Minggu, 5 Desember 2021 (Advent II) - Mundosaragi

Minggu, 5 Desember 2021 (Advent II)

Evangelium : Lukas 3:1-6

PAUBA MA ROHAMJALA PARADE MA DALAN DI TUHAN I

Sibonsiri

Tomat, ima istilah namagombarhon sahalak jolma na marlomolomo mangulahon dosa dungi di bagasan neang ni rohana mandok, “akh, toema. Ari minggu manopoti dosa do muse”. Lapatanni istilah on, ima “TObat kuMAT”. Hinorhonni i, gabe holan formalitas sambing do anggo parminggion. Ima jotjotan namasa di hita halak Kristen na parminggu alai ndang marsitutu pauba rohana. Adong muse halak Kristen KTP. Holan di KTPna Kristen, alai tu parmingguan pe so ra olo. Adongma hatana mandok, “marumpak annon gareja i, molo marminggu au”. Gabe hata rehe do didok. Bangkol do rohanta, paubahon roha hinorhonni angka namasa diparngoluan on. Toe alani angka parhepengon, parumahtanggaon, dohot angka hal-hal sosial bermasyarakat gabe sibonsiri di hita laho marjogalni roha maradophon Debata. Ndang naso tuk Debata mangurupi hita sasintongna. Marhuaso do Ibana patupahon angka halongangan di bagasan ngolunta. Alai hinorhonni pardosaonta, tartutupi do huasoni Debata i namambahen lam mandao hita sian Debata, jala gabe marhaposan digogonta manang parbinotoanta sambing ma hita. Bahkan hita pangasahon haportibion i gabe haposanta. Tung bangkol situtu do tahe hita paubahon roha molo dung di situasi songonon. Alai tung ipe, taringot tu na paubahon roha, gabe parsiajaran do sejarahni Bangso Israel na paiuhutihut Debata nabinaritahonni si Johannes pandidi. Songon turpuk ni jamita on, marbarita do si Johannes tu angka natorop i taringot tu napubahon roha mamutik sian panghataion ni panurirang Jesaya. Asa dungi dididi ma nasida songon tanda di nasida na olo paubahon roha. Hita pahombar ma muse tu parngoluan ni halak Kristen si nuaeng on, asa unang gabe halak Kristen na tomat manang ktp hita, tapaihutihut majo hatorangan ni turpuk on.

Hatorangan

Johannes pandidi, ima anak ni si Sakaria. Inongna margoar Elisabet. Songon naung pinasahatni surusuruani Debata, ima si Gabriel tu si Sakaria, ia si Johannes na binagabagahonni Debata sorang di tongatonga keluarga ni si Sakarias dohot si Elisabaet gabe patujoloni haroroni Tuhan Jesus ro tu portibi on marhite keluarga ni si Jusuf dohot si Maria. Digomgom tondi ni Debata do anggo si Johannes laho manghobasi di na patomutomu haroroni Tuhan Jesus ibana (bnd. Lukas 1: 17). Ia tanda ni panghobasionni si Johannes ima pandidion. Ai didok do, “Gabe didok si Johannes ma mangalusi nasida: Ia ahu aek do hudidihon; alai nunga jongjong di tongatongamuna Ibana, na so tinandamuna i.” (Johannes 1: 26). Ndang marsitandaan dope atihai si Johannes dohot Tuhan Jesus, alai hombar tu naung disuriranghon tu dirina, ingkon baritahononna jala hatindanghononna do taringot tu dirina, na ingkon paradeonna dalan tu Tuhan Jesus. Nata pe di atihai, nungga tung mansai tarbarita panghobasion si Johannes, namambahen sungkunsungkun rohani na torop i, ise do si Johannes. Alai ndang dipangke kesempatan i, laho patandahon dirina sebagai sipalua manang mesias. Dibahen i, sai diondolhon ibana do na holan patujoloni sipalua i do ibana, umbahen marbarita. Tung na serep marroha do tahe si Johannes. Jala sahalak pengembara do ibana, na pasidinghon dirina sian angka haportibi on. Sian rumangna pe tahe boi do botoonta, ia paheanna pe sian imbulu ni unto. Sipanganonna pe angka sihapor dohot situak ni loba (bnd. Mateus 3: 4). Lapatanna di si, tung disuarahon si Johannes pe taringot tu na paubahon roha songon na di turpuk on, ala naung parjolo do ibana pauba rohana sian angka roha portibi.

