MINGGU, ESTOMIHI 19 FEBRUARI 2023 Evangelium: 2 Petrus1:16-21
MINGGU,
ESTOMIHI
19
FEBRUARI 2023
Evangelium:
2 Petrus 1:16-21
Marsitiopan
Tu Jesus Raja Na Mulia
I.
Patujolo
Di masa nuaeng on, nunga tung
mansai jotjotan do tarbarita angka barita naso tutu, manang didok ma i berita
bohong manang berita hoax. Barita i dao sian hasintongan jala bertujuan laho
mangganggu pola pikir ni jolma di hasintongan. Molo sai jotjot do dibaritahon barita
hoax i pola sahat tu ganup ari, olo do barita i gabe tarjalo ni angka natorop
jala dirajumi gabe hasintongan, umbahen gabe terjebak ma di bagasan barita naso
tutu manang naso sintong.
Mansai godang do barita naso
tutu dibaritahon angka jolma naso bertanggung jawab, mulai ma sian persoalan
sosial, budaya, nang politik pe, nang songoni dibidang keagamaan manang
haporseaon, tarlumobi ma di ajaran hakristenon. Barita naso tutu i dibaritahon
angka parpoda haliluon manang panurirang pargapgap na mandok ndang tutu haroro
ni Jesus Kristus paduahalihon. Tujuan ni angka na mambahen barita naso tutu i
ima laho mangganggu haporseaon ni angka na porsea tu Tuhan Jesus Kristus, asa
ditadingkon angka na porsea i Jesus jala diihuthon parpoda haliluon i.
Mangadopi barita hoax on, Hot do haporseaon ni Apostel Petrus umbahen ndang
terpengaruh ibana. Naeng patoguon ni Apostel Petrus do haporseaon ni angka na
porsea asa tongtong manghaporseai Jesus Kristus jala unang ganggu alani barita
naso tutu nabinaritahon ni angka parpoda haliluon. Asa lam bagas pangantusionta
tu turpuk on, tapaihutihut ma hatorangan ni turpuk on.
II.
Hatorangan
Ni Turpuk
Surat na ginurithon ni
Apostel Petrus on marisihon taringot tu haporseaon ni halak Kristen ala hatiha
i godang angka parpoda haliluon. Ulaon ni parpoda haliluon on mangarahon angka
natorop taringot tu barita nauli na pinasahat ni Apostel Petrus, didok nasida
ma songon turiturian. Didok angka parpoda haliluon i muse ia ajaran ni Jesus
Kristus taringot haroro-Na paduahalihon, ndang tutu i. Marsangkap do angka
parpoda haliluon i naeng manggugai haporseaon ni angka na porsea i.
Apostel Petrus ima sada
sian sisean ni Jesus Kristus, jala ibana do na gabe saksi rap dohot si Johannes
dohot si Jakobus tingki ditogihon Jesus Kristus nasida nangkok tu atas dolok na
timbo. Hatiha i manghatai do Jesus dohot si Musa dohot si Elia di dolok i, laos
manghuling ma soara sian bagasan ombun i, didok ma: “On do Anak haholonganHu,
tangihon hamu ma Ibana” (Markus 9:2-13). Sian on boi do gabe sada bukti ia Hata
ni Debata i ndada songon turiturian, alai hasintongan do. Dipangke dope sahat
tu sadarion padan na robi ima na laho patuduhon na dipasaut Debata do saluhutna
angka panurirangion na pinasahat-Na marhite angka panurirang, lumobi ma
taringot tu padan ni Debata taringot haroro ni Sipalua i. Sarupa do isi ni
padan na robi dohot padan na imbaru ima taringot haroro ni Sipalua tu
portibion. Hasintongan do ianggo Hata ni Debata ala isina digurithon angka na
porsea marhite pangajarion ni Tondi Parbadia.
Dipatorang si Petrus
hadirionna na gabe saksi di hasangapon ni Jesus Kristus. Haroro ni Jesus
Kristus dohot huaso-Na ima sada hasintongan jala hasintongan i do na gabe
mangalo parpoda haliluon i. Tangkas dope diingot si Petrus angka ajaran na
pinasahat ni Jesus dohot angka tanda halongangan na pinatupa ni Jesus di
jolona, angka sisean na asing, dohot angka natorop. Tangkas dope diingot si
Petrus hamamate ni Tuhan Jesus dohot na mulak mangolu sian hamatean. Sian angka
naung didalani si Petrus rap dohot Jesus Kristus, ndang mungkin barita naso
tutu napinasahatna di na marbarita nauli ibana, pasti do hasintongan i
napinasahatna ala mangulahon turgas na pinasahat ni Tuhan Jesus Kristus do
ibana (pat. Mat. 28:19-20). Barita nauli napinasahat ni Apostel Petrus ima
taringot haluaon marhite Jesus Kristus, saluhut jolma do manghirim di haluaon
i. Rela do Ibana mangadopi parungkilon jala sahat tu na mate holan asa malua
angka jolma sian pardosaonna jala mangolu di bagasan hasintongan dohot lomo ni
roha ni Debata.
