Lukas 14: 25 - 33 PATAR DO SALUHUTNA DI ADOPAN NI TUHAN I - Mundosaragi

MINGGU, 4 SEPTEMBER 2022

XII DUNG TRINITATIS

Lukas 14: 25 - 33

PATAR DO SALUHUTNA DI ADOPAN NI TUHAN I

 

    Huria na hinaholongan ni Tuhanta Jesus Kristus, Sipalua i! Sai tongtong ma hita di dongani holong ni roha ni Tuhanta Jesus Kristus asa margogo hita mangulahon angka ulaonta, tarlumobi asa tongtong margogo hita laho mangulahon HataNa na nilehonNa tu hita ganup na porsea. Asa unang adong na tatabunihon di adopan ni Debata di ragam ni parngoluonta. Marbinoto do Debata di sude ragam ni parngolunta on. Patar sude tu hita. Didok sada logu : dunia ini panggung sandiwara ceritanya mudah berubah. Lapatanna, boi do marganti-ganti peran ni jolma i, satongkin gabe jolma na burju, satongkin gabe sipalensem, satongkin boi gabe malaikat, satongkin boi gabe sibolis. Ndang adong na hot di portibi on, boi do marganti-ganti pangalaho ni jolma i. Molo di dunia peran boi do jolma i berperan gabe marragam, jala boi do ala ni na martopeng ibana gabe ndang ditanda ise do nasida. Alai, ianggo di jolo ni Debata patar do sude angka na taula di hasiangan on.

    Songon i do molo naeng gabe siihuthon Kristus hita di ngolu on. Ndang porlu mamangke topeng, ndang porlu sipalensem. Alai roha ias, roha na polin laho manuhuk silang ni Kristus. Ai tangkas do diida Debata rohanta: ias do manang marpalensem. Ai patar do diadopanNa. Alani, didok Jesus tu angka jolma na ro tu Ibana, molo naeng gabe sisean ni Kristus do ibana, ingkon rade do ibana maninggalhon roha haportibi on. Pola do didok Jesus asa rade jolma i maninggalhon keluargana. Boasa songon i? Ai na gabe sisean ni Kristus, ndada ala sistem kekerabatan, alai holan ala asi ni roha ni Kristus sambing. Alani, ingkon Jesus Kristus do na gabe ojahan dohot pamusatan di ngolu ni siseanNa i, nang hita pe halak Kristen. Antong sala do manghaholongi dongan jolma? Ndang sala! Alai boi do gabe sala, molo gabe humolong hita tu donganta dohot tu dirinta sandiri, sian holong ni rohanta tu Debata. Lapatanna, ala roha diri gabe diulahon ma angka ulaon na so sintong. Ndang taingot asi ni roha ni Debata na tongtong manarihon ngolu ni angka na porsea jala satia di Ibana. Alani, didok Jesus manang ise na so olo manuhuk silang, na so olo manadingkon na adong di portibi on ndang tama ibana gabe sisean ni Kristus.

    Nunga songon dia hita amang inang dingolunta on, dia do humolong rohanta tu na adong di portibi on, manang Jesus Kristus naung mamillit hita gabe siseanNa?. Tuhanta Jesus naung mate jala mulak mangolu humophop hita, asa parjambar di surgo hasonanganNa i angka na porsea tu Ibana. Naeng ma tapelehon na dumenggan sian hita be, gabe pelean na hushus di joloNa. I do tanda roha marpangoloion tu Ibana naung mamillit hita gabe siseanNa. Manang baliksa do, i ma holan arta na adong di portibi on do sai tagulut? Gabe lupa hita martangiang dohot marsaor tu angka dongan sahaporseaon, di parmingguon dohot partangiangan di huria i. Ali, taingot ma sude na adong di portibi on ndang boanonta tu hamatean i. Naeng ma gabe angka sisean ni Kristus na satia hita, na rade manuhuk silang ni Kristus i, asa di hita hangoluan di surgo hasonangan i. Alani, tongtong ma hita satia sahat ro di ujungna di haporseaonta tu Tuhanta Jesus Kristus i. Sai dipatau Tuhanma hita sude gabe siseanNa di sandok parngoluonta ganup marsadasada. Amen.