Mangihuthon
Jesus Sian Nasa Roha
Patujolo
Barita na Uli (Gorik=
euangelion, Latin= Evangelium) sinurathon ni sahalak pande (pandaoni/ dokter)
margoar LUKAS, i do na jotjot tagoari evangelium
LUKAS. Barita Nauli pinajojor ni Lukas dipasahat tu sahalak partogi ni Rom
margoar Teopilus na mian di huta Rom. Duansa do nasida (panongos dohot
hasahatan ni surat) marharoroan sian duru bangso Jahudi.
Dia do roha ni Lukas
umbahenna pola gurithononna evangelium i ? “Asa ditanda ho hasintongan ni hata,
naung dipodahon tu ho.” (1: 4) Nunga dipodahon sude angka hata ni barita nauli
i tu si Teofilus, alai nuaeng ringkot roha ni Lukas laho patandahon hasintongan
ni sude barita i. Molo dung ditanda hasintonganna tontu tangkas ma langka
sidalananna. Tangkas ma nang pamillitonna di haporseaon i. Porsea do ibana tu
Jesus manang parsoadaonna do ?
Sasintongna mansai maol do
antusan ni halak Gorik Barita Nauli binoan ni Jesus jala partuktuhan
(sihailahononhon) do i di halak Jahudi. Ai maila do nansida manghatindangkon
“Debata gabe jolma” (Immanuel); Lumobi muse jolma tinadanasida di diri ni Jesus
sian Nasaret i. Haleaon do i dietong rohana. Gorik nang angka bangso sileban
sian duru ni Jahudi pe ‘busisaon’ do umbege Barita i. Beha ma bahenon ni
pingkiran ni halak Gorik manjalo haluaon
marhite sahalak jolma laos huhut Debata na margoar Jesus. Alai ingkon do haporseaon
nasida Barita i, ai i do haluaon. Angkup ni i ndada holan naumbege boti nasida
di Barita i; alai ingkon maralus do di hatangkason (ketegasan), dang meoleol.
Ingkon parungkilhononhon do Barita Nauli i. Ai tagamon do panghorhonna
(konsekuensi) molo dung porsea iba. Parungkilon, siteanon, hamaolon nang
hasusaan pe ingkon tagamon do molo dung jinalo Jesus di ngolu ni iba.
II.
Hatorangan ni Turpuk
Ayat
49 – 50
Haroro ni Jesus
mandanggurhon api pataridahon hapolinon do i. Songon api
na pinangke laho papolinhon sere, hira songon i do Barita Nauli marsigorgor
‘manutung’ angka ateate ni nasa jolma asa polin marhaporseaon di Jesus Sipalua
i. Jesus sandiri manghatindangkon ulaonna mandanggurhon
api i. Angkup ni i “dihasiholi nasa rohangKu”, ninna Jesus. Ndada na tarsor
ulaon i dibahen Jesus, baliksa dituntun rohaNa do. Laos dipasingkop do muse
dohot hata ‘anggiat haru galak’. Sai hira halak na so marlambok ni roha do
Jesus nian begeonta dison. Hape ndada i maksudna angka dongan. Didanggurhon pe
api ondeng asa polin jala hibul do roha
ni angka na di tano on laho mangihuthon Jesus.
Paridion,
sada gombaran (lambang) ni hasusaan dohot hamatean do i. Jolma na nididi
dilononghon ngoluna tua aek jala pusok marhosa. Suang songon i ma Jesus
mamarungkilhon sitaononNa i ia dung sahat Ibana tu Jerusalem (ingot: hata ni
Jesus ondeng dihatahon uju pardalanan na parpudi tumopot huta Jerusalem laho
tarsilang).
Ayat
51 – 53
Panirangon hata na suhar do i sian hadameon. Ndada holan
pamenakmenakhon jolma haroro ni Jesus tu portibi on. Ia ditangihon jolma Ibana
tarhalomong ma angka natorop laos sip boti. Ingkon maralus do Barita Nauli
binoan ni Jesus i. Jala ingkon tangkas alus i (unang dangoldangol sisilon).
Dison ma nidokna ombas krisis di angka na naeng mangihuthon Jesus. Krisis i ma
mamarungkilhon porsea tu Jesus manang manghaposi na asing.
Angkup ni i alani tangkasna sipata ro do alus na maralo tusi. Pola do marbada (marsalisi) angka na markeluarga. Tutu ndada na giot roha ni Jesus laho manirang keluarga, alai hatangkason/ ketegasan mangalusi/ merespons Barita Nauli mangido konsekuensi na arga sian hita si ihuthon Ibana.
III.
Sipahusorhusoron
Di ngolu parhuriaon
sinuaeng olo do hira na burju idaonta jolma na manghaposi saluhut di ngoluna.
Pos rohana tu Tuhan, laos pos do muse rohana tu portibi on. Marsigantung tu
Tuhan Jesus laos manghirim tu portibi
on. Ndada na sala jolma na sai manghasiholi hadameon / pardamean. Alai tung na
so jadi do marlaok haporseaonta tu Tuhan Jesus i.
Molo tung sipata dihasogohon portibi on
hita alani i, na so patut do monditondit haporseaonta di Jesus. Mangihuthon
Jesus sian nasa roha marlapatan do i manjalo konsekuensi (panghorhon) ni pamillitonta i di Ibana. Dang jadi
marbola dua rohanta. Sada tu Jesus, sada tu na leban. Sandok ingkon sian nasa
roha do !!
Post a Comment