paduahon; mangalului jalan selamat, dia pe taho asal ma malua. Patoluhon; lam dipatogu jala lam di pa tang haporseaonna. Na sintong ingkon tiruonta, ima dalan na patoluhon on. Ai tangkas taboto ndada hita suhut di hamusuon, Ahu do, ninna Debata (2 Kronika 20:15b). Pangurupion na sian Jahowa, ido sitataponta dohot sihirimonta. Panghirimon ido parbue ni haporseaon di Jesus. Panghirimon i padaohon pandelean manang putus asa. Saleleng adong panghirimon, saleleng ima adong kemungkinan masa depan na ummuli. Di angka na mangolu panghirimonna, ndnag marsak jala ndang madabu tu panolsolion alai tontong optimis ngoluna. Molo ro angka kegagalan ingkon boi do dohono di roha “kegagalan adalah kemenangan yang tertunda”. Halak na mangolu di panghirimon ndnag merasa bosan jala ndang ngolngolan paimahon pangurupion ni Tuhan i, ala tontong sai mian di rohana Jesus mual ni panghirimon dohot haimbaruon i. Jolma na mangihuthon Jesus ima halak na mangolu dibagasan panghirimon. Na marsorinsorin do kegagalan di ngolu ni jolma, unang pintor mandate, alai marusaha lao dumenggan muse.

Nungga rade inganan hasonangan i dipatupa Jesus Kristus. Ragam ni angka namasa dohot sitaonon di ngolu on mambahen jolma manghirim di hasonangan sogot. Nungga patar i diula jala dilehon Jesus tu angka sitean bagabaga i. Alai godang do ndang manahan di panghirimonna ala so diida haluaon i. Jamita on paingothon hita, nungga borhat parjolo Jesus Kristus tu inganan hasonangan i lao paradehon inganan di angka na porsea di Ibana. Disi do ibana naung gabe sintua ni Malim salelengnilelengna paimahon hita angka na monang i, songon si Melkisedek partigor dohot sipardame i. Ido bagabaga/janji ni Debata tu hita, jala porsea ma hita tutu do i. Ndang songon hita jolma Debata mura mangunduk padan, alai mura muse mangose padanna i.

III. Hahonaan/Impola
Nungga patar didai angka na parjolo i ima na mangolu di hatiuron, silehonlehon ni Debata di nasida. Alani i surat Heber on mangonjar nasida asa manatap jala marsintuhu mangolu di haporseaonna. Ingkon margogo nasida mangadopi pangaleleion na ro na manghasogohon nasida na manjalo Kristus gabe haluaonna. Hatontuon di sakkap bagabaga i lam togu, ala Debata sandiri do panghangkungina dibagasan Kristus Jesus. Haluaon na nilehonna mambahen hita gabe sitean harajaon ni Debata, jala asa dapot ingkon ulahononna ma holong tu donganna jolma, tarlumobi di angka na manghasogohon Barita Nauli i.
“Menunggu adalah pekerjaan yang sangat membosankan”. Tutu do hata on di angka na so lambas marroha. Alai adong dope jolma na sai satia paimahon bagabaga ni Debata di ngoluna, ala diboto tangkas ndada hea Debata margabus di hataNa. Alani i martua do ngolu ni jolma molo dibahen Jahowa haposanna.