Minggu, 12 Desember 2021 (Advent III) - Mundosaragi

Minggu, 12 Desember 2021 (Advent III)

Evangelium : Sepania 3:14-20

MARLAS NI ROHA ALA DITONGATONGANTA DO DEBATA

1. Patujolo

Panurirang Sepanya mangula hatiha harajaon raja Josia (639 – 609 SM). Dipasingot ibana do bangso Juda ala hadosaon nasida i na ro nama uhum ni Debata tu nasida. Ia dosanasida i, ala olo nasida manomba debata Baal, songon na sinomba harajaon Asyur. Memang di tingki raja Manasye (ompung i raja Josia) manggomgom harajaon Juda, marlaok dosa bangso i, ala tunduk raja i tu Asyur, suang songon i, diuduti anakna raja Amon (ama ni Raja Josia) hasomalan na so denggan i. Alai dung pe raja Josia adong hamubaon, i ma na ginoaran Reformasi Josia. Laos di hatiha i ma mangula panurirang Sepanya. Balga do peranan si Sepanya di gerakan refosmasi na pinatupa ni raja Josia on.

Hinorhon ni dosa ni bangso i, lumobi ala ni dua raja andorang raja Josia na umbiar tu Asyur sian Debata ni Israel, tarrimas do Debata tu nasida. Ditongos ma panurirang Sepanya pasingothon nasida. Songon i ma dinamika ngolu ni bangso ni Debata on, sipata madabu tu dosa, muba, madabu muse dst. Na pasti dang olo Debata kompromi tu hadosaon nasida, ingkon hona uhum do angka jolma na so satia, alai dang uhuman i na gabe ujungna, sai mulak do rohaNa mangasii bangsoNa i. Barita pemulihan ni bangso i, ima na pinasahat ni panurirang Sepanya, na mangalehon las ni roha tu bangso i, nang tu hita di hakristenon sisonari.

Minggu advent III, somalna diondolhon do halalasniroha/ sukacita. Las ni roha manomunomu Pesta Bolon, i ma Natal. Halalasniroha i tarjanghon ni jolma angka naung jumolo mangarajumi diri di hagaleon, hahurangan nang hasalaan ala ni dosa, jala ro Tuhan i paluahon hita sian sorop ni dosa i. Di angka jolma sisongon i do na patut jala tau marlas ni roha dibagasan Tuhan i. marhite turpuk jamita on, naeng dipanghulingi hita asa molo marlas ni roha pe hita di Minggu Advent on, marningot Natal naung jonok sekaligus marningot balga ni Holong ni Debata tu hita angka pardosa naung tinobusNa i.

2. Hatorangan

Buku Sepanya marisihon panurirangon taringot tu pemulihan ni bangso ni Debata, baik pemulihan secara politik, bangso i mangingani tano parpadanan, suang songoni pemulihan sosial, bangso i manghilalahon hamoraon, hagabeon, hasangapon, hadumaon gok olopolop, mardame sonang dang adong mara. Andigan doi masa? Di ay. 15 di tingki Tuhan i na mangarajai nasida (Theokrasi). Molo olo nasida diatur Tuhan i, marhaunduhon tu huaso ni Tuhan i sambing, satia nasida jala ndang olo unduk tu penguasa ni portibi on, disi ma masa pemulihan i, terwujud ma halalas ni roha na sintong i di parngoluan nasida.

Siala ni panghirimon na songon i ma, umbahen disuarahon di ay. 14 asa “Mariaia, marlas ni roha marolopolop sian nasa roha. Dipangido tu bangso i asa unang mabiar tu musu, unang tahutan mangadopi alo nasida na di portibi on, ala Debata sandiri nama na gabe uluan nasida. Debata na nianggap nasida nasailaon dao sian nasida, manandinghon nasida, gabe diae nasida ragam ni na bernit, ditindas angka sipelebegu, alai marhite panuirang Sepanya justru dipatandahon Debata na mian di tongatonga nasida, na rade mangondihon nasida sian angka musu.

Baga-baga ni panuriang on digohi marhite hatutubu ni Jesus di Betlehem 2000 taon naung salpu. Debata na gabe jolma, Immanuel, ditonga-tonganta ma Debata. I ma fakta sejarah na so boi dipungkiri manang ise pe jolma di portibi on sepanjang sejarah. Laos manongtong do Ibana di tonga-tonganta nang sahat tu partingkian sinuaeng on, marhite Tondi Porbadia. Tondi i do na manogu-nogu, mangiring-iring langka ni ngolunta, sahat tu na manomu-nomu haroro ni Kristus paduahalihon gabe Panguhum di hita. Ibana ma na mangondihon bangso i uju i nang mangondihon angka na porsea i sahat tu saonari on.

