Epistel : Nehemia 5 : 1 - 13
Jamita :
2 Korint 12 : 7 – 10
DISARIHON
DEBATA DO GANUP NA MARUNGKIL
Huria na
hinaholongan ni Tuhanta Jesus Kristus! Boha do panghilalaan ni halak na mangido
di bagasan tangiang jala tung gomos marpangidoan tu Debata, alai sahat tu
tingki on so jumpang dope aha na tapangido i?. Gabe olo do tubu sungkunsungkun
di bagasan roha, songon dia do haburjuon ni Debata tu hita angka na porsea di
Jesus Kristus? Nang pe nunga didok tahe di turpuk Matius 7 : 7, asa tapangido
ma pangidoanta. Jala on do na niadopan ni Paulus di ngoluna. Dipangido Paulus
di ayat 8, tolu hali do dipangido ibana, asa sumurut i sian ibana ima basirbasir
(duri) di sibukna. Tontu hal na negatif do pangantusion ni basirbasir na
di bagasan sibuk i. Di hata Indonesia, adong do peribahasa na mandok “duri di dalam daging artinya sesuatu yang
tidak menyenangkan hati, bahkan menyakitkan hati dan mengganggu pikiran,
semisal penyakit perkataan perbuatan orang lain yang mengganggu kehidupan kita”.
Alani dia
do na boi dapot hita merhite turpuk on? Borhat ma hita sian ayat 8, i ma alus
ni Debata marningot pangidoan ni Paulus i; “Tuk ma asi ni rohangKu di ho; ai
dihagaleon do sun timbul hagogoon”. Diboto Debata do tangkas na nihilala ni
roha ni Paulus di ngoluna. Jala boi do taingot hata ni Debata di Mateus 5:4;
“Martua ma na marsak roha, ai siapulon do nasida”. Asi ni roha ni Debata do
alus ni pangidoan si Paulus. Jadi dialusi Debata do pangidoan ni Paulus taringot
basirbasir na di sibukna i, i ma hagaleonna. Nang pe napinangido ni Paulus asa
dibuat Debata ma basirbasir na adong di sibuk na i, alai tuk do asi ni roha ni
Debata margogoihon ibana. Pola didok ibana: ai jumpa gale ahu, disi do ahu
margogo (ay. 10). Ganup halak Kristen marragam do hamaolon na ingkon adopanna. Hamaolon
i do na gabe basirbasir di sibukta be. Nang pe songon i, songon halak Kristen
dipangido Debata do hita asa ingkon benget marsitaon on, so tung mandele alani
sitaonon i. Marbenget ni roha, i do sada tanda di angka na porsea paboa na tuk asi ni roha ni Debata mabaor ni
ngoluna. Alani, molo martangiang hita, jala dihilala roha so jumpang dope na
tapangido di bagasan tangiang i, sai jumolo ma hita pasahaton diri tu adopan ni
Debata marhite TondiNa. Asa diajari Tondi i hita asa mangantusi angka na
pinangido ni Debata, na ingkon ulahononta. Tung martinangi do anggo Debata.
Martinangi do Debata di tangiang ni Paulus, nang di tangiangta ganup. Ai
dialusi Debata do saluhut tangiang ni angka na porsea na tongtong mangasahon
Ibana di sandok parngoluanna. Amen!
Post a Comment