Khotbah minggu Jesaya 58:9-14 - Mundosaragi

MINGGU 10 DUNG TRINITATIS

21 AUGUSTUS 2022

Evangelium : Jesaya 58:9b-14

 Panombaon na Hinalomohon ni Debata

I. Patujolo

            Sahat rodi partingkian nuaeng, torop dope namangatusi panombaon tu Debata holan na somal taida dohot taula, isara mandohoti parmingguon, mandohoti punguan-punguan kategorial, ndang mansohot martangiang,  marsaor marhitehon liturgi-liturgi, mangulahon ritus-ritus parugamoon. Ido umbahen ndang pola songgot rohata, molo adong naringgas marminggu, partangiang bahkan donatur di huria alai parsidohot dope manegai alam, tartangkup dibahen KPK, ndang parduli tu angka na masa di humaliangna. Pangantusion na tung mancai jempek taringot tu panombaon i mambahen ndang saurdot haringgasonna marminggu tu kepedulianna tua angka parsorion namasa di na humaliangna. Sai hira na marasing Debatana uju patupa ulaon panombaon tu na patupa ulaon siganup ari di tonga-tonga ni angka na tinompa. Tudos ma on tu na masa nuaeng na nigoaranna mabuk ugamo, sai martangiangi alai ndang diboto lapatan ni tangiangna, sai marminggu alai ndang diantusi lapatan ni parmingguonna (beribadah tapi tidak tau apa arti ibadahnya).

 

II.        Sibonsiri

            Turpuk ni jamita on dipasahat tu bangso Israel namangadopi ragam hamaolon niparngoluon uju baru mulak nasida sian habuangan Babel. Tubu do partontangan di angka naparsidohot tarbuang tu angka na so dohot tarbuang. Diroha ni angka na dohot tarbuang, nasida do namanaon pardangolon  di tano habuangan ianggo na so parsidohot sonang do hot di tano nasida. Kondisi perekonomian ni bangso on pe nunga tung terpuruk hape tong dope dipaksa nasida laho manggarar beo tu Persia. Jerusalem tano nasida i pe nunga leleng malengse, ndang adong be manang aha (puing-puing nama natading). Di bahen i ringkot do nasida,  mambangun ngolu mamungka sian dasor na togu hombar tu lomo ni roha ni Debata. Manadingkon angka ulaon hasomalan ni ompu nasida, manomba Debata holan alani hinaringkot nasida, sai hira holan ruhut-ruhut ni panombaon i mambahen nasida daulat  nasida di jolo ni Debata, nang pe di parngoluan siganup ari tong diulahon angka panggosagosaon dohot kekerasan tu angka natinompa, angka na mora ndang olo mangurupi  angka napogos, ndang peduli tu angka na hurang sipanganon, baliksa diroro nasida do tano ni napogos i songoni nang jabu nasida jala digosagosa nasida do angka na gale. Panombaon namanghuphupi angka hajahaton na pinatupa nasida i mambonsiri rimas ni Debata, diuhum ma nasida laos tarbuang. Turpuk on mangajarhon tu bangso i, molo naeng denggan do ngolu nasida di Judea dung mulak sian habuangan Babel, ingkon paulahon nasida do orientasi panombaon dohot pamujian nasida na berpusat tu Debata jala hataridaanna di relasi na denggan sesama nasida dohot angka natimpo na asing dohot tu Debata. Parpuasaon ndada holan tangiang sambing mangorom angka hisap ni roha manang  songon sada hasomalan manang formalitas sambing, marpuaso do alai marbada, marsalisi, mamastapi, mangasahon gostong ni botohon (58 : 4 – 5). Ai ndang marlapatan haringgason nasida mangulahon ruhut-ruhut ni parugamoon molo sai parsidohot dope merancang angka hajahaton tu angka na tinompa ni Debata. Ndang  tingkina be nuaeng halak Kristen songon na daulat, ringgas marminggu, ndang mansohot martangiang  hape di ngoluna siganup ari sai manegai angka tombak, mata mual lan angka na asing i namarpardomuan tu keutuhan ciptaan,  mangasahon gostong ni botohon tu angka jolma, paula so diboto namasa di na humaliangna.

