Gabe
Sitindangi Ni Kristus Sahat Tu Ujung Ni Portibi On
Sibonsiri Ni Turpuk
Ganup
sahali sataon, sai dipatupa halak Kristen do ulaon Minggu parningotan Hananaek
ni Tuhan Jesus Kristus tu banua ginjang. Mansai ringkot situtu do ulaon i laho
paingothon hita paboa ndada portibi on inganan na manongtong di angka jolma na
porsea. Marhite hananaek-Na i, tung tangkas do dipatuduhon tu hita asa unang
holan ngolu na ringkot di portibi on tasarihon, ala saluhutna i na laho salpu
do. Tanda ni angka naung porsea hita di Tuhan Jesus Kristus, ingkon sarihononta
do ngolu na hot ro di salelenglenengna, i ma di surgo hasonangan i. Jala sada
sian torop ni ulaon na mansai, na ingkon ulahonon ni halak Kristen laho
manarihon ngolu na hot ro di salelenglelengna, i ma manghatindanghon Kristus di
hananaek-Na i, songon naung pinatupa ni angka sisean-Na i. Di huta Jerusalem,
marhite angka surusuaruan, nunga disuru Tuhan Jesus Kristus angka sisean-Na asa
manjumpangi Ibana di Galilea. Jala hatiha i ditonahon Ibana hian do asa
jumpangan nasida Ibana muse di Jerusalem, di sada tingki. Songon i ma parsuruon
ni Tuhan Jesus Kristus di nasida, laho manguji hasatiaon nasida taringot tu
haradeon dohot lasniroha nasida laho mangulahon parsuruonNa i. Marpungu do
nasida songon naung tinonahon-Na i tu nasida, asa gabe sitindangi di
hananaek-Na tu surgo i.
II. Hatorangan
Ni Turpuk
Ayat 6, pabidanghon angka pandohan na parpudi sian ayat 3.
Pangantusion ni halak Jahudi di abad na parjolo taringot tu harajaon ni Debata,
marlapatan do i i ma harajaon ni Israel na bersifat politik di portibi on.
Saleleng na 40 ari i, sada sungkunsungkun na tung mansai ringkot di nasida, i
ma taringot tu: “Pajongjongon ni Tuhan Jesus ma saonari harajaon portibi i di
Israel?” Dietong rohanasida na patupaon ni Tuhan Jesus nama bangso Jahudi gabe
bangso na bolon jala bangso na marhuaso maradophon angka bangso na asing,
songon masa ni harajaon ni si Daud, Salomo, Asa dohot si Josafat. Hape misi ni Kristus na sasintongna,
ndada na laho pajongjonghon harajaon na digohi haulion ni portibi alai harajaon
ni nirajaan ni ngolu partondion do. Ro pe Tuhan Jesus Kristus na laho pajongjonghon
harajaon-Na sandiri do, i ma harajaon banua ginjang, ndada na laho memulihkan
harajaon portibi di Israel.
Alani i, marhitehite alus ni Tuhan Jesus Kristus
di ayat 7, naeng dohononNa tu nasida asa unang humasusa nasida
mamingkirhon taon manang ombas taringot tusi.
Ala sandok na binuhul ni Ama i guru di huaso-Na do. Ndang adong na asing na tuk
pabotohon taon manang ombas na naeng masa. Holan Ibana do nampuna huaso, holan
Ibana sambing, laho pabotohon mulai sian bonana sahat ro di ujungna.
Jala marhite saluhutna i, naeng
papataron-Na paboa na Ibana do Debata. (Jes. 46:10). Ndang boi i pabotohonon-Na tu nasida, alani i
tung na so jadi be patupaon nasida sungkunsungkun taringot tusi.
