MINGGU QUASIMODOGENITI 16 APRIL 2023 Evangelium : Hesekiel 36 : 22 – 27

 Ditubuhon Paduahalihon Marhite Hata Ni Debata

I. Patujolo

Hesekiel marharoroan sian hata heber yekhezqe’l namarlapatan Debata na mampargogoi. Hesekiel sandiri anak ni sahalak malim na tading jala manghobasi di Jerusalem (1:3). Hesekiel dohot do tarbuang tu Babel rap dohot panurirang Daniel (Dan 9:2). Di Babel, Hesekiel ditanda natorop jolma ni Debata na manurirangi (14:14, 28:3), jala mangoli do si Hesekiel songon halak Jahudi na asing na di habuangan na maringanan di topi sunge Kebar (1:1, 3:15-24, bnd. Psal 137:1). Jala panjouonna gabe panurirang dijalo ibana ditano habuangan Babel di sunge kebar. Buku Hesekiel marisi 48 bindu jala adong 1273 ayatna, diperkirahon digurithon hira-hira taon 590-570 sM di Jehuda dohot di Babel. Jala ondolan ni buku Hesekiel ima: Panguhuman jala hamuliaon ni Debata, rimas jala holong ni Debata. 

II.        Hatorangan Ni Turpuk

Turpuk jamita on paboahon situasi ni bangso Israel hatiha tarbuang di Babel ima   adong pangalapation na lilu di bangso Israel, di na mangarajumi angka na masa di nasida. Sai dietong halak Israel do siala ni nasida do Debata marpangulahi di angka hajahaton nasida, manang nasida do tolak ukur ni Debata di na marpangulahi di hajahaton nasida. Alanii Ro ma hata ni Debata marhite-hite panurirang Hesekiel laho patigorhoni, didok Debata dihata Heber : קָדֶשיאׅם־לְשֵם (qodes le-shemim, my holly for name sake) namarlapatan: Alani habadiaon ni goarNa do Debata patupahon pambahenanNa i. Diramuni Israel do goar ni Debata di tonga-tonga ni angka bangso parbegu. Dihata heber diramuni di pangke hata חׅלַלְתֶם (hillaltem, profane) namarlapatan dipangke goar ni Tuhan i tu angka pangalaho manang kepentingan sekularisasi, manang haportibion, hisap manang hagiot haportibion. Isarana: Hisap ni portibion do tujuanna, alai dipangke goar ni Debata asa porsea halak jala boi dapot hagiot ni dagingna i. Artina asa tarrimas pe Debata tu bangsoNa, dalan ni Debata do i laho pabadiahon (Ibr: qodesh) goarNa na sun timbuli, naung diramuni halak Israel ditonga-tonga ni bangso parbegu. Asa molo nunga diparbadiai Debata goarNa mulak ma muse roha ni Debata tu bangsoNai laho paturehon bangsoNai muse. Molo tarimangi turpuk on, torang ma dihita bawasanna tarorom Tuhani dope rimasNa molo diangka hahuranganta alai baliksa rimas do Tuhan i molo taramuni goarNa diadopan ni bangso-bangso parbegu (Ay.6). Molo taulahon mangaramuni goar ni Debata, marhitehite mamangke goarNa tu dalan na so patut, dang tarorom Debata rimasNa, sandok ingkon ro panguhumanNa. Jala rimas ni Tuhan i pe ndada holan pasombu murukNa sambing, sai hira jolma molo nunga tarrimas olo gelap mata. Alai dibagasan rimas ni Tuhani, sada dalan doi tong laho mangurasi dosa ni bangsoNai, asa marpangulahi muse roha ni Debata laho patureturehon bangsoNa na tangkang marrohai. Sada sitiruon do on tu hita jolma, asa nasa murukta unang ma holan laho papuas mohop ni roha, alai ingkon adong do tong unsur edukasi dibagasan muruktai. Jala molo   nunga muruk hita unang ma torus ngotngot ate-atei, ingkon adong do tong roha marpangulahi songon na binahen Debata tu hita jolma, ima : Dung salpu murukNa i tu bangsoNa natangkangi, diurasi ma bangsoNai, dipaluhut jala boanon ni Debata muse mulak bangsoNa i tu tanona.