 

III.       Hatorangan ni Turpuk

            Marhitehon turpuk napinasahat ni panurirang Jesaya, ia panombaon na hinalomohon ni Debata  ima:

1. Paholang Diri Sian Pangarupaon

            Hata ‘paholang diri’ dibagasan nats on tasir sian hata sur, lapatanna padaohon, paholanghon (menyingkirkan). Dibagasan konteks ni ayat on, sipaholang on ima ‘pangarupaon’ (kuk). Hata kuk sian hata  motah lapatanna ulaon na menindas,  panggosagosaon (penindasan). Hata on diuduti, ‘tudutudu ni jari-jari’ dibagasan nats on shelakh sian hata shalakh, namarlapatan tudutudu (menunjuk). Pandok ni Wycliffe (2001) hata tudutudu ni jari-jari marlapatan manudu halak na so marsala. Ellicott’s Commentary for English Readers (2020), mandok tudutudu ni jari-jari ima ulaon hajahaton na pinatupa ni bangso Israel, manudu (mempersalahkan) halak na so marsala. ‘Panghuling hajahaton’ di bagasan teks on wedabber awen sian hata dabar namarlapatan hata, panghataion dan awen lapatanna hajahaton, masalah, dilapati panghuling naparohon hajahaton. Ayat on patangkashon ndang dihalomohon Debata panghuling na parohon panggosagosaon tu halak na so marsala diulahon angka namarsomba tu Debata.

2. Patupa Ulaon Parasinirohaon

            Ulaon parasinirohaon napinangido ni turpuk on di ayat 10, parjolo, mangalehon asi ni roha tu na male. Hata ‘dilehon’ di bagasan nats on, wetapeq sian hata  puwq, namarlapatan jala dilehon ho, (dalam bentuk perintah) dilapati do mangalehon, pasahathon, patupahon, paradehon, patuduhon. Hata wetapeq diuduti hata, napsekha sian hata nephesh namarlapatan hosa, tondi, ngolu, hagiot. Alkitab manerjemahhon hata napsekha ‘apa yang kau inginkan’, Bibel manurathon ‘asi ni roham’.  Umbuk tu ayat on, patupahon asi ni roha tu ‘na male’, dibagasan nats on  leraeb sian hata raeb, namarlapatan male, anturaparon. Paduahon, ‘pasabam roha ni  na dangol’, hata ‘pasabam’ dibagasan nats on tasbia sian hata saba lapatanna pasombuhon (memuaskan), pabosurhon, mamparrohahon. Hata ‘roha’ dibagasan nats on wenapesh sian hata nephesh, namarlapatan hosa, tondi, ngolu, hagiot. Hata ‘nadangol’ dibagasan nats on naanah sian hata anah, namarlapatan mardangol, digosa (ditundukkan). Kedua ulaon parasinirohaon nadisurathon di turpuk on merupakan parsuruon (perintah) ni Debata laho ulahonon ni angka na manomba dohot mamuji Debata Debata.

            Marragam do ulaon parasinirohaon dipatupa Tuhanta Jesus uju mangula Ibana di Galilea dohot Judea nang di angka huta na asing isarana: mangalehon mangan angka natorop, paluahon angka na tartaban, pamalum angka namarsahit, paluahon angka naginosagosa. Molo tajaha di barita nauli ni si Lukas, ia ulaon parasinirohaon marhadomuan do tu haroro ni harajaon ni Debata ima: haluaon, hatigoran, pardamean dohot holong (Lukas 4: 18-19). Manghobasi namale na nienet ni turpuk on ndada holan namangalehon sipanganon uju male nasida. Ai molo songoni ulaon sangombas do i jala gabe tubu parsigantungon. Tongon marragam do sibonsiri mambahen adong na so dapot sipanganon:  halosohon mulaulaon, hurang ni parbinotoan, modal na so adong, sistem na so berpihak isara biaya produksi timbo,arga pasar ndang stabil. Tu angka sisongoni boi ma dipatupa pelatihan dohot pangurupion di modal. Na humaduk di tingki naparpudion ndada holan alasan na di ginjang mambahen adong na so dapot sipanganon alai gumodang do hinorhon ni panggosagosa ni angka nampuna huaso dohot nampuna modal laho mangaroro haroroan ni parngoluan ni natinompa ni Debata isara manegai tombak namampanghorhon tu hasesega ni mata mual gabe dangar ma angka hauma dohot porlak bahkan masa ma nang mara lung (bencana alam).

