MINGGU PASKAH I 17 APRIL 2022 Epistel : Psalmen 103: 1-5

 

Nungnga Hehe Jesus

I.          Sibonsiri

Buku Psalmen 103 on dipungka joujou tu pamujion di Debata Jahowa (ay.1-2), dung i diuduti ma i dohot alasan ni pamujion i (ay.3-19), jala dipaujung dohot panimpuli na tong marrumang joujou tu pamujion diDebata(ay.20-22). Targoar do on sada namarisihon  joujou mamuji Debata. Joujou tu dirina sandiri. Namanghatai do parpsalmen on tu dirina sandiri. Jala sian i ma gabe tubu sada ende pamujion tu Debata. Naeng pujionna Tuhan i sian nasa gogona. Dungi dipasingot do dirina asa unang hea manghalupahon denggan basa ni Debata. Singotsingot i patuduhon hadirion, rohana na umbagas marningot asi ni roha ni Debata Jahowa. Ndang hasuhatan denggan basa ni Debata. Di jou Tuhan i do hita laho mamuji Debata, ala denggan basa ni Debata naung tajalo di bagasan ngolunta. Di ari parningotan haheheon ni Jesus dibagasan sadarion di jou do hita mamuji dohot manghaporseai haheheon ni Jesus. Alai ndang holan i, dohot do disosoi tu hita manghaporseai huasoni Debata na tarida di haheheon ni Jesus.

Porlu do hita marningot denggan basa dohot asi ni roha ni Debata naung tajalo sian na jolo sahat tu sadarion. Marjea do jolma na so olo marningot denggan basa ni Debata Jahowa di bagasan ngoluna. I ma halak na mangarajumi ngoluna dohot nasa na adong di ibana holan ala ni gogona sambing. Unang lupa hita nanggo sada angka asi ni rohaNa i di hita. Psalmen on tung tangkas panindangion ni haporseaon na ima: Parjolo, Jahowa do mambela halak naung tertindas marhite na pajongjong hatigoran dohot uhum tu nasida. “Parasiroha jala pardenggan basa do Jahowa, lambat tarrimas jala parasi roha godang” (Pat. 2 Musa 34:6; Psalm 86:15; Neh 9: 17).

II.        Hatorangan

Rutinitas mambahen hita lalap dibagasan ngolunta gabe dang taingot be mamuji Tuhan. Dang tarajumi pambahenan ni Debata dibagasan ngolunta, I do umbahen maol hita porsea tu Tuhan gumodang do partikian tu angka ulaon siganup ari marimbanghon pamujian tu Jahowa. Buku Psalmen on paingothon hita asa unang lalap dingolu siganup ari, di rajumi si David do pambahenan ni Jahowa dibagasan ngoluna umbahen digurithon ibana ma ende pamujian tu Jahowa dibagasan roha na ias. Ndang adong pangurupion dungkon ni Jahowa. Di na marningot hita di haheheon ni Jesus sian na mate jala mulak mangolu di ari patuluhon, sian i nian ndang talup be hita mansoadahon pambahenan ni Jahowa dingolunta. Diboto Raja David  do pambahen angka halongangan dibagasan ngolu marhite na dipalua ibana sian angka hamaolan na di portibion, alani digurithon dibuku Psalmen on “Puji ma Jahowa ale tondingku….. Ayat 1-2”.

Marisuang do saluhutna pamujiontaonta I molo ndang taulahon pambahen ni Jahowa dibagasan ngolunta. Di patudohon Debata do hasatiaon na tu jolma marhitehite naso tarrimas Ibana marnida pangalaho dohot pardosaon na niula ni jolma I“Ibana do manesa dosam sudena, Ibana pamalum sahitmu…. (Ayat 3). Ndang di baloshon tu jolma i angka pangalaosion dohot hajahaton na ni ulana. Dosa dohot hajahaton ni jolma naung ni rajaan ni sibolis, ndang tarbahen na tinompa i be patubegehon pujipujian tu Debata. Ise do na martanggungjawab disi, tontu hita jolma do. Alai sai tongtong do Ibana di bagasan hasabaron manganjuanju jolma i asa anggiat nian marhamubaon ni roha jala sai tongtong mian jala mangolu di bagasan goar ni Debata Jahowa.

Di pataridahon Jahowa do holongNa i tu angka jolma na mian di bagasan pardosaon. Asa unang mago jolma i didok roha ni Jahowa di suru do Jesus Kristus ro tu portibion laho patupahon haluaon nang hatuaon (Pat. Yoh 3:16; 1 Yoh 4:10). Di patuduhon Jesus Kristus do asi dohot holong ni rohana di na laho manghophop jolma i sian pardosaon (Pat. Mat9: 9-13;Luk 7: 36-50;Yoh: 1-11), Sampe mate tarpajal Ibana di hau pinorsilang. Nang pe gantung Ibana di hau pinorsilang i tongtong do di patuduhon holong dohot asi ni rohaNa marhite pandohan na mandok: “Ale Amang! Marpamuati ma roham mida nasida, ai ndang diboto nasida na binahen nasida i” (Mat 23: 34). I ma sada bukti di ngolu ni jolma i paboa na torus do Jahowa mian di bagasan holongNa.

