Jamita 5 PEBRUARI 2023 Jakkobus 1:22-25 - Mundosaragi

 

Mangolu di Bagasan Hatigoran Hombar tu Uhum Ni Debata

I.                   Sibonsiri

            Surat Jakkobus ditujuhon tu angka huria na di parserahan, di luar Palestina. Tontu godang angka abatabat di huta ni halak jala godang marsampur angka tradisi ugamo manang haporseaon ni halak lokal. Jadi godang angka poda di turpuk on laho margogoihon dohot mangapuli akan huria na di parserahan i asa marsihohot di bagasan Kristus.

Godang poda ulaon praktis ala ido kebutuhan ni huria hatiha i, lumobi na manaringoti hubungan haporsaon dohot pambahenan. Di bagasan turpuk on, diondolhon do uhum na tigor marhite gabe siula hata ndang holan pananginangi. Hampir sarupa do impolana dohot turpuk ni Epistel, ima puasa na sintong jala na ber-integritas tu ualon siganup ari.

 

II.        Hatorangan

Siula hata ni Debata (ay 22)

            Diajari turpuk on do hita laho manangihon hata ni Debata. Jala lumobi sian i, ingkon boi gabe siula hata ndang holan pananginangi. Jotjot do ndang gabe marlapatan angka poda na taparsiajari molo ndang diulahon. Termasuk di na manangihon hata ni Debata, molo ndang diulahon marisuang do i. Isarana jotjot ro marminggu, partangiangan, jala begeonta jamita, alai molo so diulahon jamita i, marisuang do i. Jadi ingkon taulahon do angka na tarparsiajari, lumobi hata ni Tuhan. Tatangihon, tarimangrimangi, dung i taulahon ma asa marparbue i di ngolunta. Alani i, mamparsiajari hata ni Debata ndang cukup holan manangihon dohot mangapil. Ingkon sahat tu panindangion, jala ingkon sahat gabe siula hata.

            Di hata Gorik, hata pananginangi ima, paralogizomenoi, lapatanna sai mangalului angka sidalian. Sai dietong do cukup holan mananginangi dohot mangapil. Dirimpu molo nga godang parbinotoanna gabe songon na tumimbo sangapna sian na asing. Hape pikiranna ndang adong olo laho mambahen na denggan. Ndang olo marbagi parbinotoan tu angka donganna. Molo nga songon i, ulaonna pe pasti ndang adong na denggan. On ma na digoari paotootoon dirina. Jadi ndang goaron on malo justru oto ala mangolu so marimpola. Haluaon na sian Debata ndang sae holan na marsiajar komitmen ortodoks alai ingkon digohi marhite na manangihon hata ni Debata huhut marparbue sian pambahenanna manang komitmen ortopatos, lapatanna marparbue tu ulaon parasinirohaon (Patud. Kolosse 1:5-6).

Uhum na mamboan hita tu panopotion dohot panolsolion (ay 23-24)

Dipodai Jakkobus do songon dia asa mamparhaseangkon hata ni Tuhan. Dibahen ma tudosanna songon na mangida sormin. Sian sormin i do botoon songon dia situasi pardompahanta. Boi do tarida disi molo na adong dahi di bohi manang di pamatang. Dokter pe ringkot mamangke sormin laho marnida dahi manang sahit, jala dung tarboto boi ma dibahen ubat na cocok tusi. Songon i do hata ni Debata, na boi pataridahon angka dosanta, asa boi hita paubahon dohot paiashon angka dosanta i asa jaloonta hasesaan ni dosa. Alani i denggan ma taparsiajari hata ni Debata asa boi diajari hita laho paiashon dirinta. Apostel Paulus pe boi do tarurupi mamereng dirina marhite sian sormin asa boi gabe ias ibana jala gabe naposo ni Debata (Rom 7:9-12): “Mangolu do anggo ahu najolo so marpatik dope. Alai ro ma patik i, gabe mangolu ma dosa i. Alai anggo ahu mate do, jadi gabe hamatean do hape di ahu patik i, sihorhon hangoluan nian. Ai marbingkas sian i, dipaotooto jala dipamate dosa i do ahu marhitehite patik i. Asa na badia do patik i, badia do na tinonahon ni Debata, tigor jala denggan.” Jadi molo denggan do tapangke hata ni Debata na marlapatan ma i mamparhaseangkon hata ni Debata marhite patik manang uhum na denggan.

