EPISTEL: MAMUJI DEBATA ALA HALUAON DOHOT ASI NI ROHANA I

Huria na hinaholongan ni Tuhanta Jesus Kristus! Turpuk on i ma panjouon tu angka na pinalua ni Debata, asa saluhut pangisi ni tano on marende jala mandok mauliate, marolopolop manghalashon denggan basa ni Jahowa. Tanda las ni roha ni bangso Israel, i ma ala dipalua Debata nasida sian parhatobanan di Misir. Tama do bangso i mamuji Debata jala pasangap goarNa na badia i, marhite angka ende pujiannasida. Di bagasan hata pujipujian na tarsurat di turpuk on, dipangido parPsalmen asa dipuji bangso Israel Debata, ala saluhut pambahenanNa na mangaramoti pardalanan ni bangso i.

Nunga lobi ribuan taon na salpu disurati parPsalmen angka ende pujipujian tu Debata marningot denggan basa ni Debata di ngolu nasida. Antong, boha ma di hita saluhutna angka na porsea di partingkian saonari, laho patuduhon las ni rohanta di na lao manghamauliatehon pambahenan ni Debata di nasa pardalanan ni ngolunta? Mamuji pasangapon Debata ndada holan marhite angka ende na taendehon di ganup ari, manang di angka ende pujian na tarsurat di buku ende. Ala marisuang do ende pujipujian i, ia molo so mangihut parangenta songon hata na adong di ende pujian i. Tutu do marende hita mamuji Debata molo di bagasan marhabot ni roha? Tutu do marende hita mamuji Debata molo na pogos hita? Tutu do marende hita mamuji Debata molo ro parungkilon i? Tutu do hita manghamauliatehon saluhutna tung aha pe na masa di ngolunta?. Alani, taalusi be ma di bagasan rohanta ganup!

Songon panghirimon ni angka na porsea “I do dihalashon hamu nang pe marsak hamu satongkin nuaeng di bagasan ragam ni pangunjunan, molo tung ingkon i (1 Petrus 1 : 6)”, maol do nian marlas ni roha mamuji Debata molo tongon di bagasan hasusahan hita. Alai, taingot ma paboa Debata do na mandongani angka na marsak roha i. Pangapul na sumurung do Ibana. Unang ganggu haporseaonta disi. Marlas ni roha ma hita, nang pe tongon mangadopi ragam ni hasusaan. I do na pinangido parPsalmen on, jala patuduhon ni Debata do tu hita asi ni rohaNa i gabe jumpang haluaon sian parungkilonna i. I do tanda ni halak na porsea tu Debata. Songon na tarsurat i: “Marlas ni roha ma hamu tongtong di bagasan Tuhan i! Huulahi ma mandok: Marlas ni roha ma hamu! (Pilippi 4 : 4)”

Di sude pardalanan ni ngolunta naeng ma tatanda pambahenan ni Debata jala tapuji Ibana. Isarna, molo nunga jumpang ari Minggu, ingkon las rohanta disi ala marsaor hita dohot dongan sahaporseaon laho mamuji Debata. Mamungka sian borhat hita sian bagasta be, sahat di gareja, marende, martangiang, manangihon Hata ni Debata, mangalehon pelean, sahat di na manjalo pasupasu ni Debata, ingkon di bagasan dame dohot las ni roha hita. I do na pinangido ni parPsalmen tu hita angka na porsea, asa dung mulak hita sian punguan i, naung gabe halak na marlas ni roha hita saluhutna, tung aha pe na masa di ngolunta. Sai dihatindanghon angka ruas parminggu i do: ‘molo ndang ro tu gareja ibana marsaor dohot Tuhan i di bagasan parmingguon , sai adong na hurang singkop panghilalaanna di na sadari i’. Antong, ingkon taparhatutu do godang ni pasupasu dohot las ni roha naung tajalo sian Tuhan i, ala masibetabetaan hita tu harajaon ni Debata. Antong, songon haporseaon ni parPsalmen ma hita mandok: “Las do rohangku di angka na mandok tu ahu: Beta hita manopot bagas ni Jahowa! (Psalmen 122 : 1)”. Amen