MINGGU UJUNG TAON HURIA 20 NOVEMBER 2022 Evangelium: 1 Korintus 15: 50-58 - Mundosaragi

 

I. Sibonsiri

Di sada borngin uju mandohoti pelatihan “Clinic Pastoral Education” di Rumah Sakit Cikini Jakarta na niadonghon ni United Evangelical Mission, tarsonggot do hami, ala di tingki i, dokter jaga ni rumah sakit Cikini i, manjou hami tu ruang Instalasi Gawat Darurat (IGD). Dipabotohon dokter i ma tu hami, paboa adong sahalak pasien naung marujung ngolu. Hombar tu ruhut ni panghobasion ni rumah sakit, nasa pasien na marujung ngolu, ingkon hatop do diboan tu kamar mayat paima diurus keluarga angka na ringkot, manang paima diboan keluarga na monding i tu bagas nasida, manang tu inganan na asing (rumah duka).

Alai, keluarga dohot piga-piga halak ruas ni punguan na niuluhon ni na monding i, ndang olo mangihuthon ruhut naung tinotophon rumah sakit songon naung ginurithon di ginjang i, ala hombar tu pangantusion dohot haporseaon nasida, paboa: “sahalak naung marujung, holan pamatangna do na monding, alai ianggo sahala (jiwa) dohot tondi (roh) na, tongtong dope mangula jala meat di angka hinaragam ni inganan, israna: di hau na bolon dohot angka inganan na asing saleleng 7 ari nari. Di ari papituhon, bongot ma muse sahala dohot tondi i tu daging naung mate i, laos mulak mangolu ma daging i. Jadi alani ni i do umbahen sai digogohon nasida, asa unang diboan tu kamar mayat na monding i, alai dipaloas ma jolo keluarga paadop-adop bangke i di ruang perawatan saleleng pitu ari nari.

Dung hubege hami hatorangan ni keluarga i, hutangkasi hami ma nasida, taringot tu pangantusion dia dohot pangajarion sian ugamo dia do nasida sansintongna. Dialusi nasida do hami, didok: ia ugamo nasida ima ugamo malim, manang jotjot dipanggoarhon Parmalim.

Uju di panghobasion ni apostel Paulus di Efesus, dibege ibana do barita sian halak Kloe, paboa na masa do parsualan di huria Korintus. Na marbingkas ma i, ala deba sian ruas ni huria i, na so apala tangkas mangantusi taringot tu haheheon ni pamatang dungkon marujung, hombar tu naung jojot sinoarahon manang dijamitahon si Paulus (1 Kor 15: 12), laos suang songon i do nang rumang ni daging na hehe i pe, mansai tung maol diantusi nasida (1 Kor 15: 35). Ndang hinata, ala deba sian ruas ni huria i, adong dope na maniop huhut marsihohot di angka pangajarion dohot pangantusion na parjolo i na digoari Hellenisme manang pangantusion ni masyarakat biasa (awam). On ma sibonsiri, umbahen na digurithon jala ditongos Si Paulus surat on, na ditujuhon tu huria Huria Korintus, asa unang lilu haporseaon ni huria i, alai sabalikna asa lam tang jala marsihohot, maniop Barita nauli naung dibege jala dijakkon nasida.

     II.        Hatorangan

1.         Pamatang na manontong

Ra ndang salpu dope sian parningotanta, taringot tu sahalak partinju na tarbarita di sandok portibi on na margoar: Mike Tyson. Molo martanding, mansai mura do ditaluhon ibana angka alona. Nang pe ganup pertandingan, sai disangkapi jala ditontuhon panitia do, paboa partandingan i, dipatupa 12 (sampulu dua) ombas. Alai jotjot do, di ombas parjolo dope mardalan, nunga peak alona i hona tinju. Molo itapamanat rumang pamatang ni si Tyson i, mansai jompok (pendek) do molo dibandinghon tu angka pamatang ni toropan halak Amerika, nang akan alona pe tahe na sian bangso manang suku na asing. Antong didia do rahasia ni hamonangan ni ibana.

Nangpe jompok pamatangna, alai mansai pir situtu, pola songon batu luhut pamatangna, suang songon i nang rungkungna mansai togos, bolon jala togu, pola digoar ibana si leher beton. Alani i, manang songon dia pe gogo ni alona manumbuk si Tyson, sai songon na so diterge ibana do idaon, jala ndang tarhilala laho manaluhon ibana.