            Alai adong do deba na so diboto mamangke sormin. Holan satongkin dibereng, dung i laho ma gabe lupa ibana tu kondisi ni padompahanna. (ay. 24). Jolma na songon on dipatudos ma i tu na manangihon hata ni Debata, alai ndang diulahon. Dibege do barita taringot tu panobusion ni Kristus, boha sahat tu na tarsilang, alai holan olat ni i do. Holan salpu satongkin ndang diingot be angka dosana, jala ndang diulahon angka ulaon na suman tu jolma na manopoti dosa. Hape mudar ni Kristus i do na paiashon hita sian angka dosa.

            Alani i martua ma jolma na olo manangihon hata ni Debata suman tu halak na mamangke sormin dohot denggan. Barita na uli manang evangelium ima na paluahon hita sian patik ni Yahudi. Patik ni nasida holan na mamboan tu parhatobanon, molo naeng malua hita sian i, ingkon patik na sian Kristus i ma. Godang do panindangion taringot tu naposo ni Debata di Bibel, ingkon boi do i gabe tiruan di parulaon ni halak Kristen. Ido gabe tiruan manang gabe sormin di ngolunta. Jadi molo na mamangke sormin na denggan, ingkon manat no manangihon hata ni Debata, dibereng ise na boi gabe tiruan jala diulahon ma i di ngoluna siganup ari. Alani i, Barita Nauli ima, patik na paluahon hita sian angka dosa, patik na padengganhon parangenta asa marhaimbaruon jala mamboan pasupasu tu angka dongan.  Uhum haluaon na sun denggan (ay 25)

            Di ayat 25 adong perubahan istilah sian hata (logos) gabe uhum (nomos). Tontu na nimaksud Jakkobus nomos I ma sada aturan manang etika ni halak Kristen. Jala uhum on do na manggombarhon haluaon ni Kristus na dihatindangkon di Bibel. Jadi molo didok uhum haluaon na sun denggan sarupa do i tu hatigoran ni Barita Nauli. Uhum i ma na gabe instrumen asa mamboan jolma na porsea gabe lam gomos. Digoari pe na sun denggan ala kwalitasna tumimbo sian sormin. Molo taida sormin olo do hurang tangkas ala ndang denggan kwalitas materialna, alai molo uhum haluaon na sun denggan ima sada aturan na sempurna. Uhum na mamboan jolma i tu hatiuron, jala uhum na sun denggan ima patik na dipasingkop Kristus (Mateus 5:17).

            Uhum na sun denggan ima na paluahon, ala molo taida ulaon ni Kristus na pasingkophon uhum gabe mamboan jolma I lam antus tu panobusion dohot haluaon. Uhum na mangkorhon jolma i gabe siula hata dohot sijalo pasupasu. Jolma na holan gabe pananginangi, ndang adong parbuena, ndang marisuang do i di dirina jala ndang adong pangkorhonna tu dongan jolma. Alai parbue ni siula hata patar do mamboan hadengganon tu dongan humaliang.

III.       Hahonaan

            Molo tarajumi sejarah ni HKI, tung jonok do turpuk on manungguli hajongjongan ni huria na manjunjung baringinna, lumobi di ayat 22. Soetan Maloe, Ephorus na parjolo i, manghatindangkon ayat on di jolo ni uluan RMG, paboahon na mampu do halak Batak gabe sitindangi hata ni Debata. Dos do halak Batak dohot Missionaris Jerman di bagasan panghobasion ni huria. Dos do parhobas ni halak Batak dohot halak Jerman di jolo ni Debata. Pangkeon ni Tuhan i do sude jolma laho manghatindangkon dohot pajongjongkon uhum ni Debata.

            Alani I tarjou do sude parhobas nang ruas ni huria laho manghatindangkon uhum ni Debata. Dipaborhat do hita gabe siula hata, na marlapatan sipangoloi do hita di uhum ni Debata laos gabe siula hata i ma hita asa jongjong hatigoran na sian Tuhan i. Gabe siula hata ni Debata ma hita asa mangolu di bagasan hakristenon na arga, na konsisten. Molo siboto adat ingkon huhut ma paradat. Siboto poda ingkon gabe parpoda na tiingkos na mamboan angka jolma tu hatiuron. Gabe siula hita, ima na parsidhot manghatindangkon haluaon na pinatupa ni Kristus jala mangolu di bagasan uhum na sintong i.