MINGGU XVIII DUNG TRINITATIS 16 OKTOBER 2022 - Mundosaragi

 

Dialusi Debata Nasa Parungkilon

Evangelium: Nehemia 5: 1-13

I.              Patujolo

Ra tung mansai lohot do hita di sada ende na mandok: “Allah mengerti, Allah peduli segala persoalan yang kita hadapi. Tak akan pernah dibiarkannya ku bergumul sendiri s’bab Allah peduli”. Sian pandohan ni ende i, boi ma antong antusanta na diurupi Debata do hita di angka na tongon itaadopi.

Nehemia (di hata Heber: נְחֶמְיָה, jaha: nekhemyah) na marlapatan: Debata na songkal (Allah Maha besar), jala on do na dipatuduhon panurirang Nehemia di angka parsorion na ro tu angka jolma na ni rajaanna ima halak Juda. Aha do huroha masalah na muncul di tonga-tonga ni halak Juda? Songon dia do dalan na binahen ni Panurirang Nehemia tu angka halak Juda na ni rajaanna i? Tu partingkian sinuaeng on, songon halak Kristen iba, marpardomuan tu ojahan ni jamita on, aha na boi gabe mutiha di haporseaonta? Ummotikna, ido na gabe sungkunsungkun di hita laho lam antusanta ojahan ni jamitanta di tingki on.

 

II.           Hatorangan ni Turpuk 

Uju dimasa ni si Nehemia do dipatupa paulihon parik ni Jerusalem . Jala, molo itaida sian turpuk on nunga dipabangkit ibana gabe pangarajai di luat Juda (5: 14). Jala, boi do idaonta ndada mambuat paruntungan ibana sian jabatan manang posisi na adong di ibana tu angka na ni rajaanna. Une do dipadalan ibana jabatan na adong di ibana, dihalaputi ibana do mamingkiri boha do asa ruar situan natorop i sian angka parsorion na ro tu nasida.

Turpukta on manaringoti taringot tu alaualu ni situan natorop i tu si Nehemia. Mangangguk badar situan natorop i ro di jolma nasida dompak hahaanginasida, halak Jahudi. Ia alualu nasida i, ima:

1.      Torop do anak nang boru nasida, alai ingkon salionnasida do eme, asa mangan jala mangolu (ay. 2)

2.      Ingkon lehononnasida nama hauma, porlak anggur, dohot bogasnasida bahen singkora (ay. 3)

3.      Ingkon diurang nasida do hepeng bahen garar ni rundo tu raja i, haum dohot porlak anggurnasida gabe singkoram tu raja i. (ay. 4)

4.      Hahaanggina, songon sibukna, angka anak ni situan natorop ingkon gabe hatoban do (ay. 5)

Dung dibege si Nehemia alualu ni situan natotop i tarrimas ma antong ibana. Jala, dina tarrimas i ibana, tung marpingkiri do ibana. Jala, alani i do umbahen mangonai hata si Nehemia tu halak na sangap dohot tu angka induk, na patuduhon asa unang dipatupa angka na sangap i be angka ulaon na menindas i, jala jumolo dipatuduhon ibana panobusion tu hahaanggina i, hombar tu na niaturhon di halak Jahudi.

Tangkas do itaboto tung mansai ketat do aturan ni halak ni Jahudi taringot tu hatoban. Insarana, molo sahalak hatoban ingkon do unduk ibana tu indukna, alai dung salpu onom taon, manang ditaon papituhon ingkon dilehon indukna i do haluaon tu hatobanna i. Alai, ndang diulahon nasida i tu angka hahaangginasida i, totop do mardalan penindasan i. Ido umbahen dipaingot si Nehemia nasida, marhite pandohanna: “Ndang denggan pambahenanmuna i. Nda ingkon marhabiaran tu Debatanta hita nian tama marparange ala panginsahion ni halak parbegu musunta i?” (ay. 9).

