Parjumpaan Dohot Tuhan Jesus Manghorhon
Haimbaruon
I. Patujolo.
Dung manaek Tuhan Jesus tu banua nginjang,
saut ma baga-bagaNa, na marsuru angka siseanNa dung jolo ro Tondi Porbadia,
mangondihon nasida huhut mangalehon gogo laho mambaritahon “Barita nauli”,
Barita haluaon na pinatupa ni Jesus Kristus tu saluhut jolma. Tarida doi dina
disurathon si Lukas di buku Ulaon ni angka Apostel, di parmulaan ni angka
Huria- Parsaoran ni angka na porsea di Jesus Kristus, songon parbueni ulaon ni
angka SiseanNa di parsuru ni Jesus: na ingkon gabe sitindangi Jesus nasida di
Jerusalem, di sandok Judea, di Samaria sahat tu ujung ni tanoon, dung jolo di
jalo nasida hagogoon ni Tondi Porbadia na songgop tu nasida.( Ul.Ap. 1:8 + 2:4).
Tarida do tangkas parbueni ulaon
“Panindangion ni angka Apostel i na mambaritahon “Barita haluaon na sian Jesus”
tu ganup jolma, jala tangkas do dijangkon nasidana do “Hata Haluaon” i, huhut
gabe porsea nasida di Jesus Kristus, marhite na padidihon dirina, jala pola do
“Toluribu Halak” manamba na sadari i, angka na marsihohot di “Poda ni angka
Apostel”. Marparsaoran do nasida ganup ari di Bagas Joro i, martangiang jala
jojor bagas na sida marulaon na badia. Sai marlas ni roha do nasida huhut
mamuji-muji Debata, gabe lam ditambai Debata do di na “Sahuria i, angka na
dapotan haluaon.(Ul.Ap. 2: 41+46-47).
II. Hatorangan
ni Turpuk:
1.
Parungkilon
dohot sitaonon ni angka na porsea di Jesus, ala sai adong sangkap ni halak si
pangambati, na sai mangalele huhut paporsuk-porsuk, angka na porsea huhut na
gabe si ihuthon Jesus Kristus.
Tungpe
lam rarat barita na uli marhite ulaon ni angka Apostel i, jala lam tamba halak
na porsea di Jesus Kristus, alai adong do parungkilon bolon di adopi halak si
ihuthon Jesus i. Ala mansai godang jolma na so marlomo ni roha marnida angka na
porsea di Jesus jala sai disangkapi do laho mangambat asa unang nian lam
martamba-tamba si ihuthon Jesus i.
Sahalak na margoar si Saulus,
na sai mangondamhon asup-asup dohot
pamunuon tu angka sisean ni Tuhan i, jala sai dilului ibana do dalan laho
patulus sangkapna manangkupi baoa dohot boru-boru, na mangihuthon Tuhan i,
sahat tu parguruan ni si ihuthon Jesus na adong di Damaskus.(Ayat 1-2). Di jolo
ni jamitaon: Ul. Ap. 6:5-8, di papatar do taringot tu ngolu ni sahalak, na
margoar Stepanus na dipillit gabe
Apostel ni Kristus, laho pararat hata ni Debata, na porsea di Jesus Kristus, jala gok Tondi Porbadia. Parasi roha situtu,
jala patupa angka halongangan dohot tanda angka na balga di jolo ni torop halak. Alai tung gok
do parungkilon na, ala dihasogohon angka na so olo porsea di Jesus do ibana,
jala disangkapi nasida ma laho mamunu,
jala saut do ibana manaon “hamatean” marhite na di danggurhon batu tu ibana.(
Ul.Ap. 7:58-60). Tung dihalomohon si Saulus do hamamate ni si Stepanus i, jala
laos ala ni ima lam marsigorgor do roha dohot pingkiran na laho mangalele huhut
manangkup angka halak na porsea di Jesus, jala paporsuk-porsuk na sa huria i. (
Ul. Ap. 8:1-3). Sai dilului si Saulus ma dalan patulus sangkapna, sahat ro di
na mangido surat sian Malim, asa adong dalan na laho manangkup halak si ihuthon
Jesus sahat tu Damaskus, songon naung binegena lam tamba do angka na porsea di
Damaskus na gabe inganan ni halak si huthon Jesus. Marhite surat legitimasi na
sian Malim, adong ma huaso ni si Si Saulus laho manangkup nasida jala mambaon
tu Jerusalem.
