MINGGU OKULI 20 MARET 2022 Evangelium : Lukas 13 : 1 – 9

Evangelium lukas marisi 24 bindu jala adong 1.151 ayat. Dibagasan buku nabadia i, adong dua buku na ginurathon si Lukas ima buku evangelium Lukas dohot buku Ulaoni Apostel. Lukas sahalak Gorik na porsea tu Tuhan Jesus, sian natarsurat i pinaboa ia Lukas ima sahalak tabib manang dokter molo dizaman nta saonari (Kol 4 : 14). Jala pinaboa natarsurat i, si Lukas ima dongan ni apostel Paulus dina lao marbaritanauli diluat Gorik (2 Tim 4 : 11, File 1 : 24). Gabe boi ma antusan nta, panadaion ni si Lukas tu Tuhan Jesus, ima sian baritanauli na pinasahat apostel Paulus. Dimulana buku na sinuraton si Lukas on ditujuhon tu halak non Jahudi, ima tu sahalak Gorik na margoar Theofilus (Luk 1 : 1-3, Ul Ap 1 : 1), jala sahat sadarion buku ni si Lukas gabe baritanauli tu sude halak na porsea. Asa pe disuraton si Lukas bukuna on, siala hatihai dizamanna gok maredar angka injil palsu na mamaritahon Jesus na palsu, lao paliluhon haporseaon halak na porsea. Tondi Porbadia mangokhi si Lukas lao manuraton barita na sintong taringot tu Tuhan Jesus, na mandok : Jesus do Debata na gabe jolma, sipalua i na binabaga-bagahon Debata sian padan narobi.

Turpuk jamita nta on, dipungka ditingki piga-piga halak Jahudi pasahaton barita taringot jorbut ni pangalaho halak Galilea, ima tu hasipelebeguon nasida. Alani jorbut ni pangalaho halak Galilea, gabe tarimas pangomgom Rom na disi na margoar si Latus. Pola didurushon si Latus mudar halak Galilea i, jala disaorhon si Latus tu mudar nipahan-pahanan na naeng dipelehon nasida tu hasipelebeguon nasida i. Siala songoni na masa i laos ima na gabe sihata-hataon ni jolma ditingki i, molo istilah dizaman nta gabe viral manang gabe tranding topik ma jobu nipangalaho ni halak Galelea i. Dipaboa halak Jahudi ma i tu Jesus, sai dietong rohana na ingkon dohot Jesus pahatahata jorbut ni pangalaho halak Galilea i. Alai dang songoni dibahen Jesus, gariada gabe pangalaho halak Jahudi na pahatahata hahurangan halak Galilea ido na pinisang ni Jesus, didok Tuhan Jesus : Na diagam roha muna do pardosaan halak Galilea martimbanghon saluhut halak Galilea, ala songoni diahap nasida? Hudok ma tu hamu : Dang anggo so muba rohamuna, laos songoni do hamu mago muse.

Sian hata ni Tuhan Jesus on, boi ma nta rajumi : Sipinsangon do pangalaho ni jolma, molo sai nihata-hata hahurangan donganna, holan lao pasombuhon tagasna, gari dirina sandiri pe gok do hahurangan. Hahurangan pangalaho dongan na tarbarita ndada lao dipahatahata, alai hahurangan angka dongan na tarbarita nipangke ma i lao tu hamubaon roha, lao tu parsiajaran asa unang diulahon sisongoni, ndada lao dipahatahata. Songon hata na bisuk na mandok : “Tung aha ma labana sai pasalah pangalaho dongan na salah, ai nungga tutu salah. Alai parange dongan na salah i, gabe parsiajaranma i asa unang diulahon be angka na salah i.” Ai na paroaroahon angka parange dongan na roa, ndada ulaon situnjang na galdap goarnai? Nungga galdap dongani siala parangena na salah i, alau tong dope nta tunjang ibana sian hatahata nta na jebujebuhon hahuranan dongan nta i? Tangkas dipaboa turpuk jamita nta on, ingkon sipinsangon ni Debata do angka pangalaho ni jolma sisongoni. Ido boasa didok Jesus muse : Manang dirimpu hamu anggo na sampulu ualu halak, na mate ditingang palaspalas na di Siloam, parsalaan sian sude pangisi ni huta Jerusalem? Hudok ma tu hamu : Nda tung anggo so muba roha muna, laos songoni do hamu mago muse. Adong sifat ni halak Jahudi, sahalak do na mangulahon na humurang alai ingkon rarat, ingkon marlea sude bahenon nasida sahuta manang saompung. Ra, adong dope sifat sisongoni dihita halak Kristen sahat dipartingkianon. Marsiajar hita sian turpuk jamita on, tontu boi ma buaton nta pangantusion partondion ima : Na so jadi alani hahurangan sahahalak, gabe rarat nta baen marlea sude halak. Molo so tarbahen hita lao paturehon hahurangan ni parange dongan, minomat gabe pangarajumion ma i tu hita asa unang nta ulahon parange na humurang i, alai unang pararat-rarat, ai uhuman ni Debata do pangalaho sisongoni.

