Evangelium : Filemon 1:8-17
MANGOLU SONGON KELUARGA NI DEBATA
I. SIBONSIRI
Oscar Wilde hea do mandok, “Setiap orang suci memiliki masa lalu dan setiap orang berdosa memiliki masa depan” artina sude do jolma nampuna masa lalu. Jala hombar tusi do isi ni surat ni si Paulus on na dipasahatna tu si Pilemon ima anak rohani na. Surat on bersifat pribadi do jala digurithon di tingki di bagasan penjara dope si Paulus hatihai. Pilemon sahalak keluarga na mamora do on sian Gorik (Yunani) na marhuria di huria Kolose, jala gabe pasu-pasu do hatihai ngoluni keluargana marhite na dipelehon bagasna gabe sada parpunguan di parmingguon ala so adong dope gedung gereja hatihai.
Uju so pajumpang dope si Paulus dohot si Onesimus, sasintongna si Onesimus sada hatoban do manang parkarejo di joloni si Pilemon. Alai marhite nahurang denggan angka pangalahoni si Onesimus gabe lari ma ibana sian jolo ni si Pilemon. Jala ala naung ditinggalhon ibana si Pilemon gabe pajumpang ma ibana dohot si Paulus. Marhite parjumpangan ni ibana do dohot si Paulus gabe mananda ibana tu Jesus Kristus laos gabe maninggalhon ulaonna na so suman manang gabe marhamubaon ma ibana. Turpuk on sasintongna manaringoti parngoluon ni na tolu halak on do, laos na tolu halak on rap sian masa lalu (latar belakang) naso denggan be hian do ngoluna. Alai tarida do holong ni roha ni Kristus tu nasida na tolu marhite angka pertobatan ni nasida. Ndang pe maribar be naisida saluhutna alai gabe “Tarida Do Ngolu Nasida Songon Keluarga”, jala gabe keluarga rohani do nasida di bagasan Kristus.
II. HATORANGAN
Parasi roha do Jesus Kristus tu saluhutna jolma, ima na gabe ojahan ni jamita di bagasan tingki on. Alai na gabe sungkunsungkun manang si rimanganta ima, tu jolma nasongon dia do Jesus Kristus marasi roha? Marhite turpuk on patar ma idaonta na asi do roha ni Jesus tu angka na serep marroha dohot tu angka jolma na manghaholongi dongan na jolma.
I. Parasi Roha Do Jesus Tu Angka Jolma Na Serep Marroha (8-14)
Molo tapaihutihut do pardonganon manang parsitandaan ni natolu halak on memang rap adong do angka hubungan nasida. Si Paulus hubungan na tu si Pilemon marhite dongan saulaonna jala si Onesimus dohot si Pilemon ima marhite induk somang dohot hatobanna alai molo hubungan ni si Paulus dohot si Onesimus marhite anak rohani do. Sada nilai kekristenan na dipatuduhon si Paulus di turpuk on marhite haserepon ni si Paulus maradoppon si Pilemon. Na marpangidoan ibana tu si Pilemon asa paulak on na muse si Onesimus tu si Pilemon. Tarida do serep ni rohani si Paulus marhite pangidoan na i na mansai ondol sian serep ni roha. Molo mangido si Paulus sian segi jabatan ndang sala ibana manuru si Pilemon asa diulahon saluhutna angka na pinarentahonna. Alai ndang dipatuduhon si Paulus i maradoppon si Pilemon tetap do ibana marpangidoan tu si Pilemon di bagasan haserepon jala ndang manuru tarsongon sada pimpinan. Umbahen didok si Paulus do di ayat 9 i alai ala ni holong ni roha i, tagonan ma au mangelekelek. Di patangkas si Paulus do pandohanon na mangelek tu si Pilemon di ayat 10 na mandok asa huelekelek ma ho, alani anakkonku si Onesimus na hutubuhon di na tarihot on ahu.
Tarida do muse hasereponni si Paulus marhite na marpangidoan tu si Pilemon na olo do ibana pabotohon songon dia sebenarna kondisini si Onesimus. Ala tangkas do diboto si Paulus songon dia parbadaan dohot parlari ni si Onesimus sian si Pilemon hatihai. Jala hasereponni si Paulus tarida mai muse marhite na olo ibana lebih mementingkan donganna daripada dirina sandiri. Umbahen sampe tarhataon si Paulus di ayat 13 i “naeng do nian tioponhu ibana, asa singkatmu ibana patureturehon ahu di na tarrante on ahu ala ni Barita na Uli i”. Rumingkot do nian sian segi kebutuhan ni si Paulus di bagas penjara di jolona si Onesimus, alai dang diharingkothon ibana i, ala rumingkot do rap dohot si Pilemon si Onesimus mangulahon angka ulaon panghobasion.
