MINGGU PASKAH I 9 APRIL 2023 Evangelium Kolose 3 : 1-4
Dipahehe Rap Dohot Kristus
Selamat
Paskah ma dihita saluhut na ! Hamu angka dongan na
hinaholongan tarlumobi dohot natinobus ni Tuhanta Jesus Kristus. Tapuji ma
Tuhanta naung paloashon ngolunta marlas ni roha sahat tu sadarion, tarlumobi
manghalashon Pesta Hamonangan ni Tuhan Jesus Kristus i ma na ginoaran “Pesta
Paskah”. Tung tangkas do di endeta i na mandok “Haleluya,Haleluya, nunga
hehe Jesus I, Haleluya, Haleluya, nunga hehe Jesus i”. On do pos ni rohanta
jala gabe unok ni haporseaon ni sude halak Kristen di portibion unang ragu jala
sangsi hita taringot tu Haheheon ni Kristus Jesus i. Ai didok Hata ni Tuhanta
marhite panindangion ni Apostel Paulus di 1 Koristus 15 : 14,17 “Ai anggo so
hehe Kristus sian angka na mate, rumar ma jamitanami, laos rumar ma nang
haporseaonmuna. Alai
anggo so dipahehe Kristus i, magopo ma haporseaonmuna, jala tong dope hamu di
bagasan dosamuna” Asa ingkon halashononta marhite na mandok mauliate tu Jahowa
ai taruli hita di haluaon na so tarasam dohot tartuhor hita i, holan alani
basabasa dohot asi ni rohana tu hita jolma pardosa on. On ma las ni rohanta di
naung sahat tu hita, huriaNa sadarion paborhathon hita anggiat sude mananda
dohot manghatindanghon huaso dohot haheheonNa i. Marojahan tu haheheon ni
Tuhanta Jesus Kristus na ta halashon/tapestahon parningotan sadari on, i do dasar
dohot panghirimon ta di na gabe dohot hita siihuthon Jesus Kristus, laos on do
nang ojahan di haporseaon ni halak Kristen taringot tu haheheon ni angka
donganta naung mate.
1. Peristiwa
haheheon ni Tuhan Jesus Kristus i ma peristiwa kemenangan na luar biasa, na so
tarpingkiri jolma, na so hambatan ni portibion huaso dohot sangkap ni Debata.
Ndang peristiwa dongeng, turi turian, cerita rakyat manang ilusi bayang-bayang.
Alai sada fakta hal na nyata do di portibion, i do umbahen ma tarhalongang
angka parompuan dohot sisean i, dung sabbat i marnida na masa i ala ndang di
tanoman i be Jesus, batu na mangalangkopi baba ni kuburan i nunga (guling) (Mat
28 :1 -10 ; Mark 16 : 1-8 ; Luk 24 : 1 -12 ; Joh 20 : 1-18). Maol do siat tu
roha ni nasida atik pe tagan di ngolu ni panghobasion ni Tuhan Jesus nunga sai
di lumbahon ne hehe do Ibana di ari patoluhon (Joh 11:25-26 ; Mark 8 :31 ; 9 :
31 ; 10 :33-34) sahat tu na manaek tu banua ginjang paradehon naung di angka na porsea di Ibana. Na ringkot
sibotoonta paboa peristiwa haheheon i do ndang ulaon namasa secara kebetulan
manang peristiwa na mendadak i alai sada ulaon naung ditahi/dipersiaphon
Tuhanta sandiri hombar tu sangkapNa.
2. Hamu
angka dongan angka dongan nahinaholongan ni Tuhan Jesus Kristus !
Huria kollose i ma sada kota di Asia na metmet di Timur ni Efesus. Kota Efesus
di hatihai gabe sada ibukota Provinsi di Asia na metmet (Asia Kecil), didok ma
i Turki si nuaeng. Masuk tu gomgoman ni huaso bangso Roma do ujui.
Mangihuthon
sejarah, ndada Apostel Paulus na panjongjong huria on, alai nang pe songon i di
patuduhon ibana do tanggungjawab moralna marhite na paborhathon angka donganna
lao pauliulihon haporseaon ni huria i (1 :7 ; 4:12-13 ).
Tongon
di hurungan do si Paulus manongos suraton. Di pangkulingi ibana do ruas ni
Kollose dalan patubuhon, huhut patoguhon haporseaon ni huria mangadopi sumbia
ni angka hamaolon, galumbang na mangontak na naeng mangharomhon haporseaon ni
huria i, atik pe dang lupa si Paulus marningot las ni roha huria i ala
marparbue do haporseaon ni nasida jala mangerbang do huriaon na gabe songon
pamatang ni Kristus ( 1:3-4), atik pe mansai gogo do ajaran ajaran sesat i
manegai haporseaon ni huria i asa manadingkon haposeaon sian Tuhanta Jesus
Kristus. Di ancaman na songon I ma diarahon si Paulus huria Kolosse ingkon do naeng tangkas marurat jala togu
marhaporseaon tu Jesus Kristus huhut jamot, jaga di sude angka na naeng mangagohon
na porsea i (2 : 7 – 8).
