Minggu, 21 Nopember 2021 (Ujung Taon Huria) - Mundosaragi

Minggu, 21 Nopember 2021 (Ujung Taon Huria)

Evangelium : Psalmen 90:1-6

SAI PARROHAI MA HAMI MAMILANGI ANGKA ARI-ARINAMI

I. Patujolo

Hamu angka dongan na hinaholongan, digoari do minggunta sadarion ima minggu Ujung Taon Parhuriaon. Sataon na bolon ma hita na marhuria i naung mardalan dohot mangula rap dohot Tuhanta i. Marbisuk do huria i di ulaon ujung taon mamereng tu pudi, marnida, mangarimangrimangi dohot marsiajar sian pardalanan ni ngolu haporseaonta marsadasada. Laos hombar tusi dipatupa huria ma di Minggu Ujung Taon i parningotan di angka naung monding, ndang laho mangarungkari sidangolonta ganup, tarlumobi mangarungkari sidangolon ni angka sisolhot ni donganta naung monding i. Memento mori ima frase bahasa latin na marlapatan ingot ma ari hamamatem. Parpsalmen manggombarhon ngolu ni jolma songon duhut-duhut torang ari marbunga, martumbur, bodarina disabi jala malos. Hita halak na porsea ingkon do mamparhasean ngolu parsatongkinan di portibi on. Songon na didok Parpsalmen “Sai parroha i ma hami mamilangi angka ariarinami, asa dapotan roha na bisuk hami” na gabe topik minggunta sadari on.

Psalmen (tehilim) na mangondolhon makna ima “angka ende olop-olop/pujian”. Mansai torang do di parpsalmen panindangion pambahenan ni Debata huhut mangalapatisa angka ari nang angka na masa nabinolusna, jala mansai tangkas torang diida nasida pangaramotion ni Debata na somansohot saleleng di angka partingkian manang di angka ari na binolus nasida. Laos dihapadothon nasida mamodahon uhum ni Debata nang pe jotjot marasing pangalapation dohot pangulahononna di ngolu ni bangso i.

Isi ni pangajarion i ima manaringoti sintasinta ni ngolu parugamaon narosu parsaoran na tu Debata, manolsoli dosana huhut mampareahi ngolu na sintong, marpos ni roha tu Debata uju mamolus ragam linggoman (rupa-rupa ancaman) ni hamatean, dao biar, tobok huhut ringgas manghapadothon parsaoran dohot jolma nang humaliang, manghasiholi hasasaut ni sangkap ni Debata di ngoluna nang pe marhurajai angka parjahat, baliksa tahe lam magodang do serep ni rohana nang pe mangadopi na maol pola do so marhaujungan.

Ganup Psalmen, mamparbuehon pangalapation ni haporseaonna di ari naung binolusna i na mampanghorhon magodang di parbinotoan, pangantusion dohot panghaposion ni roha ni jolma i di Debata na sinombana mamungka sian angka ompuna si Abraham. On ma namamonai las ni roha siala namanjalo pasupasu sijaloon ni jolma namangulahon Patik ni Debata (umbidang sian Patik na sampulu i). Tardok do buku Psalmen martujuan manjouhon: ganup jolma na umbege huhut mameop angka ende Psalmen i dapotan tua. Ai digoari do jolma si songon i jolma na martua. Asa jamita i taringot tu jolma na mangeahi hatuaonna hombar tu suhat-suhat nihaporseaon na niuhal sian Hata ni Debata do sijalahan.

Rimpun nihatorangan on, Psalmen ima karya sastra puisi na ginurithon ni angka pande bisuk ni halak Israel na marojahan tu realitas na nialaman jala nahinangoluhon ni bangso i sandiri maradophon pangaramotion ni Debata. Dipandohan nuaeng, didok ma muse buku Psalmen on doksologi lapatanna: ende-ende, tangiang, pujipujian (himnus), hamauliateon ala las ni roha, olopolop (sukacita), nang panindangion haporseaon tu Debata, boi do nang isi ni tehilim/doksologi i “andungadung (ratapan)”. Sandok sude Psalmen i mangondolhon “pujipujian, andung (ratapan) tu Debata na badia jala na songkal saleleng ni leleng na.

II. Hatorang Ni Turpuk dohot Impolana

1. Sian Salelengnilelengna ro di Salelengnilelengna do Debata (ay. 1-2)

Psalmen on berisi tangiang dohot panindangion ni si Musa tentang Debata dohot manisia. Komposisi songonon naeng mangajarhon hita ia tangiang dohot panindangion ndang holan pabotohon aha na naeng tapangido sian Debata, alai pabotohon ise do Debata jala ise hita jolma. Molo nunga sintong pangantusion taringot ise do Debata, boi ma hita mananda ise do dirinta di adopan ni Debata. Natinompa ni Debata do hita, na terbatas jala mardosa do hita jala alani i ma ta porluhon do Asi ni roha ni Debata di ngolunta siganup ari.

Di ayat na parjolo didok do si Musa on “naposo ni Debata” na sejalan tu buku 5 Musa 33:1; Josua 1:1. Di tangiang na on, disadari si Musa do ia saluhut angka na porsea tu Debata Jahowa digoari ma i gabe naposo ni Debata. Di ayat 1b-2 digombarhon do ia Debata do haporusan nasida. Jala nunga adong hian Debata, tagan so tubu dope angka dolok, tano dohot portibion. Nunga adong hian Debata sian salelenglelengna ro di salelenglelengna. Alai dang holan i, dihatindangkon do disi Debata ma haporusan nasida (tempat perteduhan mereka).