Diturpuk on dipaboa Debata do, marhite-hite aek na tio do urason ni Debata bangsoNa na tangkangi, na jotjot madabu tu dosa ni ganaganaan. Dihata Heber mandok aek na tio dipangke hata מַיׅםטְהוֺים (mayim te howrim, the water clean) na marlapatan aek diparbadia siala dibagasan aek i mian goar ni Debata sun badia jala timbul, asai do aek na tio patoranghon aek pandidion i, asa nasa na dididi dibagasan aek pandidion dibagasan goar ni Debata Ama, Anak dohot Tondi Porbadia, nunga diurasi jala dipaias Debata do ibana sian angka dosana. Jala nasa naung diurasi marhite aek pandidion i dapotan roha na imbaru manang tondi na imbaru, molo dihata Heber dipangke hata חְַדָשָהלֵב(lebhadasah, the new heart) dohot ְַדָשָהדוּחַ(ruachchadash, the new spirit). Roha manang tondi na imbaru, marlapatan ma i angka parbue ni Tondi Porbadia na pinatorang ni apostel Paulus dibagasan Galatia 5:22-23. Jala dipaondol turpuk on muse, molo nunga mian Tondi i dibagasan jolmai, jala diparbuehon jolma angka parbue ni Tondi i dibagasan ngoluna, disi ma tarbahen jolma i laho mangaradoti manang patupahaon angka uhum dohot patik ni Debata. Dihata Heber hata mangaradoti di pangke hata תּשְֺמְדוּ  (tismeru) manang hata שָֹמַד (shamar) namarlapatan :you will keep, diingot, dipeop, dihangoluhon. Astuanna, molo didok diradoti berarti nunga dimudarhon, dihosahon, dipardaginghon be uhum dohot patik ni Tuhani.

III.       Hahonaan Ni Jamita

Goar ni minggunta sadarion ima quasimodogeniti na marharoroan sian bahasa Latin namarlapatan songon poso-poso na imbaru tubu, nauasan jala marsigantung sian susu na tama sian natorasna. Songoni ma hita angka na porsea, sai songon poso-poso ma hita diadopan ni Debata, nauasan di hata ni Debata, jala na marsigantung tu si ma ngolunta angka na porsea. Hombar tu ojahan minggu: Ditubuhon paduahalihon marhite hata ni Debata. Ise do hata ni Debata na dimaksud? Molo ta parateatehon dibagasan Johanes 1 : 1 + 14 dihata gorik didok : Έν αρχηην ό Λόγος καί ό Λόγοςην πρόςτον Θεον καί Θεοςην ό Λόγος. Καί όΛόγος σαρξέγενετοκαίέσκήνωσενένή μίνκαίέθάσσμεθα τήνδόεαν αυτούδόεανώζμονογενοϋζ παρα ΠατροςΠλήρηζ χαριτοςκαίάληθειας (en arche enho Logos kai ho Logos en pros ton Theon kai Theos enho Logos. Kai ho Logos sarxegeneto kai eskenosenen hemin kai etheasametha ten doxanautoudoxanhos monogenous para Patrosplerescharitos kai alethias) namarlapatan : Dimulana i nunga adong Hata i jala saor tu Debata do Hata i jala Debata do Hatai. Gabe daging ma Hata i jala maringan di tonga-tonga ni hita on, jadi huida hami ma hasangaponNa ima hasangapon ni Anak sasada na sian Amai, gok asi ni roha dohot hasintongan. Artina Jesus do nanidokna hata ni Debata i na tolap patubuhon jolma pardosai paduahalihon. Jala tubu paduahalihon na dimaksud ima songon dia hita sahat tu hambuaon ni roha na sintong dung tajalo pangurasan na sian Debata marhitehite aek pandidion dohot pandidion parohaion marhite-hite Tondi Porbadia. Amen.