MINGGU,
21 AGUSTUS 2022
X
DUNG TRINITATIS
Huria ni Tuhanta, na hinaholongan di bagasan
goar ni Tuhanta Jesus Kristus! Ia surat Heber on di tujuhon tu halak Kristen
Jahudi na di bagasan haporsuhon, hinorhon ni pangaleleion alani haporseaon,
jala torop do halak Kristen na ganggu uju i marhaporseaon. Surat Heber on
patoranghon ia Jesus Kristus i ma Debata na gabe jolma, tumimbo sian angka
malim ro di angka surusuruan. Ibana do dalan laho padomuhon Padan Na Robi dohot
Padan Na Imbaru, padomuhon parsaoran na denggan maradophon Debata. Turpuk on i ma
sada pangajarion na manosoi dohot na paingothon halak Kristen, asa mangolu di bagasan
pangoloion, halomoan dohot biar mida
Jahowa mardongan hadaulaton (beribadah
dengan hormat dan takut pada Tuhan). Mangulahon hasintongan, hadameon nang habadiaon di bagasan
parugamoon na sintong. Di bagasan turpuk on, dipatuduhon do kilas balik di dolok Sinai. Dung haruar bangso i sian
habuangan Misir, dipudun Debata do PadanNa dohot Israel, marhite Patik na
sampulu i. Andorang so nangkok si Musa tu dolok i, tangkas do dipaandar sotung
adong sian nasida na jumonok dohot manjama dolok i, sotung mate nasida.
Mangihuthon 5 Musa 4 : 11, digombarhon do dolok i, songon api na marsigorgor
sahat tu parsitongaan ni langit, masa ma disi parhobot ni ombun dohot haholomon
marimpotimpot, dung i pe asa ro hata ni Jahowa di tongatonga ni api i. Di ayat
20 didok, molo dais dorbia tu dolok i ingkon mate dangguron. I ma patuduhon
paboa na mansai songkal do Debata jala badia, alani i do mansai mabiar nasida
pola didok; unang pola mangkuling Debata, sotung mate hami. Alani aha ? Ala ni
dosa ni bangso i na mangaramuni dirina marhite angka ragam ni dosa na ni ulana.
Holan si Musa do na hea adop bohi dohot
Debata, dungkon ni i ndang adong be, marhite i ma dipangidohon bangso i ma si
Musa gabe perantara nasida dohot Debata. Gariada pe tahe si Musa tahutan jala
angka dotdot do alani hasongkalon dohot habadiaon ni Debata. Songon i ma
gombaran ni halak na mardosa na ro tu Debata sai di gohi biar do, betapa kudusnya Allah dan kekudusannya
membuat orang berdosa ketakutan”.
Huria na hinaholongan di bagasan goarni Tuhanta Jesus Kristus! Dolok Sinai i ma Huta ni Debata, simbol haluaon marhitehite Jesus Kristus tu saluhut manisia (Psalm 50 : 2, Jes 2 : 3). Tu dolok Habadiaon ni Debata do hita di jou, mamuji, marsaor dohot Debata. Jesus naung mamungka Parpadanan na imbaru, paulakhon parsaoran naung sanga sega. Ibana ma Malim na rimpas jala pelean na rimpas, marhite Jesus ditobus hita sian hamatean i, diroro hita sian huaso ni sibolis, laos gabe parjambar hita dihangoluan na so ra suda. Alani i ndang ringkot be hita mabiar ro mandapothon Debata tu dolok Sion, tu bagas joroNa. Taargahon ma panjouon ni Tuhanta i, unang ta jua jala ta tundalhon Ibana. UhumonNa do angka na manulak Ibana. Tabege jala tatangihon ma soaraNa. Na ro ma angka di paruhuman i, salpu do sogot portibi on. Halak na mangolu di bagasan haporseaon dohot habadiaon, manjalo tumpal harajaonNa. Antong, ro ma hita tu Sion, dolok habadiaon ni Debata, tapasomalsomal ma mangulahon hadaulaton, ai tu saluhutna do hasea hadaulaton i, ai hangoluan nuaeng nang sogot do tahe dibagabagahon (1 Tim 4 : 7 - 8). Ta auhon ma na nidokni Buku Endenta i, No. 31 :2, “ Songon dia paheanhu maradophon Debata ? Unduk serep ni rohangku, i do abit na tama. Dung adong na songon i, tau ma au di Tuhanhi “. Ai molo adong na mandok di bagasan rohana na daulat ibana, hape ndang dirantei dilana, diansi do tahe rohana, na magopo ma hadaulatonna i. Alai, on do hadaulaton na ias jala na so marlindang di roha ni Debata Ama : Mandulo angka na so marama so marina dohot angka na mabalu dihaporsuhonnasida, huhut mangaramoti diriniba maralohon portibi on, unang marlindang ( Jakobus 1 : 27 ). Amen
Post a Comment