Di turpuk jamita on, didok si Paulus do (ay 50-54), Debata patupa hamubaon ni jolma manisia sian pamatang na olo busuk gabe pamatang na manontong. Ia partupa ni hamubaon i, tangkas ma i masa, di tingki na binuhul ni Debata di ujung ni portibi on. Di tingki i, manghuling sarune ni suruan i, masa ma: parjolo, hehe ma angka naung monding.

Di tingki ni Panurirang Hesekiel, nunga diungkap Debata sada pangungkapon tu si Hesekiel. Uju diboan Debata ibana tu sada rura na gok holi-holi ni jolma na mate, diuji Debata do ibana mahite sungkun-sungkun na mandok: Tagamon tarpangolu dope holi-holi on?. Dialusi si Hesekiel do Debata mandok: Ale Tuhan Jahowa, Ho do na umbotosa. Didok Tuhan Yahowa, asa manurirangi ma si Hesekiel, jala mangido asa dilehon tondi tu angka holi-holi i, gabe masa ma halongangan, marsitopotan ma angka holi-holi i ganup tu donganna, huhut tubu ma sibuk jala dibongoti tondi ma sibuk i, gabe mangolu ma (Hes 37: 1-11).

Nian pangungkapon on, diungkap Tuhan Jahowa laho pabotohon songon dia do ngolu ni bangsoNa di tingki i, jala songon dia ma sangkap ni Tuhan Yahowa tu bangso naung pinillitNa i muse. Alai nang pe songon i, sasintongna, laos boi do pangkeonta pangungkapon on mangurupi hita laho mangantusi songon dia do muse parngoluon ni angka naung monding i.

Paduahon, angka na mangolu dope di panghuling ni sarune i, dipauba Debata sian daging na olo busuk gabe mar daging na manontong.

Uju si Joy Tobing manghamonangkon Indonesian Idol di taon 2004, adong do ende hamonangan ni ibana na margoar: “Karena Cinta.” Saotik sian hata-hata (lirik) ni ende i mandok: Dan bila aku berdiri, tegar sampai hari ini, bukan karena kuat dan hebatku...” Ende on boi do nagurupi hita laho mangantusi pandohan ni si Paulus di na mandok, ndang apala adong imbar ni naung leleng, manang parjolo marujung sian angka na mangolu dope di haroro ni Tuhan paduahalihon. Alana, nangpe mangolu dope jolma i di haroro ni Tuhan i paduahalihon, ndada na dumenggan nasida marpangalaho sian angka naung jumolo monding i, manang ndang ala nasida mardaging na jumogi sian angka na parjolo i, alai sasintongna, saluhut do jolma manisia mardaging na olo busuk jala parsatongkinan. Hombar tusi do di ari haroro ni Tuhan i dipangkuling ni sarune, masa ma hamubaon ni saluhut manisia. Solukon ni na manontong i ma na olo busuk i, jala hangongolu na manontong manoluk na olo mate.

Pandohan on pataridahon, ia ngolu ni jolma i, molo sian pardagingon do sansintongna mansai gale jala mura do i busuk. hangoluan i mansai margogo situtu, pola disoluk, manang dibondut na olo mate i. Pandohan disoluk dohot dibondut, pa andarhon paboa mamungka sian haheheon dohot hamubaon i, ndang jumpang jala ndang tarida huhut ndang margogo be hamatean i ala naung tarbondut, alai hangoluan dohot hagogoon nama na marhuraja jala manggohi sandok manisia i, gabe mardaging na gogo jala manontong ma manisia i.

Tangkas do diboto si Paulus, mansai maol do antusan jala tarjalo ni deba sian ruas ni huria i jamita ondeng, alani i do umbahen na dipaingot si Paulus nasida, taringot tu Jesus na sai jinamitahon na i. Ia Jesus Kristus, naung mate do ibana di hau silang i, jala ditanom di partangkurahan i. Alai di ari patoluhon, hehe do Ibana sian tanoman i, gabe mardaging na ibaru ma ibana. Songon ima masa di ari haroro ni Tuhan Yesus paduahalihon, alani i, di arop roha ni si Paulus do, asa unang ma nian ganggu roha nang haporseaon ni huria i.  

