MINGGU SEPTUAGESIMA 13 FEBRUARI 2022 Evangelium: Jeremia 17 : 5 – 10 Martua Do Halak Namangasahon Jahowa

Tung torop do sian pangisi ni Juda na mangkirim di hatiuron laho manalpuhon kemerosotan moral saleleng 60 taon. Panurirang Jeremia sian sada keluarga ni malim na di Anatot (Jer. 1:1). Tontu diajarhon natua-tuana do tu panurirang Jeremia taringot tu angka uhum ni bangso Israel, taringot tu penindasan agama dohot angka ajaran ni panurirang Jesaya dohot angka panurirang na asing di taon-taon/abad na salpu. Hurang lobi 40 taon si Jeremia manurirangi dompak Israel sian na dijou Debata ibana uju marumur 13 taon di pamarentaon ni raja Josia (tahun 626 sM) sahat tu hadadabu ni Jerusalem di taon 587 sM.

Di tongatonga ni zaman na lumlan do dijou Debata si Jeremia. Tongon tarhapit bangso Israel secara politik di gomgoman huaso ni harajaon Asyur. Ala kepentingan politik, gabe disoadahon angka panggomgomi ni bangso i do ugamona/haporseaonna tu Debata Jahowa. Laho do nasida mambuat roha ni Asyur, marhite na masa i olo ma Israel marsomba tu debata Baal ni Asyur; di bagas joro pe dipajongjong ma langgatan pamelean tu debata Baal ni halak Asyur. Lam leleng gabe lam lumlam pangalaho, merosot ma moral, lumobi partondion ni bangso Israel; ndang diharingkothon be parange na denggan na hombar tu Patik ni Debata. Marlaok angka ilmu sihir, ilmu gaib dohot parmainanon/persundalan suci nama diulahon bangso i. Udut ni muse ala kepentingan politik, gabe laho do nasida mangido pangurupion sian militer ni Misir. Ndang Debata Jahowa ni ompunasida be dihaposi, nunga gogo ni hoda ni Misir; tung ditadingkon jala ditundalhon nasida ma Debata Jahowa.

Di keadaan na songon i ma dijou Debata si Jeremia. Jala ulaonna i ma laho patubegehon hatani Debata, mangulahon ulaon ni panurirang, laho paubahon roha ni bangso i, jala patuduhon tu nasida sipilliton/pilihan: Olo paubahon roha asa malua, manang torus manundali Jahowa,di ujungna hona rimas ni Jahowa.

Ajaran na mansai arga do dipabotohon di turpukta on. Pamaritaon i mangajarhon jala paingothon asa unang sala marpangkirimon (menaruh harapan) tu jolma dohot tu manang aha pe na so sintong na so patut parbagahononhon uju di bagasan hasusaan. Tapaihut-ihut ma mpangajaran na diajarhon di turpukta on :

Parjolo, Marjea ma baoa na marhaposan tu jolma, manang tu bolon ni botohonna. Didok Debata nasida ‘marjea’ ala marhite pambahenan sisongoni marlapatan do i na manorui jala menghina Debata. Dosa aha do na mambahen marjea disi? Dosa ‘marhaposan tu jolma’, marpos ni roha tu bisuk dohot huaso ni jolma, haburjuon dohot hasatiaonna, hape angka sifat na sisongoni nampuna ni Jahowa Debatanta do jala haporseaon i holan tu Ibana sandiri. Dosa na mambahen marjea i ima marpangidoan tu dongan jolma jala patimbohon pangkirimon marhite na mambahen ibana/jolma i gabe pelaku utama, hape alat manang parhitean ni Debata do jolma i laho dalan pangurupi. Ndang jadi bahenon ni jolma na tinompa gabe Debata di hita. Halak na marhaposan tu jolma boi do idaon songon na jonok tu Debata marhite pamanganna. Didok do na marhaposan jala marhaporusan tu Debata, alai sasintongna mandao do roha nasida sian hasintongan ni Debata.

Paduahon, dia ma jeana molo marhaposan tu jolma? Didok do di ayat 6: Songon halak parbahudung di tano na mahiang do ibana, ndang margogo, ndang mararga jala ndang marguna/marlapatan. Saluhut angka las ni roha na mambahen gabe jut ni roha, jala mago ma pangkirimonna. Maheu, loja ni roha ala dipadege-dege jolma na dihumaliang ibana. Ndang tagamon idaonna ro na denggan, jala maringanan ibana di tano bangkal-bangkal di halongonan. Uju manggotil donganna jolma, ndang adong diha-dinana digotilon. Saluhut halak na marhaposan tu jolma dohot dirina sandiri jala na mandok ndnag agi mahua hami molo so mardonganhon Debata ndang tagamon nasida marparbue ngolu dohot manjalo pasu-pasu na paluahon ngoluna.

