Minggu, 24 Desember 2021 (Borngin Natal) - Mundosaragi

 

Minggu, 24 Desember 2021 (Borngin Natal)

Evangelium : Psalmen 147:1-11

 

MARENDE MA HAMU DI DEBATA

I. Patujolo

Ia Psalmen ima buku na marisihon angka ende manang karya sastra. Hata Psalmen na marharoroan sian hata Heber ‘Tehillim’ marlapatan pujipujian manang sian hata Gorik ‘Psalmoi’ na marlapatan angka ende na diiringi dohot alat musik. Somal do di tradisi Hajahudion molo mamuji Debata mardonganhon iringan alat musik. Alat musik mangihuthon tradisi nasida memiliki peranan penting di ulaon parugamoon nasida. Mangihuthon pandapot ni pigapiga pande bisuk, buku Psalmen on digurithon songon dalan pamujion tu Debata marhite ende dohot tangiang sian par-Psalmen na manggombarhon panghilalaan nasida manang naniadopanna pe. Ndada holan ditingki las ni roha alai dohot do ditingki arsak na tinaon nasida asa tongtong mamuji Debata. Na gabe sungkunsungkun di hita : “Boasa mamuji Debata?” alusna ima ala panandaon na tangkas taringot tu habalgaon, hagogoon nang hasongkalon ni Debata dibagasan ngoluna. Ditanda Bangso Israel do Debata sian angka pambahenanNa di ngolunasida siganup ari. Di haradeon ni Debata mangula, mangaramoti dohot marmudumudu ngolu ni bangsoNa dohot ngolu ni saluhut na tinompaNa, laos huhut do i marlapatan haradeon ni Debata patandahon diriNa. Panandaon ni jolma di Debata holan ala haradeon ni Debata patandahon diriNa. Asa, panandaon i pe silehonlehon ni Debata do i na patubu roha mauliate. Turpukta on ima ende pujipujian na somal diendehon di partangiangan bangso Israel, laho manghatindanghon asi ni roha ni Debata mamasumasu

II. Hatorangan Ni turpuk

Dimulai si Daud turpuk on dohot pandohan “Halleluya! ai denggan do endehononhon Debatanta, ai hasudungan do Ibana tama papujipujion. Hata “halleluya” marharoroan sian dua hata Heber ima: Hallelu-yah, hallel namarlapatan pujima, jala “yah” ima hapendehan ni sian hata Yahwe, jadi halleluyah namarlapatan pujima Jahowa. Molo tarajumi do habadiaon dohot hagogoon ni Tuhan i, tontu sahali patut ma hita mamuji pasangap goarna nabadia i.Pamujion tu Tuhan i ndang diolati holan di sada ruangan manang holan dibagasan parpunguan, misalna; partangiangan, parmingguon dohot angka punguan na asing. Alai lobi sian i, disaluhut gulmit ni parngoluan ni nasa na marhosa ingkon mamuji pasangap Tuhan i. Boi hita mamuji pasangap Debata sian saluhutna roha, molo boi hita marnida habalgaon dohot hagogoon ni Debata, jala boi taida saluhut denggan basa ni Debata dingoluntaon na Ibana na mangalehon saluhut na adong di hita, disi ma tarida pamujion na marsitutu jala na haruar sian ungkap ni roha. Asa molo songonon do pamujion i, ima na ni dokna, pamujion songon tanggapan ni saluhut pambahenan ni Debata di hita jolma, di pamujionon ma tarida tangkas songon dia do ungkapan hamauliateon ni rohanta di Debata, dohot sihol ni rohanta di Debata laho marsaor dohot Ibana. Tangkas ingkon ingotonta do, ia ende pamujion i, ima; ungkapan pengakuan ni haporseaonta di Tuhan i. Songon na dihatindangkhon psalmen di pambahenan ni Jahowa, dinapauli Jerusalem (2).

Jahowa do pasabam angka parroha na bojok, jala dililiti angka bugangnasida (Ayat 3). Diurupi Debata do saluhut angka na paroha na bojok, na gale. Dienet sian angka parsorion ni ngolu. Ditungkoli angka na naeng tinggang. Tinggang di parngoluon siapari, tarlumobi na tinggang di haporseaon. Molo pe sipata ro angka na borat di sitaonon ni jolma (pardagingon nang partondion), tongoson ni Debata do pangurupion di tingki halehetanna be. Di 1 Korint 10:13 didok hata ni Debata; Holan pangunjunan na patut di jolma do naung mangonai tu hamu. Haposan do Debata, ndang loasonna hamu unjunan lobi sian gogomuna; Ibana na parohon pangunjunan i, laos Ibana do mambahen hapateanna, asa tartaon hamu. Alai pandonganion ni Debata ndang na marlapatan gabe dao angka hamaolon dohot parsorion ni ngolu. Alai dipasahat Debata do gogo laho mangadopisa, laos i do pos ni roha manghabengethonsa. Molo ro sitaonon i, ingkon taonon do. Gogo do sipangidoon sian Ibana.

Ayat 4 - 5 : Dihatindanghon raja Daud : Timbul (Ibr.: gadol; Yun.: megas; Ing.: great; Jer.: groß) do Tuhanta I jala pargogo situtu, ndang habilangan parbinotoannai.. Molo timbul (balga; mega) sude nasa galaksi na adong di tanda jolma nuaeng, umbalga (untimbul) sian i dope Jahowa. Molo timbo langit papituhon, untimbo sian i dope Jahowa. Molo hadodoan do hatimbulon ni Jahowa, ndang be natumimbul Jahowa. Ala na so hadodoan i do hatimbulon ni Jahowa umbahen Ibana natumimbul sian saluhut na adong naung tinanda dohot na so tinanda ni jolma dope, termasuk sian akka pinardebata ni akka jolma.

