MINGGU 17 DUNG TRINITATIS 9 OKTOBER 2022 Haporseaon Na Paluahon - Mundosaragi

 

MINGGU 17 DUNG TRINITATIS

9 OKTOBER 2022

Evangelium: Lukas 17 : 11 - 19

  Haporseaon Na Paluahon

I.          Patujolo

Aha do haporseaon i? Molo di Heber 11:1 didok “Alai anggo haporseaon i pos ni roha doi diangka sihirimon, jala pamotoan na tontu taringot tu na so niida”. Songon dia do hataridaan ni  sahalak na “marhaporseaon”?  Turpuk jamitaon  ima hataridaan ni namarhaporseaon tu Tuhan Jesus  Kristus, jala panghorhon ni haporseaon i dibagasan ngoluna. Tapaihut ihut ma barita nauli on.

 

II.        Hatorangan Ni Turpuk

Namardalan do Jesus dompak Jerusalem , dibolus ma sian tongatonga ni luat Samaria dohot Galilea (ay.11). Hatiha i Jerusalem ima sada huta na gabe pusat ni parugamoon, hajongjongan ni bagas joro natung massai uli. Jala ganup taon marroan do saluhut halak Jahudi sian desa naualu borhat tu Jerusalem laho marariraya Paskah (Lukas 2:41). Laos di na marumur 12 taon rap nangkok do Tuhan Yesus dohot natorasna tu Jerusalem (Lukas 2:42). Laos digoari Jesus do bagas joro na di Jerusalem “bagas ni Damang” (Luk. 2:49). Mangihuhon ayat 11 on dinamardalan Jesus dompak Jerusalem dibolus ma luat Samaria dohot Galilea. Ndang pola sungkunon boasa ingkon di bolus luat Samaria dohot Galilea, alai ayat on mamaritahon paboa di nalao Jesus tu Jerusalem dibolus Ibana do luat Samaria dohot Galilea. Samaria (Heber: Shomron) sebuah istilah geografis  yang digunakan untuk wilayah pegunungan antara Galilea di Utara dan Yudea di Selatan. Alai mangihuthon  1 Raja raja 16:24  dipapatar: “Dungi dituhor ma dolok Samaria sian si Semer mararga dua talenta perak, jala dipungka sada huta di atas dolok i, dibahen ma goar ni huta napinungkanai Samaria mangihuthon goar ni si Semer, tuan nampuna dolok i hian. Di 2 Raja raja 17;1 dipapatar do ia halak Samaria ima halak Israel namaringanan di Samaria. Hinorhon ni hajahaton nasida dompak Debata Jahowa gabe diloas Debata ma nasida gabe diparhatoban halak Assur jala gabe mamulik ma nasida sian pinompar ni si David jala diparaja nasida si Jerobeam. Gabe ndang pita be haporseaon nasida tu Jahowa alai gabe haporseaon na marlaok. Ido gabe dipasiding halah Jahudi nasida jala digoari halak naung ramun. Luat Galilea (Heber; hagalil, bukit; adalah sebuah daerah yang luas dibagian utara tanah Palistina. Jolma namaringan disi ima halak Samaria nasian horong ni Israel naung sampur tu halak non-Israel dimasa ni parhatobanon ni Assur. Jadi mangihuthon hatorangan i, boi ma dohononta Di luat Samaria dohot Galilea ima inganan ni halak Jahudi no so pita be haporseaonna tu Jahowa, dohot halak Jahudi naung sampur tu sipele begu. Luat ima nabinolus ni Jesus ni na lao Ibana tu Jerusalem.

Hata “dibolus/ Menyusur” namarlapatan   ndang “dipasing” Jesus luat inganan ni jolma naung ramun i. Mangihuthon pingkiranta dipasiding Jesur ma nian inganan ni jolma na ramun i, apalagi Ibana naeng manuju inganan habadiaon i (Band.Yohanes 8:2-11). Ido asa nunga hasomalan dipingkiran ni jolma molo binoto sada inganan na gok haramunon sai pintor pinasiding doi bahkan nitonahon tu angka naasing unang mamolus sian i. ai nunga gabe dianggap luat i gabe inganan na hona uhum. Porlu do antusanta hata “mamolus”. Molo naniantusan mamolus, ndada na gabe maringan disi. Nian molo halak namamolus sian inganan haramunon ingkon adong do persiapan diri asa unang gabe tertular angka namasa di luat nabinolusnai.  Ai godangan do halak na gabe sarombang dohot inganan nabinolusna, songon bunglon gabe sarupa manang tertular. Ido sasintong na nahinabiaran ni godangan jolma umbahen sai dipasiding inganan na songoni. Alai ido naniulahon ni Jesus mamolus inganan haramunon i. Tapaihut ihut ma diturpuk jamita on aha ma namasa dung dibolus Jesus luat i.