Dungi asa lam torang, dibahen Jesus ma sada tudos-tudos tu angka nasida, ima sada umpama hau ara na so marparbue. Ima tarigot tu sasahalak na puna porlak anggur, jala tubu hau ara na sinuanna diporlak anggurna. Jadi ro ma ibana mangalului parbuena, alai dang jumpangsa. Gabe ninna napunasa porlak ima tu pangulana, taba ma i nungga pola patolutaonhon hulului parbuena alai laos so adong. Alai dielek pangula i ma tuanna mandok : Unang pola tuan nami, paloas ma sataonna i asa hupature hami laos hubahen hami napa dihumaliangna. Anggiat gabe olo marparbue tu joloanon, alai molo tong soada parbuena, tabaon ma. Sian umpama ni Jesus i, adong tolu figur disi ima : Tuan na puna porlak, pangula porlak dohot hau ara na so marboras diporlak i. Tuan na puna porlak i, ima Debata sitompa langit dohot tano on. Pangula i, ima Jesus sipalua jolma i, jala porlak ima HuriaNa ai didok natarsurat ido : Huria ni Tuhani do porlak ni Debata. Jala hau ara i ima hita jolma. Ia molo siala ni Jesus, ra nungga diusehon Debata nasa rimasNa lao mangaripashon hita jolma, na sai tongtong mangulahon dosa. Alai dibagasan Jesus i, gabe sai marpangulahi roha ni Debata i, gabe sabar Tuhan i lao paima-ima parbue haporseaon nta ditano on. Ido boasa didok dibagasan tarsurat i : Molo so dibagasan Jesus i jolma i, na ingkon sai maralo do ngoluna tu Debata na badia i. Alai molo dibagasan Jesus i jolmai, gabe dipadenggan, dipadomu jala dipasaor. Nang songon ngolu Huria i, molo nirajuman hata ni Tuhan Jesus dibagasan turpuk on, boi ma antusan nta : Ndada sude halak na porsea di tonga-tonga ni Huria mamparbuehon haporseaonna. Nta rajumi jala nta rimangi be ma ngolu nta, ganup marsada-sada. Hita do nanidok Haura ara na so marparbue i na tubu ditonga-tonga porlak ni Tuhan i? Molo tutu do ngolu nta do i, antong nta pauba be ma rohanta binsa tarbahen dope, binsan dang ro dope panabaion na sian Debata.

 Goar ni mingu nta sadarion ima Okuli na marlapatan : Sai tong mangaranapi matanghu tu Jahowa (Psal 145:15). Jala ondolan jamita nta ima : Paubahon Roha Dalan Mangotaphon Hamatean. Diondolan jamita nta on, hamatean nanimaksud ndada hamatean na ditano on, alai hamatean na sisaleleng nilelengna. Hamubaoniroha dihata Heber dipake hata “syuv” jala dihata Gorik dipakai hata “metanoeo” jala dihata Inggris didok “repentance.” Jala hamubaoniroha boi nilapatan ima : Haoloon na marsitutu manolsoli angka dosa, jala paubahon ngolu tu dalan ni Debata. Jadi hamubaoniroha ima roha na marbalik sian dosa gabe tu hasintongan ni Debata. Jala ondolan barita Harajaon ni Debata nabinoan ni Jesus ima : Pauba hamu ma rohamuna, ai nungga songgop Harajaon ni Debata (Mat 4 : 17). Jala tangkas pinaboa na tarsurat i, hamubaoniroha adong di jolmai dung oloanna mangalusi soara ni Debata na ro joujou tu bagasan ngoluna. Songon apostel Paulus, dung oloanna mangalusi soara ni Debata na manjou ibana, disi ma hamubaoniroha Paulus. Jadi dang tarbahen jolmai marhamubaoniroha molo sian gogona sandiri, ingkon begeonna jala oloanna hata ni Debata na ro tu nasida disi ma asa tarbahen jolmai marhamubaoniroha. Hombar tu goar ni minggu nta Okuli, sai tong mangaranap matanghu dompak Jahowa. Mangaranap mata dompak Jahowa, ima tanda haoloon ni jolmai naeng marsigantung tu Debata, lao dina mangaranap jolmai dompak Debata, disi ma dapotsa hamumaonirohana. Siala molo didok mangaranap matanghu dompak Debata, dos do i mandok : Oloanhu ma Debata, oloanhu ma marsigantung tu Debata. Jala dibagasan hamubaoniroha i do baritanauli i, jala dihamubaoniroha ido nta gotaphon hamatean na salelengnilelengna i.