Pinasupasu Ma Ibana Na Ro Di Bagasan Goar Ni Tuhan Psalmen 118:19-29

MINGGU PALMARUM

10 APRIL 2022

Evangelium: Psalmen 118:19-29

I.  Sibonsiri

            Dipataridahon paspsalmen dison panurirangon taringot tu toruk ni roha dohot hamuliaon ni Tuhanta Jesus. PartinaonanNa dohot hatoguonna sahat tu na manghamonangkon diri sian hamatean pe dibilangi parpsalmen on do asa boi taihuthon di bagasan haunduhon ni roha. Dipangido muse tu hita asa pasahathon diri tu habadiaon ni Jahowa, disi ma hita ringkot manghangoluhon hamuliaon ni Jahowa marhite haroro ni angka na porsea: “Ungkap hamu ma di ahu bahal ni hatigoran” (ay 19). Diondolhon do hatigoran tu bahal i, ndang boi ro angka jolma na so tigor manang jolma na so porsea. Pelean i pe digoari pelean hatigoran.

II. Hatorangan

Gok Pasupasu Do Angka na Ro Di Bagasan Goar ni Tuhan, Antong Tahamuliatehon Ma

            Angka jolma na naeng bongot tusi jala marsaor tu Jahowa ingkon badia ibana jala ingkon toruk rohana diadopan ni Jahowa. Dung diungkap pintu hatigoran i, ingkon bongot do hita, tadapothonma inganan na badia i. Tujuanta bongot tusi, ima laho mamuji Jahowa. Alani i ingkon sabar do hita paimahon asa diungkap pintu ni surgo tu hita, asa boi bongotanta jala taingani, huhut tapuji Tuhanta.

            Kristus do na digombarhon dison, alana Ibana do dalan hasintongan i na mamboan hita asa gabe jolma partigor Joh. 14:6), laos Ibana do pintu asa bongot angka birubiru  na pinarmahanNa (Joh. 10:9). Didok parpsalmen ma mauliate alani hatigoran ni Debata (Ps. 118:21), sai marpangkiriman ma angka na marnida Kristus ala nunga sahat tangiang nasida tu Tuhan i, jala sahat ma haluaon tu angka na porsea. Batu na binolongkon ni angka pande bagas nunga gabe batu parsuhi. Jala disi taida ma habuluson ni Debata. Batu na so masuk etongan ni jolma nunga gabe sada batu na momos, togu jala manongtong ma gabe hajongjongan ni partondion, batu na mansai arga (1 Ptr. 2:6). Arga do tutu batu na pinajongjong gabe huria i, jala ringkot ma hita manghamuliatehon i. Jesus do raja ni huria i, nang pe manjua angka bangso i di haroroNa. Harajaon na bianoanNa ima na marpardomuan tu dame, holong dohot angka pasupasu.

Batu Parsuhi, Ojahan ni Hadameon dohot Hasadaon

            Batu parushi i do na pasadahon hajongjongan ni sada bangunan. I do na pasadahon angka jolma na marsalisi. Pasadahon bango Jahudi dohot na so Jahudi, dipajongjong ma sada jala marsaor ma di bagas ni huria. Nunga dipatutoru diriNa laho pasadahon hita alani i tama do Ibana gabe ojahan ni pangkirimonta, Ibana do ojahan ni hasadaon dohot hangoluan. Alani i tapasahat ma ngolunta di bagasan Kristus. Debata do namanongos Kristus asa mamolus sitaonon dohot hamatean. Antong tama do hita marlas ni roha (ay 24), ido umbahenna adong ende “Sadarion ari ni Tuhan, beta hita marlas ni roha” ala memang tu mansai arga do hita ditobus. Nian sude do ari mulai ari Minggu sahat tu Sabtu ari ni Tuhan. Alai di ari Minggu i do tanda hamonangan di halak Kristen. Di ari Minggu i do dipasingkop Debata haluaon na mambahen hita badia. Kristus nunga gabe batu parsuhi jala marsaor ma hita di ari Minggu i marningoti hamonangan na manongtong.

Pangidoan tu Panumpahion

            Disoarahon angka jolma na di Jerusalem i ma hosanna (ay 25-26), lapatanna “Manumpak ma Ho ale Debata” (bahasa Indonesia: Tuhan, berilah keselamatan), sada pangkirimon na mansai togu asa singkop haluaon na sian Debata. Sada pangidoan do on asa sada hita dohot Sipalua. Musunta nunga gabe musu ni Debata, alani i marhamonagan ma hita marolohon angka dosa dohot hamatean. Saut ma lomo ni roha ni Debata songon parmonang ni raja Daud di angka porang marolohon bangso na jat. Alai Raja na naeng ro, ima Kristus i, ndada mamangke kekerasan, dame dohot holong do dipangasahon. Pinasupasu ma tutu na ro di bagasan goar ni Tuhan.

