MINGGU OKULI 20 MARET 2022 Epistel : Jesaya 55 : 6 – 9 - Mundosaragi

 

Marhamubaon Asa Unang Mago

I.          Patujolo

Buku Jesaya marisi 66 bindu jala adong 1292 ayat, ondolan buku Jesaya ima : Uhum dohot haluaon na sian Debata manang uhum dohot holongniroha ni Debata. Ia panurirang Jesaya mangolu dibagasan opat raja ni Israel ima : Uzia, Yotam, Ahas dohot Hizkia (Jes 1 : 1). Molo sian tradisi ni Jahudi, didok do panurirang Jesaya mate martir ni gergaji raja Manasye ianakon raja Hizkia. Panurirang Jesaya sandiri mengolu sezaman dohot panurirang Hosea dohot panurirang Amos. Molo niparateatehon buku Jesaya on boi didok tarsagi dibagasan tolu babakan ima : Situasi bangso Isarel andorang tarbuang manang didok proto Jesaya (1-39), situasi bangso Israel ditingki tarbuang tu Babel didok deutro Jesaya (40-55), jala situasi hamamulak bangso Israel sian habuangan manang digoari trito Jesaya (56-66).

 II.        Hatorangan Turpuk

Turpuk jamita nta sadarion ima dibagasan situasi hatiha bangso i tarbuang tu Babel. Tontu marasing do psikologis ni bangso i ditingki andorang tarbuang, dohot situasi psikologis ditingki bangso i tarbuang. Molo situasi psikologis bangsoi andorang tarbuang, ima ginjangniroha dohot tangkangniroha. Alai dung tarbuang bangsoi, dung diparhatoban bangso Babel mago ma ginjangniroha manang tangkangniroha, alai gabe tu pandelean situtu ma parohaion bangso i. Jadi, haroro ni hata ni Debata tu bangso i, hatiha nasida dibagasan pendelean situtu. Tontu, molo nta rimang-rimangi turpuk on, gabe boi ma antusan nta aha do sibahenon nta molo madabu hita dibagasan pandelean? Godang do jolma gabe lilu laos tu hamagoan siala pandelean, siala gabe dipadao ibana dirina sian Debata alani pandelean i. Alai ninna Debata dang songoni molo bangso ni Debata. Dipandelean ido ingkon lam luluonna Debata Jahowana, dipandelan ido ingkon lam gogo soarana joujou tu Debata. Boasa? Siala dang mago holongniroha ni Debata tu bangsoNa, nangpe ditingki diuhum Debata bangsoNa siala dosa nasida. Songon nanidok Debata : Ai nasa na huhalongi, angka ido Hupinsang jala Huajar. Antong haringkoton ma na paubahon roha (Pangk 3 : 19). Alani holongniroha ni Debata do asa pisangononNa bangsoNai, alani holongNa asa ido dihajar Debata bangsoNai. Jadi lilu do jolma molo didok, nungga diambolonghon Debata do au siala diuhum Debata ibana dipanglaho dosana. Alai na sintong, alani holongniroha ni Debata do tu hita, asa uhumonNa parange dosa nta i, asa jora hita patupahon dosa, siala diboto Debata do dang tarbongoti hita sogot Harajaon ni Debata molo so jora hita mangulahon dosa. 

Jadi uhumon Debata pe hita bangsoNa diangka pangalaosion nta, asa nta tadinghon do dalan hajahaton nta i, nta tadinghon angka sangkap hagedukhon nta i, mulak tu dalan i Jahowa. Ai tangkas do nta boto : Ingkon parjolo do adong panopotion ni dosa (hamubaon) asa tarjalo hita hasesaan ni dosa. Molo hita jolma sandiri dang olo manopoti dosa nta manang marhamubaoniroha, tung songondia ma carana nta jalo hasesaan ni dosa na sian Debata? Tontu lam antus ma hita antong saonari : Molo pe niuhum Debata ngolu nta marhitehite angka na masa, asa tu hamubaonniroha do maksud ni Tuhan i, ndada lao tu pandelan. Asai unang hita olo lilu, manang dipalilu sibolis siala na masa na ro tu ngolu nta. Ido boasa didok Debata : Sai lului hamu ma Jahowa binsan tarbahen dope jumpang Ibana, jou hamu ma Ibana bisan jonok dope Ibana (ay 6). Adong dua hal na ingkon siulahononta asa mardengan hita dohot Debata dingka hagogoton na masa, ima : Lului Jahowa dohot Jou Jahowa. Molo dihata Heber didok “darash” dihata Inggris “seek” namarlapatan mangolu biar mida Debata manang manghangoluhon uhum ni Debata.  Jadi mangalului Jahowa marlapatanma i ngolu biar mida Debata manang mangolu dibagasan uhum ni Debata. Jala hata manjou Debata dihata Heber didik “qara” dihata Inggris “call” namarlapatan manghatai dohot Debata manang martangiang.  Gabe antusan ma, dibagasan tangiang ido asa tarbahen jolmai satia mangaluli hasintongan ni Debata. Hombar nanidok ni Jesus : Dungo ma hamu jala martangiang, asa unang hamu bongot tu pangunjunan, ai girgir do nian tondi i, alai gale do ia daging (Mat 26 : 41).

