Jamita, REMINISCERE 5 MARET 2023 Epistel: Psalmen 121: 1-8

 

Dipintori Hinorhon Ni Haporseaon

 

I.          Sibonsiri

Di bukku Psalmen, adong 15 bindu ende hananangkok (ziarah), mulai ma i sian bindu 120 – 134. Secara khusus di bindu 121, ndang apala disurathon goar ni parpesalmen i.

Somal do angka ende hananangkok i dipatubegehon angka nanangkon (peziarah) tu huta Jerusalem uju jumpa ari raya. Adong tolu ari raya ni Israel siganup taon, ima:

a.         Pesta sagu-sagu na so niigaran (roti tak beragi = paskah, pat.2 Musa 12.

b.        Pesta ari raya parlape-lapean (pondok daun,  pat. 3 Musa 23:34-42),

c.         Pesta ari raya sipitu borngin (pat. 2 Musa 34:22, Hari Raya Tujuh Minggu =Penuaian buah bungaran)

Tolu hali ma di bagasan sataon borhat nasida nangkok (ziarah) tu Jerusalem, jala tung ganjang do dalan sidalananna.  Di halak Israel namaringanan  di luat nadao sian Jerusalem, marragam do rupa ni angka parungkilon laho manopot inganan hajonjongan ni Bagas Joro ni Debata. Di las do roha nasida manopot Jerusalem na naeng mamuji Tuhan i, alai tubu do nang biar ni rohana ai diboto nasida do ia di dalan sidalanan i, bahat parjahat dohot panamun namansai kejam (pat. Luk. 10 Sahalak nahona samun naniurupan ni halak Samaria).

Alai nangpe songoni sipata dilele biar roha ni angka nanangkok i (peziarah)  ala terbatas gogona marimbanghon angka parjahat di dalan i, ndang mangisurut hiras ni rohana tu Jerusalem. Porsea do nasida sai lehonon ni Jahowa do hahipason jala urupanNa do nasida di pardalanan i. Jala sai dipapos do rohana di Jahowa, Ibana do Sijaga Israel.

Laos ido naeng idaonta di Psalmen 121 on di Minggunta Reminiscere (Ingot ma ale Jahowa denggan ni basaM); sai diingot Jahowa hita, ro Ibana mangurupi dohot paluahon hita.

II.      Hatorangan

1.    Mangaranap tu Jahowa ai Sian Ibana do ro Pangurupion (1-3)

     Ragam do angka namambahen tahutan jala ganggu roha ni halak Israel hatiha nangkok (ziarah)  tu Jerusalem. Adong ma i alani mansai jahat do panamun, parjahat jala olo mamunu di dalan i. Alani i sai humordit do nasida manopot huta Jerusalem ai sian nadao nasida. Jala ndada holan alani angka parjahat, alai dohot do marsipata alani situasi buruk ni alam. Marnakkok tuat angka dolok dohot tor sidalananna, jala disi do jotjotan martabuni angka parjahat i mangonggop namardalan tu Jerusalem.

     Molo mangaranapi parpsalmen dompak dolok; ndang songon pangantusion ni angka bangso na leban. Molo bangsa naleban mangaranap tu dolok laho do rohana tu hagogoon ni angka tuhan, ala ninna di dolok natimbo i adong do angka debata (dewa). Ndang songoni nanaeng sidohonon ni parpsalmen on. Alai molo sai mangaranapi humaliang parpsalmen tu dolok mardongan biar, ai ro do tu rohana; Ise ma ulaning naboi mangurupi hami aut sura ro parjahat manang masa angka bencana alam di pardalanan i. Tarbahen do ulangin marlinggom manang martabuni di dolok i? Hape ndang sian i ro pangurupion, gari tahe disi do martabuni angka panamun mangonggopi.

     Sian Debata do ro pangurupion, ima Ibana; Jahowa Sitompa langit dohot tano on. Ibana do manompa dohot angka dolok manang tor i. Ginomgoman ni huaso ni Jahowa do nang angka dolok na disini angka parjahat monggop di pardalanan. Jala marhuaso do Tuhan i, pasohothon angka parjahat na di dolok i, ai Ibana do namanompa nang angka dolok i. Marborngin di dolok i angka nanangkok i jala hipas, alai ndada ala sian dolok i ro haluaonna, tung sian Tuhan i do. Ido umbahen sai hiras jala marsiadu nasida mardalan tu Jerusalem atik pe diboto godang parmaraan di dalan i, ala sai pos do rohana di Debata, sai urupan ni Tuhan i do nasida di saluhut pardalanan i.

