5 Musa 30: 11 – 14 Mamaritahon Jala Mangulahon Hata ni Debata

 

MINGGU IV DUNG TRINITATIS

10 JULI 2022

Evangelium:  5 Musa 30: 11 – 14

Mamaritahon Jala Mangulahon Hata ni Debata

I.          Patujolo:

Tung so adong hita manghalomohon ulaon na marisiuang di angka naung nihalojahon manang gabe ambolong sude angka ulaon nadenggan naung ditambortambori. Diaturhon angka natua-tua do angka ruhut laho mangaramoti parngoluon tu pudian ni ari asa lam tu sonangna parngoluon. Didok angka natua-tua do umpama: “Sinuan bulu sibahen na las, binahen uhum sibahen na horas” na gabe andor sipaihutihuton. Marlapatan do i diaturhon do angka ruhut siihutonon asa jumpang hadameon mambahen parngoluan na sonang. Alani i ma didok situatua angka parjolo: “ompunta sijolo tubu martungkot sialagundi, napinungka naparjolo siihuthonon naparpudi”. Alai dung tamba parbinotoan jala lam turagamna angka luat dohot namasa disi mambahen jotjot tubu angka pangantusion nalumehet, dipature ma pandohan i, ompunta sijolojolo tubu martungkot siala gundi, napinungka naparjolo pinauli ni parpudi. Luhutna nai martujuan asa dapot hasonangan.

II.        Hatorangan:                 

Buku 5 Musa di bahasa Indonesia di dok kitab Ulangan jala somal do digoari Deutronomy, ima namarisihon angka tona (jamita) ni si Musa tu bangso Israel tagan di huta Moab, huta paradianan parpudi ni bangso i andorang so mamasuhi tano Kanaan.  Mangihuthon pande bisuk ni bibel, turpuk on masuk tu horong hata partadingan ni si Musa tu bangso Israel.

Sian angka jamita nunga taboto ganjang do pardalanan ni bangso sian Mesir tano habuangan i (naso huta nasida) manuju sada luat na dibagabagahon Debata nanaeng gabe inganan (huta/luat) parmiaman nasida. Siingoton, naso marnampuna huta parmiaman hian nasida laho mardalan mamolus godang angka namasa tu inganan nagabe nasida marnampuna (dari yang tidak mempunyai/memiliki menjadi mempunyai/memiliki = dari yang tidak ada menjadi ada). Gumodangan dope mangarajumi “siadongan” (arta, kepemilikan) na diportibion do tudutudu ni pasupasu. Molo so marsiadongan ndang tarpasupasu ngoluna, molo so adong tubuna (ianakkon, godangan halak batak mandok anak baoa) ndang tarpasupasu ngoluna, dang dapot rongkap, dang dame parsaripeonna, dang sarjana gellengna, dang dapot pangomoan, gabe dang sonang rohana: dang dapot pasupasu i, ai pasupasu nagodang ima roha sonang (BE. 122:4). Dibagasan pardalanan i, dibolus do ragam hamaolon, sitaonon, situasi namambahen angkadotdot, biar, lomos na patubuhon holso pola do diultophon nasida marhite hamuruhon tu si Musa namanguluhon nasida nang tu Debata sandiri tahe. Atik pe di sude situasi namaol i sai dipatuduhon Debata do huasoNa marhite angka ulaon halongangan laos dalanNa patandahon diri tu bangso napinillit i, sai marulakulak do tubu biar dohot holso ni roha nasida. Tongtong do marulakulak dipatuduhon Debata huasoNa paluahon nasida sian sude ragam ni hasusaan laho paposhon roha jala pahothon roha nasida asa porsea di Debata. Disude napinatuduhon Debata angka ulaon halongangan i naeng patandashon: jonok do Debata tu nasida.