Molo marsitutu do jolmai sian roha na ias, mangaluli jala joujou tu Debata, tarbahen jolmai do marhamubaon niroha. Ai ido nanidok Debata : Sai ditadinghon halak parjahat i ma dalanna, jala jolma pargeduk i angka sangkapna, sai mulak ma ibana tu Jahowa, asa marpangulahi rohana mida ibana dohot tu Debatanta, ai buas do rohaNa manelesei (ay 7). Jadi molo nirimangan bagas turpuk on, gabe boi ma antong antusan nta : Sasintongna dang adong jolma na so boi marhamubaonniroha, molo olo do ibana marsitutu mangalului jala manjou goar ni Debata. Alai jolma i do na so olo mamgotaphon dosa i, jolma i do na sai lomo rohana maniopniop dosa i. Asa i antar dialangalang jolma i rohana mangalului hasintongan Debata, dipamaolmaol jolmai dirina lao martangiang dalan manjou goar ni Tuhan i. Siala tangkas dipaboa turpuk on, ia Debata marpangulahi do rohaNa jala buas naeng mangelesi angka dosa ni jolma i. Jadi na umringkot dihita, nta tangkasi be ma dirinta ganup marsada-sada, haiason niroha nta dina arTuhan i.

Laos dipatandahon Tuhan i diriNa na mangatasi nasa natinompaNa, tarmasuk ma hita jolma, asa ido didok Debata : Ndada pingkiranKu pingkiran muna i, jala ndada jalan muna angka dalanHu, ninna Jahowa. Ai songon timbo ni angka langit sian tano on, songoni do tumimbo angka dalanKu sian dalan muna, jala angka pingkiranKu sian pingkiran muna. Ai songon timbo ni angka langit sian tano on, songoni do tumimbo angka dalanHu sian dalan muna i, jala angka pingkiranHu sian pingkiran muna i (ay 8-9). Jadi tangkas, dang sarupa jolma dohot Debata, nang diangka dalan dohot pamingkirion. Dao andul um timbo dalan dohot pamingkirion ni Debata sian hita jolma. Sipata, nta angkui jala nta parhatutu do umtimbo do dalan ni Debata jala umtimbo do pamingkiron ni Debata sian hita jolma. Alai boasa ma jotjotnai, hita mangalapati angka na masa ditongatonga ni ngolu nta sian dalanta, sian pamingkirionta jolma? Ima bisuk ni sibolis i lao paliluhon hita jolma marhitehite angka na masa, gabe lupa hita marpangunsandean tu dalan na umtimbo sian hita ima dalan ni Debata, sai tong marpangunsandean hita tu dalan nta hita jolma na so margogo. Tontu turpuk jamita nta on mangarahon hita, mandok : Asa mulak margogo tondim, jala mulak margogo pamatangmu. Sandok nasa na masa ditongatonga ni ngolum, unang rajumi jala lapati sian dalan hajolmaonmu asa unang lilu jala mandele ho disi. Alai sandok, nasa na masa dibagasan ngolum, rajumi jala lapati ma dibagasan dalan ni Debata, asa mangolu ho jala targotap ho hamatean na sisalelengnilelengnai.

III.       Refleksi

Goar ni minggu nta ima Okuli na marlapatan : Sai mangaranap do matanghu dompal Jahowa. Jala ondolan jamita diminggu nta on ima : Paubahon roha dalan mengotaphon hamatean. Aha do hamubaon ni roha nanidok turpuk nta on? Ima mangaranap dompak Jahowa. Boasa didok mangaranap dompak Jahowa ima hamubaoniroha? Siala molo didok mangaranap dompak Jahowa, marlapatan ma i : Mangoloi Debata, marsigantung tu Debata. Antong diarahon hita, asa nta tadinghon parange na so parduli diangka hata ni Debata, alai mamungka sadarion on, nta oloi ma hata ni Debata, nta oloi ma marsigantung tu Debata. Ai ido hamubaoniroha nta, ai ido okuli nta, na mangaranap dompak Debata.