Dinabinolus ni Tuhan Yesus luat na gok haramunon i, pajumpang ma Ibana dohot 10 halak na huliton, na jongjong mandao dao. Toho pajumpang do Jesus di inganan i dohot halak na ramun. Mangihuthon pangantusion hatihai, sahit “nahuliton/kusta/ leprosy” digoari doi halak na ramun. Ai jenis sahit namassai posi doi, menular jala molo pangantusion nasida jolma na hona sahit sisongoni ima na hona “kutuk”  na sian Dabata alani hadosaonna. Ingkon hamatean nama ujung ni sahit i. Jolma sisongoni ma na pajumpang dohot Jesus. Ndang haru tangkas dibaritahon di perikop ni jamita on, naung ditanda nasida Jesus, alai nasida na 10 halak i sapandohan marsoara na gogo mandok “Jesus, Guru, asi ma rohaM di hami”.  Molo sian pandohan nasida i, berarti nunga ditanda nasida Jesus, paling tidak hea dibege nasida barita taringot tu Tuhan Jesus. Jongjong nasida mandao dao, marlapatan diboto nasida do hadirion nasida na ramun/marsahit. Jala ndang lomo roha nasida gabe tertular sahitnai tu Jesus. Molo naniantusan na 10 halak nahuliton i, nunga tung tangkas mananda hadirionna marsahit di pardagingon dohot partondion, tarida mai sian pandohan nasida tu Jesus :’asi ma rohaM” di hami. Dipangidoan nasida tu Jesus namandok “asi ma rohaM” di hami berarti ndang adong be pangalualuan nasida na asing, ai saluhut nunga maninggalhon nasida.  Keluarga, sisolhot bahkan angka malim na seharusna na gabe pemberi dorongan semanagat tarlumobi manunggulnunguli haporseaon nasida asa unang mandele ala ni sahit, sude nunga maninggalhon nasida. Holan parsorion dohot hamatean i nama jambarna. Asi ma rohaM di hami, sada penyerahan diri secara total na dibagasanna adong sada pangkirim tu Jesus. Ndang boi be dipaganjang nasida aha sipangidoan nasida, ai nunga tung singkop parungkilon nasida i. Alani jempek nama didok nasida “asi ma rohaM” di hami. Nunga pasrah be nasida dingoluna, holan asi ni roha ni Jesus sambing nama sipaimaon nasida.

Dipanagihonon ni Jesus di suara na jou jou tu Ibana didok Jesus ma marnidasa: “laho ma hamu patuduhon dirimuna tu angka  malim”. Sada parsuruan na tung massai maol doi nian ulahonon ni na 10 halak nahuliton i. Ai molo pe lao nasida laho mandapothon malim i dohot keadaanna na huliton i, ndang mungkin nasida boi patuduhon dirina tu malim hatiha i. Nunga tangkas dipatorang nangkin di ginjang haru malim i, angka na marsahit nahuliton gabe haramunon do i didok nasida ala uhuman ni Debata do didok nasida na marsahit huliton. Alai alani haporseaon nasida dohot pos ni roha nasida tu Jesus, tanpa komentar di hata ni Jesus didok di turpuk on; “laho ma nasida”. On do na nidokna parbue ni haporseaon. Porsea di hata ni Jesus ima marhite  “namangulahon hataNa”. Ndang mangkomentari parsuruon ni Jesus. Godang do halak na mengaku “Porsea” tu Jesus, alai ndang mangulahon hata ni Debata, baliksa pasidingkon bahkan mangalo hata ni Debata. Molo di turpuk Jamita on tangkas do dipatuduhon na sampulu halak nahuliton i haporseaonna tu Jesus. Ai diparsuruon ni Jesus, pintor lao do nasida. Ndang adong tubu dipingkiran nasida mandok ndang mungkin ulahonon nami i, ai nga tangkas huboto hami na so boi hami pajumpang dohot malim i, alai dibagasan haoloon do nasida mangulahon hata ni Jesus i.

Toho ma tutu, dinaniulahon nasida hata ni Tuhan , dipardalanan dope nasida gabe ias/tahir sian sahitnai.  Huaso ni Jesus masa di angka  namangoloi hataNa. Malum sian parsahiton na so adong tudosanna. Onma sasintongna surung ni jolma sioloi hata ni Debata. Malum sian parungkilon na tung massai posi, ai marhuaso do Jesus laho mambolongkon saluhut angka parsorionta asal ma taulahon hataNa. Bukti parbue ni sioloi  hata ni Debata, ido na tarida di turpuk jamita on songon na masa tu 10 halak na huliton i, gabe ias nasida. Alani molo naeng ias hita sian saluhut haramunon dibagasan ngolunta taoloi ma Debata marhite namangulahon nanidokNa, ai marhuaso do Debata paiashon hita sian ganup haramunon ni dirinta. Songon dia do udut ni haiason napinasahat ni Jesus tu na sampulu halak na huliton i ?