2.    Jahowa Manjaga Hita, Arian Dohot Borngin (4-6)

     Ala dao do luat ni angka Israel nanangkok tu Jerusalem mar ari raya, ingkon marbogngin di dalan i do nasida. Ndang sahat sadari nasida, molo tung pe borhat sian luatna di manogot ni ari. Ido umbahen didok parpsalmen i di ayat 4-5; “…ndang olo nok mata, jala ndang olo modom ianggo Sijaga Israel. Jahowa do Sijaga ho….” Jala di ayat 6 didok; “Ndang tagamon doiton ni mata ni ari ho arian, manang bulan pe bornginna i.” Sian i taboto di pardalanan i do nasida arian dohot borngin. Arian mardalan, borngin modom di dalan i.

     Nang pe songoni, di arian namardalan nasida; dilinggomi habongNa, dilinggomi huaso ni Debata do nasida, gabe ndang didoit posi ni mataniari nasida. Di parngoluanta nuaeng, marlinggom boi do jongjong di toru ni halilu (bayangan) ni sada hau, manang bangunan. Ndang hona tu namarlinggom i sondang dohot posi ni ari i, ala diambati hau manang bangunan i. Songoni do nang nanidok ni parpsalmen on, marlinggom tu Debata, ai gabe Tuhan i do mangambati pandoit ni mataniari i. Halongangan do i di nasida molo di Israel parhorsihan (padang pasir) mardalan di arian ni ari na posi (ekstrim) hape dang didoit mataniari. Mataniari namansai posi boi do mambahen gale, pingsan manang marsahit kulit. Alai ndang masa i tu nasida ai dilinggomi huaso ni Debata do nasida.

     Nang tingki borngin di poltak ni bulan; namarlapatan na mansai ngali borngin i.  Molo modom jala nok mata nasida, ragam do boi masa parmaraan sian parjahat dohot binatang buas. Alai ianggo Debata Jahowa ndang dohot tarpodom, ndang nok Ibana, sai dijaga do bangsoNa Israel asa unang marmara. Laos marhite psalmen on dipaingothon do muse pangaramotion ni Debata maradophon oppu nasida (Israel) di parhorsihan uju na sian Mesir tu tano Kanaan. Dilinggomi Debata do nasida di arian namohop marhite ombun namarsijongjong (tiang awan), jala dipatiur Jahowa nasida marhite sinondang ni api namarsijongjong tiang api).

3.    Jahowa do Manjaga Nang Tondim, Sahat Ro di Salelengna (7-8)

     Ise do natuk manjaga tondi nang hosanta? Di ayat 7 didok parpsalmen; “Sai jagaon ni Jahowa do ho sian nasa parmaraan, sai jagaonna do tondim”. Ndada holan manjaga dagingta Tuhan i sian nasa ragam ni parmaraan, alai lobi sian i tahe, diramoti jala dijagai do tondinta.  Sai diramoti jala di dongani do bangsoNa di sude dalanna, ndada holan asa mangolu dagingta alai mangolu dohot tondi marhaporseaon, jala asa manontong ro di salelengna hita mangolu rap dohot Ibana.

     Nang Jesus Kristus didok do; “Ai ida ma, sai na dongananku do hamu ganup ari, rasirasa ro ajal ni hasiangan on!”  (Mat. 28:20 B)

III.       Hahonaanna Dohot Panimpuli

1.        Rap dohot Tuhanta ma hita mardalan di saluhut pardalananta, ai tarbahen Ibana do mangurupi jala pasingkophon angka na ringkot i di ngolunta.

2.        Mangaranap tu Jahowa ma hita ai sian Ibana do ro pangurupion. Unang ma sai pos be rohanta tu angka hagogoon dohot huaso na di portibi on, tarlubobi huaso ni angka tondi na hodar, gogo haholomon i. Itatadinghon ma bangko sisongoni, alai sian Debatanta Sitompa saluhut ma tapangido pangurupionta.

3.        Marlinggom tu huaso ni Debata ma hita, nang sipata ro angka hamaolon namandoit, manang naboi manahiti, ai sai ondihonNa do hita. Jesus Kristus do Tuhan namangondihon hita

4.        Unang be hita sai tahutan, mabiar jala lomos, ai umbalga do huaso ni Tuhanta martimbanghon saluhutna angka i. Molo sai marpangunsadean jala mangaranap tu Jahowa hita, sai pangoluonna do hita, mangolu ma tondinta nang haporseaonta ro di salelenglelengna. Didok angka hata ni namalo; Ndanga alani angka hamaolon i umbahen tubu biar i, alai alani biar i do umbahen marhamaolon hamu. (Bukan kesulitanmu membuat ketakutanmu, tetapi ketakutanmulah yang membuat engkau kesulitan).  Antong taingot ma hata ni Tuhan i; “Sai jagaon ni Jahowa do ho sian nasa parmaraan, sai jagaonna do tondim. Sai jagaon ni Jahowa do ho laho ruar dohot laho bongot, olat ni on ro di salelenglelengna. (Psalmen 121:7-8)