1. Sorop ni Hamatean

Nasa na manggulmit di hasiangan on, sai adong do sinjatanya. Sinjata i dipangke laho palua dirina sian angka na naeng mamolgak ibana, huhut laos dipangke laho manaluhon musu huhut mangalului parbalanjoanna. Sada sian na manggulmit i, dipangke si Paulus do laho pabagas pangantusion ni huria i taringot tu hamatean, ima tudoshon sorop ni loba (lebah).

Torop do ra naung hea pajumpang dohot asar ni loba, jala molo pajumpang dohot asar ni loba, somalna sai marusaha do ibana pasidinghonsa, asa unang disotop. Alai sasintongna, torop do jolma na mangula siap ari mangalului situak ni loba tu tombak. Alai ganup mangalului situak ni loba, sai diboan nasida do sinjatana, isarana: asap, jaring manutupi pamatangna dohot na asing, dohot tujuan, molo tungpe rongom loba i naeng mansotop, ala ni perlengkapan sinjata i, malua do ibana sian mara i.

Ra na gabe sungkun-sungkun ni rohanta, boasa si Paulus mandok: Jo hamatean, didia hamonangan mi? Jo hamatean, didia sorop mi?. Asa lam hantus pandohan on, boi do ra paboaon pengalaman uju marubat “Terapi Lebah” di Bandung uju i. Andorang so dipatupa dope terapi i, jolo ditangkasi do hami, atik alergi sorop ni loba manang ndang. Jala molo dung pasti ndang alergi, baru ma dipatupa terapi i. Dung simpul terapi, dipatudu terapis i do tu hami angka loba naung dipangke. Huida hami ma disi, sai manggepori loba i, jala na deba nari nunga mate. Tudoshon i do na nidok ni si Paulus taringot tu sorop ni hamatean i. Molo uju masa hamatean i, tutu do mansai hansit tarlumobi di angka na ditadingkon, pola sai mangandungi dohot mangangguk bobar. Jala saluhut do jolma marusaha laho pasiding hamatean, marhite na jamot di pardalan ni ngolu, marhite na mangorom deba sipanganon dohot mangalului parubatan molo uju ro parsahiton.

Ndang apala sala na mangargahon ngolu i, jala tung mansai denggan situtu do i, ido umbahen na diuhum huria angka na mate maningkot. Alai, si Paulus mandok di turpuk on, paboa ndang tarpasiding hamatean i (B.Ende No. 520: 2), alai hamatean i, holan parsatongkinan do i, ai molo dung ro Tuhan Yesus paduahalihon, paheheonna do angka na mate i. Ido umbahen, sai songon na dilesengi si Paulus hamatean i mandok: Jo hamatean, didia sorop mi, jo hamatean didia hamonangan mi?. Lapatanna, sasintongna ndang margogo ianggo hamatean, jala nunga talu dibahen Tuhan Yesus i.

   

II.        Hahonaan

Halak Kristen digoari do siparmonang. Tangkas di didok di Buku Ende No. 474: ay 1 didok:....Raphon Jesus boi au monang talu musu i na ro; ay.3 mandok: ......Tuhan Jesus do parmonang, dipamonang dohot au.

Hamonangan na boi do i jumpang hinorhon ni 2 siala (faktor) na pasimbar, ima Parjolo molo togu jala gogo hita, manang Paduahon molo gale musunta. Tuhan Jahowa sitompa manisia jala parholong roha, disangkapi do asa taruli hasonangan jolma i, ndada hamagoan, jala mangalehon nasa na hinalungunhon ni roha ni jolma i (Patudos Jeremia 29: 11). Patulus sangkap Na i, ndada holan gogo dilehon tu angka na porsea i, manang dibahen Tuhan i gale musu ni jolma i, alai tung singkop do dilehon na dua i, ima dipargogoi naporsea i laos di tostos gogo ni musu i, gabe pasti jala saut ma sangkap haluaon na sian Tuhan i.

Alani i, pasingkophon jamita on ita tiop jala marsihohot ma hita di tona ni si Paulus na di ay. 58 i mandok: Onpe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong dibagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i. Amin.