3. Hamu
angka dongan sahaporseaon! Marhite turpuk ni
jamita on di paingot si Paulus huria Kollose songoni dohot hita halak Kristen
tarlumobi ma halak angka naung mananda haheheon ni Jesus Kristus marhite Thema
ni minggu ta sadarion “Dipahehe Rap Dohot Kristus”.
3.1. Manjalahi
na di ginjang I (ayat 1-2).
Aha/ angka dia do nanidok
ni Apostel Paulus na di ginjang i. Boha na so ringkot be di hita na di tano on ?
Hape hita mangolu di tano on dope. Molo di pangido hita manjalahi na di ginjang
na nidok na mangula ulaon na tau lomo ni roha ni Debata, tapasaut ma sangkap ni
Debata marhite ngolu dohot ulaonta (Mateus 6 : 33). Sebalik na angka na di tano
on ima angka ulaon hagiot ni portibi, na maralo tu ulaon ni Debata. Asa molo
didok angka na di ginjang i ma
lului/jalahi hamu, marlapatan do i naeng pangkeon ta do angka na ditano on,
manang na adong di hita laho pasauthon sangkap tu lomo ni roha ni Debata. Unang
tapangke na adong di hita laho pasombu tagas, sangkap sangkap dohot hagiot ni
portibion. Nunga di tobus Tuhanta hita, di palua sian dosa,huaso ni sibolis lumobi
sian uhum hamatean alani ndang gabe sai mangadop/mangoloi tu portibion be hita.
Ingkon tu Tuhanta Jesus i na ma na maringanan di banua ginjang, di siamun ni
Debata.
3.2. Taparangehon
ma Parange na imbaru(Ayat 3).
Ingkon balongkon do
saluhut angka jolma na buruk rap dohot parulaon na roa i, alai ingkon ihut do
solukhononta jolma na imbaru, songon pandohan ni Apostel Paulus di 2 korintus 5
: 17 na mandok “Asa molo dibagasan Kristus halak, na tinompa na imbaru ma i.
Nunga salpu pangalaho na robi, gabe na imbaru. Angka pangalaho na robi i ndang
sai paianon be, unang be sai mangadop tu daging, molo sai marparange tu daging
hita, mate ma. Alai molo ta pamate ulaon ni pamatang marhite tondi mangolu ma
hita (Roma 6 :6 ; 8 : 12-13 ; Efesus 4 : 22-24). Dung dibunu, balongkononta ma
muse ima rimas,muruk,hajahaton,panginsahion dohot hata barangsi ro di pangalaho
na marsigabusan (ayat 5-8 ; Roma 6 : 2).
3.3. Na
mardalan do hita di portibion alai huhut paimahon hasangaponna (ayat 4).
Nunga mangolu hita nuaeng
di bagasan haheheon ni Tuhanta Jesus Kristus. Ta parhatopot do nunga mate,
nunga hehe, jala manaek Tuhanta Jesus Kristus tu banua ginjang jala hundul do
nuaeng Ibana di siamun ni Debata Ama i. Tahaporsea i do nunga mate hita di
bagasan hamatean na i, jala nunga hehe hita dibagasan haheheon na i jala huhut
nunga di panaek hita marhitehite hananaek na i. Ala ni i si ingoton ni Rohanta
na gabe kontrol ni ngolunta on holan sian banua ginjang do, i ma Jesus naung
hehe i. Molo manaek Tuhanta Jesus tu banua ginjang berarti ndada ditadingkon
boti hita di hasiangan o. Alai na mandok/pabotohon do i tu hita ia Tuhanta
Jesus nunga morot jala humusor ibana sian pangalaho hajolmaonNa mulak tu
hamuliaonNa (dari kemanusiaanNya Kembali ke IlahianNya).
Hamu angka dongan naung tinobus ni holong ni
Tuhanta Jesus Kristus ! Ala naung di tobus
holong ni Tuhanta do hita sian gomgoman ni dosa,sibolis tarlobi hamatean i,
jala mian di portibion dope hita huhut di bagasan pardalanan do hita nuaeng
manopot surgo, inganan naung pinarade Tuhanta Jesus, ima hasonangan
sisaleleng-lelengna. Tusi do mata haporseaon/partondionta di jou, diarahon tu
saluhut angka na porsea i. So tung lilian, lalapan hita di angka tawaran
haulion na ro sian portibion, so tung talu/tartading hita hinorhon angka hisap
hisap dohot godaan angka na ro sian portibi on. Ingkon hamonanghononta do i
sude marhite na lam pahibulon ngolu dohot parsaoran Rap dohot Tuhan i. Jaminan
dilehon Tuhanta tu angka na porsea ingkon monang do hita, ai Tuhanta Jesus
Kristus i pe si Parmonang do. Taingot ma
huhut na ingkon sude do hita mamolus hamatean alai ndang hamatean ujung ni
ngolu ni halak Kristen, angka na porsea ala adong do hape haheheon dohot
haluaon di angka na manghangoluhon hamamate dohot haheheon ni Tuhanta Jesus.
Taingot ma Debata do haroroan jala marhapatean tu Ibana do sude jolma/ngolunta
on. Pareahi ma i rap dohot Tuhanta. Amen.