 

3. Pabinsaron ni Debata do Angka Namangulahon Panombaon Nahinalomohon ni Debata Marhite panurirang Jesaya dibagasan turpuk on, dipadanhon Debata do tu hita, molo taula ulaon panombaon dohot parpuasoon na singkop hinalomohon ni Debata, gabe bangso na tarbarita, binsar, ditogu-togu jala patimbulon ni Jahowa angka pomparanna. Boi do idaonta di piga-piga Bangso di portibi on, na so manirang  ulaon panombaon  tu Debata sian ulaon panggulmitan ni ngolu siganup ari, binsar do parngoluanna, isarana denggan pendidikan, denggan sarana hahipason, denggan ekonomi, mamparjuanghon hasintongan, mambela angka napogos. Adong do bangso na totop manghatahon bangso na religius alai ndang diharinghothon ulaon namarpardomuan tu ngolu nihajolmaon dohot angka na tinompa na asing. Boi do hilalaonta di tonga-tonga ni bangsota na so mansohot mandok bangso na religius alai lam tu bidangna alam na sega, lam mangumbakbak do korupsi, kekerasan, ketidakadilan dohot panggosagosaon lam patar marluatluat.  Padan ni Debata tu angka napatupa ulaon panombaan dohot pamujion na hinalomohon ni Debata umbuk tu turpuk (ayat 10-14), i ma:

- Binsar hatiuron nasida di bagasan haholomon (ayat  9b)

- Hagolapon nasida tudoshon hos ni ari (ayat 10)

- Togutoguon ni Jahowa nasida gabe togu di angka inganan na rahar, jagar tudoshon porlak na siniram, songon mual na so dung marsik (ayat 11 & 14)

- Tarbahen ni pinompar nasida pajongjong ngolu nasida gabe tarbarita songon sada bangso na paulion angka pasipasi sian narobi, patindanghon angka ojahan marsundut-sundut, sipauli angka riga, sitotas angka dalan balobung asa hainganan (ayat 12).

            Padan napinasahat ni Debata di turpuk on, mancakup kesejahteraan di tonga-tonga ni masyarakat marhitehon panombaon na hinalomohon ni Debata. Di ulaon panombaon na sintong ido patar (terwujud) ulaon shalom di tonga-tonga ni parngoluon. Boi dohonon namanomba Debata gabe agen panggonopi parpadanan. Namarlapatan do i dilehon do partingkian tu jolma i laho parsidohot secara aktif mewujudkan kesejahtraan di tonga-tonga ni portibi on di napajongjong parngoluon ni  sada bangso gabe bangso natarbarita, maju nampuna fasilitas dohot sistem na mansai togu jala denggan.

IV.       Hahonaan/ Panutup

            Ndang boi hungkupanta panombaon tu Debata memegang peranan sentral dibagasan ngolu ni halak na porsea. Mago do hakekat ngolu ni halak na porsea molo so adong panombaon, alai sahat tu tingki on, ndang haru singkop dope pangantusion dohot panghangoluhononta taringot panombaon i. Nang pe sai disoarahon panombaon patupa hubungan vertikal tu Debata marhitehon  ruhut-ruhut ni parugamoon sekaligus mewujudkan nilai-nilai sosial dan etis dibagasan ngolu bersama. Alai torop dope na mangalapati panombaon i seputaran liturgi, parmingguon, ritus, parsaoran dohot dongan sahaporseaon. Hape panombaon i sandiri mencakup cara hidup dohot parbue hasintongan di bagasan parngoluon. Namarlapatan ma i, saurdot do haringgason patupa ulaon ritus manang ruhut-ruhut ni parugamoon dohot pambahaenan di ngolu siganup ari. Konsep spiritualitas na fokus tu diri sandiri dohot Debata alai manghalupahon pambahenan na hombar tu parngoluan na tinompa ni Debata lam padaohon jolma sian ulaon parasinirohaon, hasintongan, kepedulian dohot pembebasan. Ibadah (panombaon) nahinalomohon ni Debata manontuhon kualitas ngolu di sude panggulmiton ni ngolu.