Udut ni haiason napinatupa ni Jesus, sahalak sian na sampulu na marnida dirina naung ias, mulak do ibana tu Jesus lao mamuji pasangap Debata. Dipatungkap do dirina tu jolo ni Jesus mandok mauliate. Jala halak Samaria doi. Mulak tu Tuhan Jesus mamuji, marsoba tuadopanNa. Sada sikap na massai uli. Holan patar asi ni roha ni Jesus dingoluna, pintor mamuji pasangap Debata do na parjolo diulahon.Ndang asi ni roha i naparjolo di halashon, alai Debata dibagasan Jesus namangalehon asi ni roha i, ido dipapujipuji ibana. Mulak tu Jesus Nian tu malim ido nasida disuru Jesus laho pataridahon dirina. Alai ndung masa asi ni roha ni Jesus dingoluna, pintor mulak do ibana parjolo pataridahon diriNa tu Jesus silehon haiason i. Tangkas do dinamulak i ibana mandapothon Jesus pintor manungkap do ibana diadopan ni Tuhan Jesus. Hata manungkap tersungkur, ima patuduhon hahormatonna diadopan ni Debata, holan Jesus do sisombaon. Nunga ias nasida dibahen Jesus. Na patut do nasida mamuji pasangap Debata, marsomba diadopan ni Tuhan Jesus napatupahon haiason i. Ido napinatuduhon ni sahalak sian na 10 i mulak ibana mandapothon Tuhan Jesus. Sada tiruan namassai uli do nabinahen ni sahalak namulak mandok mauliate huhut marsomba tu Jesus. Tangkas do dipabotohon paboa halak Samaria do ibana, ima jolma nanidok ni halak Jahudi naung ramun. Alai dung dipangkilalahon huaso ni Jesus pintor marbalik do hadirionna laho mamuji, marsomba tu Tuhan Jesus. Sada sindiran do on sasintongna tu halak Jahudi hatiha i naung godang mangkilalahon huaso napinatupa ni Tuhan Jesus dingolu nasida alai ndang songon halak Samaria on pintor mulak tu Jesus mamuji huhut marsomba diadopanNa. Marhite sian harorona mandapothon Jesus dinamamuji jala manungkap marsomba tu adopan ni Tuhan Jesus, laos disi ma sungkun sungkun Jesus didok Jesus ma tu ibana: nda sampulu nasida naung gabe ias? Didia do na sia nari? Ndang adong hape na olo mulak pasangaphon Debata , dungkon ni halak dagang on? Longang do roha ni Tuhan Jesus marnida na  9 nari na so ro mulak tu Tuhan Jesus naung taruli haiason i. Boi do ro benarhononta na 9 halak i mandok; na mangoloi parsuruon ni Jesus do nasida laho pataridaho dirina tu malim, ido umbahen ndang mulak nasida mandok mauliate/marsomba tu adaopan ni  Debata. Ndang pola dipatorang di perikop ni jamita on manang na toho nasida laho pataridahon dirina tu malim i, alai disungkun sungkun ni Jesus namandok ; nda 10 nasida naung ias? Namarlapatan doi sude do nasida naung dapotan asi ni roha nasian Jesus. Alai didia do nasida? Lulu lulu rohani Jesus boasa ndang saluhut nasida mandok mauliate, mamuji Debata jala mulak marsomba tu Debata? Mangihuthon naniantusan sian pandohan ni Tuhan Jesus on, molo dung patar dipasahat Debata asi ni rohaNa tu hita, tapuji ma Ibana, ro ma hita marsomba tu adopanNa. Ndang binoto manang na lao nasiai tu malim patuduhon dirina, alai molo tungpe lao nasida, jumolo ma nian nasida mandok mauliate tu Jesus silehon haiason i, ai ndang boi nasida pajumpang dohot malim i anggo so dipaias Jesus. Ido laos diuduti Jesus mandok tu na ro mandapothon Ibana “Hehe ma ho, laho ma, “Haporseaonmi do paluahon ho”. Hehe ma ho lapatanna uduti ma parsuruon ni Jesus i, jala naumbalga didok Jesus “Haporseaonmi do paluahon Ho”. Ndada holan haiason sian parsahiton ibe jumpang dina mulak mandapothon Jesus, huhut marsomba tu Ibana, alai umbalga sian i “Haluaon” i gabe upa napinasahat ni Jesus tu ibana. Patarma songon nanidok ni ojahan ni turpuk jamita on na mandok: “Haporseaon tu Jesus taruli haluaon”.

 

III.       Pangarimpuni.

Parbue ni haporseaon na tu haluaon ima:

a.       Mangalualuhon tu Debata saluhut parsorion ni ngolutta, jala manghirim di asi ni  rohaNa

b.      Taulahon ma nanidokNa, nangpe suhar sian pamingkirionta.

Ia dung taruli hita di asi ni roha ni Debata, tapuji jala tasomba ma Ibana. Ro ma hita mandok mauliate huhut marsomba tu adopanNa, dungi taruli ma hita dihaluaon na sian Ibana di pardagingon nang partondiaon. Amen.