Debata Na Marhamuliaon Jala Na Sanga - Mundosaragi

 

MINGGU TRINITATIS

12 JUNI  2022

Evangelium: Mazmur 8:1-10

 

I.         Patujolo

            Di 2 Samuel 6:12-18, dipajojor do songon dia si Daud laho mamboan Poti parpadanan sian jabu ni si Obed-Edom tu Jerusalem. Digombarhon do songon dia si Daud mamparhamaol Poti Parpadanan i, ala  gabe songon sada tanda patudu haadongan ni Debata do i di tongatonga haroroni Poti Parpadanan i.  Di 2 Samuel 6:14 di Dok:  “Mangasa gogo huhut anggo si Daud marhujingjang di adopan ni Jahowa; jala marpangkean baju epod sian haen na bontar do si Daud." Di pajojor muse, sapanjang pardalanan nasida na mamboan Poti Pardalanan i, di ganup onom langka pelehonon ni si Daud ma sada lombu dohot anak ni lombu na mokmok songon sada tanda hamuliateon tu pandonganion ni Debata di nasida. Taruli pasupasu na sumalin do isi ni jabu ni Obed-Edom panghorhon ni poti Parpadanan andorang di jabuna. Suang songoni, uju Poti Parpadanan i di huta ni si Daud … “tarpasupasu ma bangso i di bagasan goar ni Tuhan Debata (2 Samuel 6:18)”.

            Tung massai sipasangap si Daud do Tuhan Debata, jala di patuginjang ibana goar ni Debata. Ditanda ibana dirina di adopan ni Debata. Di dok ibana: Ale Jahowa, Sigomgom hami. Mansai sangap do goarmu di liat portibi on, dipatimbul Ho do hamuliaonmu ro di atas ni angka langit (ayat 2). Boasa tu songon i pamujion ni si Daud tu Debata?

 

II.        Hatorangan

            Ende ni par Psalmen on patujolohon hasangapon ni goar ni Jahowa (ayat2,8). Hasangapon ni Jahowa tung patar situtu marhite angka jadi-jadianNa. Di bagasan Alkitab ‘hamuliaon” di dok “kemuliaan” (glory), “kabod” (Heber), sarupa lapatanna tu : Sangap, tumimbul, marbungaran, marhuarar; “Doxa”(Bahasa Gorik): marbungaran, marsinondang, timbul. Jadi molo di dok Debata na marmulia, lapatanna: Debata na sangap, natumimbul. Marbungaran, marsinondang. Molo di Padan na robi, sadasada goar patuduhon hadirion ni sadasada halak.

            Godang do boi tajuppa i hata ‘hamuliaon’ di buku nabadia i. Hamuliaon ni Debata tarida dibagasan hadirion ni Tuhan Jesus, Ibana Sinondang ni hamuliaon ni Debata (Heber 1:3). Di partubu ni Jesus tu portibi on, angka parmahan marnida sinondang ni hamuliaon ni Tuhan Debata (Lukas 2:9, 14). Di nanakkok Jesus dohot siseanna tu sada dolok, di ida si Petrus, si Jakkobus dohot si Johannes do hamuliaon ni Tuhan Jesus. Dibukku ni si Johannes, ditingki na mangalean hosaNa Jesus tu hamatean, ima sada hamuliaon ni Jesus na sumurung  (Joh 7:39; 12:23-28; 13:31; 17:5; bnd Heber 2:9). Haheheon ni Jesus dohot parnakkokna tu banua ginjang, tong do gabe sada hamuliaon ni Tuhan i.  (Luk 24:26; Kis 3:13; 7:55; Rm 6:4; 1 Tim 3:16; 1 Ptr 1:21). Alai di ginjang saluhutna i, hamuliaonNa, dipapatar di harorona napaduahon (Mrk 8:38; 13:26, dan).

