MINGGU REMINISCERE 5 MARET 2023 Dipintori Hinorhon Ni Haporseaon
Evangelium:
Rom 4:1-5+ 13-17
I. Sibonsiri
1.
Boasa ingkon dipintori
marhite haporseaon ndada marhite ulaon ni jolma? Naeng baritahononta; Ai ingkon
patar hatigoran ni Tuhan i (keadilan Tuhan) apala nuaeng nang sogot tu saluhut
jolma (pat. Rom 3:26). Ai holan Debata sambing do parpintor jala naboi mamintori
saluhut jolma naporsea tu Jesus Kristus. Asa ndang tarbahen jolma hape
paburnang diri di adopan ni dongan jolma tarlumobi di adopan ni Debata. Ia
malua hita, holan ala na pinintoran ni Tuhan i do. Alani i naeng ma ila rohanta
molo paburnang diri, ai ndang alani ulaonta nadenggan manang alani rohanta na
uli umbahen malua sian hamagoan upa ni dosa i, tung asi ni roha ni Debata do.
2.
Taringot tu ojahan:
Dipintori Hinorhon ni Haporseaon, taamenhon do i, ai dang tarpangasahon hita
ulaonta dohot gogo gabe tardok hita jolma napintor manang natigor di adopan ni
Tuhan i. Ai didok di Rom 3:9-20, ai saluhut jolma nunga madabu tu hajahaton
jala ginonggoman ni dosa (dikuasai dosa). Targoar do saluhut jolma namardosa,
jala dang adong namarroha, manang nauso-uso di Debata. Tung saluhut do dang
dapot pujion di adopan ni Tuhan i. Songon i ma saluhut hita pe, nang nuaeng
hagiotta tu dosa do ala ni pardagingon i.
3.
Tapamanat ma bindu 3
dohot 4 ! Molo dihatahon ap.Paulus di bindu 3 i, taringot saluhut (sude) jolma
na di portibi on nunga mardosa, jala saluhut jolma dang margogo paluahon dirina
sian hamagoan. Hamagoan do upa tinuhor ni dosa (pat. Rom 6:23) alani i ingkon
hamagoan hian nama nian ujung ni hajolmaon.
Antong aha nama sipangasahonon? Holan basa-basa ni Debata nama di
bagasan Kristus. Songoni ma ingkon masa asa saluhut jolma dohot bangso malua.
Laos di bindu 4 on ditaringoti
ap.Paulus si Abraham, gabe sada bukti do i; haru si Abraham ompu (leluhur)
dohot ama ni naporsea i, dipintori marhite haporseaon. Ai nang pe tardok si
Abraham ama manang ompu ni naporsea, ndang jumpang si Abraham hapintoran molo
sian ulaonna sambing, ai mardosa do nang
si Abraham.
Nang di ayat 5 didok do i; …
Sipintori na jahat. Ido umbahen dihatahon ap.Paulus tu halak Jahudi na di Rom
taringot tu si Abraham sahalak tokoh namansai dihormati jala dijungjung, jala
ompu nasida, hape dang tarbahen pintor so holan ala ni haporseaonna. Ima
dihatahon ap.Paulus asa tarjalo nasida paboa ndang ala uli ni ulaon manang
alani Patik i be, manang alani parsunaton i umbahen malua hita, tung holan
alani haporseaon dohot basa-basa ni Tuhan i do.
II. Hatorangan
1.
Abraham Ompu Pardagingon ni Jahudi, jala Ompu
Partondion ni Saluhut Jolma (ayat 1-2)
Di Alkitab, ayat 1, disurat : “bapa leluhur jasmani kita” patoranghon
ompu nasida do si Abraham mangihuthon pardagingon. Jala tung jotjot do halak Jahudi manang Israel paburnang diri
paboa nasida pomparan ni si Abraham. Nian ndang apala sala i, alai gabe so
marimpola do i ala sai paburnang diri nasida marhitehon daging ndada alani
partondion manang haporseaonna. Sai didok do nasida pomparan ni Abraham alai
ndang mangantusi nasida taringot tu haporseaon na sasintongna na di bagasan ni
Abraham. Gabe jotjotan ma mangasahon angka nadapot idaon ni simalolong i ma dipaburnang
laos madabu tu ginjang ni roha (sombong). Songoni ma halak Jahudi hatiha i.
Ido umbahen dipaingot ap.Paulus; Ai molo
holan ama pardagingon sambing do si Abraham, gabe so manghorhon do haporseaon ni Abraham dohot padan ni
Debata na di ibana i tu angka bangso na di portibi on nang tu hita nuaeng, ai
ompu ni halak Jahudi do ibana di pardagingon i.
Aut sura
dapot pintor si Abraham hinorhon ni ulaon pardagingon, boi do i antong
mantat ginjang ni roha (bermegah) tu dirina, alai ndada dohot tarpangasahon
ibana i di adopan ni Debata. Antong ompu ni saluhut naporsea do ibana
mangihuthon haporseaon partondion i ndada ala ni pardagingon.
2.
