Gabe
Anak Ni Debata Marhitehite Haporseaon
Di
Bagasan Jesus Kristus
I.
Patujolo
Surat
na ginurithon jala tinongoshon ni Apostel Paulus tu huria na di Galatia ima
halak Kristen Jahudi naung gabe manirpang jala holang sian Tuhan Debata
hinorhon ni na tung marpangunsandean jala mangharonsothon tu parniulaon di uhum
na pinasahat ni Debata tu bangso i marhite si Musa ima na ginoaran Patik Raya.
Tung marusaha situtu do nasida mangolu di pangoloion nang hatunduhon di patik
na sappulu i baliksa pola dipahebaheba nasida dope patik i na nirajuman nasida
paboa i do uhum jala suhat-suhat asa tung talup dapotan haluaon. Marusaha do
Apostel Paulus laho patanakahon panganstusion na dasip mangadopi masalah na
niadopan ni huria i marhite na paadophon parasingan ni ‘auga’ = ‘kuk’ uhum na
pinasahat ni si Musa na mambobani, na paadophon dosa nang pangalaosion dohot
barita haluaon na binoan ni Jesus Kristus na mangarahon jala mangaithon ganup
na porsea tu haluaon di haporseaon. Mangarisipi surat on tung bagas do
hinanghamna mangargahon huhut manghamauliatehon haluaon na pinaandar ni Jesus
Kristus. Digurithon Apostel Paulus suratna tu angka na badia di Galatia nionjar
ni lomos jala biar ni rohana paboa naung holang nasida sian haporseaon di
bagasan Kristus Jesus panghorhon ni na niiuhuthon nasida pangajarion ni angka
na marusaha manghosing barita haluaon na pinatupa ni Jesus Kristus (pah. Galatia 1: 6 – 7). Halak Kristen na
marharoroan sian horong Jahudi mangajari halak di duru ni Jahudi marhite
pangajarion na lipe na mangondolhon paboa ingkon mangulahon parsunaton jala
ingkon polin mangulahon uhum na pinasahat ni si Musa asa talup di haluaon (pah. Galatia 6: 12; Ul. Ap 15: 1). Nunga
torop di huria Galatia na mangolu jala porsea tu pangajaran i (pah. Galatia 4: 10). Marhite surat on,
tauji ma jolo mangarisipi sangkap ni Apostel Paulus na mangondolhon:
1. Mambela
hadirionna sian angka parbarita pargapgap na marusaha mangaruppakhon jala mangapas
haapostelonna.
2. Mangajarhon
paboa ganup halak Jahudi manang na so Jahudi talup dapotan haluaon marhite
pardamean na pinatupa ni Tuhan Jesus di
bagasan haporseaon alai unang be mangunsande tu uhum na pinasahat ni si Musa.
3. Padasiphon
pangantusion didia do sintuhu ni patik na pinasahat ni si Musa di sangkap
hatuaon na sian Debata marhite Jesus Kristus.
4. Paadophon
parasingan ni Padan Na Robi na pinasahat ni Debata marhite si Musa dohot Padan
Na Imbaru ima Kristus Jesus.
5. Mangondolhon
tu ganup halak na porsea asa mangolu di bagasan Tondi.
Galatia Bindu 3 on marisihon paboa Apostel
Paulus marusaha manghajongjonghon habonggalon ni Barita Na Uli na binoan ni
Tuhan Jesus Kristus. Diajarhon jala dipaadop ibana do paboa si Abraham sada
tudos-tudos sian halak na pinalua marhite haporseaon ndada marhite na
mangulahon patik na pinasahat ni si Musa. Marhite pardamean, ditobus Jesus
Kristus do manisia sian gomgoman ni dosa nang hamatean.
II.
Hatoragan
Ay. 23, na tarihot do sauhutna tu uhuman na sian
Debata na pinatupaNa marhite patik ni Debata, jala sada do dalan tu haluaon i
ima marhite haporseaon. Alai andorang so porsea dope hita, adong do sintuhu ni
patik na pinasahat ni si Musa di ngolunta ima songon panjaga na manghurung
hita. Sian pardalanan ni sejarah ni bangso Israel, nalnal do boi idaonta paboa
dijaga do nasida jala dihurung marhite patik ni Debata. Di ugamo Jahudi,
dipabidang jala dipahebaheba nasida dope patik i asa tung singkop jala dasip
dirajumi nasida. Ujungna dunghon ro Jesus Kristus tarhurung jala tarhinsu ma
nasida marhite angka hasomalan nang adat. Asa marhite i tung mansai maol do
nasida dapotan haluaon hinorhon ni parsihohoton nasida di patik na so tuk
tarulahon nasida i.