Marhitehite
sungkunsungkun ni angka sisean i dipatuduhon nasida do paboa na so sabar nasida
paimahon hajongjongan ni harajaon, na dietong roha nasida di bagasan harajaon i
dapotan bagian na dumenggan nasida, jala alani i, dietong rohanasida boi nian
joloannasida sangkap ni Debata. Tung pe
didok Tuhan Jesus di Lukas 22: 30 “Asa mangan jala minum hamu di MejangKu di
HarajaonHi, manghunduli habangsa...” Alai taringot tu tingki sadiharina nda holan
Debata do na umbotosa. Manang ise na porsea tung na so jadi humasusa
mamingkorhonsa, alai di bagasan sonang dohot pos ni roha manghirim, paboa di
tingki halehetanna, hombar tu pangatur ni Debata, i do na dumenggan. Alani i,
di tingki perpisahan na di bagasan holong on, dipasahat Tuhan Jesus tona-Na na
mansai arga on, jala sekaligus paingothon huria-Na di ganup tingki dohot luat,
asa tongtong marjagajaga di hagigiot na marlobi taringot tu parbinotoan na so
patut, tarlumobi laho manulingkit angka
dia pe na so hea niida, ala ndang dipatudu Debata.
Ayat
8, Tumagon ma na asing sian i
dipingkirhon/ disarihon angka sisean i. Isarana taringot tu haroro ni Tondi
Porbadia na naeng usehonon-Na tu nasida, na tuk mangelhon gogo na so halompoan
tu nasida, asa marhite hagogooN-Na i tuk nasida gabe sitindangi ni Kristus tu
sandok portibi on. Ingkon
hatindanghonon nasida paboa Ibana do Raja, djala mamaritahon angka hasintongan taringot tu
harajaon na naeng pajongjongonNa, jala Ibana na gabe Raja di harajaon i. Ingkon
patar jala marsitutu nasida mamaritahon Barita Nauli tu sandok portibi on. Jala
ingkon buktihonon nasida hasintongan ni Barita Nauli i di bagasan angka
sitaonon nasida, sahat tu na ingkon mate. Ndang margogo nasida laho mangulahon
saluhitna i molo mangasahon diri nasida
sandiri. Ai nang sian mulana pe, jolma na gale jala na oto do nasida di
portibi on. Alani i ndang barani nasida gabe sitindangi ni Kristus hatiha na
diadili Ibana, jala sahat tu tingki hananaek ni Kristus on pe tongtong do ndang
margogo nasida.. “Alai jaloonmuna do
hagogoon ni Tondi Parbadia na songgop tu hamu”.
Tangkas
do dipatorang inganan hararat ni panindingion ni angka sisean i di ayat 8 on i
ma mamungka sian huta Jerusalem (Bindu 1-7); di sandok Judea dohot Samaria (Bindu 8:1-11:18);
jala sahat ro di ujung ni tano on (Bindu 11:19 sahat tu ujung ni Buku on). Ulaon manghatindangkon
Kristus manang marbarita nauli i ingkon mulaan nasida sian Jerusalem. Jala torop
halak na manjangkon panindangion nasida. Jala angka halak na so manjangkon
ndang tagamon malua nasida sian uhum. Dungi marsinondang ma sondang nasida sian
huta Jerusalem tu sandok Judea, naung gabe mulaulaon angka na marisuang
andorang so sahat Barita Nauli. Jala sian i torus ma nasida marbarita nauli tu Samaria,
atik pe dimulanai diorai nasida pararathon Barita Nauli di huta i. Alai saluhut
ulaon nasida na denggan jala marguna i sahat tu ujung ni tano on, jala gabe
pasupasu nasida tu sandok portibi on.
