MINGGU PENTAKOSTA I 5 JUNI 2021 Evangelium: Rom 8:8-11 - Mundosaragi

 

Mangolu di bagasan Tondi

I.                   Patujolo

Di na mandalani parngoluan on, adong do marpiga massam godaan na boi mambaen hita madabu tu bagasan dosa jala godang do persoalan dohot angka na masa na ta adopi. Na pasti hita jolma adong do batas na, molo holan mangasahon hagogoonta sandiri hita. Ido umbaen didok Tuhan Jesus “Dungo ma hamu jala martangiang, asa unang bongot hamu tu bagasan pangunjunan; ai na girgir do nian tondi I, alai gale do ia daging” (Markus 14:38). Alana dang adong sada pe pambahenan na ture na taulahon anggo mangasahon dirinta sandiri. Unang ma adong na manganggarhon dirina, Tuhan marhite tondi-Na do da mian di dirinta, ima na manggogoihpn hita laho mangulahon saluhut ulaon na denggan (Efesus 2: 9-10). Di  na mandalani ngolunta, unang ma hita berkecil hati alani hahurangonta, jala hita jolma na gale, alai ikon boi do hita berbesar hati laho manjalo huaso ni tondi ni Debata na naeng mangajari jala manogu-nogu hita di ngolunta. Ido Umbahen hita dipauba hombar tu hamuliaon ni Debata. Dipaingot do hita asa unang mangolu hita dibagasan hisap-hisap ni daging, alai mangolu ma hita dibagasan Tondi, ima : holong, lasniroha, hadameon, hasabaron, (Galatia 5: 22-23).

 

II.                Hatorangan Ni Turpuk

Andorang turpuk on, dipatorang Apostel Paulus do parungkilonna marningot dosa dohot ngolu na sintong. Di turpuk on, dipabotohon do alusni nadua parungkilon i. Parungkilon na parjolo, dialusi si Paulus di ayat 1-4, ima dibagasan Kristus dang adong be uhum. On ma pambahenan ni Debata na so boi ulahonon ni jolma. Di suru Debata do Anak na Jesus Kristus laho paluahon jolma pardosa jala di suru do tondi porbadia laho mengalehon ngolu na pamonanghon jolma I sian dosa. Ia parungkilon na paduahon, ima di alusi si Paulus ma di ayat 5-8, ima mangolu marhite Tondi, dang marhite hadagingon. Holan Tondi Porbadia do na boi pasangguphon hita laho mangulahon aha na hombar tu lomo ni roha ni Debata. Angkup ni I, hasintongan ni Debata boi diondolhon rap dohot ngolu na dibagasan Tondi, dang be dibagasan daging (9-11). Ajaran ni turpuk on mansai ringkot do, alana mangajarhon taringot dasar ni haporseaon ni halak Kristen. Debata na pamonanghon hita sian hadosaon ima marhite Jesus Kristus na mate humongkop hita. Ibana na mampargogoi hita asa badia hita jala marhasintongan hombar tu lomo ni roha-Na, ima marhitehon Tondi na badia na mian dibagasan rohanta be.

            Ayat 8-9 patoranghon ima : Sude halak na porsea manjalo Jesus Kristus gabe sipalua jala Tuhan, nampuna Tondi Porbadia na mian dibagasan nasida. Hita do Joro ni Debata jala Tondi (1 Kor. 3:16). Ngolunta on dang be di hita, nungga dituhor hita jala lunas  marhitehon Debata. Siala ni I, ingkon ta pasangap ma Tuhan I marhite daging dohot Tondi ta (1 Kor. 3:19-20). Tondi Porbadia do na gabe jaminan di hita na gabe Kristus nampuna hita (Ef.1:14). Jolma na mangolu dibagasan Tondi ni Debata marpangkirimon tu hangoluon jala na pangoluhon saluhut jolma di uhum alai di na mananda Jesus rap do dohot Ibana di hangoluan na salelenglelengna , ima di siamun ni Debata Ama na di Surgo.

