Ditangihon Debata do Joujou Ni Angka Naporsea - Mundosaragi

 

MINGGU EXAUDI

29 MEI 2022

Evangelium : Psalmen 17: 1-6

Ditangihon Debata do Joujou Ni Angka Naporsea

 

 

I.                   Patujolo

Psalmen 17 ima tangiang ni si David na mangido haluaon sian Debata asa malua sian tangan ni musu dohot sian angka na mangalotongi ibana. Adong ma dua bagian ni Psalmen 17 on, ima :

Ø  Ayat 1+6 : alu-alu ni si David tu Jahowa

Ø  Ayat 2-5 : panindangion ni si David

Marhite-hite isi ni Psalmen 17 on, boi do idaonta parsitutuan ni si David namangalualuhon nasa parsorionna tu Jahowa, jala dibagasan roha na hibul (ndang mardua roha) do ibana pasahathon sude nasa sitaononna tu Jahowa (na bernit, arsak ni roha, dohot biar ni rohana). Ai porsea do ibana Jahowa na mangaramoti dohot na manjagai ngoluna jala na paluahon ibana sian angka tahitahi ni angka parjahat. Suang songoni pos situtu do rohana tu Jahowa na tongoson ni Jahowa sian ginjang angka panumpakion. Lapatanna, ikkon marujung ma angka hamaolon dohot hasusaan bahenon ni Jahowa dibagasan hasintongan (keadilan). Songoni ma parsorion na tongon songgop di ngolu ni par-Psalmen manang si David ujui umbahen pola ro ibana mangalualu tu adopan ni Jahowa pasahathon saluhut pangidoanna marhite tangiangna.

II.        Hatorangan Ni Turpuk

Ragam do namangkasogohon si David dung gabe bangkit raja ibana. Dihasogohon si Saul do ibana. Pola sahat disangkapi mangalele dohot mambuat hosana. Molo tapaihut-ihut surat ni si Samuel naparjolo dibindu 22 dohot 23 dinasai manggasa rimas ni raja Saul mangalele si David sahat tu naeng bunuonna, soada salana nian tu si Saul nda holan ala naung pinillit ni Jahowa i do si David gabe raja manggantihon ibana jala nunga dimiahi panurirang Samuel si David di Betlehem. Ima mula ni pangiburuon ni si Raja Saul tu si David. Laos i dalanna paburu-buru si David helana i (1 Samuel 16: 1-13). Sataon ma di pangungsian si David (1005-1004 SM) dohot soldaduna si 600 halak i. Sian Nalot tu Rama-Nob-Gat-Liang Adulan-Mizpa torus tu tombak Heret, dungi mulak tu Nob. Asa dung mate si Saul maningkot di dolok Giboa (1 Samuel 31), martangiang ma si David di Hebron (parpadanan) 1 Musa 23: 2. Diingot ma angka parmaraan naung binolusna rodi angka dosa dihaposoonna, jorbut dipangkorhonna muse tu dirina dohot pinomparna. Alai diida muse ma asi ni roha dohot angka denggan basa ni Debata Jahowa naung paluahon ibana sian musuna dohot hamateanna. Ima na mangajar tondina dohot pingkiranna mangalualu tu jolo ni Jahowa dibagasan roha na mangopu marningot pengalaman naung salpu i.

Songon dia ma alualu ni si David tu Jahowa :

1)      Ayat 1+6 : “Sai tangi ma hasintongan ale Jahowa, tangihon ma alu-alungkon. Sai tarehon ma pinggolMu tu tangianghon sian bibir na so marpangansi” ; “Sai Ho do hupajoujou, ai dialusi Ho do ahu, ale Debata. Sai tarehon ma pinggolMu tu ahu, tangihon ma hatangkon”.

Pandohan on dang na adong niat ni si David mamaksa Jahowa asa ditangihon nasa alualuna i, alai diloas Jahowa do ibana patolhashon nasa na dipingkiranna dohot na dirohana asa maralus. Angka aha ma na pinangido ni si David laho tangihonon ni Jahowa, ima:

·         Ala sian roha na ias, roha na marsitutu jala na tulus do si David mangido tu Jahowa, ndang adong kepura-puraan alai saurdok do na dirohana dohot pandohanna na haruar sian bibirna. Tangiang na marpangansi marisuang doi, alai tangiang na tulus jala na marsitutu dihalomohon Jahowa doi.

·         Ngolu partangiangon i nunga dihangoluhon si David, ndada ala dibagasan hasusaan, sitaonon manang haberniton ibana umbahen diula ibana martangiang, alai jauh sebelum i nunga dipajou-jou ibana Jahowa diangka tingki naung salpu.

·         Martangiang si David na nionjar ni haporseaon do. Alani do mangkirim ibana na ingkon tangihonon ni Jahowa tangiangna. “Aku tahu, bahwa Engkau menjawab aku”, alani ale Tuhan sai tarehononmu pinggolMu tu ahu.

2)      Ayat 2 : “Sai dapotan uhum ma ahu sian bohiM, sai ditatap mataM ma hasintongan.”

