Khotbah Psalmen 51 : 1 – 10 - Mundosaragi

 

DIHALOMOHON DEBATA DO HAMUBAON NI ROHA

Huria ni Tuhanta na hinaholongan di bagasan Jesus Kristus! Molo tajaha 2 Samuel 12: 1-25, na ro do si Natan manorui Raja Daud laho mangungkap dosa na buni nabinahen ni Raja Daud, ala na dijehehonna si Uria, asa boi olionna si Batseba tunggani boru ni si Uria. Ala ni pinsang-pinsang na koras i, gabe mananda do Raja Daud di dosana (hasalaan). Didok ibana do: ”Nunga mardosa ahu dompak Jahowa”. Malua do raja Daud sian uhum hamatean, alai dakdanak na naeng tubu sian Batseba ala pangalangkupon ni si Daud dohot si Batseba, ingkon mate do. Marsahit ma dakdanak i dung tubu, tumatangis do raja Daud martangiang, marpuasa ibana pola margulu orbuk simanjujungna di alaman i, mangido asa marpangulahi roha ni Debata jala diloas mangolu dakdanak i, alai ndang dioloi pangidoan ni Raja Daud, mate do nian dakdanak i. Dung i, hehe do ibana laho marsuap, marpangir jala ganti pakean, dung i laho ma ibana tu bagas ni Jahowa martangiang. Turpuk on uju na martangiang raja Daud di bagas ni Jahowa. Di bagasan  tangiangna ditariashon do taringot tu panandaon di dosana, jala elekelekna asa disesa Debata sude dosana, termasuk dosa teanteanan na sahat tu ibana. ”Asi ma roham di ahu, ale Debata, hombar tu denggan ni basam, sai sesa ma angka pangalaosingku hombar tu godang ni asi ni roham (Ay.3). Dipajojor ibana do saluhut dosa naniula ni ibana didok: ” Angka pangalaosingku; hajahatonku; dosangku; na jat na huulahon; hajahaton sian hatutubuna; sian inangna pangintubu; dosa pangalaosion di namarroharoha ibana tu si Batseba (mangalangkup, manghaliangi).

            Dipangido raja Daud asa dilehon Debata tu ibana hasesaan ni dosa, roha na ias, hasonangan, habisuhon, las ni roha, haimbaruon ni tondi. Asa mian Tondi ni Debata di ibana. Dielek si Daud do Tuhan i, asa olo marasi ni roha tu ibana, dipangido ibana do tu adopan ni Debata: ”Sai palua ma ahu sian angka parsapataon mudar, ale Debata, Debata ni hatuaonhu, asa dipujipuji dilangku hatigoranMu (Psalm 51: 16). Diboto si Daud do, ia Debata Jahowa, Debata parrimas, siluluhon dosa ni amaama tu pinomparna, ro di sundut patoluhon, ro di paopathon, alai Asi do rohaNa jala parholong do Debata di angka na olo mananda jala mangido hasesaan ni dosa. Hata Hesed (Heber) i ma sikap dohot pambahenan na marroha pangoluhon nionjar ni holong ni roha na olo manesa dosa ni naniasianNa. Hata Rehem (Heber) i ma sikap dohot pambahenan na so baloshonon tu parsala i salana, baliksa tahe dipatupa silehonlehon asa boi mulak mangolu parsala i. On ma nadipangido ni si Daud, asa disesa Debata pangalosion na ”Sai urasi ma ahu sian dosangku marhitehite sanggul, asa tung ias ahu; sai buri ma ahu, asa sumaksak ahu sian itak (Ay.9) diulakhon raja Daud muse mangido asa diburi ibana jala dipaias sian dosa. Dipangido pamurion ni dosa marhite parhohas (alat) i ma mamispishon aek tu na manopoti dosa i, jala sanggul marata (hisop) dibahen mamispishon, pangurason di dosa, asa ias sian dosa, jala gabe jolma na imbaru, nang pe rara songon abit hasumba, gabe songon hapas do muse  (Jes 1: 18).

            Di partingkian si nuaeng on, nunga godang jolma na so mananda dosa na niulana, nunga maol mananda dia dosa, dia na so dosa. Sipata, gabe maol jolma mandok dosa tu na mamangke narkoba, korupsi, manggadis jolma, marmainan, manangko, marjuji, dna. Ndang didok be i dosa, alai dalan ni ngolu nama i dietong, ala ni torop ni halak naung mangulahon, gabe ndang ditanda be naung dosa na niulana. Nunga lumlam be hajolmaon nuaeng. Asa unang martimburak dosa i alani ringkot situtu naeng ulahonon :

      1. Mangajari ganup angka sundut naumposo ( ianakhon) asa diboto dia do na sintong dohot na so sintong, dia do dosa dohot na so dosa. Ingkon ajaran ni natoras do nasida martangiang tu Debata, mangido hasesaan ni dosa dohot mangolu hombar tu PatikNa.

    2. Ganup halak siihuthon Kristus ingkon padaohon diri sian pangalaho dosa, isarana: Marnarkoba, korupsi, manangko, marmainan, marjuji, mangalangkup, mambunu, manggadis jolma, dna.

   3.  Rade manopoti dosa tu adopan ni Debata sian nasa roha dohot ateate, asa disesa Debata dosana jala ndang be  diulahi mangulahonsa.

Rade ma hita manopoti dosanta tu adopan ni Debata jala tapangido hasesaan ni dosa i, huhut sai muba hita marpangalaho na tama di adopanNa. Hata ni Debata mandok: ”Songon sintong na mangolu ahu ninna Tuhan Jahowa, tung na so lomo do rohangKu mida hamatean ni halak parjahat i, so ingkon mida hamumulak ni parjahat i tumadingkon dalan na i nian, asa mangolu ibana! Antong sai mulak ma hamu tumadinghon dalanmuna angka na jahat i ( Hes 33: 11 )