JUMAT AGUNG 15 APRIL 2022 Evangelium: Jesaya 52 : 13 – 15

 

  Parungkilon Ni Naposo Ni Debata

1.         Tabe

Dame ma di hamu, huria ni Debata, na porsea di Jesus Kristus! Sadari on marpungu do hita patupa partangiangan di parningotan hamamate ni Tuhanta Jesus. Tongon do i di ari jum’at. Ala ni i do ari sadari on digoar “Jum’at Agung”.  Siala ni i hupasahat ma tabe tu hamu “Selamat Jum’at Agung”!

Ojahan ni jamita di hita saonari ima “Naposo Ni Debata Na Marsitaonon”. Jesus ima naposo ni Debata na marsitaonon. Ibana do na taingot di partangianganta on. Songon nidok ni endenta “Sai ingot Jesus Tuhanmi, sitaon godang na bernit” (BE.No.199:2).

 

2.         Sumalin Do Hinaroa Ni RupaNa

Ala ni sitaonon na mansai bernit gabe sumalin do hinaroa ni rupa ni Jesus. Na boi do roa rupa sian partubu. Alai hinaroa ni rupa ni Jesus ala na pinaroa ni angka jolma do. Sega manang rusak daging ni  Jesus ala na ginosagosa ni angka Tentara ni si Pilatus dohot angka halak Jahudi. Pardalanan na ganjang mamorsan silang, tijur, tali dohot pastappastap, linsing-linsing, sungsang duri, tolong dilibashon dohot panorusi ni angka labang ro di parsilangon, mambahen sega jala sumalin  hinaroa ni bohi dohot pamatang ni Jesus. Ndang rumang jolma be dapot di Ibana. Songon “halak-halak” nama Ibana idaon. Hampir dang dapot ditanda jolma Ibana dibaen hinaroana (pah. Jes.53:2-3). Dohot do sitaonon psikologis na mansai paet dibolus Jesus. Godang insak-insak, rehe-rehe, asup-asup tu Jesus, ro di na  mamahehon Jubah ungu rombengan dalan mangaleai, pailahon Jesus. Jala Jesus mate tarrajum tu halak parjahat (Jes.53:12). Hape ala ni pangalaosionta do marsitaonon Ibana (Jes.53:4-5).

Ise mambahen hinaroa ni rupa ni Jesus ima jolma parroha na roa. Jolma parroha na roa mambahen roa rupa ni halak. Jolma parpingkiran na sega mambahen sega rupa ni halak. Ise na paroahon halak, parroha na roa do i. Ise na pasegahon halak ido parroha na sega. On do panjouon ni Debata tu hita halak Kristen ima asa parroha na denggan parroha haserepon, parroha na burju. Tanda ni parroha na denggan ima mambahen denggan halak, jala parroha haserepon mambahen sangap halak. Ia parroha na burju mambahen maruli tua halak. Ndang jadi halak Kristen manginsahi, mangarehei, manijuri, mangaleai, pailahon jala manegai manang ise pe. Jamita taringot tu naposo ni Debata na marsitaonon mandok tu hita na so jadi mambahen halak marsitaonon. So tung hita mambahen roa rupa daging ni halak manang paroaroa karakter ni halak.

 

