khotbah Minggu III Dung Trinitatis, 16 Juni 2024

Mangolu Di Bagasan Haporseaon Ndada Di Bagasan Na Marnida

Hidup Karena Percaya, Bukan Karena Melihat

2 Korint 5: 6-10

1.      Patujolo

Digoar do Surat 2 Korint on surat iluilu, ala godangan isina taringot tu angka parsorion ni Apostel Paulus songon naposo ni Debata mamaritahon Barita Nauli ni Kristus, haluaon i. Ndada holan penderitaan fisik (loja, mangkar, male, hurangan, sahit, dna) alai apala na umborat ima penderitaan psikis, berupa teror mental, isarani isu-isu na pinararat ni angka halak na so manghalomohon ibana, marhite na mansoadahon haapostelonna dohot angka poda nang ajaranna pe. Alai digodang ni parsorion i tangkas do ibana mandapot asiasi, gogo dohot pangapulon sian Debata (2 Korint 1: 4, 5), huhut laos diangkat ibana ma pengalaman hidupna i di surat 2 Korint on bahen jamita apulapul dohot patoguhon roha ni ruas dohot parhalado ni huria tingki mangadopi parungkilon haporseaon di portibi on. Hata apulapul i do nang na tangkas tarida di turpuk 2 Korint 5: 6 – 10 on i ma na manogihon tu panghirimon ni halak Kristen asa unang mandele uju mangadopi sitanonon ala adong do inganan hasonangan naung diparade Tuhan i di angka na porsea tu Ibana.

 

2.      Hatorangan

Di jolo ni turpuk on (ay.1-5) dihatahon si Paulus do taringot tu panghirimon ni halak Kristen paboa di balik ni sitaonon di portibi on nuaeng, adong do diparade Debata inganan na hot saleleng ni lelengna di banuaginjang, bagas na so pinauli tangan ni jolma, na gabe sambulo ni tondinta. Andorang di ngolu hasiangan on (parlapelapean), mangae na porsuk, marhoi jala sorat do hita siala parungkilon haporseaon, alai unang ma mandele baliksa ingkon dionjar haporsuhon ma nian rohanta gabe sai masihol tu inganan na sonang di surgo i. Panghirimon na pasti do on ala Debata na tahaporseai i do na parade inganan i, laos Ibana do nang na patauhon hita bongot tusi, jala nunga dilehon Tondi Porbadia na gabe patujolona (ayat 5), ai dibagasan Tondi i do hita managam hatigoran sihirimon i (pat.Gal.5:5). 

 

Ndang adong ganggu ni roha ni si Paulus nanggo saotik pe taringot tu inganan sihirimon i, alai pos situtu do rohana mameop i atik pe maringanan dibagasan daging dohot mian di hasiangan on dope nuaeng na holang/dao sian inganan ni Tuhan i (surgo). Panghirimon na pasti na songon i do pinarbuehon ni haporseaon i di diri ni angka naporsea, songon na nidokna di ayat 7 i: “ai dibagasan haporseaon do hami, ndada dope di bagasan na marnida”. Hombar do on tu natarsurat di Heber 11: 1 “Alai anggo haporseaon i pos ni roha do i di angka sihirimon, jala pamotoan na tontu taringot tu na so niida”. Jadi memang, ndang diida mata dope surgo i alai tangkas do i diida rohanta, diida mata ni haporseaonta na adong do inganan i jala bongotanta do i muse di tingki halehetanna marguru tu lomo ni roha ni Debata.

 

Pos ni roha di panghirimon na songon on patubuhon di ngolu ni halak na porsea i manang piga-piga hal, i ma: parjolo, las ni roha bungkas sian daging on laho maringanan di Tuhan i (ay.8). Pandohan “bungkas” on boi do i bermakna hamatean. Somalna hamatean tarajumi do i sitaonon na mambahen hita tumatangis, holsoan jala mabiar. I do umbahen gabe ringkot pangapulion dohot singotsingot patoguhon. Alai ala torang do dihaporseai rohanta na bongot tu inganan ni Tuhan i do angka naung monding i gabe las ni roha do i rajuman, songon panghilalaan ni si Paulus dison. Hombar do nang on tu na hinatahon ni si Paulus di Pilippi 1:21 “Ai Kristus do hangoluan di ahu, jala laba nang hamatean”. On do sada hebat ni haporseaon i, boi do dijalo paruntungan sian na dietong harugian hian; jala boi do diida parsaoran na manontong dohot Tuhan i nang pe masa hamatean, ai ndang parsirangan panghorhonna alai justru lam ngolu na lam menyatu rap dohot Tuhan i do, umbahen na di surathon Paulus: ”Ai gomos do ditiop rohangku, dang tarbahen sirang hita sian holong n iroha ni Debata na di bagasan Kristus Jesus Tuhanta i: manang bahenon ni hamatean, manang hangoluan….d.u” (Rom.8:38). Apalagi molo marningot hinauli dohot sonangna ngolu na rap mian dohot Tuhan i tontu lasan do rohanta bungkas sian portibi on.

 

Paduahon, mangaringkoti naeng gabe halomoan ni roha ni Debata (ay.9). Semangat marparange dohot mangulahon na denggan do na dimaksudna dison. Saurdot cita-cita dohot pambahenan; unang roha sai naeng tu surgo alai pangalaho sai holan haportibion (duniawi). Marparange nabadia i do sada apala na rumingkot parangehononta ala nabadia do Debata. Habadiaon porlu situtu jamothononta justru ala tongon di pardalanan dope hita nuaeng, mangolu di bagasan daging di portibi on, na tontu mansai godang na boi mangela rohanta asa manimbil sian lomo ni roha ni Debata. Dung i, di pangulaon si ganup ari pe tong ma ingkon marsitutu hita mangulahon na tau lomo ni roha ni Debata, songon na nidokna di Kolose 3: 23 “Sian rohamuna ma ula hamu nasa siulaonmuna; songon na tu Tuhan i ndada tu jolma”.

 

3.      Sipahusorhusoron

Sude na hinatahon di ginjang ondeng ringkot ala pertanggungjawabhononta do sogot saluhut pambahenanta di ari paruhuman i, tangkasna di ayat 10 disurathon Paulus songon on: “Ai ingkon gabe patar be do hita saluhutna sogot di jolo ni habangsa paruhuman ni Kristus, asa dijalo be hombar tu na niulana tagan di pardagingon, manang na denggan, manang na roa”. Jadi taulahon ma ulaonta saleleng mangolu di bagasan biar maradophon Jahowa, ala ndang adong na holip sian parnidaanNa. Jotjot hita mambiar tu jolma do atik adong marnida manang mamboto tingki naeng mangula na jat hita, molo ndang adong na marnida gabe holip ma i jala tadok aman. Hape adong do Tuhan na marnida saluhutna i jala di ari paruhuman sogot i papatarponNa do nasa na taula: na denggan manang na roa pe. Nian, ndang didok dison ulaon na denggan manang ulaon na roa i ma na menentukan upa sijaloonta haduan manang tu surgo hita manang tu naroko, ala na pasti adong do ari paruhuman sogot, disi ma pertanggungjawabhononta sude na taula saleleng mangolu hita di hasiangan on. Molo tasadari on, tontu naeng ma lam gumirgir rohanta mangulahon na denggan i jala sai tapasiding angka na roa, ai ndang diparede Debata hita bahen siuhumon alai naeng paluaonNa hita tahe bahen panean hangoluan saleleng ni lelengna di inganan na manongtong, surgo hasonangan i. Amen.