Di naung jumpang tingki ni si Musa, ndang rap be ibana dohot bangso naniuluhononnai, jala naeng sahat ma nasida tu situjuon i, tano napinarbaga ni Debata nanaeng lehonon gabe huta parmiaman nasida, gabe marnampuna ma nasida. Ditonai si Musa nasida asa tontong porsea di Debata. Nunga dipatuduhon Debata hagogoon dohot huasoNa naen gabe parsiajaran najonok do Debata: asa hot nasida mangoloi Debata, nang angka pinompar nasida tu joloan niari, naeng pasahaton ni Debata ma bagabagaNa i tu nasida. : “Ingkon haholonganmu Jahowa, Debatam, jala marparange di angka dalanna, huhut mangaradoti angka patikna, angka aturanna dohot uhumna, asa pangoluonna ho jala patoroponna ho, jala pasupasuon ni Jahowa, Debatam ho di tano sitopotonmu nuaeng bahen partalianmu.”(16). Dipaingothon do tunasida, ia napinangido ni Debata tu nasida nagabe sioloan, nagabe patik sihangoluhonon i: ndang masongkalhu di ho, manang maholangku. Ndada di banua ginjang hata i, Jala ndada di bariba ni laut. Asa ndang adong sidalian mandok masongkalhu, maholanghu.

III.       Panimpuli:

Taboto do tangkas sahat do tano napinarbagabaga ni Debata i gabe partalian (milik) nasida. Naso marnampuna hian tano partalian gabe marnampuna. Tutu ganjang do pardalanan siboluson nasida dohot angka ragam ninamasa siadopan: dilelei, manaripari laut, las niari, mohop niari, mamolus huta ni halak jala diambati, ingkon marporang maralohon jolma raksasa, saluhutna i patuduhon hamaolon, hasusaan, hatahuton; laho manjumpanghon luat naso binoto dohot ditanda nasida dope. Alai jumpang do jala sahat do. Didok: Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida. (Heber 11:1). Pasupasu ni Debata dipungka marhite bagabaga (marlapatan naso adong dope, dang niida dope nabinagabahon-Na), alani i saluhut angka naporsea angka natarpasupasu do. Jala haunduhon/haoloon (ketaatan) ma dalan paubahon “naso- marnampuna” tu “marnampuna”. Haoloon do mamboan bangso Israel sian tano bangkal-bangkal tu tano na gok susu dohot situak niloba. Halak kristen naporsea di Jesus Kristus naeng lam bagas pangantusionna, ia pasupasu dihita ima hangoluan namarsonangsonang saleleng nilelengna, ndada hangoluon tu hamatean. Bagabaga hangoluan nunga dilehon tu hita asa hita “nampunasa”. Didasdasi turpuk on do hita asa tongtong manghaholongi Jahowa, Debata, jala marparange di angka dalanna, huhut mangaradoti angka patikna, angka aturanna dohot uhumNa. Ido na digurithon hurianta HKI gabe Visi (diparnipihon), gabe Huria na Kuat Iman, Misioner, Modern dan Berdedikasi. Dipartingkian na gok hamaolon on, naeng tongtong togu mangulahon parbarita naulion, ndang holan songon na jolo i alai boi paihutihut hamajuon dibagasan haunduhon tu Debata. Naeng lam tangkas dipataridahon hita HKI mangeahi umur 100 taon, asa pasidohot saluhut ruas ni huria patupahon i. Hita angka natoras naeng lam marsitutu marrohahon angka ianakhon asa mangharingkothon parsaoran dihuria huhut marrohahon nasida sotung so mangolu dibagasan ngolu haporseaon i. Hamajuon ni jaman on boi do lam parohon halosohon tu parsaoran di huria, lam tarpedem ala naung somal parmingguon daring. Hata ni natuatua mandok: “Horboni pea raja manggagati di balian molo so lomo roha ai godang do sidalian.” Dipaingothon do tu hita: Ai mansai donok do hata i di ho, di bagasan pamanganmu tahe dohot di bagasan roham, asa ulahononmu i. Unang ma masidalian.