Porsea Gabe Manghorhon
Hasintongan (ayat 3)
Dihatahon ap.Paulus do angka namasa di si
Abraham najolo, uju ndang dope marianakhon ibana. Dihatahon i muse asa tarjalo
ni halak Jahudi na di Rom paboa marhite haporseaon ni si Abraham do taruli
ibana gabe bangso nabolon, ndada holan ala torop ni anakna sian pardagingon. Di
ayat 3 i martudu sian 1 Musa 15:6; uju
manghatai marpadan Debata tu si Abraham,
baga-baga ni Debata mandok marpinompari ma ibana. Ndang saut di si
Abraham baga-baga i ianggo sian alani
gogona ai naung suda gogo do ibana, jala ripena si Sara na hol do. Mangasahon
marhaporseaon do ibana mameop padan na sian Tuhan i. Dihaporseai si Abraham do
hata ni Tuhan i, gabe dietong Tuhan i ma i hasintongan. Jala nang pe so masa
dope hatiha i, alai gabe sintong do i masa. Ima haporseaon namanghorhon, ndada
alani uli ni ulaonna mangoloi Patik i. Laos songoni do hita dipintori Debata,
ndada alani pambahenanta, tung alani basa ni Tuhan i do.
3.
Asi ni Roha do
Parpintoran ndada Upa (ayat 4-5)
Dikritisi ap.Paulus do angka parrohaon ni
jolma di Rom, asa nian manontong martoruk ni roha. Dietong Jahudi do ianggo
hapintoran naung jinalo ni si Abraham ima
silehon-lehon sian asi ni roha ni Debata sekaligus dohot hinorhon ni
angka ulaon nadenggan binahen ni si Abraham (simultan). Hape, ndang songoni,
alai ias do holan ala basa-bas ni Tuhan i!
Molo didok ndang alani ulaon nadenggan hita
dipintori, i do tutu diparhatopot haporseaonta. Alai ndang diambati hata ni
Kristus jolma laho mangulahon na denggan huhut ndang maralo (anti) hataNa i
maradophon angka ulaon na denggan. Apala tahe hinorhon ni namarhaporseaon do
hita gabe tarbahen mangulahon nadenggan maradophon dongan jolma. Jadi na
dikritisi ap.Paulus ima anggapan manang pangantusion namandok; si Abraham
dipintori ala ni ulaonna angka nadenggan i.
Songoni ma nang hita, molo laho do rohanta
mandok, dipintori Debata hita hinorhon ni angka ulaonta angka na denggan di
bagasan Patik i, gabe tu kesombongan do namasa, ai ndang adong hita apala
rimpas boi mangulahon saluhut nidok ni Patik i.
Didok ap.Paulus ma gabe sada astuan; Ai
molo mulaulaon jolma gabe dijalo upana, ndang sietongon manang rajuman i gabe
asi ni roha, alai tahe upa naso tarjua do i di ibana naung mangula. Alai di
jolma na so mangaradoti ulaon, hape
porsea ibana di Debata; Sipintori na jahat, gabe hatigoran rajumon di
ibana. (:4-5). Sian i do taparhatopot, dipintori Debata do jolma uju pardosa,
parjahat dope jolma i asa ima dalan ni
Debata manogihon jolma tu hangoluan di bagasan haporseaon.
Molo itatorushon tu ayat 6-8, nang si Daud
pe dihatahon do; martua do halak na gabe pintor dirajumi Debata, so sian
parulaonna, jala disesai Debata angka dosa dohot hajahatonna. Martua ma halak,
anggo so dijujur Tuhan i dosana tu ibana!
Antong ndada upa naso tarjua hinorhon ni
ulaon hape rajuman parpintoran i alai tung basa-basa ni Debata do tu hita
saluhut jolma.
4.
Baga-baga ni Debata na tu
si Abraham, Dilehon dohot nang tu Pomparanna (ayat 13-16)
a) Marhite Haporseaon
Di ayat 16 dihatahon; “Dibahen i sian haporseaon i do bagabaga i, asa sian asi ni roha do, ai
naeng hot bagabaga i di sandok pomparanna i; ndada holan di dongan sapatik ni
si Abraham, dohot do di donganna sahaporseaon, ai ama ni hita saluhutna do
ibana.”
Di padan narobi, 3 ma padan ni Tuhan i tu
si Abraham: (1) Marpinompari gabe bangso nabolon, (2) Mangingani tano Kanaan,
(3) Gabe pasu-pasu tu saluhut bangso.
Dipatorang ap.Paulus do pamikkiron i, paboa
rap manghaporseai do nasida, ia padan ni Debata dipatulus marhite si Abraham.