Ay. 24 - 27, Tontu mansai balga do mutiha ni patik na
pinasahat ni si Musa ima na gabe siparorot = penuntun di ganup jolma andorang so ro dope Jesus Kristus. Patik i
sasintongna marguna do i laho manjamothon jolma i asa tung tunduk maradophon
aha na pinangido ni Debata. Patik i dipangke asa tung unduk jolma i di adopan
ni Debata marhite angka uhum na koras. Asa dapot hita ma sasintongna turgas ni
patik i ima manjamothon jala patandahon jolma i tu na pinarsinta ni Debata
sampe boi nasida dipalua. Mutiha ni patik i mangarahon hita asa tung rade
mangarajumi paboa na gok dosa do hita, jala na mangarahon hita gok biar paboa
ndang margolle hita mangulahon patik i. Jala ingkon sai rajumanta do paboa molo
naeng malua hita marhite patik ni Debata, ingkon taulahon do i singkop. Asa molo
so tarulahon hita, ingkon rade ma hita manjalo uhuman ima hamatean. Sialani
sahat ma ngolu ni jolma i tu sangkap asa malua sian gomgoman ni patik i. Ndang
tuk patik i mamboan hita tu haluaon alai jumpang ma hita ma haluoan i di
bagasan Jesus Kristus. Molo tapamanat di Rom 10: 4 didok: “Ai Kristus do ujung
ni patik i laho mamintori nasa na porsea”. Aha na so tuk tarpatupa patik i
nunga dipatupa Debata marhite na manongos AnakNa Jesus Kristus, sialani Kristus
do hagogok ni patik i. Marhite naung ro
Jesus Kristus, na gabe unok ni haporseaonta ima marondolan tu Jesus Kristus
naung manggonopi patik i. Alai diondolhon Apostel Paulus do paboa dasor ni
patik raya ndada haporseaon alai marhite parniulaon manang usaha. Dipaullop jala diondolhon Apostel Paulus do
paboa halak Jahudi dohot halak di duru ni Jahudi dos do ima halak pardosa,
ndang adong parasingan, saluhutna nasida dapotan hasintongan marhite haporseaon
jala marhitehite i do nasida gabe talup goaron anak ni Debata jala marhite i
gabe sada ma nasida di adopan ni Debata. Molo tasigati umbagas, adong panatapan
ni halak Jahudi paboa dirajumi nasida do na tung mansai tandi situtu nasida
sian halak na di duru nasida na so mangolu di bagasa patik na pinasahat ni si
Musa. Ganup na so mangolu di bagasan patik, rajuman ma i halak na ramun, jala
ndang denggan marsaor dohot halak si songon i. Dipatullom Apostel Paulus ma
paboa na lipe pangantusion nasida i, paboa patik ndang tuk mambahen halak
Jahudi gabe sintong, alai holan marhite haporseaon sambing do sasahalak rajuman
gabe dapotan hasintongan. Haporseaon tu Jesus Kristus ima punsu na mambahen
hita gabe anak ni Debata, marlangku do i tu ganup halak na porsea, tu halak na
marsunat di pardagingon manang na so marsunat. Pangantusion na songon on
manghosing pangalaho na matorbanghu sian halak Jahudi na manatap halak di duru
ni nasida mansai lea jala ramun. Sai hera na tuk do patik i mambahen
suhat-suhat di hadirion. Pabagashon
pangantusion i, dipaadop apostel i ma pardomuan ni patik dohot haporseaon.
Patik ima songon siparorot (penuntun).
Sahalak guru na mangarorot manang mangajari angka ianakkonna, tarmasuk hatoban
tu parsingkolaan. Asa dung matobang jala matoras dakdanak i, ndang ringkot be
di nasida si parorot i. Laos songon i do dunghon digohi Jesus Krsitus sangkap
ni Debata, talup ma rajuman dapotan hasintongan ganup na porsea marhite
haporseaon, sialani ndang targantung be manisia i tu patik na tagombarhon
songon siparorot i.
Ay.
28 – 29, Adong do parsaingan ni
halak Jahudi sian na so jahudi? Nunga sai marulak-ulak dipasahat Apostel
Paulus paboa ndang adong parasingan
nasida, ima paboa saluhutna do nasida halak pardosa (pah. 2: 16; 3: 22) alai sambalik na i holan marhite haporseaon do
nasida saluhutna asa dapotan hasintongan. Molo na uju i rajuman do halak di duru
ni Jahudi halak na lea jala na so dapot jujuron, alai marhite haporseaon di
bagasan Jesus Kristus nunga dipabangkit nasida gabe anak ni Debata na
marhasangapon rap dohot halak Jahudi. Ndang mardia imbar be disi halak Jahudi
manang na so Jahudi, baoa manang borua, na sangap nang lea baliksa hatoban, na
mora nang na pogos saluhutna gabe dipasada di bagasan Jesus Kristus. Jala
sisaihot dohot janji nang padan haanahon i, laos dibagabagahon do upa nang
tuppal ima siteanon ni ganup halak na porsea.
