MINGGU ROGATE 22 MEI 2022 Engelium: Yakobus 5:13-18 - Mundosaragi

 

Huaso ni Tangiang ni Halak na Bonar

I.          Patujolo

Surat Yakobus ditongos tu halak Kristen Yahudi na di pangarantoan (diaspora) na mairisihon alus na praktis mangadopi ragam hamaolon, huhut manogunogu huria i asa haruar sian pangantusion na sala tu ngolu na sintong. Isarana pangantusion taringot tu haporseaon na so dipatuduhon marhite pangulaon. Laos ihutma mamodai nasida nang hita nuaeng mangantusi hinaarga ni tangiang dohot gogona tu ngulonta. Si Jakobus do panuratna hira taon 80-90 masehi. Goar ni minggunta on “Rogate” lapatanna “Tangiang”. tangiang ima pangkataion haporseaon dohot Debata na puas sian roha. Doshon hosa ni tondi do tangiang, jala tung mansai arga jala margogo do tangiang mangurupi hita. Tema minggu “Huaso ni tangiang”, nian undasip do molo tema minggu i mandok “gogo ni tangiang” jala laos tu si do boanonnami turpuk on, paandarhon “gogo ni tangiang” di  ngolu ni siihuthon Kristus.

 

II.        Tafsiran/Aplikasi

            Tangiang, i do gogo sian saluhut hagogoon na adong, alani i:

1.       Patujolo ma tangiang sian ulaonmu.

Si Jakobus mangantusi paboa tindakan na parjolo tu namarsahit, ima tangiang. Alai hasomalan di hita, molo adong na marsahit pintor parjolo do hita mangalean ubat baru pe tatangianghon, jala adong dope na humebat, ndang ringkot ubat sai ma holang tangiang. Ima nanaeng patureon ni hata ni Debata di hita, molo adong na marsahit, molo adong hamaolon, adong sitaonon ingkon jumolo do hita martangiang pasahathon tu Debata. Ai jotjot do Tuhani paimahon tangiangta andorang so taubati sahitta.

Di taon 1988, Dr.Randolp Byrd, sahalak kardiolog mambagi 393 pasian na marsahit jantung di San Fransisco General Hospital Medical Center tu dua bagian.bagian na parjolo sai ditangianghon halak kristen na adong di kota i, alai bagian na paduahon ndang ditangianghon. Hasilna, bagian na ditangianghon i godang na malum, otik do dipangke antibiotik, jala mangorui bakteri. Dokter Amerika patupahon penelitian na menghasilkan paboa na margogo situtu do tangiang ni partigor. Tangiangnai parsidohot di proses pamalumhon sahit, jala ido tindakan na parjolo patupaon dungi mangihutma pangubation.

Tangiang i ma paluahon na marsahit i, gabe boi hehe, alai ndada holan pamalumhon sahitna, alai umbalga sian i gabe boi sesa dosana molo tung adong diulahon. Yakobus ndang manjamin malum sahit, alai dijamin pasti malua. Molo sahit i marpardomuan tu dosa, alai marhite tangiang ipe disesa do dosa nangpe ndang tolap gogo ni namasahit ipe manghatahonsa, alai marhite tangiang ni angka sintua gabe sesa  ma  dosana.  Alani  i  do  ringkot  do  marsitopotan  dosa  dibagasan  tangiang  (bdn  tangiang  ale amanami).

2.       Tapature ma dirinta gabe jolma na bonar asa margogo jala marhasil tangiangta.

Margogo dohot marhasil sada ihot doi, alana tangiang ndang mungkin margogo anggo so marhasil. Alai na dua hata on tong do dang dos lapatanna. “margogo” patuduhon paboa tangiang i mampu patupahon angka habalgaon, dungi “marhasil” patuduhon paboa   tangiang i di oloi Debata. Dipatuduhon tu hita gogo ni tangiang dohot hasilna marhite si Elia dohot tangiangna. Margogo jala marhasil do tangiang ni si Elia, ai boi di paso ibana asa unang ro udan 3,5 taon (ay.17b), di paro ibana udan (ay.18// 1 Raj.18:42-45), boi ro api sian langit ( 1Raj.18:36-38) jala dipangolu ibana anak ni sahalak ina na mabalu di Sarfat (1 Raj.17:17-24). nuaeng nanaeng si buatontan boasa boi margogo jala marhasil tangiang ni si Elia? Songon dia do huroha hadirion ni halak na bonar na margogo jala marhasil tangiangna. Taboto do na urrade do Debata mangalean martimbanghon hita dohot tangiangta. Alai dihataridaanna, jotjot do tangiangta ndang maralus, ujungna marsak jala gale ma hita ditangiangta i. Boasa? Sada do alusna ala ndang jolma na bonar hita diadopanna.

