MINGGU JUDIKA 3 April 2022 Evangelium: Pilipi 3:4b-14
Mangauhon Panjouon Ni Banua Ginjang
I. Patujolo.
Ia panurat ni surat Pilippi, ima Apostel Paulus, na nihirim tu huria Pilippi, andorang di hurungan Roma Ibana tingki i. (Ulaon ni Apostel 28:30). Jongjong Huria Pilippi, di tingki di pardalanan pangkobasionna napaduahon. (Ulaon ni Apostel 16:1-40). Dipandidihon Sipaulus do si Lydia dohot dongan sajabuna di Pilippi ujui (Ulaon ni Apostel 16:14-15)
Parngoluon ni partondion ni halak Pilippi ujui marangkup do tu angka ajar-ajar ni portibi on. Di somba nasida do kesar (Julius, Agustus, Claudius), Debata ni halak Misir, Isis, dohot Serapis, daohot angka debata na leban na asing.
Alai huria pilippi burju do mangalean dirina tu Harajaon ni Debata, songoni nang memelehon si nadonganna laho tu pangkobasion ni si Paulus. (2 Korint 8:1-5). Hombar tu panindangion ni si Paulus taboto do haburjuon ni huria Pilippi na marulakulak laho manuppahi ulaon ni si Paulus. (Fil 4:15-18)
Ia Surat on, ginurathon ni si Paulus tu huria Pilippi laho paboahon baritana di bagasan hurungan (1:12-26), dohot paboahon tahi manang sangkapna dung ruar sian hurungan (Fil 2:23-24). Pasadahon haporseaon nasida dibagasan Jesus Kristus (2:1-18; 4:2-3). Alai tarlumobi di bindu 3, tangkas tarida tahi ni si Paulus laho patoguhon haporseaon nasida sian angka pangajarion namambahen tu haliluon. (3:2-3).
II. Tafsiran
Songaon sada halak Jahudi si tutu appostel Paulus andorong so niulahon Ibana pangkobasion, togu do ibana mangihuthon sude uhum ni halak Jahudi. Ido umbahen na alo ibana tu ajaran ni Kristus di mula na i. ido umbahen di dok ibana musu ni Kristus (4-6). Sude na di pangasahon na hian, hape magopo so marlapatan, ala so dietong Debata songon sada haboran sude nadipangasahon ni ibana di hajahudion na i. dang adong jolma na bonar mangasahon gogona sandiri. Dung di tanda ibana Jesus, sude nanipangasahonna sian hajahudion ni ibana hian gabe orbuk so marlapatan (ayat 8)
Ayat 9, Asa di bagasan Ibana ahu didapot, unang ma marhatigoran sian patik, tung sian haporseaon di Kristus do, i ma hatigoran na sian Debata, na marojahan di haporseaon. Songon sada pamumu na paluahon hosanna sian namangaluluhon hosa nabinununa tu huta haporusan (4 Musa 35:25). On ma sada tudosan di hita, dipanguhuman ni Debata sogot, na ingkon mardame do hita dohot Ibana asa boi tapalua hosanta hamatean. Tung na mate do hita molo jonjong hita di adopan ni hamuliaon ni Debata, ala jolma naung mardosa do hita. Alai ala naung maporus do hita tu Tuhan Jesus gabe dapotan haluaon hita. Si Paulus mandok, asa dibagasan Jesus imana, dapotna ma haluaon. Dang marhite hatigoran ni patik, alai marhite mudra ni Jesus (Roma 3:25)
Di ayat 10 di dok : “asa hutanda Ibana dohot hagogoon ni haheheonna i, ro di hasasaor tu angka haporsuhonna, di na gabe sapangalaho ahu dohot Ibana di hamamatena i;” Mananda Jesus Kristus lapatanna, mamboto lomo ni roha ni Debata, tau uhum dohot holong ni roha ni Jesus Kristus sian angka jamita na uli, mangoloi dohot mangihuthon lomo ni roah ni Debata. Mangulahon nasa pinangido ni roha ni Debata dibagasan haporseaon. Mananda huaso haheheonna sian hamatean (Filipi 3:10), lapatanna, mangoloi pangimbaruon ni ngolu asa malua sian hadosaon (Rom 6:4; Epesus 1:18-1-20). Ro di hasasaor tu angka haporsuhonna marlapatan, massoadahon diri laho manuhuk silang jala na olo manaon haporsuhon alani Jesus Kristus laho mambaritahon harajaon Na i (Pilippi 1:29; Ul 9:16; 1 Kor 15:31; 2 Kor 4:10; Gal 2:20)
Haheheon sian angka na mate, di ayat 11 manghalumbahon tu namasa sogot di ari parpudi di ngolu ni portibi on. Nanaeng si hatahon ni si Paulus di ayat on, ima upa ni halak naung mangoloi manuhuk silangna, gabe dapotan jambar hangoluan si saleleng ni leleng na (Roma 8:17).