II. Parasi Roha Do Jesus Kristus Tu Angka Jolma Na Manghaholongi Donganna Jolma (15-17)
Di boto si Paulus do sebenarna songon dia parbadaan ni si Pilemon tu si Onesimus. Jala diboto si Paulus do songon dia sogo ni rohani si Pilemon tu si Onesimus. Kemungkinan besar na tong do adong jarak hubungan di nasida hatihai, umbahen sampe didok si Paulus ndada be naposom ibana alai ingkon lobi sian naposom. Marhite i do umbahen na pola di bagasan haserepon ni roha si Paulus mangidohon asa dijangkon muse si Onesimus dohot denggan. Asa unang adong be di nasida hubungan naso denggan alai ingkon manian denggan jala uli muse parsaoran ni halaki na dua. Jala asa ditinggalhon nasida angka namasa diangka naung salpu namamboan nasida gabe tu parsaoran naso denggan. Adong do didok si Paulus muse tu si Pilemon di ayat 18 i “alai molo tung adong salana manang utangna di ho, tu au mai rajumi” marhite i boi ma tabereng songon dia sebenarna sihol ni rohani si Paulus tu hubunganni si Pilemon dohot si Onesimus asa denggan. Pola do ditaruhon si Paulus dirina sandiri lao mananggung sude hasalaan dohot harugian nabinahen ni si Onesimus. Mansai arga hian dohot holong hian rohana di donganna.
Sada sikap na pinangido ni si Paulus muse sian si Pilemon ima na ikkon jaloon na muse si Onesimus lobi sian naposona. Artina na ingkon salpuhonon na sude angka hassit ni roha manang ndang boi adong dendam ala ni parsoalan nasida najolo. Jadi diarahon si Paulus do si Pilemon marhite surat pribadina on asa denggan dohot ingkon haholongan na si Onesimus. Asa marhite hasadaon di nasida boi denggan nasida mangulahon angka panghobasion nasida muse songon na dihasiholi si Paulus umbahen sampe ditongos ibana si Onesimus asa adong donganni si Pilemon rap manghobasi. Jala pola do jumolo dipingkiri si Paulus panghobasion ni si Pilemon sian mangkobasionna jala ala ni i do umbahen dikirim si Onesimus, hape ibana sandiri mamorluhon tenaga ni si Onesimus dope lao mangurupi angka na dihaporluhon si Paulus di bagas penjara.
III. HAHONAAN
Di zaman sonarion godang do jolma na salah mamakke angka jabatanna. Adong do jolma nuaeng on mamakke jabatanna gabe sada cara lao menindas angka jolma na asing manang bawahanna. Jala terkadang somarimbar be di gereja dohot angka di parkantoran, ima dang adong be holong i di pimpinan sipata lao memimpin angka bawahanna. Marhite i porlu do hangoluhonon ni sude jolma turpuk on asa diboto lao paturehon sikapna dinalaho memimpin angka bawahanna. Mansai uli do parsiajaranta sikap ni si Paulus on dinamangkobasi huria ni Tuhan i hita di partingkian nueng on. Ndang holan dolong tu napinarmahanna manang dongan na saulaon alai diupayahon do lao padamehon angka naung na so mardomu (hubungan na retak). Sude hita ruas nang pangula ingkon padamehon do ndang mambahen parbadaan apalagi pabadabadahon. Asa tapataridahon naung tajalo asi ni roha ni Kristus ingkon ngoluta pe patupahon angka ulaon parasinirohaon ma tu angka dongan.
Ringkot jala denggan do sihangoluhononta turpuk jamitaon. Jala marhite turpuk on gabe dapotma alusni angka sungkunsungkun ni rohanta taringot asi ni rohani Kristus tu hita. Marhite turpuk on hangoluhononta ma dua point na gabe panimpuli ni jamita on.
1. Mangolu songon keluarga ni Debata ingkon di bagasan hasereponni roha. Sude do jolma manghaporluhon haserepon alai dang sude jolma manghangoluhon. Alani di tingkion diondolhon turpuk on do tuhita asa mangolu di bagasan haserepon tarsongon na pinatuduhon ni si Paulus. Porlu hangoluhononta songon haserepon ni si Paulus gabe bentuk manang rumang ni hasereponta tu angka na tahobasi manang tauluhon baik dari segi jabatan, umur dohot angka tutur. Ingkon manian tarida haserepon ni rohanta tu donganta manang tu angka natahobasi. Mansai jotjot do nuaeng on jolma mamakke jabatan na gabe sada cara laho menindas na ditoruna. Alai turpuk on mandok ingkon di bagasan haserepon do hita manjangkon angka na ditorunta ala marhite haserepon i gabe pasu-pasu ma hita tu angka dongan dohot na ditorunta. Bahkan olo mangorbanhon dirita asa denggan natahobasi i.
2. Mangolu songon keluarga ni Debata di bagasan holong tu donganta jolma. Diondolhon si Paulus do asa haholonganta angka donganta manang halak namaralo tu hita (alonta). Taridamai dipangidohon si Paulus tu si Pilemon asa dihaholongi si Onesimus na sebenarna sahalak namansai dihasogohon si Pilemon. Godang do nuaeng on terjadi tarsongon hubungan ni si Pilemon tu si Onesimus on adong masa lalu mambahen mago holong manang gabe ndang masiantoan be ala adong hian sibonsirna. Alai marhite turpuk on tahangoluhon ma holong ni Kristus naung tajalo i asa holongi ma na mangarajai hita ganup gabe boi patupaonta holong ni roha tu donganta dohot tu angka namanghasongohon hita pe. Amen.
){kind=link}
Post a Comment