            Ro do Tuhan Jesus di bagasan goar ni Debata, mangula di bagasan goar ni Debata dohot lomo ni rohaNa jala pajongjongkon hamuliaonNa. Umbahen i ringkot do hita mamuji Ibana, manghatindangkon hasangaponNa, ai manongtong do pasupasu na sian Debata. Domu tusi, ringkot hita manghamuliatehon haroro ni parhobas na ro di bagasan goar ni Debata, tajangkon jala tatangiangkon ma hararat ni huria, ala paimahonta dope haroro na paduahon. Gabe siboan pasupasu ma hita tutu ala nunga tarpasupasu hita marhitehite haroro ni Kristus. Nunga diboan Debata pasupasu partondion (Ep. 1:3), alani i tarpasupasu ma hita sude na ro dohot na mangula di bagasan goar ni Tuhan.

            Ringkot do hita mamboan tangiang dohot pangidoan tu Debata asa manumpahi ngolunta. Jala tongtong ma taputudu pangkirimonta i marhite angka ulaonta na mamelehon diri tu Debata. Tapasahat dirinta on di bagasan habadiaonNa, songon na pinatupa halak di Jerusalem di haroro ni Kristus (Mat. 21:1-9). Tapasahat ma sude na di hita laho marhobas di tongatonga ni huria, pos ma rohanta sai disarihot Debata do sude na ringkot di hita.

Panondang na Mamboan Dame

            Jahowa do panondang di hita (ay 27). Nunga dipapatar tu hita Tuhan Jesus Kristus na gabe panondang di hita. Ari na marlas ni roha ma tutu sadari i ala ingkon seahononNa ma mudarNa laho manobus hita. Adong do tradisi panobusion di Israel na mamboan pelean tu altar. Mudarna i do didaishon tu tanduk ni altar i, alai dipasingkop Jahowa ma i di bagasan Kristus. Dung i ndang gabe pelean na mate be diboan tu altar, nuaeng hita pe tarjou ma gabe pelean na mangolu (Rom 12:1).

            Dipaujung parpsalmen ma turpuk on marhite pamujian dohot mandok mauliate (ay 28-29). Ditogihon do hita di bagasan pamujian i asa sada di bagasan roha mauliate ai nunga marsaor hita dohot Debata. Dibagabagahon haroro ni Kristus na manobus hita gabe pelean na manongtong. Ro di saleleng ni lelengna do asi ni rohaNa, Ibana do Alpha jala Ibana do Omega, hamuliaon ma di Jahowa ai saut do lomo ni rohaNa mamboan dame dohot pasupasu tu sude natinompaNa. Disoarahon angka surusuruan do hasangapon ni Jahowa ala naung sahat dame tu tanoon (Luk 2:14), jala molo dung ro dame singkop ma tutu panggoraon ni hosanna, pinasupasu ma na ro di bagasan goar ni Tuhan (Luk. 19:38).

III.       Hahonaan

            Disungguli turpuk psalmen on do hita taringot tu haroro ni Mesias, ima Jesus Kristus na ro dibagasan goar ni Tuhan mamboan dame dohot haluaon. Di Epistel minggunta nunga dipasingkop tutu haroroNa, jala na istimewa sian i, nunga jumolo marolopolop angka jolma i ala adong kepastian ingkon monang. Ido umbahenna taronjar hita mandok mauliate mangadopi angka na masa, ai nunga dipataridahon haradeon ni Debata mangalehon pangurupion jolo tongtong raphon Ibana hita.

            Haroro ni Kristus ditopot dohot denggan marhite maremare, gombaran do on taringot tu hamonangan. Alani i, di Minggu Palmarum on ringkot do hita manogihon angkan donganta asa rade parsidohot di panongosion (misi) laho mambaritahon dame dohot haluaon. Taihuthon ma Ibana naung ro marhitete gorar ni Tuhan, alani i manang tudia hita mangalangka ingkon mamboan pasupasu tu humaliangta. Dijou do hita asa mandok mauliate jala marlas ni roha. Psalmen ndada holan ende sambing, alai di bagasan i adong motivasi dohot gogo. Psalmen mangalehon semangat naimbaru marhite tondi asa gomos hita mangadopi angka hamaolon ni ngolu. Dipargogoi Tondi Parbadia do hita mangula di huria, di pemerintahan, advokasi, tenaga medis. Di media sosial pe diajari Tondi i do hita mangulahon na marimpola.

            Ende Psalmen on ndang boi tarsirang sian ulaon dohot haporseaonta. Sai dipargogoi Tondi i ma hita lumobi di masa hamaolon. Sian 2019 tung godang do jolma na marungkil alani pandemi Covid-19, alai tongtong ma marpos ni roha. Tongtong ma hita mangolu di bagasan ni Tuhan i, taendehon ma hosanna! Sai manumpak ma Ho ale Jahowa! Taendehon ma haleluya! Tapuji ma Tuhanta huhut mandok mauliate hita, ai nunga ro Kristus, pinasupasu ma na ro di bagasan goar ni Tuhan