Najolo, nuaeng, sogot. Sude jolma do mangolu di bagasan tolu tingki: najolo, nuaeng dohot sogot. Si Paulus mandok: ‘Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i” Andehon ma sude parulaonmu nadenggan manang na roa tu Tuhan Jesus. Ta eakhi ma harajaon banua ginjang, ima tu hangoluan sogot na saleng ni llelng na.
III. Hatorangan.
Tujuan ni ngolu ni halak Kristen ima, hangoluan na saleleng ni leleng na rap dohot Jesus Kristus di banua ginjang. Ala ni i, tung salhut jolma ikkon paubahon diri na maninggalhon nasa dosa dohot hisaphisap ni dpamatangna. Manadingkon angka parngoluon na na salpu naso tama di adopan ni Debata. Mangolu di bagasan parsaoran dohot Tuhan Jesus. Asa ta pandang situjuon ima Tuhan Jesus Kristus (ayat 4-7). Si Paulus, andorang so mananda Kristus satia do ibana tu uhum ni halak Jahudi. Nabisuk do ibana di parugamoan ni halak Jahudi, tarsunat, jala halak sipandangon do ibana di Israel sian marga Benjamin. Tangkas do ibana halak Heber, Parise , jala sipusa halak namarhaporseaon tu Kristus. Tar sar do goarna halak napistar jala na barani. Alai dung jumpa ibana dohot Kristus, gabe marbalik do rohana manghaholongi Kristus. Jadi sipararat ibana do Barita Nauli tu godang bangso dohot roha na marsitutu. Di soadahon do dirina dohot hosana, laho mangoloi Tuhan Jesus asa pararathon barita na uli i. Ido sada panjou on tu dirina, di olio ibana do i, asa sahat ibana tu hangoluan na salelng ni leleng na.
Jamitaon paingothon hita, asa tabahen apostel Paulus gabe sada tudosan di bagasan ngolunta. Naung tarjou do hita asa gabe sada parjambaron dohot sude halak naporsea asa masuk tu harajaon banua ginjang. Di bahen i, tatinggalhon ma angka parulaonta na so hasea di angka ngolunta naung salpu. Ta eak hi ma hangoluan naimbaru na marpangkirimon. Tabuahai ma i sian panandaion di Jesus Kristus dibagasan roha na marsitutu sapanjang hita mangolu di tano on.
Tema di hita di bagasan minggu on, ima: “Mangauhon Panjouon Ni Banua Ginjang”. Aha do lapatan ni panjouon ni Banua Ginjang? Ima panjouon tu hangoluan nasalelngni lelengna, panjouan asa masuk tu sangkap ni Debata, panjou on tu parsaoran dohot Kristus, jala panjou on tu pangkobasion laho mamaritahon barita na uli. Dang sude panjouon i sarupa tu ganup jolma. Di si ma hita ikkon mananda, mamboto dohot mangantusi panjauon ni Tuhan di bagasan ngolunta. Tung arga si tutu do panjouon i. pardalanan ni ngolu ni jolma, di totophon marhite-hite panjouon di bagasan ngoluna. Molo halak naso porsea, mardalan ma ibana tu panjouon ni portibi na pasombu hisaphisap ni dagingna. Alai angka naporsea i, di olo i do panjouon ni banua ginjang laho massoadahon dirina, manuhuk silang asa pamuliahon Jesus Kristus dibagasan ngoluna dohot di tongatonga ni jolma.
Boha do laho mangauhon panjouon ni Banua Ginjang?
1. Marsitutu di bagasan haporseaon paboa naung nitobus Jesus Kristus hita
marhite-hite mudarna.
2. Mananda panjouonta sian mula na i andorang so jinadihon dope portibi on (Epesus 1:4)
3. Manghirim di jambar naung pinarade ni Jesus di angka namangoloi ibana.
(Pilippi 3:14 Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i.
4. Mandok mauliate.
Alai na tama do hami tongtong mandok mauliate tu Debata marningot hamu, ale angka dongan, na hinaholongan ni Tuhan i, ala dipillit Debata hamu sian mulana, asa saut hamu malua, i ma marhite sian Tondi na pabadiahon dohot haporseaon di hasintongan. (2 Tesalonika 2:13)
Di timgki on, di paingot do hita laho mangauhon panjouon ni banua ginjang. Ta alusi ma nian marhitehite hata nang pambahenan na mangoloi panjouon i. Tahi manang sangkap ni Jahowa di mula na i, ima asa marsaor hita dohot Ibana, jala manghobasi jala marhalado tu Ibana. Amen.