Ayat 7 – 11, Mansai borat do pangkilalaan ni halak Israel tingki tartaban di Babel. Direhei angka halak do nasida, jala didok ma, ”Endehon hamu ma di hami sada ende sian Sion.” Alai ndang lomo be roha ni halak Jahudi marende, ai nunga dilengsehon Jerusalem, huta hasurungan ni nasida. (Ps. 137:1-3, 6) Gabe marmetmet ni roha do nasida jala porlu diapuli. Songon na disurirangkon, urupan ni Jahowa do bangsoNa marhite Raja Sirus sian Persia na manaluhon Babel. Didok si Sirus do, ”Ibana [Debata] marsuru ahu pajongjong di Ibana sada joro di Jerusalem. . . . Manang ise nuaeng sian hamu, sian bangsona, sai didongani Jahowa, Debatana, ma ibana asa nangkok!” (2 Kron. 36:23). Diapuli Jahowa do bangso Israel. Diparrohahon do nasida ganup marsadasada. Suang songon i ma tu hita saonari. Dilehon do tu hita bisuk dohot gogo asa boi manaon hasusaan Dilehon Jahowa do haluaon tu na lambok roha”. Dihaholongi Jahowa do hita jala sai rade do Ibana mangurupi hita. Jahowa do pahehehon angka na nirupa. Songon dia do asa marlaba pangurupionNa tu hita? Ingkon togu do paralealeonta tu Ibana. Alani i, ingkon unduk do rohanta. (Sep. 2:3) Halak na unduk roha mangasahon Jahowa na laho manalpuhon sude hajahaton dohot sitaonon. Lomo do roha ni Jahowa tu halak sisongon i.

III. Sipahusorhusoron

Jotjot do tapuji sasahalak ala denggan hata manang ulaonna. Tarlumobi ma tu Debata Jahowa, taronjar do rohanta laho mamuji Ibana! Tingki taida tompaanNa, tarida ma Ibana pargogo na so hatudosan. Dilehon do anakNa laho manobus hita, na patuduhon holongNa na mansai balga. Nungga dipaluah Debata bangsoNa sian habuangan di babel jala di pangido tu nasida asa tontong manghantindangkon pambahenan ni Jahowa di parngoluan nasida marhite mangendehon asi ni rohaNa. Asa dohot nang hita paluaonNa marhitehite ulaon ni Jesus Kristus i. Ala ni i, di borngin Natal on marlas ni roha ma hita, ala nunga masuk tu bilangan ni angka na pinalua ni Jesus Kristus i hita. Ndang holan i tahe, sihalashononta do tong na dung dipalua Debata hita angka bangsoNa ia na tinuju ni Debata parohon Jesus tu portibion marhite na tubu sian Tondi Porbadia i ma laho pabotohon dohot pasauthon sangkapNa nauli i do, i ma: Ibana, Debata rap dohot hita di ngolunta di portibion. Jala i do didok Tuhanta Jesus tu angka siseanna di abad parjolo uju mangajari nasida Ibana sahat tu nuaeng marhite hataNa na tarsurat di Matius 18: 20: "Ai anggo pungu dua manang tolu pe marhitehite goarHu, sai dongananku do nasida." Dung malengse pe bagas joro ni Debata di Jerusalem di taon 70, ondol ma tu angka siihuthon Jesus na di bagasan Jesus rap dohot hita do Debata. I do haporseaonta umbahen tahaporseai jala tahaposi na rap dohot hita do Debata di gareja nang di angka inganan asing ni gareja di borngin on di na tapuji goarNa. Uju dipaborhat Ibana pe angka siseanNa di abad parjolo nang dung i manorushon ulaon mamaritahon barita nauli didok Ibana do tu hita: "Ai idama, sai na dongananku do hamu ganup ari, rasirasa ro ajal ni hasiangan on" (Mat 28: 20).

Di Malam Natal sadari on, dipabotohon do tu hita nunga saor be tu hita tu sipaluai, so tung ditulak roha dohot pingkiranta Ibana. Torop do sadarion manghalashon Natal alai ndada diboto dia do tapuonna sian Natal i. Molo sidung natal, sidung ma las ni rohana, sidung ma parsaoran, jala mulak muse songon halak na so mananda panondang i; tubu ma ragam sahit, tubu ma ragam sipingkiron. Torop do halak na holan merayakan holan marningot tubu Tuhan Jesus secara fisik; marningot haroro ni SIpaluai i tu portibi secara fisik, alai ndada manjanghon haroro ni Sipaluai i tu bagasan roha manang pingkiranna. Nunga marhapal jala marbatu be sipareon dohot roha ni torop jolma laho manjanghon Hata ni Jahowa tu roha nang pingkiranna. Tatanda ma Debata jala angkuantama ulaon ni Debata di ngolunta, songgon Raja Daud. Ngolu dohot parange ni ngolu na songon i do na pinatupa ni angka na manomba Debata sitolusada i di pardalanan ni huria ni Kristus sian abad na parjolo sahat tu saonnari: Mamuji-muji, pajojorhon, paboaboahon, parataratahon, mangolophon, mamujimuji, mangendehon hadirion, ulaon, pambahenan, asi ni roha, hagogoonna, hatutimbul ni goarNa, habalgaon ni ulaon ni Debata di hasiangan on, di ngolu ni hajolmaon saluhutna dohot marsada-sada. Selamat natal ma di hita. Amen.