Dihaporseai si David do ala holan sian Jahowa na talup mangalehon uhum dohot hatigoran. Molo tung adong pe hasalaan dohot hajahaton ni angka na mangkasogohon dohot na mangasupi ibana, Jahowa ma na manguhum ibana, ai manatap manonggor do mata ni Tuhani mida angka hatigoran ni naposona. Ai tagan so manjou dope nasida, nunga mangalusi Ahu, mangkatai dope nasida, nunga manangihon Ahu (Jes 65: 24), jala porsea do si David matua ditangihon Jahowa do nasa namarpangalaho dibagasan hadaulaton jala maruli pasu-pasu sian hatuaon ni Jahowa.

3)      Ayat 3 : “Nunga didodo Ho rohangki, ditingkir Ho bornginna i, dilala Ho do ahu, hape ndang adong jumpang Ho, hupompangi do angka pingkiranhu, asa unang mangalaosi pamanganhu”.

Natingkos jala natutu do uhum anggo na sian Jahowa, ai manguhum Ibana hombar tu naniula ni ganup jolma. Manguhum Jahowa ndang marnida bohi. Diboto Jahowa do aha jala dia diula si David nasailaoni. Patar do dijolo ni Jahowa songon dia uli denggan ni roha ni si David maradophon Jahowa. Ai disulingkit Jahowa do nasa ulaon dohot pambahenan ni si David nasailaoni, alai ndang jumpang ni Jahowa hasalaanna songon naung dipaasuphon angka na mangkasogohon ibana. Adong do nian kesempatan emas di si David laho mamaloshon ni tu si Saul, alai jaga do ibana unang sanga lalu mangalaosi pamanganna. Dibuktihon si David doi di pandohanna na mandok : “hupompangi do angka pingkiranhu, asa unang mangalaosi pamanganhu”. Lapatanna: dijagahon si David do pangalahona unang madabu tu dosa jala jaga do nang ibana dipamanganna unang marpangansi.

4)      Ayat 5, dipangido si David do asa mangula asi ni roha ni Jahowa di ibana : “Sai diihut-ihut langkalangkangku do angka bogasMu, ndang maoraor pangalangkangku.”

Martangiang do si David tu Jahowa asa asi ni rohaNa i ndada holan paluahon ibana sian angka musuna, alai naengma asi ni roha ni Jahowa i patauhon ibana laho paihutihut angka langka dohot bogas ni Tuhani. Dipatau ma ibana marhite asi ni rohaNa, ndang manimbil tu siamun manang tu hambirang, alai manontong ma marpangalaho dohot marpambahenan na denggan na gabe halomoan ni Jahowa.

 

III.       Hahonaan

Boasa ringkot hita martangiang? Alana tangiangi do dalanta manghatai dohot Tuhani. Dibagasan tangiangi bebas do hita patolhashon nasa na solot dibagasan rohanta. Ai parduli do Tuhani tu hita jala paelengonNa do pinggolNa laho tumangihon nasa alualunta. Debata tumangihon hita ndada ala marnida rupa, manang marnida bohi, manang marnida derajat ni jolma, alana ndang marimbar hita jolma ianggo di adopanNai.

Ditingki martangiang si David, hirim do rohana na ingkon paelengon ni Tuhani pinggolNa tumangihon alualuna. Ai alualuna tu Jahowa mardongan hasintongan do jala naso mengadaada manang dipatubutubu. Dipatolhas ibana do tangiangna tu Jahowa dibagasan hasintongan dohot tulus ni roha, angka namasa na marpardomuan tu dirina, ima asa malua ibana sian angka tahitahi ni halak parjahat dohot angka na mamusuhi ibana.

Marhite turpuk on dipaingot hita asa lam ringgas hita mangalului bohi ni Jahowa na tuk boi paluahon hita sian musu, mara, nang parungkilon namasa dingolunta, tarlumobi di hamamasa ni panahit sorimago Covid-19 on na mansai jorbut situtu pola mambahen hita tahutan jala godang naagoan hosa di portibion. Alani i porsea ma hita na ingkon salpu do sahit sorimago on sian ngolunta, sian portibion, sian bangsonta nang sian luatta on. Sai joujou ma hita tu Jahowa asa dipalua hita sian nasa musu dohot hajahaton. Antong, sai olo ma hita pasahathon dirinta, ngolunta tu gomgoman ni tangan ni Debata ai Ibana do haporusanta. Lapatanna, dang sian jolma ro pangurupion i alai sian Debata do nang pe mardalan hita di hamamasa ni Pandemi Covid-19 on. Alani i unang mabiar hita disi, ai tungkot dohot batahi ni Debata do na manjagai hita asalma taparhanalom Ibana. Sai olo ma hita pasahathon nasa gulmit ni ngolunta tu Jahowa, manang aha pe namasa, las niroha manang arsak niroha ai matua ditangihon Jahowa do alualu ni angka na porsea i songon goar ni Minggunta “EXAUDI” (Sai tangihon ma soarakku ale Jahowa).