MINGGU, 25 SEPTEMBER 2022 Psalmen 146 : 1 - 10 XV DUNG TRINITATIS - Mundosaragi

MINGGU, 25 SEPTEMBER 2022

XV DUNG TRINITATMINGGU

Psalmen 146 : 1 - 10

 PUJI MA DEBATA, RAJA RO DI SALELENGLELENGNA!

        Huria na hinaholongan ni Tuhanta Jesus Kristus, Sipalua i! Buku Psalmen marisihon angka ende pujian dohot tangiang mamuji Debata. Digoari do Psalmen 146 on “Psalmen Haleluya” ala dibonai jala diujungi hata “Haleluya”. Latar belakang ni Psalmen on, i ma ndung mulak bangso Jahudi sian habuangan Babel, ndada ala hagogoon nasida, tung alani huaso dohot hagogoon ni Debata sambing do. Di bagasan turpuk on, diarahon parPsalmen do asa saluhut jolma mamuji pasangaphon Debata. Naeng ma haborhatan ni ganup jolma laho mamuji sian panandaon na tangkas tu Debata. Asa ganup halak na mamuji Debata borhat sian haporseaonna, i ma di las ni roha dohot arsak ni roha tongtong dirajumi, Debata na mandongani huhut marmudumudu ngolunasida.

       Di ay. 1-2, idaonta do polin haporseaon ni par-Psalmen laho mamuji Debata. Didok: “saleleng mangolu ahu, saleleng adong dope ahu” pujion parPsalmen do Debata!. Na marlapatan, di sude angka na masa, tama do pujionta Debata, Sitompa hita, di las ni roha nang arsak ni roha pe. Sipata maol dope hita mamuji Debata uju ro arsak ni roha, ala jotjot holan di tingki las rohanta, disi tapuji Debata. Alani, sada parsiajaran na arga sian turpuk on, paboa saleleng mangolu hita, holan Debata na tama pujionta. Ai ‘hadir’do Debata di saluhut parngoluanta. Naeng ma songon na dihatindanghon si Job uju dingoluna: “Jahowa do mangalehonsa, Jahowa do muse mambuatsa, pinuji ma Goar ni Jahowa (TUHAN yang memberi, TUHAN yang mengambil, terpujilah nama TUHAN!). Antong, pujionta do Debata saleleng mangolu jala saleleng adong dope hita di portibi on.

       Di ay. 3-5, di arahon asa holan tu Debata hita marhaposan jala marpanghirimon di ngolu on. Marojahan sian barita pardalanan ni bangso Israel, dihatindanghon do paboa jotjot bangso i marhaposan tu hagogoon ni portibi on, sian na marhaposan tu hagogoon ni Debata. Sai ro do bangso i marsomba tu ganaganaan manang Baal ni bangso na asing. Di bagasan turpuk on, tung dipaingot do hita, asa unang marhaposan tu angka pangarajai, tu jolma manang ganaganaan na tinompa ni jolma. Tangkas taboto na maralo situtu do pangalaho i tu Patik ni Debata. Alai, martua do angka jolma na mambahen Debata gabe Pangurupi di ngoluna. Nang pe godang angka hamaolon, alai sai toguonNa do na porsea i asa margogo mangadopi saluhut na masa i. Dipaingot do hita holan Debata na tama gabe parsigantungan jala pangusandeanta. Songon na tarsurat di Jesaya 2:22 “Dibahen i unang hamu marhaposan tu jolma, na marhosa di bagasan igungna, ai tung pola aha ibana rajuman?” (Jangan berharap pada manusia, sebab ia tidak lebih dari pada embusan nafas, dan sebagai apakah ia dapat dianggap?). Ai di ari na sasada i pesan ma sude angka sangkapsangkap ni  jolma jala parsatongkinan do ariarina di tano on. Antong, marhaposan tu Debata ma hita di ngolu on.

       Di ay. 6-10, patar do ulaon manang pambahenan ni Debata di tongatonga ni angka na porsea. Asa lam tangkas pamujionta tu Ibana, dipabotohon do tu hita marhite turpuk on paboa Debata:

a.         Sitompa langit dohot tano. Dipantadahon Debata diriNa marhite panompaonNa. Ibana Pargogo na so hatudosan na tumompa langit dohot tano. Tumiru rupaNa do jolma i ditompa. Asa tabahen ngolunta bahen hasangapon jala pujian di goarNa.

b.        Sipatingkos uhum. Dipantadahon Debata diriNa marhite hasintonganNa. Diurupi Ibana angka na nirupa, dilehon sipanganon tu angka na male, jala Ibana mangharhari angka na tarante. Debata Sipalua do Ibana tutu. Laos i do dihatindanghon Israel uju dipalua nasida sian Misir marhite hagogoon dohot huasao ni Debata. Alani, tongtong ma angka na porsea i mangolu di bagasan hasintongan ni Debata, marhite mangulahon hata dohot parsuruonNa i.

c.         Parholong roha situtu. Gok halongangan do pambahenan ni Debata di ngolu ni angka na porsea. Dipatonggor Ibana angka na mapitung, dipahehe angka na tungki, dihaholongi angka partigor, diramoti angka na buro, diulosi angka na so marama so marina dohot na mabalu, jala dipalipe dalan angka parjahat. Saluhutna i, martudutudu do tu Jesus Kristus, Anak ni Debata na ro tu portibi on paluahon hita jolma pardosa. Alani, tama do pujionta holan tu Debata jala patar ma di saluhut pambahenta laho pasangaphon Ibana.

d.        Raja ro di salelenglelengna. Debata do Raja ro di salelenglelengna di hita. Ibana manggomgomi saluhut. Alani, molo Raja do Ibana, naeng ma Ibana mangarajai saluhut angka ulaon dohot pambahenanta. Manang tu dia hita mangalangka, sai Debata na tapangasahon di angka ulaonta i sian bonana ro di ujungna. Ibana do nampuna hamuliaon i.

Antong, tapuji ma Debata sian nasa rohanta, lumobi, ala nunga ditobus jala dipalua hita sian pahatobanon ni dosa, di bagasan Jesus Kristus, na mate humophop hita. Ibana do Sipalua hita. Amen!