Bahkan lobi sian sekedar mangondihon nasida, Debata sandiri na memulihkan bangso i: na gondok roha, na holang sian luhutan i, dipapungu Ibana. Dipamalum Ibana na mengkat, dipapungu halak na pinabali, laos dibahen nasida gabe pujipujian, jala marbarita di saluhut tano haurahon nasida nasailaon. Debata sandiri paojakhon nasida di tano parpadanan i, songon sada bangso na berdaulat penuh, na disegani angka bangso na dihumaliangna. Marningot i ma diarahon bangso i asa marlas ni roha, marolopolop sian nasa roha.

Las ni roha ni bangso i, naeng parsidohot hita manghilalahon, lumobi di Minggu Advent III hon on. Molo didok marlas ni roha, boi nilapatan kondisi ni roha na mariaia, gok dame, jala dang terpengaruh tu kondisi na dihumaliangna. Alai ndang na so marlapatan ia panghilalaan las ni roha i satorusna tahilalahon. Sipata adong do ombasna songgop tu ngolunta habot ni roha, lungun, ganggu, biar dna. Boi sajo do songgop angkai i, alai ndang na gabe boban i mangarajai hita. Justru gabe margogo do hita manaon boban ni ngolu i molo adong las ni roha, lumobi las ni roha dibagasan Tuhan i.

Di na mandalani ari-ari ni ngolunta on, lumobi paradeonta manomunomu haroro ni Tuhan Jesus na paduahalihon, na gabe Panguhum bolon i, tarjou do hita asa tongtong dibagasan las ni roha. Marhite las ni roha i do patubuhon pos ni roha hita mangalangka, mangula nasa siulaonta. Molo pos roha di angka na taulai, tubu ma panghirimon na mangolu adong keberhasilan di ngolunta ala Debata mian di tongatonganta. Tanpa campur tangan ni Debata dang marhasil hita di ngolu on. Ingkon rajumanta do keberhasilan na taraih ala pandonganion ni Tuhan i di ngolunta. Laos ido mangonjar hita sai hot marlas ni roha.

3. Hahonaan/ Aplikasi

Molo tapamanat angka na masa disinuaeng on, marungkil do godang halak Kristen di Indonesia on, lumobi di kantong-kantong na minoritas dope Kristen. Tung godang dope na so berpihak tu hita, baik sian segi regulasi nang angka sikap resistensi di kehadiranta di inganan i. Isarana di perizinan laho pajongjonghon bagas joro, suang songoni kebebasan laho marparsaoran di gareja nang di jabu-jabu. Alai disoarahon Sepanya do, molo pe taadopi ragam ni hamaolon i, ingkon boi hita marlas ni roha. Ala ni aha, ala pos rohanta, di sada tingki Tuhan i sandiri do na pauliulihon parsaoranta.

Laos mardomu ma muse di na mangadopi mara bolon portibi on i ma Covid 19, tung godang do pangontakna tu sude sendi parngoluan, ekonomi, politik, sosial budaya tarlumobi kesehatan ni jolma, sahat ta na marratus ribu mate hinorhon ni covid i. Alai nang pe songoni situasi na niadopan ni bangsonta nang sude pangisi ni portibi on, asa songon napinaningido ni panurirang Sepanya, boi marlas ni roha ala adong do Debata na mian di tongatonganta na margogoihon jala manungkoli hita di sitinaonon i. Panghirimonta mardonganhon Tuhan i, ro nama Ibana laho memulihkan bangsonta sian ragam ni hamaolon i, gabe boi hita marlas ni roha.

Tarlumobi ma di Minggu Advent III-hon on, di sada sisi marlas ni roha hita manomunomu Pesta Natal, alai lobi sian i marlas ni roha hita manomunomu ari ni Tuhan i, manang andigan pe haroroNa songon Panguhum di hita. Sai dibagasan las ni roha nang panghirimon na mangolu ma hita manjangkon haroroNa i. Asa di ari Tuhan i, jumpangsa hita so martihas, alai dibagasan pamujimujion dohot parsaoran na denggan rap dohot angka na porseai. Di si ma jumpang las niroha bolon i, las ni roha na so marhaujungan rap dohot Tuhan i. Amen.