Ibana Paluahon ngolum sian Hamagoan (Lubang kubur)…. Ayat 4.hamatean ima sada alo na mansai borat jala ndang taralo. Dang peduli songon dia gogo ni obat dohot pangobatan ni para medis. Dang adong manang ise na gogo taringot tu hamatean. Dang peduli songon di pe hita padaohon hamatean I, hamatean tetap do ro jala ndang taboto sadiharina harorona. Godang do angka sipikkiran di bagasan ngolunta. Alai holan alani holong dohot lambas ni roha ni Jahowa do boi hita Manahan. Na gabe sahalak pelarian nungnga biasa be di si David. Dung malua ibana sian pamuruon I dirajumi do saluhut  pambahenan ni Debata dibagasan ngoluna, ai dipalua Debata  do ibana sian hamagoan. Saonari mandok mauliate ma hita tu Debata,iaHamatean ima na gabe pangomoan (Laba) mansohot mandapothon Tuhan jala manontong las ni rohanta dohot Tuhan (Filipi1: 20-22) ndang adong alasan mabiar tu hamatean (1 Kor 15: 55-57).Ala ni i do dipaborhat Jesus angka siseanNa dohot sude angka na porsea i mambaritahon barita na uli taringot haluaon dohot haheheon na  binoan ni Jesus tu saluhut bangso. Marhite i ma gabe sude na ulu ni tot manghatindanghon paboa Debata di bagasan Jesus Kristus mangalehon haluaon dohot hatuaon di bagasan ngolu ni jolma.Tapatogu ma rohanta mandok mauliate sian nasa gogo tu Debata marningot sude asi ni rohaNa tu hita. Marhitehite angka ende, pujipujian, tangiang dohot mangula ulaonta di bagasan lomo ni roha ni Tuhan i. Naeng ma mulak rata ganup semangatta mamuji dohot mangulahon lomo ni rohaNa.

Dung tangkas tahangoluhon jala tahamauliatehon asi ni roha dohot denggan basa ni Debata, tarjou do hita manogihon angka dongan na sing asa dohot nasida mananda asi ni roha ni Debata. Gabe rap dohot hita pangasaphon Debata di bagasan pardalanan ni ngolunta. Saluhut naung mananda Tuhan i gabe dongan ni Tuhan i mangula lomo ni rohaNa. Alani i adong do turgas manogihon, mangarahon halak na asing gabe si puji Debata.Turgas na niulahon sian las ni roha dohot roha mauliate tu Debata, ala sanga dipangke ngolunta mangarahon angka donganta. Ingkon rap mamuji jala pasangaphon Debata do hita dohot saluhut na tinompa ni Debata di portibion. Ingkon sude do jolma i manghatindanghon paboa Debata do sitompa ibana. Ndang adong haluaon nang hatuaon so dunghon sian Debata. Ndang boi halupahonon ni jolma i nanggo satongkin pe di bagasan ngoluna laho mangarahon donganna laho mamuj dohot pasangaphon goar ni Debata. Ibana do pamahap roham marhitehite denggan basa….Ayat 5, halak na porsea jala sai manotong mamuji Debata sai na donganna do molo tung pe merus sibukta dohot rohanta holan Debata partanobatoanta salelenglelengna Psl. 73: 25-26. Ibana do mamasumasu dohot mangalehon hangoluan di hita saleleng ni lelengna. Ibana na mangalehon ngolu na imbaru di angka na marhaposan tu Jahowa maruli hagogoon mardapotdapot, asa “mulak poso” songon “pidong raja wali”. pidong rajawali ima hagogoon manang gogo na imbaru na marhalojaon…. Jesaya.40: 31.

III.       Hahonaan

Mahite turpuk on tontong ma hita mamuji Tuhan nang pe godang angka hamaolan na ta adopi dibagasan ngolunta arsak nang las ni roha. Nang angka na masa dibagasan ngolunta boi tapatudos songon sada solu na metmet na mardalan di tongatongah ni laut na bidang jala na bagas. Dison boi berengonta mansai godang ancaman na boi mangharomhon solu i. Ima sian galumbang na balga jala gogo dohot alago na mansai gogo situtu. Na di setiap tingki boi ro jala mangauphon solu dohot pangisina. Pardalanan ni jolma i pe suang songoni do, bahat jala godang do angka na masa siboluson di na laho mandalani ariari ngolunta. Mansai godang sangkap ni portibion, sibolis laho mangaithon jolma i asa mian, mangolu di bagasan pardosaon. Jotjot di lehon sibolis i hasonangan parsatongkinan di ngolu ni jolma i dohot maksud asa mian di pardosaon jala mago jolma i sian adopan ni Debata. Mansai godang masa jala songgop parungkilon dohot hasusaan dibagasan ngolunta on. Alai molo tung songgop pe tu hita parungkilon i ndada dalan ni Debata i laho manguhumi, pamatehon jolma i. Alai boi do parhatopotonta dalan ni Debata laho patoguhon haporseaonta. Ndada molo ro haporsuhon, sitaonon i gabe mandate, maheu pangkilalaanta, alai merhitehite sitaonon i gabe lam pita mata ni haporseaonta jala lam solhot hita tu adopan ni Debata. Kita tidak ingin pulang karena ada gelombang yang besar, akan tetapi mamfaatkanlah gelombang tersebut untuk mencapai tujuan. Amen.