            Ayat 10-11 patoranghon ima : Upani dosa ima hamatean, alani do daging ta pe mate. Dang dilomohon Kristus bangso-Na mate/mago, alai marhamubaon do na pinangido ni roha-Na. Nats on tangkas naeng paboahon jala mangondolhon taringot tu “ngolu”. Molo ta sigati nas on, olo do marasing ngolu na idok na di portibion tu ngolu na didok ni Debata. Molo portibion mandok sahalak na mangolu I : mar fisik dope, bergerak dope, karejo, marhosa, marpikkir. Alai di adopan ni Tuhan I sahalak na idok mangolu ndada holan sebatas I, lobi sian i. Alana adong sada unsur na penting na ingkon adong di sada-sada jolma barupe didok ibana mangolu. Ima dibagasan dirina adong Tondi ni Debata. Di ayat 6 didok:“Ai hamatean do harohaon ni daging, alai hangoluan jala hadameon do anggo harohaon ni Tondi ”. On ma na gabe sipeoponta, na mambaen hita asing sian jolma na so porsea di Jesus Kristus, dibagasan hita adong Tondi ni Tuhan na dipasahat tu ngolunta. Sian ngolu hadagingon dang adong imbarta, rap marhosa do, rap karejo,  jala marusaha, alai diadopan ni Tuhan na digoari jolma na mangolu ima na dibagasan dirina mian Tondi ni Debata jala mangulahon. Ido mulana molo taantusi Yehezkiel 37:1-14 dipatorang do halak Israel songon “Holi-holi na masak”, nang pe mangolu nasida di pardagingon, alai sasintongna mate do nasida di partondion. Na mangolu di hadagingon I do nasida, sarupa mai tu halak na so porsea tu Tuhan. Holan hisap-hisap ni daging do na diharingkothon. Ido umbahen dang heran be molo godang jolma saonari manukun taringot “aha do arti ni ngolu”. Raja Salomo mandok di Parjamita ima magopo do anggo ngolu na di portibion. Nang pe Hapistaran ni si Salomo mandok “Pambahenan di hasiangan on laho salpu do saluhut” ndada gabe dang porlu di hita panghirimon, cita-cita dohot karir. Alai justru sebalikna ingkon boi do hita mangharingkothon sude andorang dilehon Tuhan dope di hita kesempatan, ta lului saluhut na ima na hombar tu bimbingan nang tuntunanni Tuhan i. Asa tung aha pen a taulahon jala tapatupa saluhut na I taguruhon marhite Tondina sian Tuhan. Tuhan mangampehon Tondi I tu ganup jolma na porsea tu Tuhan Jesus, jala asa boi hita marhangoluan dibagasan hadameon. Na mian Jesus dibagasan ngoluni jolma ima dalan ngolu na tarpasu-pasu. Ndada alani portibion jolma I manghilalahon basa-basa, alai alani Tuhan ido. Jolma na mangolu dibagasan daging ima jolma na sibuk di angka ngolu hadosaon. Alai jolma na mangolu dibagasan Tondi ima jolma na mangolu di hasintongan jala mangasahon Tondi. Hisap-hisap ni daging maralo do tu Debata. Jolma na mangolu dibagasan hadagingon ndada boi pasonaghon roha ni Debata.

 

III.             Aplikasi

1.      Mangolu dibagasan Tondi mangharorohon hadameon, alai anggo ngolu ni pardagingon mamboan tu hamatean manang dosa. Alani I ingon boi do tarajai dirinta sian na masa di portibion

2.      Di tingki mangolu hita jala mangasahon Tondi, Tondi I do na manuntun hita. Tondi do na mangalehon gogo tu hita laho mangadopi angka na masa, na manegai di ngolunta. Ise na boi mangalo hisap-hisap ni daging ido na mangolu. Ta adopi ma prose laho mangulahon aha na hombar tu lomo ni roha ni Debata jala asa sahat hita tu hangoluan salelenglelengna

3.      Mangolu dibagasan Tondi mambaen hita tarjou dibagasan Kristus (Roma 8:9). Siala ni I, molo mangolu hita dibagasan Tonda, ingkon totap do hita ampuna ni Kristus jala aha na nisangkapan ni Kristus, patupaon-Na doi hombar tu parngoluanta.