2. Di
papatar Tuhan Jesus hadirionNa tu si Saulus, dalan laho mangambat sangkapna di
na patupa pangaleleon tu angka naung
porsea di Tuhan Jesus.
Di na disangkapi si Saulus laho
manangkup angka si huthon Jesus tu Damaskus, di tongan dalan dope ibana nungnga
di pabotohon Tuhan i hadirionNa tu si Saulus, marhite sondang sian nginjang
humaliang ibana, dohot soara na manjou goarna huhut papatarhon tu ibana , aha
na binahennai. (ayat 3-4).
Dang
boi dibereng si Saulus, ala ditutupi sondang na sian nginjang ido simalolongna,
jala di na tinggang ibana, di ungkap ma matana, alai dang boi be marnida pola tolu ari lelengna.( Pat. ayat 8-9). Tung
pe so marnida si Saulus, alai dilehon Tuhan i dope “Parbinegean” tu ibana, laho
tu mangihon soara ni Tuhan i, na manjou goarna pola dua hali : Saulus- Saulus!
jala dipasungkunhon tu ibana di na sinangkapan ni rohana, laho mangalele dohot
manangkup si ihuthon Jesus sahat tu Damaskus, na mandok: ”Boasa leleanmu Ahu”?. Dison tung
tangkas do dipabotohon Tuhan i, tu si Saulus, ia na nileleannai dang holan
angka si ihuthon Jesus i sambing, alai tung Tuhan Jesus i sandiri do na
nileleanna, ai sada do Ibana dohot angka
si ihuthon Jesus, jala naung porsea di Ibana. Ai tarida doi di tangiang ni Jesus sandiri taringot tu hasadaon dohot
Debata Ama songon hasadaonNa dohot angka na porsea di Ibana.( Joh 17: 21-23),
jala didok Jesus do muse:” Na tumangihon hamu, Ahu do na tinangihonna, jala na
manulak hamu, Ahu do na tinulakna; alai na manulak Ahu, na marsuru Ahu do
tinulakna disi.( Luk,10:16; Pat.
Mat 10:40). Angkup ni i, laos
dipatuduhon Tuhan Jesus do tu si Saulus
na so boi sangkapna na saut laho mangambat parsaoran ni halak si ihuthon Jesus,
dohot mangalele laho paporsuk-porsuk angka na porsea di Jesus. Dang boi
ambation ni manang ise pe, marhite huaso dohot gogona, laho mangorai-
manundati- “Hasasaor dohot hasasaut ni Barita Nauli”- Barita haluaon dohot
hangoluan na sian Jesus Kristus”; tu ganup jolma, angka nanaeng porsea di Tuhan
Jesus Kristus huhut gabe si ihuthon Ibana.
3. Panandaion di hadiron ni Tuhan Jesus,
naung di papatarNa i, ima dalan patulus sangkapNa, laho mambaritahon GoarNa,
manghatindangkon “HataNa- Barita Nauli” na gabe haluaon dohot hangoluan.
Dung tangkas di patuduhon Jesus
hadirionNa tu si Saulus di panjouon nai, marhite sipaingot ni Jesus i, gabe
disungkun si Saulus ma “Ise do Ho
Tuhan”, dialusi ma ibana: “Jesus do Ahu, na nilelenmi”. Angka hitir jala
tarhalongong ma ibana mandok: Diama bahenonku Tuhan di pangido rohaM, dungi
didok Tuhan ima tu ibana:”Hehe maho, bongoti hutai, disima paboaon tu ho
sibahenon mu. (ayat 5-6). Di pangidoan ni si Saulus naeng patupaonna lomo ni
roha ni Tuhan i, ima patuduhon naung adong panandaion di si Saulus, di hamubaon
ni roha dohot pingkiran. Marhite huaso dohot gogo ni Tondi ni Tuhan Jesus
sandiri, gabe dipangido si Saulus ma aha naeng sipatupaonna marguru tu lomo ni
roha ni Tuhan i. Ingkon marpaima ma si Saulus, jala ingkon tangkas do borhat
ibana tu Damaskus, alai dang patulus sangkapna hian, sabalikna ,laho patulus
sangkap ni Tuhan Jesus sipabotohononNa tu ibana. Tuhan Jesus sandiri do na
punya inisyatif- marhite huaso dohot gogo nang lomo ni rohaNa, laho paimbaruhon
roha dohot pingkiran ni si Saulus, na marsangkap laho mangalele angka si
ihuthon Jesus hian, gabe dipauba Tuhan Jesus laho pararat Barita Nauli-barita
haluaon tu angka na so porsea, tu angka si palebegu dohot tu na dao!