Singotsingot na mansai denggan do na pinasahat ni si Nehemia on, asa unang tarpodom angka na sangap dohot angka induk i di hasalaanna. Ae ndang dihalomohon Debata angka ulaon nasida i tu angka hahaanggina i. Lumobi ma tahe molo diingot nasida angka panginsahion ni parbegu na gabe musu nasida i.

Alani, dipangido si Nehemia asa disalesehon ma angka utang nasida i. Jala asa dipaulak nasida hauma, porlak anggur, porlak jetun, dohot bagasnasida, ro di bunga ni hepengnasida, eme, anggur dohot miak naung tinunggunasida sian angka hahaanggina i. Diolohon, huhut diulahon nasida do nian parsuruon ni si Nehemia i, ala nunga jumolo dipatupa si Nehemia paluaon jolmana i, tontu asa gabe tiruon ibana, marhitehon i gabe tokoh perubahan ma antong ibana di angka na masa i, asa anggiat sidung angka parsorion ni nasida i. Jala ido songon bentuk pengorbanan ni si Nehemia asa anggiat muba situasi i gabe lam tu dengganna.

Dihaloon naung nidok nasida i dipatupa ma antong panolonan manang parpadanan tu Debata marhite angka na jinouna i angka malim, jala dipaspas si Nehemia parndoraan ni bajuna, na patandahon songoni ma halak na so manghajongjonghon hata i. Gombaran ma i dipatuduhon si Nehemia tu angka natorop i.

     Di pengorbanan na naung tangkas dibereng angka natorop i sian Nehemia, sasintongna ido sibonsiri na mambahen situasi ni sosial masyarakat gabe lam tu dengganna, gabe marhamubaon ni roha angka na sangap i asa unang dipatupa be angka penindasan i. Tung arga do tahe hape pengorbanan i, tung ragam do hape haulion parbue ni pengorbanan i tu angka humaliangta molo itaparsiajari sian si Nehemia on.

Jala, itaingot ma pengorbanan ni Kristus di hau pinarsilang i, sian pengorbananNa i gabe lam tu ulina parsaoranta dohot Debata, aek Kristus do na gabe singkat ni dosanta marhite i gabe anakNa hita, jala ndada be hatoban hita.

 

III.        Hahonaan

·         Nehemia ima sahalak na gabe pangarajai di luat Juda, alai tung une do tahe diulahon ibana ulaonna i. Ndada mambuat paruntungan ibana sian jabatanna i. Jala berdampak positif do jabatanna i tu angka humaliangna. Hape, aut sura hita, molo gabe sahalak marjabatan aha do tahe na adong dipingkiranta? Unangunang adong dipingkiranta, wajar do molo maruntung ahu sian ulaonki. Alai, gabe singotsingot ma on tu hita saluhutna marhite angka ulaonta i. Manang aha pe ulaonta i, baik sebagai partani, baik sebagai partonun, baik sebagai parkarejo di kantor, sude ma tahe angka ulaon na pinasahatNa tu hita laho manguduti ngolunta on ingkon adong do sada motivasi di hita: sian ulaonki, ingkon berdampak positif do i tu angka humaliangku, ndada laho manusai angka humaliangku ulaonki.

·         Ojahan ni jamitanta di minggu on, ima: dialusi Debata do nasa parsorion. Tutu dialusi Debata do nasa parsorionta, songon pangalusion ni Debata tu situasi na masa ditongatonga ni na rajaan ni si Nehemia on. Alai, ingkon aluhononta do i tu Ibana, asa alusanNa alualu manang parsorionta i, unang holan na sip. Jala, itaingot ma: holan halak na olo pajonokhon dirina tu Debata do na pasahathon angka alualuna.

·         Ringkot sihangoluhononta taringot tu alus ni Debata di angka parsorion na itapasahat tu Ibana. Ingkon alus hombar tu lomo ni rohaNa do na itahirim. Unang molo andul sian na itapingkiri alus ni Tuhan i, gabe meol haporseaonta. Biarlah Tuhan menjawab dengan ketetapanNya, karena itu pasti untuk kebaikan kita. Amen.