KAMIS PUTIH 14 APRIL 2022 Evanggelium: 1 Korint 11: 23 – 34

Parningotan di Panghophopon Ni Kristus

1.        Parpadanan Nabadia/ Perjamuan Kudus dimulai di borngin Parpudi andorang so tarsilang

       Tuhan Jesus.

Di borngin Parpudi andorang so tartangkup   jala   mate tarpajal Tuhan Jesus dihau parsilang,  dipatupa do Perjamuan malam  rap dohot angka siseanNa. Tangkas do i tarsurat di buku evanggelium Mateus 26: 26 – 29; Markus 14: 22 – 25; Lukas 22: 15 – 20. Dipabotohon do disi, dibuat Jesus ma roti, dipasupasu, diponggoli ma i, dungi diparlehon ma tu siseanNa hudut didok: “ Jalo hamuma, pangan hamu, dagingku do on. Dungi dihindat ma panginuman i (anggur)  huhut didok: “Sude ma hamu manginum sian i, Ai mudarHu do on, mudar parpadanan i, na niusehon humophop torop bahen hasesaan ni dosa”. Di turpuk jamita sadarion   tangkas do dipabotohon, ia parpadanan Nabadia/ulaon na badia songon na pinatupa ni Tuhan Jesus uju i, rap dohot siseanNa, na ingkon patupaon ni si i huthon Jesus !

2.        Na parsidohot di ulaoan nabadia taruli di haluaon i.

Di parpadanan nabadia i, ia  roti dohot anggur ima singkat ni daging dohot mudar ni Kristus do i nilehonNa  humophop jolma  pardosa. Na  marlapatan do i, marhite na manganhon parpadanan i, saluhut dosanta  diburi Tuhan Jesus.  Marhite i  ma  gabe  taruli  hita  dihaluaon i, haluaon sian gomgoman ni dosa  i, gabe mardame hita dohot Ama  i,  jala marhite i ma hita partohap nang di hangoluan na salelenglengna    na pinaradeNa di surgo i.

3.        Parsidohot di Parpadanan Nabadia, mangoloi Tona ni Tuhan Jesus

       (Ay. 22).

Manorushon ulaon Parpadanan Nabadia songon na   pinatupa ni Tuhan Jesus uju i rap dohot siseanNa, dipasahat Tuhan Jesus tu sisean asa dipatupa sisongon i, bahen parningotan jala parataratahon taringot tu   haradeon ni Tuhan Jesus patupahon hasesaan ni dosa diangka na ro, dibagasan roha na magopu jala manolsoli dosana, huhut mangan dohot minum sian parpadanan na badia i. Dihalomohon Jesus do na mangoloi tona manang parentaNa mangulahon Parpadanan na badia i.

4.        Na  mangulahon Parpadanan Nabadia,  na mamaritahon hamamate ni

     Tuhan Jesus do i, rasi rasa  ro Ibana ( ayat 26)

Dipatangkas do muse dison, ia parpadanan nabadia i, hamamate ni Tuhan Jesus do na binaritahon disi.  Ai hamamate ni Tuhan Jesus di hau parsilang i do dipake Debata, laho patupahon haluaon. Asa ndang sihailahonon barita taringot tu hamamate ni Tuhan Jesus. Ai hamamate ni Tuhan Jesus ido puncak ni pengorbananNa laho manobus   jolma pardosa. Jala tangkas do taboto, ndada na marujung dihamatean i Tuhan Jesus, hehe do Ibana manaluhon hamatean i, jala na manaek tu banuaginjang. Na ma imaima do hita di haroroNa laho mangalap na porseai di haroroNa paduahalihon i.

5.        Boha do pangalaho manang sikap  ni halak na manjalo parpadanan na

       badia (ayat 27 – 34).