Nang tu angka bangso sileban (non Jahudi), digogohi Tuhan i do padanNa, ai
dijangkon do bangso naleban naung porsea gabe huria (gereja) ni Kristus. Antong
saluhut bangsa do gabe pomparan (anak) ni si Abraham marhite haporseaon i. Patar ma di si padan ni Tuhan i namandok
teaon ni si Abraham do tano i (bumi ini),
ala gabe ama ibana di sandok bangso na di tano on marhite haporseaon.
b) Ndang Alani Patik
Alai ndada alani Patik umbahen dilehon
Debata baga-baga (padan) tu si Abraham dohot pomparanna asa manean tano i, alai
tung alani haporseaonna do. Ai molo mangihuthon Patik i ibana manghirim asa
manean tano on, marisuang do haporseaon i, jala pesan ma baga-baga i. Boasa
gabe songoni? Ai dihatahon do di ayat 15; “Ai dihorhon patik i do rimas; alai
anggo soada patik, laos so adong do pangalaosion.” Alai ndang namandok; sala
Patik i, umbahen ndang manghorhon pasu-pasu Patik i alai ala dang margogo
Jahudi mangulahon hata ni Patik i, disi do tarida pangalaosion maradophon Patik
i naparo rimas ni Debata. Alai baliksa, manang didia ndang dipasahat Patik
i, ndang tardok disi adong pangalaosian
maradophon Patik. Jala ndada alani parsunaton umbahen taruli di baga-baga i.
Hinorhon ni i ama do si Abraham di saluhut jolma, natarsunat dohot na so
tarsunat, gabe saluhut bangso taruli hite (dalan) tu Debata (pat. Rom 3:30)
5.
Sada do Debata di Saluhut
Bangso, Ibana Sitompa Saluhut Jolma (ayat 17)
Dijou jala dipabangkit Debata do si Abraham
gabe ama ni torop bangso, asa marhite haporseaon gabe martuhanhon Debatanta,
ima Debata Sipangolu ni angka na mate jala Sitompa naadong sian na so adong
hian.
Sundut parjolo do si Abraham digoar di ompu
ni naporsea, dunghon ni nabinahen ni Debata aek na sumar i manguhum jolma
pardosa. Sian pomparanna ma muse dilehon Tuhan i baga-baga haluaon asa
dipintori, malua jala dapot hangoluan angka naporsea di sandok tano on. Antong
sada do Tuhanta saluhut jolma naporsea, Ibana do Sipalua. Asa saluhutma
marhaporseaon doshon naung hinaporseaan ni si Abrahan Tuhan Jahowa.
6.
Di bagasan Jesus Kristus
do hita Dipintori jala Dapot Hangoluan
Mangihuthon Rom 3: 22-25 naung ginohan ni Jesus i do patik i,
Ibana do singkatta manaon upa ni dosa. Alani i, ganup jolma namarhaporseaon tu
Jesus Kristus, dipintori hinorhon ni haporseaonna. Jala dung dipintori, mardame
ma hita jolma dohot Debata marhitehite Jesus Kristus. Laos marhitehite Ibana do
saut masuk hita tu asi ni roha nabolon i dohot hangoluan namanontong i.
(Pat.Rom 5:1-2). Ai nang ap.Paulus
dihatindanghon do; Ai upa tinuhor ni dosa do hamatean; alai basabasa ni Debata
do hangoluan salelenglelengna marhitehite Kristus Jesus Tuhanta i. (Rom 6:23)
Hahonaanna dohot
Panimpuli
1)
Marroha mauliate ma hita
di adopan ni Tuhanta Jesus ala ni balga ni asi ni roha dohot basa-basaNa namamintori hita uju gabe pardosa dope hita.
Ido dalan ni Tuhan i manjou jala manogu-nogu hita tu hangoluan di bagasan
haporseaon dohot hatiuron.
2)
Unang ma hita paburnang
diri, di adopan ni jolma tarlumobi maradophon Debata, ai nang hita pe dang
tapangasahon hita gogonta, pikkiran nang uli ni ulaonta ianggo tung paluahon
hita sian hamagoaan ala ni dosa i. Ai upa tinuhor ni dosa do ianggo hamatean
(hamagoan), alai basa-basa ni Debata do hangoluan. Ido da na itahalashon, gabe
marria ni roha hita mangihuthon jala manghaporseai Tuhan Jesus.
3)
Manontong ma hita
mangasahon haporseaon, ai anak ni si Abraham do nang hita. Si Abraham do ama
jala ompu ni naporsea, ai sahat do baga-baga ni Tuhan i nang tu saluhut hita.
4)
Tapelehon/ tapasahat ma
dirinta tu Tuhan i gabe naposoNa, marhaburjuon mangula ulaon nadenggan tanada
mauliate ni rohanta tu Ibana bahen hasangaponNa. Unang be olo hita parhatobanon
ni sibolis i gabe siula hajahaton. Alai muba ma rohanta jala mangadop tu Tuhan
i, ai nang Jesus pe dipelehon do diriNa
bahen hangoluanta, pola tarsilang jala durus mudarNa asa dapot parpintoran
hita.
5)
Di Minggunta Remincere
sadari on, namarlapatan “Sai ingot ma ale Jahowa denggan ni basaM”, songoni do
hita manghaporseai Tuhanta Jesus. Mangido di denggan ni basaNa sambing asa
dapotan parpintoran hita. Martangiang do hita; ”Sai ingot ma hami ala ni
denggan basaM”, ndang alani parulaonta naung denggan. Antong marroha mauliate
ma hita tongtong.