Ayat 9, Dung sun dipasahat Tuhan Jesus parsuruon-Na tu angka
sisean-Na i, ditadingkon Tuhan Jesus ma nasida. Tarhinsat ma Ibana dipanotnoti angka sisean-Na i. Sasintong ni
sintongna, diida nasida do Tuhan Jesus i manaek tu banua ginjang, jala tung
mansai denggan do diparrohahon nasida marhite mata nasida, suang songon i nang
pingkiran nasida,, asa ndang boi tertipu
nasida disi. Dungi diholipi ombun i ma Ibana sian jolo ni matanasida. Ombun na
mangholipi Tuhan Jesus di na manaek i
ndada holam ombun biasa na marrumanghon uap ni aek, alai gombaran ni hamuliaon ni inganan na
manggombarhon habangsa ni Debata na gok hamuliaon (2 Musa 33:7-11; 40:34; Mrk. 9:7). Saonari mardalandalan do Ibana di atas ni habong ni
alogo (pat. Psalm. 104:3). Marhite angka ombun i, boi idaonta paboa na
tongtong do adong hubungan na terjaga antara banua ginjang dohot banua tonga
on. Di bagasan angka ombun i, uap i manaek tu ginjang sian tano on, jala ombun
i manorop tu tano on sian ginjang. Alani i, tutu ma Ibana manaek di bagasan
ombun, ai Ibana do tutu parhitean ni Debata dohot jolma, jala marhite Ibana do
angka asi ni roha ni Debata sahat tu hita, suang songon i nang angka tangiangta
sahat tu Debata Ama marhitehite Ibana. On ma parpudi sahal Ibana papatarhon
diri-Na. Jala mata ni angka sisean-Na manghatindanghon Ibana masuk tu bagasan
ombun i. jala, molo naeng botoonta taringot tu na masa di Ibana hatiha i, boi
ma jahaonta Dan 7: 13 “... ro sahalak
merhitehite ombun di langit i, songon anak ni jolma, jala sahat ibana tu Ibana
na so suda ariNa, jala tarboan ibana tu jolo-Na.” Haheheon ni Kristus i
marlapatan paboa naung digotaphon Ibana parsaoran na haidaan dohot angka sisean
i di portibi on, jala marhite na mamangke daging haheheon-Na i, dimasuhi Ibana
inganan na so haidaan ni mata i, i ma inganan ni Debata Ama i.
Ayat 10, Nang pe ndang diida nasida be Tuhan Jesus, alai tongtong dope dinuluthon
nasida Ibana na laho i tu ginjang. Jala laos di tingki i ma, dua surusuruan
pataridahon dirina tu nasida, laho pasahathon tona ni Debata hombar tu na masa
di nasida hatiha i. Dua halak surusuruan i marpahean ulos na marlinanglinang.
Diboto nasida do tangkas ulaon nasida, na tutu situtu do diulahon nasida na
manghobasi Kristus, molo denggan dihobasi nasida angka naposo-Na di portibi on.
Tumangkas muse dipatorang taringot tu na hinatahon
ni surusuruan i di ayat 11. Isina i ma laho
paingothon nasida taringot tu keingintauan nasida di Tuhan Jesus Kristus naung
tarhinsat sian adopan nasida i. Nunga dilehon Tuhan Jesus hasangapon tu nasida,
marhite na sinuru-Na i nasida gabe sitindangi Ibana. Alai ingkon ingot nasida
paboa na jolma do nasida, halak Galilea, angka halak na so adong parbinotoan,
jala na dipandang lea. Tung na so jadi nasida jongjong jala humasusa sambing
mamingkirhon na masa i, ala adong do di nasida pedoman hidup na pasti boi
pangkeon nasida laho borhat, suang songon i nang batu mamak na togu laho pature
pardalanan ni ngolu nasida laho manghatindanghon Kristus.