2. Debata na Tongtong (kekal) dohot Jolma na Terbatas (ay. 3-4)

Di ayat 3 didok “gabe orbuk do jolma i” na pataridahon na ingkon mulak do jolma i muse gabe orbuk. On ma parsatongkinan ni jolma i. Orbuk i sebagai gambaran parsatongkinan doi. Ndang adong jolma nuaeng on na boi menentang kodrat on. Na menarik dison didok do anggo hamatean ni jolma i di tangan ni Debata do. On ma kekekalan ni Debata. Umbahen i ingkon bergantung tu Debata do jolma i. Keterbatasan ni jolma i tung kontras do tu kekekalan ni Debata. Molo di Debata ibarat sadari do 1000 taon i, jala songon sada gansi parjaga di borngin. Di hatiha i disurathon bukku Psalmen 90 on, tempo kehidupan uju i tung mancai lambat do. Aktivitas di mulai sian pukul 6 pagi sahat tu pukul 6 botari. Sadari di nasida holan 12 jam do. Sada gansi parjaga sarupa ma 3-4 jam. Jadi molo nunga didok 1000 taon berarti nunga tung macai leleng bei. Alai na 1000 taon i holan sadari doi di Debata. Debata tongtong sadarion ro disaleleng ni leleng na (Maha kausa (Omni Potent), Maha hadir (Omni Present), Maha tahu (Omni Science).

3. Parsatongkinan do Ngolu ni Jolma, Alani Ingkonma Bermakna jala Bernilai (ay. 5-6)

Di ayat 3 nunga taida bahwa terbatas do anggo hita jolma. Alai dang holan sementara, parsatongkinan do ngolu ni jolma i. Dibaen parpsalmen on do ilustrasi laho manggombarhon parsatongkinan ni ngolu ni jolma. Ngolu ni jolma di ibarathon songon korban banjir (ay. 5a: Engkau menghanyutkan). Molo nga ro banjir na bolon, maup do sude jolma i jala mate. Ilustari na mangihut ima songon duhut-duhut na melus dibagas sadari molo disabi. On ma gambaran ni waktu na singkat (Jes. 40:6-7; Jak. 1:10-11). Hatiha i, di zaman ni Parpsalmen, kondisi ni ari tung mancai mohop do jala gabe hatop sude mahiang.

III. Aplikasi

Hamu angka dongan sahaporseaon, marhite turpuk on naeng mangajarhon tu hita ia parsatongkinon do ngolunta on, umbahen i ingkon tapangke ma ngolunta on laho mengulahon hata ni Debata. Ingkon marbisuk ma hita mamilangi angka ari-arinta. Molo tabereng ditingki taon 2020 na salpu godang na masa di ngoluni jolma, pandemi covid-19 na godang mambaen jolma mate alani virus, ekonomi na merosok, godang na di PHK sian parkarejoan, dohot lan na asing. Nang pe gok angka parungkilon na ro tu hita, alai marhite pangurupion ni Debata boi do saluhutna ta adopi. Tapangido ma tu Debata dibagasan tangiangta asa diajari hita mamilangi ari-arinta songon tangiang ni parpsalmen on. Mamilangi ari-ari on marlapatan ma on mengevaluasi manang menilai parngoluanta. Songon dia do ngolunta di bagasan sataon bolon on, ia ta parhaseang do tingkinta, manang dang adong hal na positif na ta ula. Dongan sahaporseaon tapangido ma tu Debata asa dilehon tu hita bisuk laho memaknai parngoluanta on.

Molo ta parrohai jala tabilangi ariarinta di portibi on, boi do hita jolma mambaen sada progres tindakan:

1. Kurangi! Mangorui, manghurangi sude dosa nang hasalaanta. Hita jolma hobby mambahen dosa, mambaen marsak dongan jolma, jala rutin taulahon on. Molo tabilangi ariarinta di portibion, ingkon do adong sada komitmen didirinta, komitmen mangulahon na sintong hombar tu lomoni Debata, dohot hasintongan ni Debata. Martangiang hita asa dilehon tu hita gogo dhot bisuk na sian Tuhan i.

2. Tambah! Lam ganda habengeton dohot habonaron na ta ula di ngolunta. Ta tambai ma parange na denggan, marsiajar laho mangantusi jolma (memahami orang lain, rasa empati), marsiajar menghargai dongan jolma. Selanjutna aha taulahon, ima mambagihon.

3. Membagi! Mambagi angka hasurungan na adong dihita, misal ilmu, contoh yang baik dan benar, dohot lan na asing.

Dongan sahaporseaon, marhite bisuk na sian Debata, boi ma hita mangulahon, mananda dalan hasintongan ni Debata, jala dang be manambai angka parungkilon hita alani pelanggaranta sandiri. Marhite bisuk na sian Debata, gabe disadarhon do hita bahwa sude keterbatasan jala parungkilon na ro i gabe sada parsiajaran jala ajakan tu hita asa marpangunsadean holan tu Debata hita. Amen.