Suang songoni nang panurirang si Jesaya. Turpuk napinutik ni si Johannes sian bukuni panurirang Jesaya, ima ayat 4-6 sian Jesaya 40: 3-5. Bindu 40 sahat tu 55, ima nanigoaranna buku Deutro Jesaya, manang buku ni si Jesaya napaduahon. Ia buku on secara husus ma on ditulishon si Jesaya tu bangso Jehuda di tingki habuangan Babel. Mansai parir situtu do ngoluni nasida di tingki habuangan i. Punjun do panghilaan ni bangso i atihai, magopu, ndang marpanghirimon. Di bindu 40-48, dibagabagahon Debata ma marhite si Jesaya haluaon tu bangso. Marhite barita haluaon i, naeng parade diri ma bangso laho manulingkiti rohana be asa marhamubaon. Habuangan Babel, gabe parhiteon ni Debata ma on, laho manghajar huhut mangajari bangso i, asa satia namarDebata. Sian roha napunjun jala partondian na putus asa, manang naung magopu panghirimon ni nasida, didok ma di Jesaya 40: 1, “Apuli, apuli hamu bangsongki, ninna Debatamuna.”. Hata apul-apul ma parjolo dipasahat si Jesaya tu bangso, asa mulak ma panghirimon nasida. Jala manongtong rohana tu haluaon nanaeng sipasahaton ni Debata tu bangso i. Lumobi ma muse taringot tu ondolan ni hasehaanni dosa ni bangso i. Dibahen i, marhite hata surirang naung sinuriranghon ni si Jesaya, mulak ma hasadaron ni nasida, asa diingot nasida ma angka tutur dohot hata ni Debata naung sinahaphon Debata tu angka ompung ni nasida hinan. Jala, porlu situtu do bangsi i manopoti dosa, hasalaan, dohot pangalosion ni nasida tu adopan ni Debata. Dungipe, margogo ma nasida laho parade diri huhut paulihon dirina be laho maimaima haluaon na sian Debata.

Haluaon naminaksud ni panurirang Jesaya di turpuk on, ima haluaon ni bangso i ruar sian tano habuangan Babel i. Dibagabagahon Debata ma tu bangso i, namulak ma nasida tu Jerusalem manaripari rura, dolok, dohot angka buntulbuntul. Sarupa ma i songon parrohaion ni bangso i, songon rura, dolok, dohot angka roha namarbuntulbuntul. Dibahen i, ingkon pahornopon ni nasida do i, asa bulus ma ro asi ni roha ni Jahowa maradophon bangso. Parenta ma on di bangso asa hobas jala marsitutu ma nasida di na paubahon rohai. Totalitas do nasida manghalaputhon i, sahira napahornophon angka rura, dohot patigor dalan. Jala, laos on muse songon gombaran pardalanan ni bangso, asa di na manaripari angka dalan sisongoni i pe bangso i, sai na donganan ni Jahowa do bangso i. Jadi mangarade ma bangso i diparrohaion, jala mangarade ma tong bangso di pamatang. Ai jarak, pardalanan ni nasida mulak tu Jerusalem, tung mansai dao do, jala gok do angka rura nang dolok pe. Asa dungi, marsangap ma Jahowa di bagabagaNa i, dihapapatarni huasoNa tu bangso i. Alai dung di putik si Johannes turpuk on, jala diulahi mandok taringot tu ayat on, gabe tubu ma muse pandohan bahwasana bagabagani Debata ma on muse tu saluhut bangso, naeng ro Sipalua, ima Tuhan Jesus Kristus. Songoni ma nang di situasi ni saluhut bangso, marmula ma i di aek Jordan. Marbarita ma si Johannes tu saluhut natorop asa paubahon rohana be dohot dinamanopoti dosana, ima parhiteon pangaradeion ni diri laho manjanghon haroroni Tuhan Jesus Kristus, sipalua i. Pardosaon dohot pangalosion ni saluhut jolma tahe, sarupa do i di adopan ni Debata. Dibahen i, turpuk ni ayat na niputik ni si Johannes na sian buku ni panurirang Jesaya, marondolan dope i di situasi ni bangso Israel atihai, masa ni si Johannes. Bahkan, sahat tu si nuaeng on.

Kalimat paubahon roha dohot hasesaan ni dosa, na nisuarahon ni Johannes marlapatan ma i, songonna pahornophon rura nang dolok jala patigor dalan. Ima songon na naung pinatorang di ginjang. Paubahon roha, dipaantus ma i tu bagasan bahasa Indonesia namarlapatan pertobatan. Di bagasan bahasa Gorik di dok Metanoeo, lapatanna manolsoli diri hinorhonni pardosaon manang maninggalhon dosa. Molo didok bertobat, berarti haputusan na mansai ringkot jala ingkon di bagasan roha na marsitutu do hita mangulahon i. Songon dia ma i, ingkon totalitas do hita maninggalhon ngolu naburuk i ima pardosaon, tu ngolu naimbaru ima habadiaonni ngolu. Mangarade diri, ima sada tahapan tu hamubaon ni roha asa dungi tagam ma hita manjalo haluaon na sian Tuhan Jesus Kristus. Saurdot ma i, tu hasadaran ni diri na mandok pardosa do hita. Sian hasadaran ni diri i ima, boi lam hita padenggan parangenta songon dalan paubahon roha manang bertobat sinangking. Ndang masa pertobatan molo so mangarade do hita laho pasadarhon dirinta sipardosa. Jala ndang masa hasesaanni dosa molo so olo do hita bertobat. Molo ndang sesa dosanta, berarti ndang tutu hita boi manjanghon Jesus i di bagasan ngolunta manang manjalo haluaon i sian Ibana. Sian on muse botoonta, ndang na mamungka naimbaru be hita laho mamasuhi ngolu na imbaru i. Ai nungga diparade Debata hinan i, marhite Tuhan Jesus Kristus. Dibahen i do di dok pahornophon dohot patigor, marlapatan ma i na olo do hita paulihon dalan i, jala dipauli. Paulihon asa gabe uli. Molo dung gabe uli, berarti ndang marisuang alai gabe arga. Dungi pe, pertobatan i mamboan hita tu ngolu na arga do, ai arga situtu do hita di tobus Tuhan Jesus Kristus, ima naung hita pauli dalan dohot inganan di Ibana di bagasan ngolunta namarhaimbaru on i. Jadi, rap paulihonsa do hita dohot Debata marhite Tuhan Jesus. Hita pauli dalan tu Debata, jala laos Ibana muse paulihon hita, ima pertobatan i.