Laho patoguhon
haporseaon nasida taringot tu haroro ni Kristus na paduahalihon, nunga tung
jotjot dipasahat Gurunasida i pangajarion taringt tusi, jala angka suruan
disuru Debata di tingki na lehet on laho paingothon pangajarion-Na i muse tu
nasida. Di tingki naung binuhul ni Debata, ro do Ibana muse sogot songon naung
niida nasida Ibana manaek tu banua ginjang, jala ndang boi be hirimon nasida manang sungkuonon manang pingkirhonon
nasida ro Ibana muse andorang tingki naung binuhul ni Debata. Haroro ni
Tuhan Jesus na paduahalihon i marpahean daging na imbaru, di bagasan daging na
marmulia, ndada na lea. Tuhan Jesus naung hea ro sahali laho manesa dosa na
saluhut jolma marhite hamamate-Na i, naeng papatarhon diri-Na sahalinai alai
ndada laho mamorsan dosa be (Heber 9:26-28), Tuhan Jesus na hea ro sahali di bagasan
haleaon jala laho parsilangkonon, naeng ro muse di bagasan hamuliaon laho
manguhumi. Tuhan Jesus naung pasahat ulaon i tu angka naung tinobus-Na naeng ro muse laho menuntut
pertanggungjawaban taringot tu denggan do manang ndang diulahon ulaon na
pinasahat-Na i. Nunga manaek Debata mardongan parolopolopon, mardongan soara ni
sarune (Psalm 47:6), jala tuat ma Ibana muse sian banua ginjang
mardongan suraksurak dohot soara ni sarune (1Tes. 4:16). Saonari, mago Ibana sian parnidaan ni matanta ala
diholipi ombun jala sahat tu banua ginjang, ndang boi taihuthon Ibana saonari.
Alai, haduan, ihuthononta do Ibana,
hatiha na nialap-Na hita rap dohot Ibana di bagasan ombun laho manomunomu Tuhan
i tu langit an, jadi olat ni i sai tongtong ma hita rap dohot Tuhan i.
III. Hahonaan
Ni Turpuk
Ojahan ni turpuk
jamita di Minggu Hananek ni Tuhan Jesus Kristus tu Banu Ginjang sadari on, i
ma: “Gabe Sitindangi Ni Kristus Sahat Tu Ujung Ni Portibi On”. Hananaek ni Tuhan
Jesus Kristus tu banua ginjang gabe tanda parpadanan, disi ma tajalo huaso asa
gabe sitindangi ni Kristus. Nunga manaek Tuhan Jesus Kristus tu banua ginjang,
alai hananaek-Na i ndada ujung ni saluhut ulaon-Na. Dipangke dope hita saluhutna
asa gabe sitindangi-Na. Alani i:
1. Gabe
sitindangi ni Kristus, ingkon unduk do hita tu hasintongan ni Debata, dibohali
do hita marhite huaso-Na, jala digohi do hita di bagasan Tondi Parbadia. Alani
i, panindangionta i pe ingkon marharoroan sian huaso ni Tondi Parbadia do.
Panindangionta i marharoroan sian asiniroha ni Kristus, ndada panindangion na
palsu ala ni ngolu na marisuang, na holan naeng mangalului hasonangan di
harajaon portibi.
2. Tangkas do taboto, paboa na masa do logo ni
ari suang songon i nang ari udan, marsingkat soring. Manang dia pe na naeng
masa di ari i, ndang adong hita na umbotosa. Sandok, na pasti ingkon
sesuaihononhon ma dirinta tu na masa i, asa tung dia pe na masa, ta pangke ma
dohot denggan. Tuhan Debata do bonana dohot ujungna. Alani, saguru di Ibana do
saluhutna, jala patupaon-Na ma sude di tingki halehetanna. Jala saluhut na
binahena-Na i manumpak tu na denggan do saluhutna.
3. Ndang ulaon na mura gabe panindangi. Olo do
ngukngak, boi do sala, bahkan boi do terancam. Alai unang lomos jala unang mabiar hita.
Nang pe nunga manaek Tuhan Jesus tu banua ginjang, alai hundul do Ibana di
siamun ni Debata. Jala
marhuaso situtu do Ibana di banua ginjang dohot di tano on. Nunga dilehon huaso
di hita asa gabe sitindangi di Ibana. Diparbohali
huaso-Na i do hita asa margogo, jala marhamonangan do hita bahenon-Na. Alani i,
satia ma hita gabe sitindangi-Na sahat tu haroro-Na na paduahalihon, Amen.
Post a Comment