KAMIS PUTIH 06 APRIL 2023 Evangelium: Lukas 22 : 14 – 23

 

Panghophopion Ni Jesus Kristus Na Paluahon

 

I.          SIBONSIRI

Parningotan Kamis Putih ima songon partording ni ulaon Paskah laho marningot huhut nang mangulahon borngin parpudi mangihuthon songon naung pinatupa ni Tuhanta Jesus Kristus rap dohot angka sisean uju di panghobasionNa. Di parningotan Kamis Putih on marningot do hita di panghophopion ni Jesus Kristus naung paluahon jolma manisia sian dosa. Ulaon Kamis Putih na pinatupa ni Tuhan Jesus Kristus uju rap dohot angka apostel ima rap hundul huhut marsipanganon. Ulaon on dipatupa ala sihol ni rohaNa naeng mangan birubiru Paska rap dohot angka sisean andorang so songgop dope angka sitaonon tu Ibana jala mate tarpajal Ibana di hau pinorsilang. Konteks ni turpuk evangelium on ima partingkian ni Tuhan Jesus Kristus di borngin na parpudi di na naeng mandapothon ari na laho pasingkophon panghohopionNa i marhite hamamateNa di hau pinorsilang i.

 

II.        HATORANGAN

Di angka ulaon molo dipatupa rap marsipanganon, songon sada tanda ma i paboa adong na ringkot siingoton manang angka ulaon na ringkot ma i. Isarana ulaon martading hata, dipatupa do angka na denggan termasuk rap marsipanganon tarlumobi ala marpungu do angka na marholong ni roha di ulaon i. Nian, dang na rap marsipanganon i na gabe mata ni ulaon manang na umringkot di sada ulaon, alai na mambahen ringkot ulaon i ala partingkian si songoni do dipakke laho manghatai sian roha tu roha andorang so marsirang. Ido nang dipatupa Tuhanta Jesus Kristus andorang so marsirang dohot angka siseanNa nang sude naung mangihuthon Ibana. Parsirangon ima sada partingkian na mambahen lungun roha ni sasahalak ala dang boi be rap dohot angka na hinaholonganna. Tung godang do jolma dang lomo rohana molo adong parsirangon lumobi ma ala sinirang ni hamatean. Songoni do na masa di panghobasion ni Tuhanta Jesus ala Tuhan Jesus pe manghilalahon paboa na lungun do rohaNa ala ingkon marsirang na ma Ibana rap dohot angka apostel.

Dipatupa Jesus do parsaoran rap dohot angka siseanna ima marhite “Perjamuan Paskah” (ari raya mangan roti na so niasoman), ala mansai masihol do rohaNa tu angka siseanNa jala partingkian on do dipakke Tuhanta Jesus laho pasahathon na dibagasan rohaNa. Di tingki na mangan i do dipaboa Jesus paboa naeng dapot ma partingkian partinaonanNa i. Lapatanna, diboto Jesus do na naeng songgop nama sitaonon i tu Ibana. Andorang so sahat Ibana tu hamatean, nunga diboto paboa ngolu dohot angka panghobasionNa naeng sae ma di portibion jala ingkon marsirang dohot angka naung mangihuthon Ibana. Alai ndada holan i, diboto do tong paboa naeng ro ma Ibana gabe siparmonang. Di tingki na mangan i, dipasahat Jesus do angka pangajarion  na mansai porlu botoon ni angka sisean dohot sude angka na porsea taringot tu padan na binahenNa. Ditonahon do tu angka sisean na rap dohot Ibana asa manongtong patupahon Perjamuan Paskah laho marningot sitaonon na niadopanNa. Dipangke istilah anamnesis (Yunani) na marlapatan ingotma alai ingkon manongtong do parningotan i. Molo di buku Padan Na Robi, diajarhon do paboa adong do lapatanna molo marningot di angka sejarah. Songon bangso Israel na disuru Debata laho patupahon Ari Paskah, marningot sude angka pambahenan ni Debata naung paluahon nasida sian parhatobanon Misir. Jala sahat nuaeng on, dipatupa nasida do ulaon na mansai bersejarah on. Tangkas do taboto paboa sitaonon na dokdok na niadopan ni Jesus sudena i laho patulushon sangkap ni Debata taringot tu haluaon. Ido umbahen dipatupa halak Kristen do Parpadanan Na Badia ima laho paingothon sude angka na porsea taringot tu sangkap ni Debata na mansai uli jala denggan pasahathon haluaon tu jolma manisia. Ido inti ni pangajarion ni halak Kristen ima haluoan dohot padan haroro ni Tuhan Jesus na paduahalion.