          Marhitehite Psalmen 8 on, par psalmen naeng mangondolhon goar ni Jahowa ndang Debata ni halak Jahudi sambing, alai dohot do Debata ni saluhut portibi on na tumompa langit dohot saluhut pangisina. Lam martamba-tamba ma muse patar ni  hamuliaon ni Debata marhitehite najinadihonna jolma manisia. Humurang apala otik do ibana sian Debata dibahen Ho, alai ditalitalihon Ho muse hamuliaon dohot hatongamon tu ibana (ayat 6).  Di dok hata i: “dungi di tompa Debata jolma i tumiru rupaNa ( 1 Musa 1:26). Marhite i ma, tarjou jolma i laho dipangke  Debata mangula mangaradoti portibi on. Gabe tunduk ma saluhut namarhosa di toru ni gomgoman ni jolma (Ayat 7-9). Alai jolma i, ikkon tunduk di adopan ni Debata songon sude pangisi ni portibi on (Ayat 10)

            Psalmen 8 on, mangurupi hita mananda hasangapon ni Debata. Hasangapot dohot hamuliaon holan ugasan ni Debata (ayat 1,10). Saluhut lung manindangi hasapangon ni Debata Jahowa (ayat 4A). Dilehon Debata parbinotoan tu jolma i laho mamuji dohot pasangap habadiaonNa (ayat 3). Tung siang angka pamangan ni dakdanak dihot posoposo mamuji sangap ni Debata. Jolma i di tompa Debata gabe pusuk ni jadijadianNa (ayat5-6).  Ala dipakke Debata do jolma i laho mangaradoti portibion, gabe mararga ma jolma i di saluhut na marhosa di portibion (ayat 7)

            Sian ayat parjolo sahat tu panimpuli di bindu on, pajojorhon ende napasangaphon jala patimbohon goar ni Debata. Hapangapianon ni si Daud tu Debata di patudu imana sian Psalmen on. Tung longang situtu rohana marnida huaso ni Debata, ala ndang holan sian hajang-hajang na diginjang binereng huasona, dohot do sian pamangan ni dakdanak nabaru tubu tarida huaso ni Debata. Sian dakdanak na manarus boi ranapan huaso ni Debata, ai dipatupa Debata do dohot hangoluan marhite-hite sian tarus ni sada ina. Mananda huaso ni Debata di sude panggulmitan ni ngolu ni jolma, mambahen jolma i mananda dirina di adopan ni Debata (ayat 4-5). 

           

III.       Hahonaan.

            Debata nabadia jala na sangap. Songon dia ma panghonaan ni i tu ngolunta? Ikkon tapuji jala pasangaponta ma Debata. Boasa ikkon pasangaponta? Ai disarihon Debata do ngolunta sian bortian, nabaru tubu sahat tu namatua, mate dohot tu hangoluan nasaleleng ni lelengna. Dang lokkang asi ni rohaNa di hita. Diparade do sude nasa namarhosa, natubu dohot angka uagsan naasing, asa adong laho hobasan ni manusia di potibi on. Disarihon do ngolunta sahat tu haheheonta sian hamatean. Nang pe naung hona toruan ni dosa jolma i, alai Debata sandiri ro tu portibi on jala mate di hau pinarsilang holan humonghop dosanta, asa unang be mardalan hita di dalan hagolapan. Jala Ibana paimbaru ngolunta, gabe boi ma hita mardame dohot Debata, gariada gabe ianakhonNa. Ima na gabe sada parbossiran umbahen naingkon pasangaponta Debata.

            Angkup ni i, songon dia ma hita laho pasangap Debata? Parjolo, marhite hite parsaoran di hahomion tu Ibana (Ibadah). Boi do holan sahalak niba, alai boi muse do marhite-hite punguan. Ta pasangap ma Ibana marhite-hite ende puji-pujian. Paduahon, marhitehite na saling menghargai sesama dongan jolma. Ai di sude jolma do adong  gambaran/ tiruan ni Debata. Patoluhoan, gabe jolma na denggan jala bertanggungjawab laho mangula dohot mangaradoti portibion.

            Jolma namanda hamuliaon ni Debata, ikkon bai gabe pasu-pasu dui na humaliang, patuduhon jala paboahon asi ni roha ni Debata na saleleng ni lelengna. On ma na gabe sada tanggungjawab na so boi di halupahon angka naporsea. Parngoluan di portibion holan parsatongkinan do, ikkon malo jolma i mamilangi ari-arina, dohot patuduhon hadirionna di parsatongkinan on. Gabe jolma na marguna di adopan ni Debata, di donganna jolma dohot tu parngoluan ni portibi on.

                        Suang songon i parhuria on. Ikkon diingot huria i do lapatan ni haadongan na tu bagasan huria i (sentripetal), dohot tu luar ni huria i (sentrifugal). Marhite sian i, tandaon ni saluhut jolma manisia ma, hasangapaon dohot hamuliaon ni Debata, gabe boi ma nasida parsidohot laho mauji pasangat Debata, gabe taruli pasu-pasu dohot hangoluan na saleleng ni leleng na nasian Tuhan Jesus Kristus. Amin.