Patoluhon, kewajiban na dituntut Debata sian hita ima Marhaposan tu Jahowa¸mandalanhon kewajibanta holan tu Ibana jala marsigantung tu Ibana asa margogo mangulahon kewajiban i. Molo tung pea dong angka tompaan na asing na mangoto-otoi, margabus manang mangulahon na jahat dompak hita, ingot ma marhaposan tu Jahowa huhut marhaporusan di Ibana na tuk paluahon hita sian gomgoman ni jolma dohot hagogoon ni portibi. Halak na marhaporusan tu Jahowa tudos do ibana tu hau na sinuan di topi ni batang aek, hau na denggan na diramoti jala tubu di tano na denggan. Jala manjarar uratna di lambung ni batang aek, patuduhon na so jadi holsoan nasida, sonang jala dame di roha nang pingkiranna. Martua jala marlas ni roha ma nasida dibagasan roha jala denggan di mata ni halak. Angka jolma na marhaposan tu Debata dapotan hilas dohot las ni roha ma dihumaliang nasida, songon hau na marbulung rata. Marparbue na denggan ma ngolu nasida di bagasan habadiaon. Manontong ma nasida mangulahon ulaon hamuliaon di Debata, las ni roha di dongan jolma jala marguna tu dirina sandiri.

Ayat 9 mandok “Tung na angkal situtu do roha ni jolma, jala na ganggu, tung ise ma na tuk mandodoisa?” Sintong do hata i. adong do angkal di bagas roha ni jolma na so tasadari jala ndang tacurigai maringanan di bagasan rohanta. Jala somal do angka jolma mangulahon hasalaan na manganggap dirina sandiri lobi denggan sian keadaan ni ngolu nasida na sasintongna. Manang angkal na songon di ape masa di bagas roha ni jolma, diida jala diboto Debata do. Debata do sidodo roha. Marlapatan ma I, diboto Debata do saluhut na di bagas roha, pingkiran, na terlintas di roha, sangkap ni jolma, jala niat-niat tung pe songon dia malo ni jolma manabunihon na di rohana sian donganna jolma, alai anggo Debata di boto do saluhutna. Boi do holip sian jolma, alai ndada songoni angka di Debata. Didok hata ni Debata do, jaloon ni jolma do tumpalna hombar tu na niulana, pasupasu tu angka na mangoloi Debata jala jea tu angka na so mangoloi Ibana. Ido umbahen holan Debata do na gabe Panguhum, ala Ibana, ndada na asing, na mangantusi, mandodo isi ni roha ni angka ianangkonna.

Martua do jolma na marhaposan tu Debata Amanta i, nasa jolma na marpangkirimon tu Debata Jahowa do na dapotan pangkirimon di nasa parsorion nasida, ndada rihit na gabe haojahan ni na manghaposi Tuhan debata. Baliksa, marjea do jolma na mambahen donganna jolma manang gogo ni portibi on gabe haposanna. Arsak do na ro molo mangasahon botohon. Holso ni roha do na ro molo sai mangasahon hapistananna sandiri. Taida ma, molo sai holsoan do jolma di ngoluna, diama gunana? Holso na sai taholsohon, gabe patubu holso na imbaru do. Lam ganda do arsak dohot holso ni roha molo holan na holsoan. Saleleng so olo jolma i rot u adopan ni Debata pasahat saluhut boban ni rohana, sai mian ma boban na borat i di ngoluna, sai hansit ma tanggurungna binahen ni ragam sipingkiran molo holan dirina dipangasahon, gabe disoadahon do huaso ni Tuhanta.

Sasintongna, sian mula ni hasiangan on, tung soadong do jolma na mangolu na so adong parungkilonna dohot sipingkirinna. Alai dia ma na diula jolma? Olo do nasida mangasahon gogo dohot pingkiranna sambaing, hape tangkas diboto ndang dihalomohon Debata sisongoni masa. Margogo pe jolma i, na dipargogoi Tondi ni Debata do. Sian turpuk jamita on boi idaonta parsiajaran na mansai arga na pinatupa ni Debata marhite bangsoNa. Ingkon pasabam roha do jolma I marunduk ni roha di Debata. Debata do na mamboto saluhut na ringkot di ngolunta. Diboto Debata do halehetanna mambahen angka si las ni roha, ditongos do na denggan andorang so ditagam jolma i. Unang ma dok diroham’ditadinghon Debata do au di haporsuhonku’, ndada tadighonon ni Debata jolma na mambahen Ibana haposanna. Idama hinadenggan ni pambahenan ni Jahowa, longang do sogot hita paida-ida huasona na marmulia i. Dibahen i, haporseai ma Jahowa Debata sian ias dohot unduk ni roha, burju ma mangulahon hata dohot lomo ni rohaNa, ihuthon ma pandokna jala haposi panumpakNa, angka jolma na manghaposi Tuhan Debata ndang jadi tartading ibana. Tuhanta ma mamasumasu jala mangaramoti hita. Amen!