EPISTEL: MAMARITAHON HUHUT MANGULAHON HATA NI DEBATA

Huria ni Tuhanta na hinaholongan di bagasan goar ni Tuhanta Jesus Kristus! Mansai las situtu do roha ni Apostel Paulus maradophon huria Kolosse, siala holong ni roha dohot haporseaon ni huria i. Nian, ndang na si Paulus pajongjonghon huria i alai na tinotas ni si Epapras do huria i (1:3-7). Ai di bagasan hurungan do ibana manurathon surat tu huria Kolosse on. Alai, di tingki pajumpang si Epapras dohot si Paulus (Kol. 4:12), ditongos si Paulus ma tabi marhite Epapras, naposo ni Tuhan i. Boasa songon i balga ni roha ni Apostel Paulus maradophon huria Kolosse i? Songon naposo ni Debata ibana, marungkil situtu do ibana huhut tumangianghon asa jongjong huria i, rimpas jala margomos ni roha situtu di nasa na hinalomohon ni Debata. Surat tongosan ni Paulus dibuhai ibana do manurathon surat i (ay.1-2) i ma paboa na apostel ni Kristus i do ibana, na mandapothon angka na badia, i ma huria Kolosse, angka na porsea di bagasan Kristus. Asi ni roha dohot dame na sian Debata, sai somal do i dipasahat si Paulus tu angka huria na hinobasanna. Ala holan marhite asi ni roha dohot dame na sian Debata di bagasan Jesus Kristus, i do na patauhon ibana nang dohot angka huria i talup marsaor dohot Debata.

            Hilas ni roha ni si Paulus maradophon huria Kolosse tarida do i sian sikap partangiangonna jala mandok mauliate tu Debata Ama, songon ulu ni huria i. Mandok mauliate ibana ala dibege barita taringot tu haporseaon dohot ni holong ni roha nasida (ay.8). Tangiang songon sada ‘sinjata’ ni si Paulus maradophon sude angka huria, nang angka na mangalele ibana. Alani, diajari do hita asa mangharinggashon ngolu na martangiang. Tangiang do hosa hangoluan ni na porsea. Tangiang do dalan pajumpang dohot Debata, alani i unang ma adong nanggo sada halak na losok rohana di partangiangon. Songon i do nang ruas ni huria maradophon parhaladona, manang parhalado maradophon ruas ni huria. Molo so hea be ditangianghon ruas ni huria i parhaladona isarana Pandita, Guru huria, Bibelvrow, Sintua, Evangelis, naung mate do huria i. Lapatanna, nunga gotap hubungan na denggan disi. Sabalikna, molo so hea be ditangianganghon parhalado i angka ruas ni huria (lumobi di duru ni parmingguon) naung mate do parhalado i. Alani i ingkon masitangiangan do ganup parhobas nang ruas ni huria pe. I do na pinatuduhon ni si Paulus di turpuk on, na so mansohot si Paulus dohot angka apostel i laho tumangianghon huria i asa digohi di nasida pantas ni roha laho mananda lomo ni roha ni Debata marhitehite hapistaran dohot habisuhon di bagasan partondion.

            Diigil Paulus do hapantason ni roha dohot bisuk na sian Tuhanta i mian di ruas ni huria i. Ala godang do angka parpoda haliluon na di portibion na naeng mangagohon huria i, marhite hata bisukbisuk ni portibi on dohot marhite angka hata lensem na so marimpola (Kol. 2:8). Alani, ingkon di bagasan hapantason dohot bisuk na sian Debata do na porsea i, laho mangalo nasa poda haliluon na ro tu portibi on. Godang do angka elaela naeng manegai parsihohoton ni na porsea i, lumobi molo nunga sonson angka parungkilon. Alani, tung gomos do ditangianghon si Paulus asa marsihohot huria i di nasa parungkilon. Laos i do sada tiruan na sinosoan ni si Paulus tu huria Pilippi, asa maniru si Paulus ala parsihohotanna ala Barita Nauli i (Plp. 3:17). Gariada sahat tu na dihurungkon do ibana ala Barita Nauli na binaritahonna.

            Asing ni hapantason dohot bisuk na sian Debata tu huria i, diigil si Paulus dope  tu huria Kolosse, i ma panandaon di Debata. Asa molo dung tangkas ditanda nasida Debata, di bagasan Jesus Kristus naung manghophop jolma pardosa i, gabe lam margogo do nasida mangulahon nasa na denggan. Ala Kristus naung mate jala na mulak mangolu, laos i do na gabe sihiromon ni angka na porsea i (pat. ay. 5). Lapatanna, ndang magopo haporseaon dohot habengeton ni na porsea i. Haporseaon dohot panghirimonta paboa naung sangkambona hita dohot Tuhan i, Kristus naung jumolo mate dohot do nang hita mate, jala Kristus naung hehe sian hamatean laos dohot do hita muse paheheonNa. I do panghirimonta. Alani asa jumpang i, ingkon na tahangoluhon do marparange na denggan marhite hata ni Debata huhut naeng gabe halomoan situtu jala marparbuehon na denggan. Marhite Barita na Uli dohononta, i do gogo dohot panghirimon ni na porsea i, i do patandahon tu hita habalgaon ni holong ni roha ni Debata. Alani, disosoi do huria i nang hita pe asa mandok mauliate ala naung patauhon hita manjalo tohap di bagasan hatiuron siteanon ni angka na badia i. Sian dia taboto i? Tontu ala na pinasunggulhon ni hata ni Tuhan i do tu hita. Marhite barita nauli naung tajangkon i, taboto ma naung diroro Kristus i do hita sian gomgoman ni dosa dohot haholomon i, jala dipaunsat hita tu bagasan harajaon ni AnakNa.

Haroro ni Jesus tu portibi on doshon na mangunsat hita sian dore na pilhot, jala dipajongjong hita tu atas ni dolok batu (pat. Psalmen 40:3). Dore na pilhot manang lumpur rawa, na roa do pangalaho ni gambo si songon i. Ia bongot hita tu sada rura na margambo dore na pilhot i, maol do ruar sian bagasan. Sipata molo lam marusaho asa morot, olo do lam jonong ala hira na ditait gambo manang dore na pilhot i. Ingkon adong do manogu sian duru asa mura ruar sian dore i. Songon i do gombaran ni dosa naung niula ni jolma i. Nunga jonong hita tu bagasan dosa i, jala ala ni tonggi ni dosa i manait hita lam bongot ma hita lam so boi be morot sian dosa. Alani i holan Jesus nama na boi manogu hita sian dosa dohot hamatean i. Haluaon i tajalo holan di bagasan Jesus Kristus, ndang adong haluaon di duru ni Jesus Kristus i. Hombar tu topik Minggu: “Mamaritahon huhut mangulahon hata ni Debata” naeng ma taulahon jala tabaritahon tu sandok portibi on, holong dohot pambahenan ni Debata na gabe haluaon tu sandok bangso. Asa molo dohot hita mamaritahon hata ni Debata, lumobi marhite na mangulahon hata ni Tuhan i, martamba ma angka na marlas ni roha jala na porsea di Jesus Kristus sipalua i. Amen