III. Hahonaan
Adong
do sada sian pangalaho ni hajolmaon na maol diuba ima, ‘panatik na matorbanghu’,
ima pangalaho na mangidolahon, patimbohon manang mampartahanhon sada-sada
pangantusion manang prinsip na tung mansai tarhinsu tu angka parasingan nang
panatapan na marasing. Na umpaltak, Halak na panatik ndang hea olo marnida
tarlumobi manjalo paboa di duru ni na niantusan jala naniihuthonna i adong
hasintongan. Ai sai lohot do di rohana paboa holan dirina jala na niihuthonna i
do na sintong, di duru ni i sai na sala do saluhutna. Sundung ni pangalahona i,
ingkon sahat jala tartait ma ngoluna tu ngolu na paburnang diri jala ginjang
marroha. Pangalaho si songon i ma na ampe tu ngolu ni halak Jahudi, na
mangarajumi houmna jala hadirion nasida na badia jala na patut dapotan haluaon
ai sai dirajumi nasida do satia nasida mangulahon patik na pinasahat ni Debata
marhite si Musa. Nunga mansai bagas
diondolhon Apostel Paulus paboa nunga gabe anak ni Debata hita marhitehite
haporseaon di bagasan Jesus Kristus. Ingkon sai rajumanta do paboa di pardaanan
ni ngolunta naung tabolus ima halak na holang sian Jahudi na mangolu di bagasan
Patik. Molo tauji mangarimangi pardalanan ni ngolunta, mansai holang do hita
sian parsihohoton mangolu di bagasan patik, ai sai mangarunta jala manuntun
lomo do hita. Sian panagalaho nang parniulaonta i, holan uhuman do sasintongna
na talup tapuonta sian Debata. Alai mauliate ma di asi dohot holong ni Debata,
marhite AnakNa Tuhan Jesus Krsitus gabe dapotan haluaon hita marhite
haporseaonta. Marhite panobusonNa i gabe diain do hita gabe anakkonNa, jala ala
nunga gabe anakNa hita, talup ma hita dapotan di jambar siteanonta sian Debata.
Molo tung gabe anakkonNa pe hita, sai rajumanta ma paboa holan ala ni asi dohot
holong ni rohaNa do, tontu ingkon sihamauliatehononta ma i. Antong ala naung
gabe malua hita, boha do hita pataridahon haluaon naung taparsaulihon i? Ala
naung gabe anakNa hita, laos sisaihot do marhite haanahon i ingkon
pataridahononta paboa ingkon tadinghononta ma pangalaho na robi, alai ingkon
pareahanta ma hataridaan ni ngolu naung pinalua ni Debata. Ala naung pinalua ni
Debata do hita, ulahononta ma patik ni Debata marhaborhatan sian holongta
maradophon Kristus naung paluahon hita. Molo taulahon pe aha na pinagido ni
patik i, ndada be nionjar ni asa malua hita, alai umbagas sian i, ala naung
taparsaulihon do haluaon i. Marhite las ni roha ulahononta ma i ndada hinorhon
ni na tarhurung tarajumi hadirionta. Di partingkian na parpudi on, tabolus do
Pandemic Covid-19 na pola sampe loja jala maheu hita. Marragam do cara dibahen
pamarenta asa tung malua hita sian pangontak ni sori mago i. Sada sian usaha na
sai manongtong disoarahon pamarenta asa malua hita, ima asa satia hita
maneraphon 5M. Alai molo tapamanat di si ganup ari, maol dope jumpang hita
hasatiaon mamangke masker di angka parsaoran tarmasuk di parmingguon, ndang
jumpang dope gabe hasomalan i. Sada contoh na metmet do i, boha do hita
pataridahon hasatiaonta asa tung dapot haluaon hadirionta nang donganta. Paboa
naung pinillit Jala pinalua ni Debata hita, diigil do sian pardalanan ni
ngolunta ingkon gabe tiruan di angka hasatiaon.
Marhaborhatan sian naung gabe anak naung pinalua hita marhite holong ni
Debata di bagasan Jesus Kristus, naeng lam tandap ma haporseaonta di
tonga-tonga ni portibi on, asa marhite hasatiaonta di Jesus Kristus gabe nalnal
ma hasangapon ni Debata di portibi on. Tahalashon ma paboa nunga gabe anak
haholongan ni Debata hita marhite asi dohot holong ni rohaNa, Amen
Post a Comment