Hahonaan

Molo tung pe alani parngoluan na mansai susa dohot alani parungkilon hita mardosa, di si naeng botoonta, ia Debata satia do tongtong patupahon hasesaanni dosa di hita. Mungkin salahi songon rura dohot dolok namarbuntulbuntul parungkilonta i, sai na tuk do Debata pabulushon i di hita. Ai saleleng hita di tano on, sai jotjot dope hita diunjuni (diuji). Mungkin haporseaonta di uji asa lam tu torasna, manang bangko ni pangalahonta na tangkang i asa gabe lambok. Dibahen i, molo na totalitas pe hita maninggalhon dosa, butuh proses do i. Alai ndang na gabe marlomolomo hita mangulahon dosa. Na ro pe hita manopoti dosa tu adopan ni Debata sada partingkian do i laho manolsoli dosantai asa dungi disesa, dungi dipauli ma hita. Songonima satorusnya jala torus ma marhaimbaruon. Isarana songon namarsiajar manulis bukku. Olo do hita sala manulis, dungi hita hapus. Bahkan olo do jotjot hita sala manulis muse, dungi hita hapus. Alai, ndang na gabe holan dilembaran parjolo torus hita sala dungi hita hapus. Ingkon adong do perobahan. Na sala i boi do i dihapus, alai ingkon maju do torus hita tu lembaran paduahon, semakin denggan, maju ma muse tu lembaran berikutna. Manang songon sorha ni padati namardalan tu jolo. Marputar do sorda on, sipata tu ginjang sipata tu toru, alai torus maju tu jolo. Songoni ngolunta do hasiangan on, sipata do hita madabu tu dosa, alai ingkon ingoton do hehe jala tongtong maju tu jolo.

Jala taringotni Kristen tomat dohot KTP. Porlu botoonta, naringkot do na tu parmingguan i. Soal belakangan do i molo tung masa pe angka persoalan di gereja. Unang gabe hita uhumi gareja i hinorhonni angka persoalan i. Masa panopotionni dosa tu hita, sabotulna paingot hita do i tu lapatanni gereja. Gereja ima halak na bertobat; ruas natarjou sian hagolapon (pardosaon) tu hatiuron (habadiaon) di bagasan huasoni Tuhan Jesus Kristus. Songon naung nidokna di ginjang, molo tung pe sian masa ni panurirang Jesaya turpuk on, sahat tu si Johannes, sai tongtong dope i marsaringar tu hita asa tongtong hita satia paubahon roha. Lumobi di masa Adven II, lam hita solsoli ma dirinta na hurang i, asa adong hasadaranta laho paulihon ngolunta na gabe inganan ni Tuhan Jesus Kristus, na tapaimaima i. Patar do hamulionna di hita marhite hasesaan ni dosa. Dibahen i lam ingotma hita diburjunai. Unang gabe Kristen tomat. Satongkin bertobat alai satongkini nungga kumat. Ndang saguru di dirinta ngolunta on. Nasa na targoar Kristen, bertanggung jawab do hita mempertanggung jawabhon hakaristenontai di adopan ni Debata. Laos dibahen i, ndang holan Kristen KTP hita, alai lumobi sian na di KTP i. Di bagasan huasoni pandidion i, nungga tarsurat nasa goarnta di banua ginjang. On dope na porlu sipertanggung jawabhonnta di ngolunta on. Dang tarlambat dope, ai panghirimonta jala sihangoluhononhon sebagai halak naporsea, nungga sesa dosanta dibahen Debata marhite Tuhan Jesus Kristus. Nungga dipauli be ngolunta jala laos dipauli do muse inganan di hita di na laho masuhanta banua ginjang i. Saonari, sai olo ma hita mangolu di dalan naung hita pauli di Debata asa manongtong Ibana pauliulihon hita jala asa tongtong ma hita marhaimbaru on. Amen