Ari Paskah marlapatan situtu do di halak Kristen paboa naung manjalo haluaon sian Debata marhite-hite Jesus Kristus naung mate di hau pinorsilang i. Di ayat 19 – 20 on ma songon cara ni naung ditotophon Tuhan Jesus laho marningot Ibana, marningot di haluaon naung pinatupaNa huhut paluahon jolma sian hagiot ni dosa tu hangoluan na saleleng ni lelengna. Roti ima gombaran ni dagingNa, jala anggur ima gombaran ni mudarNa. Di borngin i dipatupa Tuhan Jesus do perjamuan rap mangan dohot siseanNa. Dihindat Ibana ma roti, dipasupasu ma dungi diponggoli laos diparlehon ma i tu angka siseanNa huhut didok “Dagingku do on, na nilehon humongkop hamu; ula hamu ma i, bahen parningotan di Ahu!”. Roti i ma na gabe gombaran ni daging ni Kristus na ingkon mate. Songon i nang anggur dilehon tu angka siseanNa huhut didok “Ia panginuman on, padan na imbaru do i, marhite-hite mudarhu, na durus humongkop hamu!”. Anggur i ma songon gombaran ni mudarNa na durus di dolok Golgata laho paluahon hita angka pardosa. Marhite na manganhon dohot manginum di ulaon na badia, saluhut dosanta diburi Tuhan Jesus, taruli hita di haluaon gabe mardame hita dohot Debata jala marhite i ma hita na gabe partohap di hangoluan na saleleng ni lelengna i naung pinaradeNa di surgo hasonangan i.

 

III.       HAHONAAN

Molo marningot hita di haluaon na pinatupa ni Debata marhite-hite Jesus Kristus, sasintongna ingkon mangolu do hita dibagasan hasintonganNa. Tarlumobi ala panghophopion ni Jesus Kristus naung paluahon hita. Di parningotan Kamis Putih on, ima marningot borngin na parpudi mandapothon tingki ari partinaonan ni Tuhan Jesus. Dipatupa Jesus do rap mangan dohot rap minum dohot angka siseanNa. Naeng ma tangkas di hita, panghophopion ni Kristus do na mambahen haluaonta. Sasintongna nunga mardosa saluhutna jolma alani dosa ni na parjolo i jala ndang adong jolma na tuk paluahon dirina sandiri sian hadosaonna. Ido umbahen asa ro Tuhan Jesus Kristus tu portibion. Alani ma ringkot do sasintongna hita marningot di angka ulaon naung dipatupa Tuhan Jesus humophop hita. Angka naung manjalo haluaon sian Debata ingkon mardalan do dibagasan haporseaon tu Debata marhite Jesus Kristus jala ingkon manongtong do marningot di angka panaritaon dohot sitaonon ni Tuhan Jesus Kristus di sude ngulmit ni parngoluon on. Hita naung dohot mamparsaulihon panghophopion ni Tuhanta Jesus ingkon do patuduhon ngolu na imbaru na hombar tu hataNa nang lomo ni rohaNa. Ala panghophopion ni Jesus Kristus naung paluahon angka jolma manisia, tama do sude naung manjalo haluaon i satia jala unduk di na laho paimahon haroroNa na paduahalion.