Panindangion ni si Saulus on dipapar ibana sandiri do dung gabe muba goarna si
Paulus, na gabe apostel ni Kristus- naung dipillit Debata hian laho mananda
lomo ni rohaNa, jala tutu gabe sitindangi
tu sude jolma taringot tu haluaon na sian Jesus Kristus. ( Pat. Ul.Ap.
22: 14-15+21).
III. Hahonaan
ni Jamita.
Na gabe sipahusor-husoron ni rohanta marhite jamitaon di ngolunta, adong
dua bagian bolon:
Parjolo: Ojahan ni Jamita Mingguon:”Parjumpangan dohot Tuhan Jesus patupa haimbaruon”, ala marhite na
dipataridahon Jesus hadirion-Na gabe adong hamubaon ni roha dohot pingkiran,
jala gabe mar-haimbaruon di sude panggulmiton ni ngolu. Dipatuduhon Jesus do
holong dohot asi ni rohaNa tu si Saulus, marhite na pasohon sangkap ni si
Saulus, di na laho mangalele halak si ihuthon Jesus, uju di tongan dalan dope
laho tu Damaskus. Dang diuhumi Tuhan Jesus si Saulus di ulaon na sinangkapan ni
rohanai na mangalele halak si ihuthon Jesus, baliksa dipaingot do ibana, asa
gabe di huta Damaskus do jaloonna ulaon sipasahaton ni Tuhan Jesus tu ibana,
ima na ingkon gabe sitindangi goar ni Tuhan Jesus sandiri. Dison ma tarida:” Parjumpangan
dohot Tuhan Jesus” ima dalan; ”Pasauthon, Patulus, Patupa dohot Mambahen
haimbaruon ni ngolu di si Saulus. Tuhan
Jesus sandiri do na marsangkap di ngolu ni si Saulus jala marguru tu lomo ni
rohaNa do laho paimbaruhon ngolu ni si Saulus.
Paduahon : Mardomu tu goar ni Minggu sadarion :
Quasimodogeniti: marlapatan: “Songon poso-poso na imbaru tubu”. Nungga di
paimbaru Tuhan Jesus sandiri ngolu ni si Saulus, jala dung ditanda ibana Jesus
na manjou goarna- na mangambat sangkapna hian laho mangalele si ihuthon Jesus.
Nuaeng dung di paimbaru Tuhan Jesus,
gabe disalpuhon ibana ma ngolu na buruk i; ndang dapot be di ngolu ni si Saulus
roha na manjahati, na mangasupi huhut na marsangkap paporsuk-porsuk halak si
huthon Jesus!.Nungnga disolukkon ngolu
na imbaru, ngolu na di bagasan Jesus Kristus, ala ditangkup Tuhan Jesus sandiri
ibana, jala ditodo gabe naposoNa. Nuaeng
marsinondang ma tutu di ibana “haluaon dohot hangoluan” na sian Tuhan
Jesus, laos marhiteima di suru ibana
gabe “sitindangi goar-Na” laho mamaritahon Hata-Na, na ngabe :”Barita Nauli tu saluhut jolma.
IV. Panimpuli
Nungga tangkas dipatuduhon Tuhan Jesus hadirionNa, dalan paimbaruhon dohot paubahon roha nang pingkiran, laho mangihuthon Ibana. Ala ni i, jangkon ma Tuhan Jesus Kristus na papatarhon hadirionNa di sude panggulmiton ni ngolum, jala hatindangkon ma goarNa marhite na mambaritahon Hata-Na.
Post a Comment