Dilehon si Petrus do hatorangan tu angka na
porsea i, ia angka panurirang ndang mungkin pasahathon barita naso tutu
taringot tu Hata ni Debata. Marbarita nauli pe angka sisean i, lumobi ma si
Petrus, ndada sian pikkiran nasida na pinasahatna alai marhite pangajarion sian
Tondi Parbadia do. Jala marhite Tondi ni Debata do umbahen na dibaritahon angka
panurirang di padan na robi taringot tu haroro ni Jesus Kristus jala disaksihon
angka sisean ni Jesus do masa i hatiha na rap nasida dohot Tuhan Jesus. Laho
mangadopi angka parpoda haliluon ima marhite Hata ni Debata. Ringgas manjaha
Hata ni Debata sian Bibel i jala dihangoluhon, pasti dang ganggu haporseaonta
molo tung pe ro angka parpoda haliluon naeng manggugai haporseaonta. Hata ni
Debata na tarsurat di Bibelta i ndada holan marisihon sejarah songon buku na
asing, alai marisihon hasintongan na sian Debata dohot hasangaponNa marhite na
disaksihon angka sisean-Na. Antong unang be adong keraguan di angka na porsea,
sintong do Hata ni Debata na pinasahat ni angka panurirang nang angka apostel
i.
III.
Sipahusorhusoron
Huria ni Debata na di
portibion na gabe saksi-Na, tongtong ma pasahathon barita nauli tu saluhut
jolma ala ido turgasta dilehon Debata. Dijou Tuhan Debata do angka sisean-Na
dohot angka na pinillit-Na jala disuru laho mangulahon turgas panghobasion i.
Didok Hata ni Debata marhite surat ni apostel Paulus tu Huria Epesus : “Laos
Ibana do mangalehon deba gabe apostel, deba panurirang, deba evangelis, deba
muse parmahan jala pangajari” (Epesus 4:11). Di masa nuaeng on, angka parhobas
di tongatonga ni huria i nunga lam martamba sahat tu Majelis Huria dohot angka
jabatan na asing, hombar tu angka turgas panghobasion i. Saluhutna angka
perangkat di huria i mangulahon turgasna gabe saksi sian hasintongan dohot
hasangapon ni Jesus Kristus, Raja jala Sipalua i.
Angka parhobas ni Tuhan
di tongatonga ni huria i na gabe saksi-Na, ingkon tangkas do mananda ise Tuhan
Jesus Kristus na disaksihon i. Molo ndang songoni, gabe diraguhon do kesaksian
nasida i jala gabe mura ma diganggu angka parpoda haliluon. Angka parbarita nauli
ingkon unduk jala marserep ni roha do maradophon Tuhan Jesus Kristus. Boi pe dihaporseai
barita nauli napinasahat nasida i ndang alani status hadirion na manang status
ni parngoluonna, alai ala rade do nasida diarahon Tondi Parbadia. Angka sisean
ni Jesus i pe angka jolma na berstatus sosial biasa do, alai gabe tarbarita do
goar nasida ala rade nasida diarahon Tondi Parbadia jala unduk maradophon
Debata.
Godang do na mandok
dirina siihuthon Kristus jala gabe saksi-Na, alai di balik ni i sasintongna
adong do maksud tertentu di nasida. Adong do na malo (mahir) pasahathon Hata ni
Debata, hape di balik ni i na naeng mambuat keuntungan pribadi do ibana sian
Hata ni Debata napinasahat-Na i. Pelayanan
yang dibangun atas prinsip seperti ini tidak akan memajukan kehidupan beriman.
Karena itu jangan mudah percaya dan diperdaya oleh kebesaran lahiriah.
Sasahalak didok gabe saksi ni Kristus, ima na olo mangulahon panghobasion i
dibagasan unduk dohot serep ni roha, jala ndang mambuat keuntungan pribadi alai
laho tu hamuliaon dohot hasangapon ni Debata do. Jala ido napinatuduhon ni
Tuhan Jesus Kristus tu hita saluhutna. Songon si Petrus na gabe saksi ni
Kristus, hita pe ingkon gabe saksi ni Kristus marhite parngoluanta siganup ari
(panghataion, parniulaan, dohot pikkiran). Molo hatiha i diida si Petrus dope
angka panghobasion ni Jesus Kristus dohot ha-Debataon-Na umbahen dibaritahon
ibana ma i tu saluhut jolma. Alai ianggo hita, nang pe ndang idaonta secara
langsung panghobasion ni Jesus Kristus i songon na dialami si Petrus, alai boi
hita porsea tu Ibana marhite haporseaonta (Heber 11:1) jala ingkon tapasahat do
barita nauli i.
Jadi, ringkot hian do
manjaha Hata ni Debata dohot mameop i di bagasan ngolunta asa lam tangkas
panandaonta di Tuhan Jesus na tasomba i. Ai nasa surat i sinihathon ni Debata
do jala hasea mamodai, maminsang, pauliulihon, manogunogu di bagasan hatigoran
(2 Tim. 3:16). Marhite na manjaha Hata ni Debata ganup ari, lam dipatogu ma
haporseaonta maradophon Debata, hot ma Hata ni Debata i di ngolunta. Marganti
sorin pe angka parungkilon nang angka sitaonon jala godang angka parpoda
haliluon, alai ianggo haporseaonta i ndang boi ganggu. Antong lam tapajonok ma
dirinta tu Tuhanta Jesus Kristus jala lam togu ma haporseaonta asa margogo hita
mangalo parpoda haliluon na naeng mangaliluhon haporseaonta. Amen.