Na marpardomuan tu na patupahon Perjamuan   di huria na di Korintus, tarbege do tu apostel Paulus, na jotjot masa di huria i angka pangalaho na so  patut di na patupahon perjamuan. Isarana, na mangan bersama do nasida, alai masipangan sipanganon na be, angka parnampuna na godang, maradu  marlobilobi,  jala kesempatan pasombu tagas mangan dohot minum siinumon di tingki perjamuan i, alai na pogos holan marsaulihon na tarbahensa, bahkan male ditongatonga ni situasi ni deba jolma na marlobi lobi. Dung i muse adong na masijolojoloani marsipanganon, ndang sabar paima tingki asa rap marsipanganon, dohot angka pangalaho na so saling masiantusan  jala ndang saling masiargaan patupahon perjamuan di huria i. Alani i ma apostel Paulus paingothon huria i asa patupahon perjamuan dohot pangalaho na tau hinalomohon ni Debata asa  unang  parsala di daging dohot mudar ni Tuhan Jesus  (ay 27).  Alani i, ingkon ditangkasi be do dirina di na dohot tu parpadan na badia i. Marningot hasomalan na sala uju patupa perjamuan di huria Korintus, diajari Apostel Paulus do huria i, asa   manjamothon dirina be saluhut siihuthon Kristus. Ingkon gabe paniru ma saluhut na porsea dipambahenan ni Tuhan Jesus, na sumeahon diriNa (daging dohot mudarna) laho patupa haluaon di jolma na portibion.  Halak na parsidohot diulaon na badia, unang ma mangasahon denggan ni pangalahona. Alai na mangarajumi diri pardosa sian hatutubuna, nang marningot sude dosana, huhut ro dibagasan roha na magopu huhut manolsoli dosana i tu Debata, mangido  hasesaan ni  dosa, huhut  manganhon  parpadanan  na  badia,  ido na hinalomohon  ni Debata di halak na parsidohot diulaon nabadia.

6.        Na Porsea di Hata i do na taruli sian Ulaon Nabadia.

       (Katekhismus kecil Marthin Luther

Di huria Protestan (Lutheran) dua do sakramen. Sada sian i, ima Marulaon na badia. Di Katekhismus Martin Luther  na metmet didok do: Aha do laba ni na mangan dohot minum di na marulaon na badia? Dipaboa hata i do labana, ai ninna do: Na nilehon humophop hamu bahen hasesaan ni dosa, hangoluan dohot hasonangan marhite panganon na badia i. Ai disi do hasesaan ni dosa, hangoluan dohot hasonangan. Alai tangkas do dipabotohon disi, hata na mandongani sipanganon dohot siinumon ido, ido situan ni sipanganon dohot siinumon na badia i, manang ise na porsea di Hata i dapotan hasesaan ni dosa.

7.        Pangauhonon Marulaon Nabadia ima sada   sian 2 sakramen di hurianta. Sakramen na marlapatan do i “Yang digunakan Allah sebagai sarana mengkomunikasikan rahmat bagi umat beriman yang menerimanya. Hataridaan ni asi ni roha ni Debata na mangalehon AnakNa Jesus Kristus tu hamatean laho manobus hita jolma. Alani i diturpuk Kamis Putih sadarion tangkas do disoarahon, paboa tona ni Tuhan Jesus do laho patupahon haluaonta, ndada holan parningotan, alai tahaporseai do, di ulaon na badia i, disesa dosanta dibagasan daging dohot mudar   ni Jesus Kristus. Asa denggan ma dipatupa Marulaon Nabadia i, secara berkala di tonga-tonga ni huria.

a.         Kamis Putih tongon do di na pinatupa ni Tuhan Jesus, Marsipanganon (Perjamuan) rap dohot siseanNa, mandapothon ari  na laho pasingkop panghophoponNa marhite hamamateNa di hau Parsilang i. Naeng ma saluhut na porsea mangauhon panghophoponni Tuhan Jesus marhite na mangalehon daging nang mudarNa, ai ido dalan na binahen  ni Ama i, laho  patupa  haluaon sian dosa i. Ndang adong dalan na asing dunghon ni i.

b.        Naeng tangkas parsidohot hita di ulaon nabadia na pinatupa nihurianta, ai na mamaritahon Kristus  i do hita disi, laos  dalanta marsaulihon hasesaan ni dosa. Alai ro ma hita dibagasan roha na mananda dosanta, na mangasahon asi ni roha ni Tuhan i sambing ma hita naung pataluphon hita parsidohot marsaulihon panghophoponNa i.

c.         Ingkon martanda ma nang di ngolunta naung parsidohot dipanghophopon ni Tuhan Jesus i.Tarida sian roha na manghaholongi dongan, asa unang hita holan sumarihon na ringkot di diriniba (egois), alai tatiru ma pambahenan ni Tuhan i naung mate humophop hita.