Psalmen 139:17-24 Patar Do Luhutna Di Adopan Ni Debata - Mundosaragi

 

MINGGU XII DUNG TRINITATIS

4 SEPTEMBER 2022

Evangelium: Psalmen 139:17-24

 

Patujolo

Tarajumi do di parngoluan on ndang adong na singkop manang na sempurna, sai jotjotan do angka jolma manisia madabu tu bagasan hasalaan manang dosa. Olo do hasalaan i diulahon ala unsur kesengajaan, alai olo do ndang pola disadari hape nunga salah na niulahononna. Jala olo do jolma manisia pasintonghon diri, dirajumi dirina do na sintong ibana di angka ulaonna, hape maralo do tu hasintongan ni Debata. Sian pigapiga faktor i mambahen angka jolma madabu tu bagasan dosa. Nang pe dipangasahon jolma i pikkiran nang gogona laho manutupi angka hasalaanna, nang pe marbunibuni jolma i laho mangulahon dosa i, nang pe holan di bagasan rohana dope ibana marsangkap naeng mangulahon na jat, alai ganup diboto Debata doi, ala ndang adong na buni di adopan ni Debata. Saluhutna na diulahon manisia i patar do di adopan ni Debata. Ido na gabe tema di Minggu sadarion, ima Minggu XII Dung Trinitatis na mandok “Dang Adong Na Buni Di Adopan Ni Debata”. Boha do pandok ni turpuk on, antong laos tapaihutihut ma.

 

II.        Hatorangan ni Turpuk

Psalmen 139 on ima turpuk na mansai jempek alai mamora di haporseaon, ala marisihon pamujion ni raja David tu Debata di saluhut pandonganion dohot pasupasu ni Debata naung dipanghilalahon ibana. Di bagasan 24 ayat on tangkas dipataridahon pribadi ni Debata na marsangap i, jala boi idaon sian i na bagas do panandaion ni parpsalmen on tu Debata na nisombana. Raja David ima sahalak raja na patut diteladani taringot tu na martangiang. Tung mansai lomo do rohana manghatai tu Debata marhite tangiang. Ndang boi ibana mangulahon angka ulaonna andorang so martangiang, jala simpul pe diulahon na ingkon do pasahathonna tu Debata marhite tangiangna. Teladan na pinatudu ni raja David on patuduhon na hosa partondionna do ianggo tangiang i. Lam tang do haporseaonna di tingki lam jonok ibana tu Tuhan Debata, jala optimis ibana mangulahon ulaonna, jumpangna ma keberhasilan. Di saluhutna i, dihatindanghon ibana ma hasangapon ni Debata, sai dipuji ibana do Debata.

Di bagasan turpuk on pe dipuji ibana do Debata na mandok torop ni bilangan pingkiran ni Debata, naso boi bilangan sadasada ala tumorop sian horsik. Pamujion ni raja David on ndada na laho mambuat roha ni Debata, alai ala naung dipanghilalahon ibana do saluhutna i umbahen dihatindanghon ibana marhite tangiangna. Somalna do di parngoluon ni jolma molo mamuji donganna, ndada holan alani keberhasilan ni donganna umbahen dipuji, alai sai adong do na bermotivasi naeng mambuat roha. Ra adong na niigilna umbahen diulahon cara sisongoni. Alai marasing do napinatuduhon ni raja David on, ia pamujionna tu Debata ima pamujion na sian haporseaonna maradophon Debata. Songon dia na di bagasan rohana, songoni do pamujionna tu Tuhan Debata, ala diboto ibana do na umboto saluhut do Debata, ndang adong na buni di adopanNa. Marhite hajonohonna tu Debata, boi dipanghilalahon ibana na godang pasupasu ni Debata i tu ibana jala sai didongani do ibana ganup ari, ganup tingki. Parpsalmen on naeng mangarahon bangso Israel nang angka na porsea asa mamuji hasangapon ni Debata. Ditogihon do saluhut jolma laho marningot di saluhut pasupasuNa jala unang lupa mamuji Debata. Molo marningot hita di pardalanan ni ngolunta, hea do hita mamuji Debata di saluhut pasupasu nang pandonganionNa di hita? Boha do caranta laho mamuji Ibana? Hombar tu teladan naung pinatuduhon ni raja David, pamujionta tu Debata tahatindanghon ma di ganup parngoluanta jala tapasahat marhite tangiang tu Ibana.

