MINGGU JUDIKA 26 MARET 2023 Evangelium :Hesekiel 45 : 9 – 17

Ulahon Ma Hatigoran Dohot Hasintongan

Patujolo

Hesekiel marharoroan sian hata heber yekhezqe’l na marlapatan Debata na mampargogoi. Hesekiel sandiri anak ni sahalak malim na tading jala mangkobasi di Jerusalem (1:3). Si Hesekiel dohot do tarbuang tu Babel rap dohot panurirang Daniel (Dan 9:2). Di Babel, Hesekiel ditanda natorop, jolma ni Debata na manurirangi (14:14, 28:3). Mangoli do si Hesekiel songon halak Jahudi na asing na dihabuangan, na maringanan di topi sunge Kebar (1:1, 3:15-24, bnd. Psal 137:1). Jala panjouonna gabe panurirang dijalo ibana hatiha ditano habuangan Babel do di sunge kebar. Buku Hesekiel marisi 48 bindu jala adong 1273 ayat. Diperkirahon digurithon hira-hira taon 590-570 sM di Jehuda dohot di Babel. Jala ondolan ni buku Hesekiel ima: Panguhuman jala hamuliaon ni Debata, rimas jala holong ni Debata.

II.        Hatorangan Ni Turpuk

Adong piga-piga hal naboi ni sagi dibagasan turpuk jamitanta di minggu on, ima :

I. Tangung-Jawab Tohonan Ni Angka Induk (ay 9)

Turpuk on secara khusus tu angka induk, molo dihata heber dipangke hata nesie yisrael na marlapatan pangeran Israel (princes of Israel). Jadi hata nesie manang induk patoranghon huaso manang tohonan na adong di sasahalak jolma laho mangatur angka na di toruna. Jotjot diulahon angka induk uhum manang penyalah-gunaan kekuasaan. Didok Debata dihata heber רַב־  (rab, enough) na marlapatan paholang ma angka ulaon si songoni. Molo tarajumi tahe, tohonan induk marharoroan sian Debata do, alai boasa parulaonna justru pataridahon parange haportibion isarana pangarupaon dohot hamagoan, boasa dipangke tohonan induk i gabe manosak, mangonjar angka bangso ni Debata sian partalianna. Turpuk on mangido ingkon adong ma reformasi diangka ulaon ni induk tu hasintonganna ima mangulahon uhum (Ibr:tsedaqah) dohot hatigoran (Ibr : mishpat).

Sintong Ma Angka Timbangan Pelean Muna (10-17)

Ia dihalak Israel dimasa Heskiel sistem pelean tu Debata ima parsampuluan, jala aturan i diulahon malim di bagas joro dibagasan legatimasi ni angka induk harajaon Israel. Artina ndada holan hepeng na gabe pelean ni halak Jahudi kuno di bagas joro, dipasahat do eme, miak, anak ni birubiru, na gabe pelean situtungon, pelean pardosaon, pelean hamulitaeon, pelean pardengganan. Molo angka induk nunga papeol uhum, tontu ditoruna pe ingkon lam peol do. Asa i do reformasi i ingkon parjolo do masa sian ginjang dungi mangihut ma tutoru. Diulaon bagas joro pe nunga dang sintong be angka timbangan, ampang (efa) dohot poting (bat). Molo bat dohot efa ima satuan ukuran ni halak Heber kuno, na dipangke tu miak manang gandum, sada bat manang efa dos tu 36 liter. Jala adong muse ukuran na asing ima sada mas (syikal), ringgit (gera), dohot tail (mina). Di halak Heber kuno sada mas (syikal) ima alat ukur timbangan, sada syikal (mas) ima 11,4 gram. Molo tail manang mina ima alat ukur mata uang halak Heber kuno na dos argana tu dinar, molo di zaman Jesus upa ni jolma parkarejo harian saleleng 100 ari ima 100 mina manang dinar, berarti upa karejo sadari ima 1 mina manang dinar (bnd. Luk 19:13).  Artina, nunga jotjot masa angka timbangan na manipu hatiha i di Israel sahat tu angka timbangan pasahathon ragam pelean tu Debata di bagas joro i. Asai do di turpuk on diulahi Debata muse paturehon angka pelean ni bangso i naung somal margabus bangso i diangka peleanna.

III.       Hahonaan Ni Jamita

Goar ni minggunta sadarion ima Judika, na dibuat sian Psalmen43:1 na mandok elohim shaphaten i na marlapatan luluhon au ale Jahowa (God vindicate me). Jala dihata Latin didok judicum napatoranghon uhum na sintong. Adong pandohan hata Batak na mandok: ‘Molo litok aek ditoruan, tingkiron ma tu julu. Arti ni  pandohan i patoranghon adong penyebab utama di angka na masa, molo dipature masalah sian penyebab utama  gabe tio ma saluhutna. Ahama penyebab utama? Ima ulaon partondion ni jolma. Molo nunga litok spritualitas ni jolma i, mangkorhon ma i tu halitokon di sude parulaonna, mulai sian parumah -tanggaon, pansarian ni ngolu si ganup ari, sahat tu angka parsaoran paralealeon, gok gabus. Dos do i songon hansitan ipon; olo do mangontak hansitna sahat tu simanjujung jala olo gabe demam. Dang na malum sahiti molo na ta inum obat hansit ulu manang demam, alai holan ta inum obat hansit ipon tor malum do sude sahit i nang ulu manang demam. Suang songoni ma, molo nunga ture partondionta, nunga somal ta ulahon tsedeq (hatigoran) dohot mishpat (hasintongan) dipartondionta, mangkorhon gabe sintong ma sude parulaonta siganup ari. Amen.