Asa margogo jala marhasil tangiangta ingkon adong do di hita karakter on:

-       Na martangiang ingkon halak partigor do (16b). Jolma na tigor ima naung porsea di Tuhan Jesus. Nian ndang adong hita na tigor sian hadirionta, alai dung di patigor Debata hita naeng ma mangolu dibagasan habadiaon, ndang dibagasan dosa be, ai taingot ma dosa i do mangambati tangiangta tu Debata (bnd Yoh.9:31). Molo ndang ditangihon Debata tangiangmu, cek ma jo haporseaonmu dohot habadiaonmu, atik na adong do na hurang disi. Gogo ni tangiang ndada di hata-hata na, di hinadeak ni angka hata na dipandok di tangiangna i, alai di hadirion ni si partangiang i do. Godang do halak na memahami paboa tangiang na hebat ima molo malo na mangkatahonsa, marhite hata na uli jala nunur huhut tabo begeon, nian denggan do uli angka hata ni angka tangiangta, alai taingot ma ndada di hinauli ni angka hata ni tangiangta i gogo ni tangiang. Adong do halak dung sidung martangiang disungkun ibana dongganna “boha hebat do dibege ho tangiang ki” ninna. Di rajumi ibana paboa kehebatan ni tangiang ima molo terpesona halak mambege angka hata ni tangiangna i. Porlu do antusanta lumobi di angka dongan na maol suruon martangiang paboa hagogoon ni tangiang ndang di hata-hatana alai di hadirionta do, halak partigor do hita manang ndang.

 

-       Na  martangiang  ingkon  dihaburjuhon.(17-18).  adong  do  istilah  di  halak  Ibrani  na  mandok: martangiang dibagasan tangiang, lapatanna tangiang na so marnamontok, na jugul huhut na serius ndang marmeam-meam. Molo martangiang hamu, serius do manang marmea-meam, asal martangiang, molo ditangihon denggan, molo ndang ditangihon ndang pola boha. Dihaburjuhon ma martangiang.

 

-       Na martangiang ingkon do di dibagasan toruk ni roha. Taida halak Farisi na martangiang dibagasan ginjang ni roha, na mangetong dirina humebat  sian na asing, alai taida ma sahalak sijalo beo na martangiang dibagasan toruk ni roha na mangetong dirina ndang talup di adopan ni Debata. (Luk.18:9-14). Atik jolma na mora ho, parpangkat, na beteng, na hebat alai disi ro ho martangiang tu Debata ingkon tandaonmu do dirim na ramun, na so adong sipangasohononmu di adopan ni Debata. Manang Naposo ni Tuhan i ho, manang boha pe keadaanmu dohot statusmu, molo martangiang tu Debata ingkon do dibagasan toruk ni roha. Pandohan ni halak Batak mandok :”di toru do tangan na mangido”. alani i molo ro tu adopan ni Debata ingkon do dibagasan toruk ni roha.

 

-       Tangiang na marojahan tu haporseaon na so ganggu tu Debata. Dibagasan haporseaon na so ganggu do si Elia ditangiangna asa diparo Jahowa udan, laho patangkashon pola do pitu hali naposona disuru ibana marnida  tanda-tanda  manang  na  ro  udan  i.  Ndang  ganggu  roha  ni  si  Elia  ai  terbukti  do  dung papituhalihon diulahi naposona marnida, di ida ma sada ombun mardongan haba-haba, gabe ro ma udan tipotipo. Dibagasan haporsesaon ma hita martangiang, unang ganggu rohanta, ai na ganggu roha i tudos do tu galumbang ni laut na pinahuturhutur jala na pinalindaklindak ni alogo, molo ganggu do roha dibagasan tangiang unang ma diparbaga roha jaloon ni i agia aha sian Tuhan i. Tuhan Jesus pe tangkas do di paingot angka sisean i asa porsea jala unang ganggu rohanasida diangka pangidoan nasida tu Debata (Mat.21:21-22).

Naeng margogo tangiangmu, tiru ma hadirion ni si Elia. Amen