Hajonohan ni parpsalmen dohot Debata boi tarida di tingki naung ditanda parpsalmen on do ise Debatana. Marasing situtu do Debata ni Israel sian debata ni sileban. Umbalga do huaso ni Debata na sinomba ni raja David tumimbanghon huaso ni portibion. Jala dihaporseai parpsalmen on do ia Debatana i ima na manjadihon nasa na adong di portibion, tung gok huaso jala na Badia.

Realita na masa di humaliang ni Israel, mansai torop do jolma naso porsea di Debata Jahowa, mangarehei Debata, jala marsineang mandok goarNa. Di bagasan tangiang ni raja David, dipangido ibana do anggiat boi dibunu Debata angka parjahat jala dipadao sian ibana angka sisopsop mudar. Pangidoanna i dipasahat ala ditanda ibana do Debata na marhuaso, na marlapatan Debata do na marhak manguhum jolma na marsala. Di bagasan roha nang pingkiranna, sai unang ma martahan angka parjahat lumobi na marsineang mandok goar ni Debata dohot na mangarehei Ibana. Ala holong ni raja David do on tu Debata umbahen dipasahat pangidoanna. Marhuaso do ianggo raja David, alai molo uhuman i dipasahat ibana do tu Debata asa Debata na mangulahon, ndang marhite huasona na gabe raja. Ido na dipamasa raja David tu si Saul, Abner, dohot Yoab. Dipatuduhon raja David do hasereponna, nang pe raja ibana, alai ndang dipangasahon i laho manguhum na marsala. Dirajumi ibana do ndang tuk huasona laho manguhum angka jolma na marsala manang mardosa, alai tung huaso ni Debata do na tuk mangulahon i. Debata do na marhuaso di saluhutna di portibion. Debata do na marhuaso manguhum angka parjahat dohot angka sisopsop mudar marhite carana sandiri.

Ra hea do masa di humaliangta angka hajahaton, jala manigor diuhum angka natorop. Manangko ma sasahalak jala tardapot, pittor diuhum masyarakat ma, ditunjang, dipukul, olo do sampe gok mudar dagingna, ndang dipardulihon angka natorop i be parngoluan ni panangko i, jala adong do na sampe marujung ngoluna. Hape andul marasing do napinatuduhon ni raja David di turpuk on. Raja do ibana, alai dipasahat ibana do angka parjahat i tu Debata asa diuhum, ala Debata do na marhak disi. Songoni do tong na dipatuduhon Jesus di tingki mambuat haputuson, di tingki ro angka na torop mamboan boruboru pardosa i jala mangido pandapot ni Jesus taringot na ingkon ditingganghon batu tu angka na mangulahon dosa, songon boruboru i na marlangka pilit. Alai didok Jesus do alusna “Manang ise sian hamu na so mardosa, i ma jumolo maninggangkon batu tu ibana......umbege i, laho be ma nasida sadasada, pininsang ni panggora ni rohana be, jumolo ma angka sintua i, gabe tinggal ma holan Jesus angkup ni boruboru i, na jongjong disi” (Joh. 8:7+9). Sian alus ni Jesus i pe boi tarida naso adong hak ni jolma laho manguhum donganna jolma na marsala, ai mardosa do saluhutna jolma, ndang adong na badia di adopan ni Debata, holan Debata do na marhuaso mangulahon i. Antong manat ma hita di ngolunta ganup, unang gabe panguhum hita di angka donganta na marsala, alai pasahat ma i tu Tuhan Debata na tuk mangulahon panguhuman i.

“Sulingkit ma ahu ale Debata, jala tanda rohangki....” ninna parpsalmen di bagasan turpuk on. Alani haporseaonna jala marpos ni roha tu Tuhan Debata, rade do ibana disulingkit Debata sahat tu bilut parbagasan rohana, ndang adong ganggu ni rohana. Sian i boi tarida naso adong do dibunihon ibana tu Debata. Haradeonna i tubu sian togu ni haporseaonna. Jala pola sahat tu arah na manguji ibana, dipasahat do tu Tuhan Debata. Dihaporseai parpsalmen do molo disulingkit jala diuji Debata ibana, na marguna tu dirina doi, asa tongtong ibana mardalan di hatigoran ni Debata. Tiruan na denggan do nabinahen ni parpsalmen on tu saluhut angka na porsea. Molo tutu do porsea tu Debata, naung rade do angka na porsea i disulingkit Debata jala diuji, ndang adong natinabunihononna. Jala ringkot do rajuman ni angka na porsea, molo disulingkit jala diuji Debata, na marguna tu dirina sandiri do i. Molo dapot hasalaanna, boi ma ibana padengganhon i muse asa unang be mulak ibana mangulahon na sala i. Jala sian ujian i pe boi tarida naung mardalan di dalan hatigoran ni Debata do ibana manang na gabe asing dalanna.