3.         Na Pistar Do Naposo Ni Debata Na Marsitaonon

            Di ayat 13 didok: “Idama na pistar do pambaen ni naposongku”. Pambaenna na dia do na pistar? Ima pangoloionna marsitaonon na pola mambaen sun hinaroa ni rupana (ay.14). “Dipasipal pe ibana, sai manaonnaon do anggo ibana, ndang manang mangkuling pamanganna, songon birubiru do ibana na tinogu tu pamotongan, jala songon anak ni biru-biru na hohom maradophon jolma sigusting ibana, tung na so dibungka do pamanganna” (Yes.53:7). Dalan marsitaonon ido dipillit Jesus. Ndada na so boi dipasiding asa malua gabe di dalan hamonangan na gok las ni roha (pah. Mat.26:53). Alai dipillit dalan i hombar tu lomo ni roha ni Debata (Mat.26:39). Ia di roha ni angka jolma manang portibi on, haotoon do i jala hagaleon (1 Kor.1:18). Ndang dapot roha ni jolma portibi on, molo sahalak Mesias marsitaonon. Di rohana, Mesias ima bebas sian sitaonon. Hape na pistar do pambaen ni Jesus. Ido hapistaran na mambaen Ibana berhasil. Dia keberhasilanna? Adong dua rumangna. Na parjolo, tarhinsat Ibana jala dipatimbo, gabe timbul situtu. Dipatutoru do dirina alai gabe dipatimbo Debata Ibana jala dibasabasahon Debata tu Ibana goar na sumurung asa nasa goar, somba tu Ibana nasa ulu ni tot jala nasa na marsoara marhatopothon Jesus Kristus do Tuhan (Plp.2:8-11).  Asa dang hea gagal pambaen ni Debata. Jolma do na gagal mangantusi pambaen ni Debata. Ndang hea tarambat dalan ni Debata, jolma do na so tolap mangantusi dohot mandalani dalanNa. Keberhasilan na paduahon dipaboa di ayat 15, urasonna torop angka bangso parbegu sogot, hohom be angka raja maradophon Ibana. Dung i halak na so dung panahatan ni barita i, nasida do marnida, jala halak na so dung umbegesa, ido mangantusi. Ai hagogoon ni Debata do barita na uli. Pambaen ni Jesus na marsitaonon i do barita na uli. Ima barita na uli na paluahon nasa na porsea (Rom 1:16-17).

Hamu dongan na hinaholongan! Ndang gabe marlea jolma na serep roha molo dipalealea halak. Ise na mangaleai, ido na lea. Rehe-rehe manang asup-asup ndang paoru sangap ni jolma na sintong jala na burju. Molo hot dibagasan serep ni roha, dibagasan hasintongan dohot haburjuon, manang aha pe dibaen halak paroaroahon, berhasil do hita di ujungna.

            Dalan sitaonon na binolus ni Jesus ima dalan tu keberhasilan. Ndang tarambat ni situasi dohot kondisi aha pe huaso ni Debata. Huaso ni hamatean do sungkot ni huaso ni sibolis dohot banuatoru alai taluhonon ni Jesus do nang i. Asa manang aha jala manang songon dia pe dalan sibolusonta molo tapasahat tu Jesus, ture do bahenonNa. Via dolorosa manang dalan sitaonon ala ni Kristus marhapatean tu keberhasilan. 

Ala pangalaosion dohot hajahaton  ni jolma do umbahen marsitaonon Jesus, asa malua jolma i. Ima hapistaran ni Jesus, naposo ni Debata. Angka naposo ni Debata di tingki on dijou marpambaen na pistar. Pambaen na pistar do molo marsitaonon naposo ni Debata demi haluaon ni halak. Tung na pistar do ise na rela marsitaonon laho manghophop na marpangalaosion jala na jahat asa malua. Ido tanda ni naposo ni Debata. Mangihuthon data Almanak HKI taon 2021 adong 913 jemaat ni hurianta HKI di 14 Daerah, tamba ni angka Jemaat dohot Pos Pekabaran Injil (Pos Zending). Gabe huria na pistar ma sude huria HKI, ima na so mambaen donganna sahuria marsitaonon alai baliksa olo marsitaonon laho mambaen donganna i malua jala martua. Huria ni Debata do HKI.  Tutu na boi do masa parsoalan di tonga ni huria. Na boi do adong parasingan ni pandapot manang pingkiran ni marsasahalak manang marhoronghorong. Jala ndang jaminonta paboa tanda ni huria na sintong, na badia ima na sama sekali ndang adong permasalahan. Alai molo sada huria na marbolat ndang olo marsada, molo sada huria na marbada ndang olo mardame, ndang tutu i huria ni Debata. Molo sada huria HKI pola martaon ro di martaon-taon lelengna sai marbolat, marsoal-soal, marbada, songon dia ma i huria ni Debata?

Huria HKI na pistar marhasil do. Sada huria na dibagasan parbolatan marsada ma. Sada huria na di tonga ni parbadaan mardame ma. Ido huria HKI na marpambaen na pistar.  Ido huria ni Debata. Tarhinsat ma hurianta HKI, dipatimbo, gabe timbul situtu baenon ni Debata. Amen.