 

III.       Sipahusorhusoron

Di masa nuaeng on ala kemajuan ni zaman dohot parbinotoan, berdampak ma tu parngoluan ni jolma manisia. Marlas ni roha do manisia di saluhutna kemajuan zaman on, alai gabe terlena ma di haulion ni portibi. Ido umbahen jotjotan gabe mandao sian Tuhan i, lupa tu Ibana, jala marlomolomo mangulahon ulaonna be. Adong beranggapan alani kesuksesanna, jabatanna, huasona, gabe lomona mangatur ngoluna nang ngolu ni jolma, jala dihilala ibana naung singkop ngoluna, dang porlu be Tuhan i nang Hata-Na laho mangarahon parngoluonna. Sandok di parngoluonna, holan sangkapna do na ingkon saut. Jotjotan lupa do jolma manisia di pasupasu naung jinalona sian Debata. Gabe maralo do na masa on tu turpuk na sahat tu hita sadarion. Ia di turpuk on, dipatuduhon do sahalak raja na marhuaso, napinillit ni Debata, ima raja David, alai dang dipangasahon huasona, jabatanna, artana, laho marlomolomo tu bangso Israel nang tu angka na manghasogohon ibana. Nang pe suhar dipikiranna di angka na masa i, alai dipasahat do saluhutna tu Tuhan Debata. Dirajumi ibana do dang marlapatan huaso nang jabatanna i di adopan ni Debata. Marserep ni roha do ibana lumobi di adopan ni Debata.

Porsea do hita ia pardalanan ni ngolunta sai tongtong diramoti Tuhan Debata? Porsea do hita na Ibana tongtong manogunogu hita sahat tu sadarion jala Ibana na mangalehon pasupasuNa di nasa parngoluanta? Jala porsea do hita na ditanda Tuhan Debata do hita sahat tu bilut parbagasan ni rohanta? Alusna : Porsea. Songon ende na tarsurat di Buku Ende No. 753 na marjudul “Di pardalanan Jesus di jolongku”, ima panindangion ni angka na porsea di saluhut pandonganion ni Tuhan Debata di pardalanan ni ngoluna. Manghatindanghon pambahenan ni Debata i tubu sian haporseaonna maradophon Debata. Molo tahatindanghon songon pandok ni ende i, jala tahaporseai, ingkon tasadari do na dibagasan pangaramotion ni Debata do hita ganup. Dang Tuhan Jesus be marhite pamatangNa na mandongani hita di siganup ari, alai nunga ditongos tu hita Tondi Parbadia i na tongtong mandongani hita, mangurupi hita laho mangulahon na denggan, jala mangajari hita manghatindanghon pambahenan ni Debata. Tondi Parbadia i do na tongtong marsoara di bagasan rohanta asa taulahon na denggan jala marpos ni roha tu Tuhan Debata.

Dibahen parpsalmen do tiruan na denggan tu hita, ima na tongtong mamuji Tuhan Debata di pardalanan ni ngoluna di saluhut pambahenan ni Debata. Jala rade ibana disulingkit dohot diuji Debata. Soadong lapatanna molo sai tatabunihon angka na salah manang dosanta, nang pe ndang boi idaon ni angka donganta jolma ala marbunibuni hita mangulahon dosa, alai ingkon taingot ma patar do saluhutna di adopan ni Debata, ndang adong na buni. Ditanda Debata do hita sahat tu bilut parbagasan ni rohanta. Antong, songon angka na porsea hita, tapuji ma Tuhan Debata, tahatindanghon ma saluhut pambahenanNa i di ngolunta, jala rade ma hita disulingkit dohot diuji Debata, na marguna tu hita sandiri doi jala mangarahon parngoluanta asa mardalan di hatigoran ni Debata. Tapaposma rohanta tu Ibana, unang marbunibuni, ala ndang adong na buni di adopan ni Debata, patar do saluhutna. Amen.